‘Tusalany Yom Yetu Yawonsu Nich Rukat’

¹ “Tushimokin nakash pa kuman mutapu wen wa kurijek yom ni kuziyil. Chinech chifanyidin kamu kubazin ni kalimish.” Mwamu mwalonday mukurump umwing ukata kusal mudimu ku biro umwing wa ministère weza ni kukumangan ku chimwing cha yikunguril yetu ya distrik. Chitukasikeshin kutesh kubazin mud kwinoku mulong wa ngikadil yetu kurutu kwa antu. Chinech chimekeshin anch etu awonsu ‘tukakusal yom yawonsu nich rukat.’ (1 Kor. 16:14) Pakwez, kudi milong yimwing yinenganeshina yikutwisha kuyipish katumb ka antu a Nzamb anch tuyirijekinap.

² Tumekeshany Rukat Retu Nich Kusal Mudimu wa Kwikatin: Kusutish nawamp chikunguril kwengamidin nakash pa mutapu wa kwirijek. Chawiy lel twitina spiritu wen wa kwikatin mulong wa kusadil pamwing ni makomite ma yikunguril matondinau mu teritwar wen. Tusotin kuyijikitish awonsu ipanina mulong wa kutek ni kudiosh madepartema kushalijan ma chikunguril. Chakin anch kudi yivud ya kusal. Chisu chivud, tufanyidin kukomb kamu ndond jawonsu. Kufanyidin kwikal akadivar mulong wa kulam jindond tusadidila chikunguril. Pa chisu cha chikunguril, akwau afanyidin kutal milong ya kwinang kwa misalany.

³ Marapor tutambwila mu jindond jivud malejen anch kudi kusu akadivar nau anambaz akemp akata kwipan mulong wa kusal mudimu wa kwikatin mulong wa kurijek yikunguril. Amwing pakach pa akadivar inay akata kwitiy kuusal, akat kwitang anch Sosait ayifuta nfalang ni kuyidish. Akwau akat kupanang yom ya kukwash nich mudimu ni kwit nfalang mulong wa yom yaletinau mulong wa kukwash nich. Kajinguninap kwau anch yikumangan yetu yitumbila yikat kuyinkishang chisu chimwing chiwamp cha kupan mulambu wa kwikatin mulong wa kuyish kurutu difukwil dishitwila dia Yehova.​—⁠Kus. 110:⁠3.

⁴ Pasak pa chirung cha Baibel, kutung kwa tempel ni kwa mpwembu ya Yerusalem yadinga yisu yimwing ya musangar kud atushalapol a Yehova. Antu a Yehova adinga ni kuman chisu chinech mud chisu cha kumekesh kujikitish kwau kud Yehova. Amakundj nau amband adinga ni kulet milambu muntu ni muntu kwambatan ni yikwetay ni adinga ni kwipan mu mitapu kushalijan ya midimu.​—⁠Esidera 2:​64, 65, 69; 3:​1, 3, NW.

⁵ Chilikej chau chitufundishin yivud. Adinga awonsu ni mushiku wa kusal mudimu wa kwikatin. Mikadil mwadingau ni kushakam yadingap nawamp ap pakemp. Pa chirung cha Esidera, antu adinga ni kusal midimu ya kutung adinga antu asu mu musumb. Ashakama mivu yivud mu winkwal ni chayifanyidina chisu chimwing chilemp chakwel kwijidin ni kushakam kand nawamp. Chikwau kand, adinga ni kuyizengol kud akankuny nau, antu adinga ni kulik kuchirish kwa difukwil diakin mu Yerusalem. Komb lel kadingap ni mwom umwing uswapela. (Esidera 4:​1-5, NW) Kachirikinap kwinyim bwat. Ap anch adinga achidi asu mu musumb, kadingap ni kwit anch, mulong akat kutung tempel, ayifuta nfalang. Pakwez, asala mudimu “pakad kadiwij” ni Yehova wayiyukisha.​—⁠Esidera 4:​22, NW.

⁶ Kurijek kwa chikunguril chiding chisu chimwing cha musangar. (Kuv. 16:15) Chikumangen ni chikumangen, dijuku ni dijuku dia in Kristu, chifanyidin kuman anch mulong winou uyitadil. Amakurump nich chilikej chau ni yikasikesh yau, akutwish kuyibachik yidi ya chikumangen. Chikunguril cha Distrik “Dizu dia Uprofet dia Nzamb” pichashikena piswimp, amakurump a chikumangen chimwing cha mwi ngand yetu akumangeja ansand a chikumangen chau, ni alejana filim video “Unis grâce à l’enseignement divin,” filim urumburila, mutapu ukatau kwinungin ansand nau anikanch mu mangand mawonsu ku kurijek kwa yikunguril. Pa kuman chinech, ansand a chikumangen eza avud mulong wa kusal mudimu wa kwikatin mulong wa kukomb dibur dia ndundu mwafanyidinau kusadil chikunguril. Ikalap nchik mwikadil wetu, tusalany mudimu ni tupanany milambu nich musangar mulong wa kusutish nawamp yikunguril yetu ya distrik yirijekinau muvu unou.

⁷ Tutandurilany Ukadivar Wetu pa Yisu ya Kupim: Mulong wa kuswapej yom ni kuman chisu chivud, Sosait wayitin in kukumangan kusend dichuku ni dichuku yakudia yau. Akadivar avud alondwil chiyul chinech ni amen anch chading chitwishikin, pa chisu cha kupim kwa midi, kushakam pamwing ni yidi ya dijuku diau ni kudia yakudia yasendinau. Avud alondil anch akat kwisakin chisu chimwing cha kwiswedish ni kusutish chisu chivud ni akadivar nau anambaz au. Chiyifanyidin pa chinech kurijek kurutu kwa muten yakudia ni yakuna ni kuyitek mu kamufuk ap mu kachitung ka kulamin chitalesh, kakutwishau kutul mwishin mwa chitwamu chishichau. Tuyitin in kukumangan awonsu kusal mutapu winou. Machuku ma kwinyim am, twamen anch akadivar akat kusha ndond ya kukumangen mulong wa kuya ni kuland yakudia piswimp. Mud chibudikin tukakuman in kulandish avud ezina ni kwandam mukach mwa ndond yitusadidina chikunguril. Amwing pakach pau asotin katat anch ayinkisha mbil ya kufungul chintamb chau cha kulandishin yakudia kud in kukumangan ku chikunguril. Anch ayinkish mbil yiney, antu avud a pol akwibomb netu mu chirung cha muten. Tukusambish kand kuman milong yilemp yichingedina kurutu kwa yintamb ya yakudia, chom chikutwisha kuyipish chisu cha diswedish dia yikunguril yetu. Chawiy lel tumwitin muntu ni muntu kwez ku chikunguril ni yakudia yend ni ya kuna yend dichuku ni dichuku. Antu asotina kwez nen pamwing awapidil ni yawiy kusal mwamu. Chiyifanyidinap kwez nich mishet ya makalash ni mar mu jindond ja yikunguril.

⁸ Tuchingedin nich impu yijim nakash kukumangan ku Chikunguril cha Distrik “In Kusadil a Dizu dia Nzamb.” Ov warijekin kal yom yawonsu? Ov watongidin kal kusal mudimu wa kwikatin? Likany ngikadil yetu ku mahotel ni mu ul tusadidina chikunguril yimekesha uyakin udia mu michim yetu ni rukat retu mulong wa Sakatang wetu.