Tutany Matu ku Mazu Matumbila

¹ Yidap yawonsu yikatau kulond antu yifanyidina kutesh nakash. Pakwez palondilay Nzamb, tukweting yiyingish ya kashinsh ya kutesh. (Kuv. 28:​1, 2) Cha musangar, chidi anch in kufund apepidilau afunda “mazu ma Nzamb matumbila” mulong wa kuwap kwetu. (Rom 3:⁠2) Chikunguril cha distrik chikwikalaku ech chikutwinkish yisu ya kutesh mazu minam pamatanginau ni kumisambin. Ov mutapu ik tukutwisha kutaku matu mutapu umwing wa pakampwil?

² Tushikany Kurutu kwa Chisu Dichuku ni Dichuku Pamanch: Tutonginap bil musangar wadinga nau in Isarel payilejau anch akuya ni kumusankan Yehova ku Mukandu wa Sinai mulong wa kutesh Chijil chend! (Kub. 19:​10, 11, 16-19) Anch tukwet mwikadil wa manangu wa chilik chimwing pitusotina kutambul mafundish ma Yehova ku chikunguril cha distrik, tukwirijek chakwel kushik kurutu kwa chisu dichuku ni dichuku pamanch. Tukutwishap kutesh program mwawonsu wa kabuj anch tukakushik kwinyim kwa chisu, ni tukuyizuwol antu akwau pa kukimbol pa kushakam. Dichuku ni dichuku, yis yikwikal ya kufungul ku chikunguril pa saa ya 8:​00, ni program wa pamanch ukusambish pa saa ya 9:⁠30.

³ Amwing akata kushik kurutu kwa chisu kadingap ashicha chisu chisambishina program. Mulong wak? Mulong akat kuchingelang bil anch mwin kutakel asambisha nich muminy wa kusambish chakwel imika misamb nau arund ni kusambish chad lel kuchirikin kwi ndond yishichau. Tukuman anch mwin kutakel ushich ku chimet aminit avud kurutu kwa muminy wa kusambish wa chikunku ni chikunku, pawangina mizik ya Want ya kusambish. Chinech chidi kud etu chijiken cha kwel anch chisu chawanyin kal tuchirikina ndond yetu ya kushakam! Chad lel, pakujimbulau muminy wa kusambish, tukwikal tayad kuwang kushiman kud Yehova.

⁴ Tuteshany Mud Dijuku Didia mu Umwing: Chisu chadingau ni kutang mazu matumbila ku yikunguril ya in Isarel, majuku, ni “an” afanyidina kutesh ni kwilej. (Kuv. 31:12) Ku yikunguril yetu, an kafanyidinap ‘kuyilik kwa ayinau.’ (Jnsw. 29:15) Anvaj​—⁠irijekany chakwel dijuku dien diawonsu dia kabuj dishakama pamwing, pamwing kand ni an a dikum dia mivu. Anvaj amwing akat kuchingelang kushik ni pakusambishinau kuwang muminy wa kusambish chakwel kuyitwal anau ku musalany. Pakwez, winou udap mutapu wa kuyifundish an usey ujim wa miminy ni malembil mu difukwil dietu. Mud kamu chitwishikina, chiwapil kuya kuns kurutu kwa yikunku kusambish!

⁵ Chikutukwash kutesh anch twalal nawamp dichuku ni dichuku uchuku ni kwipuk kudia yakudia yilimina mu chirung cha dichuku. Tutekany yitongijok yetu ku yilondinau in kulond. Kangal twazuwol manangu metu. Tulondulany mu Baibel wetu patanginau maverse. Tufundany milong yiswimp. Papaninau diskur ni diskur, tutonginany mazu ma mwin kulond ni kutal mutapu tukumasadila. Kwisudiel kwa dichuku, twisambinany program mu dijuku. Ov milong ik yimwing yamukatishina muntu ni muntu? Ov dijuku dietu dikutwish nchik kuman ukwash wa yiyul yapanangau?

⁶ Tumekeshany Kalimish Mulong wa Dizu dia Nzamb: Yikunguril yikat kutwinkish chisu chimwing chiwamp cha kwisamb nau arund ni kwikal ni misamb yimwing yitungina. Anch twashik kurutu kwa chisu, tukwikal ni chisu cha kwisamb kurutu kwa program kusambish. Pakwez yisu yikwau, amwing akat kwambamb pa chisu chisutishinau program, end idimb ni kutong anch chinech chizuwodil kusu pakemp mu kuvul kwa antu. Pakwez yikumangan yisadidilau mwi ndond yimwing yijim, chidi chisu chimwing cha kutesh mud kamu pitukata kukumangan ku Chot cha Want. Tufanyidinap kuyizuwol akwetu nich kusadil pa chisu cha program telefon wetu wa ku makas, yisaj yikata kubudish masok, makamera video, mafoto.

⁷ Moses padingay ni kutambul Chijil kud Yehova, “washakama wakad kudia ap kuna.” (Kub. 34:28) Chilik chimwing, chikwikal chakad kufanyin kudia ap kuna pa chisu chisutishinau program. Ching kamu anch kudi milong ya ukash wa mujimbu, chiwapidil kuchingel “pa chisu chau” mulong wa kuchisal.​—⁠Mul. 3:⁠1.

⁸ Ku yikunguril yimwing, kuchidi mulong wa akadivar avud nau anambaz avud ni ap kand anikanch akata kunyingumok mu tubway pa chisu cha program. Akuyilej akadivar in kwakan yany ya kulondul chakwel kuyit antu mud inay kuchirikin ndond yisadidinau chikunguril. In kusal mudimu wa kwikatin akata kusal mudimu mu madepartema kushalijan awapidil kuchirikin pa ndond yau ya kushakam anch apwish kamu mudimu wau. Ching kamu anch ayinkishin mudimu wa kusal pa chisu chisutishinau program, in kusal mudimu wa kwikatin awapidil kushakam pa yitwamu yau, mulong wa kulondul program. Kafanyidinap kushal mu mabiro ma madepartema, ap kuya ni kwisamb nau akadivar akwau in kusal mudimu wa kwikatin pa chisu cha program.

⁹ Tusotinap ap pakemp kwikal antu ‘ajikina matu nakash’ pituteshina Dizu dia Nzamb. (Heb. 5:11) Chawiy lel twikwatinany chiyul cha kumekesh kalimish kafanyidina nich kuta matu pisambidinau mazu matumbila ma Yehova ku chikunguril chetu cha distrik chidia mu kwez.