“Kumuziyil Nzamb” Chikumangan cha Distrik cha Atuman a Yehova cha 2005
1 Mud Mulej wetu Mujim, Yehova Nzamb urijekin mulong wetwetu kukumangan chakwel atufundisha mu jinjil jend. (Is. 30:20, 21; 54:13) Ukat kusal mwamu kusutil ku chisak cha kashalapol ushinshamena ni kubabal, chikata kurijek yikumangan mud yikumangan yetu ya distrik ya muvu. (Mat. 24:45-47) Yovil yetu yidi mud ya mwin kuseng David, wawanga anch: “Pakach pa yisak yikumangena nikez kumuyukish Yehova.” (Kus. 26:12, NW) David wova kurumburik kwa usey wa kwikal ufundishinau kud Yehova ni wakwata mupak wa kwikal pakach pa antu End chisu chawonsu chikumangenau pamwing.
2 Ov ukwikal “pakach pa yisak yikumangena” yikukumangana ku Chikumangan cha Distrik “Kumuziyil Nzamb” muvu unou? Anch mwawiy, rusangu rilondwila er rikwikal ra ukwash mu kwirijek kwey mulong wa kukumangan.
3 Tenchik Katat Chakwel Kukumangan Dichuku ni Dichuku: “Yitongijok ya mwin mushiku ya kusal yom yishikin ku kupit.” (Jinsw. 21:5) Ov mazu minam makasikeshidinap usey wa kwirijek pakad kulabijok mulong wa kuya ku chikumangan? Chakwel kushinshik anch ukuburenap dikasikesh ap dimwing dia program wa muspiritu, nich manangu sambish katat kusal yitenchik yin yawonsu yiswiridina mulong weyey kukumangan machuku mawonsu masatu. Anch ukimbin kwit konje kud mukurump wey, it katat. Anch uswiridin kwisambin yitenchik yey ni mwin nkwey wakad kwikal mwin kwitiy, kangal wachingel kushik pa chisu cha kwinsudiel. Yikalap nchik yikokujol yawonsu usankena, yiteka mu malembil mey kud Yehova, nich kuchingej ukwash wend “yitongijok yey ya kusal chom yikez kuwanyin.” (Jinsw. 16:3) Chikwau kand, chikwikal chiwamp kuyikwash in kwilej Bibil ey mu kwirijek kwau chakwel akikala ku yikunku yawonsu.
4 Jindond ja Kulal: Ndond ja kulal ku musumb kusadikidina chikumangan yisu yivud jidi mu yikumbu yayen (yikumbu ya akadivar), mu Yot ya Want ap ku yid ya dijuku. Dipang dia jindond jawonsu ja chikumangan akudilimik ku tablo wa jinsangu ja chikumangen kupwa kwa kushinshikin wenjil winou ku Chikumangan cha Mudimu. Chiyul chidi anch awonsu ashinshikin mu malembil ku chikumangan ik kukukumanganau mu 2005. Anch usotil ndond ya kulal mu chikumbu chayen (cha mukadivar), ap mu Chot cha Want, tuyudil anch kalam wa ujindj asala dipang kurutu kwa chisu dia in kulejan asotila ndond ya kulal ni kuditum ku Departema wa Kuladikan ku musumb ukusadikina chikumangan. Ufanyidin kulejan dijin, muntu ikundj anch mband, mivu, kuvarikan mu dijuku. Chinech chikuyinkish akadivar akweta chisend mu Departema wa Kuladikan chisu cha kukimb ndond ja kulal mulong wa awonsu. Komite wa Mudimu wa Chikumangen ufanyidin kushinshikin yaku ya in kulejan kurutu kwa kutum kwit kwinoku ku Departema wa Kuladikan. Anch atwinkish ndond, chikutwishap kwikal chiwamp kwovijan ku ujindj mulong wa kushakam kand ni mukadivar mukwau ap ni murund. Chinech chikutwish kuvundangesh yom mulong wa akadivar akweta chisend cha Departema wa Kuladikan. Pakwez, anch muntu watong kushakam mu chirung cha chikumangan mu dijuku dia mukadivar nend wakad kwikal mukadivar muspiritu, ndiy kafanyidinap kupan dijin ni kuditumin pa fomu wa Kwit Kapalikany ka kulal.
