Ov Tukweting Kalimish ka Yom Yitumbila?
1 Muntu ukutwish kutwipul anch tukweting kalimish ka yom yitumbila, tukwakul kapamp kamwing anch mwaning! Ov yitenchik ik yimwing yitumbila ya Nzamb yitukata kulimish?
2 Tumening nich usey ujim urund utukweta nend Tatukwetu wa mwiur! Utulejin chakin anch ‘ang twamusejin piswimp, chad niyend ukusej piswimp niyetwetu.’ (Jak. 4:8) Pakad yakupesh ya difut ya Yesu Kristu, kwikil muntu ap umwing wela kutambul mwom wa chikupu. (Yohan 3:16) Nich kujikitish kwa muchim utok, dichuku ni dichuku tukat kumujikitish nakash Nzamb mu malembil mulong wa chipan chinech chipandakena kuwap.
3 Dizu dia Nzamb dipepidilau, Baibel Utumbila, didi kand ditumbila kud etu, mud kamu mudia dirijek dia pa divu dia Yehova. Tumekeshining kujikitish kufanyidina mulong wa yitenchik yiney ya Nzamb pitulondwila yijidik ya Baibel mu mwom wetu, pitukasikeshina kunungijan kwa rukat ra ukadivar, pitulimishina nakash mbil ya uteokrasia, ni kusadil pamwing nau akadivar atakedila.—1 Pita 1:22.
4 Kusutin kashalapol wakin ni ubabela, tukat kutambul yakudia ya muspiritu yivud. Mwamu kamu chikwikala muvu unou ku Chikunguril cha Distrik “In Kusadil a Dizu dia Nzamb.” Tukutambulaku mafundish mamwing ma usey ni kwikal ni wimbay wa chirungil utukweta kamu nich kuswir nakash. Ov mutapu ik tukutwisha kumekesh kalimish ka kashinsh mulong wa ditenchik dined ditumbila?
5 Kangal Twadiul Chikumbu cha Yehova: Nehemi wayikasikesha antu adinga ni kusal mudimu ukash wa kutungiril mpwembu ja Yerusalem ‘kulik kudiul chikumbu cha Nzamb wau.’ (Neh. 10:39, NW) Nlel “chikumbu” cha Yehova yidi yitenchik yikwatinay mulong wa difukwil. Yikunguril yetu ya distrik yidi chikunku cha yitenchik yiney. Kangal twadiul ditenchik dined, tufanyidin kwikalaku ni kuta matu nakash, mwi njil yiney tukumulej Yehova anch tumen nich usey ujim yitenchik yend. ( Heb. 10:24, 25) Ov yom ik tukutwisha kutongin kusal kudiosh kamu katat chakwel kumekesh anch tulimishin chakin chinship chinech chitumbila?
6 Tukumanganany Machuku Mawonsu Masatu: Muntu ni muntu pakach petu uwapidil kwirijek chakwel kwikalaku machuku mawonsu masatu ma chikunguril. Ov utongidin kushik kurutu kwa muten dichuku ni dichuku ni kushal kushik ni ku dilembil dia nsudel Diarubing? Anch mwawiy, ukwikal ni yiyukish yivud. Kukumangan ku chikunguril kudingap chisu chin chawonsu kuswapela. Kurijek program wey wa midimu ya mujimbu kukutwish yisu yimwing kwit kujijaman. Mwa kwendil mudingap chisu chawonsu muwamp bwat. Pakwez kangal walik yom yiney yikuchirisha kwinyim mulong wa kuya ni kukumangan ku chikunguril.
7 Tushinshikinany Chilikej Chinech Chipandakena Kuwap: Chadingau ni kuya ku chikunguril cha distrik, chirund chimwing cha akadivar a mwi ngand yimwing ya Afrik mudia njit ya chisivil asankana chirund chimwing cha amasalay. Ayipula akadivar anch: “Udiany anany, ni uyilany kwisu?” Akula anch: “Tudi Atuman’a Yehova, ni tuyil ni kukumangan ku chikunguril cha distrik.” Umwing wa amasalay walonda anch: “En, Atuman’a Yehova ukwetanyap cha kwakam. Yangany kwen, ni ukutwishany kwen kusal chikunguril chen pakad mulong. Pakwez, ijikany anch ukusankanany amasalay avud. Wendilangany ching kamu mukachikach mwa njil! Anch wamanany antu avud akumangena dandamenany kwendil kamu mukachikach mwa njil!” Mwamu kamu mwasalau akadivar ni ashika nawamp ku chikunguril. Akadivar inay ayiyukisha mulong wa kalimish kamekeshau mulong wa yom yitumbila.
8 Mud kamu akadivar netu mu Afrik, niyetu tukwet kand milong yivud. Pakwez, tukutwish kwilikej ritiy rau ni kukwat chiyul cha kukumangan ku yikunku yawonsu ya chikunguril chetu cha distrik. Anch kudi kwipan kuswiridikina, tukarumukinany kud Yehova chakwel atutakela, ni kwijik anch ukez kuyukish usu wetu tusadila chakwel kukumangan ku chikunguril chawonsu.
9 Tutambulany Yiyukish: Tusotin nakash Dizu dia Nzamb, mulong twij anch kusutin dizu dined tukutwish kukul chakwel kutambul dipandish. (1 Pita 2:2) Kukumangan kwetu ku chikunguril cha distrik ni kutesh madiskur kukutukwash muntu ni muntu kutung ritiy rikash mu Dizu dia Nzamb, chad lel tukutwish kujijaman ku yoziu ya Satan. Anch tukakusal mwamu, tukumekesh kud Yehova ni awonsu atutadila anch tukwet kalimish kajim ka yom yitumbila ni “kitudiap a mu chisak cha antu akata kuchirik kwinyim . . . pakwez etu tudi a mu chisak cha antu akweta ritiy chakwel tupanda.” —Heb. 10:39; 12:16; Jnsw. 27:11.
10 Twijikany anch Yehova Nzamb ukufungul yis ya mwiur ni kuzizil padi etu ruval wa yiyukish yivud ya muspiritu. (Mal. 3:10, NW) Twitekinany rutong ra kwikal ku Chikunguril cha Distrik “In Kusadil a Dizu dia Nzamb” kudiosh kamu kwisambishil, Diakatan pamanch kushik ku dilembil dia nsudel ni “Amen!” Diarubing urel. Tukez kwinanap bwat!