Teshany ni Ilejany

1. Ov, mulong wak chitwitin kusal usu ukash mulong wa kutesh ni kwilej ku chitentam cha distrikt?

¹ Piswimp kamu ap, yitentam ya distrikt ya muvu wa 2013 yikez kusambish. Asadin mudimu ukash mulong wa kurijek program utondinau kwambatan nich maswir ma katat ma mudimu wa chingand wa pa mangand mawonsu. Ov, wirijek kal chakwel wikalaku mu machuku mawonsu maad ma chitentam? Yitentam yijim yikutwish kwikal nich kuzuwol kuvud, chawiy chiswiridina kusal usu ukash chakwel utesha nawamp program. Mulong yikunku yilepining nakash kusutamu yikumangan ya chikumangen, chawiy chifanyidina kulam kampuw chisu chilemp. Chikwau kand, weny ni yom yikwau yikutwish kulet mutapu kanang ukutwish kuziyishan. Ov, chom ik chikeza kutukwash chakwel tucha ku mes mulong tutwisha kutesh ni kwilej?​—Kuv. 31:12.

2. Ov, mutapu ik tukutwisha kurijek michim yetu mulong wa program wa chitentam?

² Kurutu kwa Kusambish Chitentam: Kapend ketu ka Web kijikena www.jw.org, kalejen program wa chitentam ukwet mitu ya milong ya madiskur mawonsu ni mutu ni mutu ukwet verse mujim umwing ap aad. Anch tusadidiling Internet, kutang rusangu riner kurutu kukez kutukwash kurijek michim yetu mulong wa yom yikezau kwijikish. (Esi. 7:10) Pa chisu cha urel wen wa Kwifukwil mu Dijuku, ov, ukutwishany kusutish chisu cha kwisambin program ukwezap?

3. Ov, yom ik yikutukwash chakwel tutesha nawamp?

³ Pa Chisu cha Program: Anch chitwishikin, chiwapil kuwanyish maswir metu mawonsu ma kuya kuns kurutu kwa chikunku kusambish. Fung telefon wey chakwel kangal akuzuwol nich kusutil ku kukutazuk, ku kufundin jinsangu ap kupak chakwel uyifundina antu akwau jinsangu pa chisu cha program. Anch ufanyidin kwikal nich telefon wey ufungwila, chiwapil kumurijek chakwel kangal wayizuwol antu akwau chisu chikukutazukau kudi muntu kanang. Anch usadidin ordinater mukemp wa kusadil ku makas pa chisu cha program, musadila mutapu wakad kuyizuwol antu akwau. Ipuk kudia ap kuna maar pa chisu cha program. (Mul. 3:1) Shinshikin kamu mes mey padiay mwin kulond. Chisu chitanginau verse, londul pamwing mu Bibil wey. Fund manans majim mu wiswimp.

4. Ov, mutapu ik ukutwishau anvaj kuyikwash anau chakwel atesha ni ileja?

⁴ Tusotin kand anch anetu atesha ni ileja. Jinswir 29:15 jilondin anch: “anch amulik mwan mwamu, ndiy ukez kamukwatish makwend usany.” Chawiy lel, chidi chiwamp kudi majuku kushakam pamwing chakwel anvaj atwisha kushinshikin anch anau akat kuta matu ku program pa ndond pa kwambamb kwau, kutumol jinsangu mu matelefon ap kwend kwau chamwamu. Ap anch achidi anikanch nakash chakwel atesha yom yawonsu yisambidinau, an akutwish kuyifundish kuchish ku mes ni kushakam zoong.

5. Ov, mulong wak chidia cha usey kuchirikin program winou ni mutapu ik tukutwisha kumusadil?

⁵ Kupwa kwa Kupwish Program wa Dichuku ni Dichuku: Kangal walab kuya. Yang kamu ulala kurutu kwa chisu chakwel utana chisu cha kupima nawamp. Kuchirikin yom yiwatesha kukez kukukwash kuyivurik chisu chilemp. Chawiy lel, chikwikal cha usey kwitekin minit yikemp chakwel wisambinany program urel ni urel mu dijuku. Anch uyila mu restoran ni arund ney, ov, mulong wak ukutambulap manans mey majim ni kuyilej dinans dimwing ap maad miusangaredina pakampwil? Piukuchirikanya ku chikumbu kupwa kwa chitentam, ukutwishany kusutish chisu kanang pa chisu cha urel wa Kwifukwil mu Dijuku mu kwisambin piur pa mutapu ukutwishanya kusadil jinsangu jinej mu dijuku. Ukutwishany kand kwitekin chisu pa rubing ni rubing mulong wa kuchirikin chikunku cha mikand yisu yabudika.

6. Ov, kwikalaku ku chitentam kwawiy kuwanyidina? Rumburil.

⁶ Musambu kiukwikalap nich rutong ap rikemp anch kwikal yakudia ni kwiswedish. Tukutwish kulond mutapu umwing nich musambu wa muspiritu ukwikalaku ku chitentam cha distrikt. El amboku tutaninamu yom yivud kusutil ku kwikalaku ku dilejan ni dilejan dia musambu wa muspiritu, kusutil ku kutesh nawamp ni ku kusadil yom yitwileja.