5 Kulal mu Chot cha Want: Tukat kulejan pinap yany kanang pa mutapu wa kusadil Jindond mu Chot cha Want. Komite wa Chikumangan cha Distrik ukutond mukurump ukutakela ditenchik dined. Ukwikal ni nkwash, nakash mukurump mukwau ap nkwash wa mudimu uwanyidina muspiritu. Chot afanyidin kuchangan mu yikunku yaad. Chikunku chimwing mulong wa anambaz nau an au akemp, nau ayangadim. Chikunku chikwau mulong wa akadivar ni an akwau amakundj. Chot cha Want chifanyidin kuchisadil mulong wa kulal kusu. Dichuku didiau awonsu kwi ndond ya chikumangan, kukwikal kutenchik chakwel kwikala atulam akuswinkanijana mulong wa kwipuk kwiy yom ya antu. Atulam akusadilau afanyidin kwikal akadivar a muspiritu, akashinsh. Chifanyidinap kwisukin yakudia mu Chot cha Want. Akutwish kutung kapish mu rupang kakusadilau mud ndond ya kwisukin mu chirung cha chikumangan kusu. Kupwa kwa chikumangan, akez kukawupul. Chidi cha usey kulam chot pamwing ni rupang yinangina ni pakad kanvundangesh. Chifanyidin kutal anch kangal ayipish chom ap chimwing. Antu ashichamu afanyidin kusal usu wau wawonsu wa kumekesh mwikadil ufanyidina wa in Kristu akin umwing ni mukwau pamwing kand ni amutej nau.—1 Kor. 10:31.
6 Maswir ma Pakampwil: Mupostol Paul warumburila anch akadivar amwing adi mud ‘ukwash ukata kukasikesh’ kud ndiy. (Kol. 4:7-11) Umwing wa mitapu ya ukwash wapanau wadinga kusutil ku kumukwash Paul mulong wa maswir mend ma pakampwil. Ov mutapu ik ukutwisha kwikal ‘ukwash ukata kukasikesh’ kud akwen mu yom yitadila chikumangan? In kulejan amapal, ayilim, adia mu mudimu wa chisu chawonsu, ni akwau akutwish kuswiriken ukwash mulong wa kwend, ap wa ndond ya kulal. Anamakwau akwet chakusambish chisend cha kuyilam antu inay. (1 Tim. 5:4) Pakwez, anch katwishinap kusal mwamu, ambay akaritiy akutwish kuyikwash. (Jak. 1:27) Atulam a dilejan dia buku afanyidin kutal mu chirund chau anany akweta maswir ma pakampwil chakwel kwijik anch irijekin nawamp kurutu kwa chisu mulong wa chikumangan.
7 Kukumangan ku Chikumangan Chindjing: Kushinshik anch kudi ndond ya kushakam, mikand, tupalikany twa kulal yiwanyidina, ni yikwau, in kulejan ayikasikeshin kuya ku chikumangan chitondinau mulong wa chikumangen chau. Anch mikadil yitin anch ukumangana ku chikumangan chindjing, mumana amboku kalam wa ujindj wa chikumangen chey.
8 In Kusal Mudimu wa Kwisotil Aswiridikin: Yesu washa chilikej chiwanyidina mu kwikal wikepishina ku maswir ma akwau. (Lu. 9:12-17; Yoh. 13:5, 14-16) Antu akata kwisotil kusal mudimu ku yikumangan amekeshin spiritu wa chilik chimwing. Chakwel kuwanyish maswir ma madepartema ma chikumangan, Komite wa Chikumangan wa ndond yiniya ukuyitazuk akwau kusal nau mudimu pamwing. Kudi kuswir nakash kwa amakurump kwipan ni kwitiyin yisend. Spiritu wau wa kwipan umekeshin chilikej chiwamp mulong wa awonsu mu chikumangen.—1 Pi. 5:2, 3.
9 Yamanau Antu Akwau: Mband umwing ukata kusadil ku otel walonda anch: “Udiany chisak cha antu tukatina nakash. Ukwetany chaku chiwamp mu kushalijan ni chisak chin chawonsu chikwau. In kulam yikumbu awonsu akat kushimunin mutapu wayisadilau nawamp ni mutapu watambulau kujikitish. Chakin, muntu ni muntu usotil kusal mudimu nsudiel ya rubing udianya kunoku!” Ikundj mukwau utadila otel warumburila anch: “Atuman a Yehova adi chisak chiswapela kusal nau mudimu pamwing.” Pamwing ap chaku chey chiwamp chiwejidin ku mazu minan. Tong musangar mud ik ufanyidinay kwikal nich Yehova pakatay kutuman tukat kusadil mu mutapu uletina kushiman mud kwinoku!—1 Pi. 2:12.
10 Kusutil “kashalapol wakin,” Yehova Nzamb warijekin kal chakwel antu end akumangan mulong wa mafundish ma mu spiritu muvu unou. (Lu. 12:42) Kwirijek mulong wa kukumangan machuku mawonsu masatu kukwit kusal usu, pakwez chikwikal cha ukwash nakash. Muvu unou Chikumangan cha Distrik “Kumuziyil Nzamb” chikukasikesh chakin kamu mupak wetu wa kumusadil Yehova kudiosh katat ni chikupu. El tukwatany mupak wa kulondul chiyul cha mwin kuseng chilondila anch: “Muyukishany Nzamb mu kukumangan.”—Kus. 68:26.
[Mutu wa mulong udia pa paj wa 3]
Program
[Mutu wa mulong udia pa paj wa 3]
Diakatan ni Diampos
9:30 pamanch - 5:05 urel
Diarubing
9:30 pamanch - 4:10 urel
[Mutu wa mulong udia pa paj wa 4]
Manans mamwing ma kushinshikin nich chitongijok cha kukumangan ku Chikumangan cha Distrik
1. Anch usotil kukas weny ulemp mulong wa kukumangan ku chikumangan, sambish kulam nfalang jifanyidina mulong wa weny wey ni dijuku diey, ni ja kuland nich yakudia.
2. Tongin kand kukwash yirijek ya chikumangan nich milambu yey ya kwisotil. ‘Kangal muntu ap kusu umwing kwez kurutu kwa Yehova makas a makas,’ pakwez ‘Mulimisha Yehova nich yom yey yawonsu ya usey.’—Kuv. 16:16; Jinsw. 3:9.
3. Chisu cha chikumangan, tukat kutumbish dijin dia Yehova kusutil ku mwikadil wetu uwamp ni kudjal maswin minangina ni mafanyidina.—1 Kor. 10:31.
4. Sadil mu kovijan pamwing nau in kukumangan ni akadivar akweta chisend cha kwandjik ni kushichik antu. Kangal wakwatin jindond chamwamu, ching kusu mulong wa yid ya dijuku diey ap antu wezina nau pamwing.
5. Mulong wa kwisakin sens yikunku ya kupwa kwa midi, diang yakudia yipipela kupwa kwa chikunku cha pamanch. Yakudia yivud ap yilimina yikutwish kuletish tul.—Lu. 8:18.
6. Kwinang kukat kumulimish Yehova. Kwinsudiel kwa chikunku ni chikunku, muntu ni muntu ukutwish kusal usu wa kusha jindond ja chikumangan jinangina mu kunonol mapaper ni yishoshot ni kuyidjibul mwi ndond yitekinau mulong wa yishoshot.—1 Pi. 1:15, 16.