“Yikumangejany Antu”
1. Ov, mutapu ik yitentam ya distrikt ni ya mangand mawonsu yifanakena nich kukumangej kujim kwa in Isarel machuku makemp kupwa kwa kubudik mu Idjipit?
1 Machuku makemp kupwa kwa kubudik mu Idjibit, Yehova wamuleja Moses chakwel “ayikumangeja antu” ku Mukandu wa Sinay mulong wa kutesh mazu Mend chakwel atwisha kumwov Nzamb wom ni kuyifundish anau mu jinjil Jend. (Kuv. 4:10-13) Chirung mud ik chafanyidina kwikal cha chivurikish ni chikasikeshina ritiy! Mu angond akemp kurutu oku, antu a Yehova akez kukumangan ku yitentam ya distrikt ni ya mangand mawonsu chakel ayifundisha kudi Yehova. Ov, chom ik tufanyidina kusal chakwel tutaninamu nakash?
2. Ov, yom ik tufanyidina kusal chakwel ‘twikala tayad’ mulong wa chitentam chetu?
2 “Ikalany Tayad”: Yehova wayinkisha in Isarel mbil chakwel ‘ikala tayad’ mulong wa kukumangan kwa usey kwinoku ku mukandu wa Sinay. (Kub. 19:10, 11) Chilik chimwing kand, kwirijek kuwamp kuswirdin kudi antu awonsu akeza kukumangan ku yitentam, chidiap ching kusu mulong wa antu akeza kwikal nich yikunku ya kusal ku program winou. Chilakej, antu avud akez kuswiridin kwit konje ku midimu yau ya kumujimbu. Pamwing ap mwikadil wey udi wa chilik chimwing ni wadingay nich Nehemiy. Ndiy wasota kulik mudimu wend wa kuswind mar kurutu kwa Mwant Aritaserisis mulong wa kuya ku Yerusalem ni kukwash kutunguril rubumbu rau, pakwez ndiy wijika anch chikutwishap kumusangaresh mwant. Nehemiy walembila ni kupwa wamuleja mwant nich mushiku kwit kwend kwa ranakena. Mwant wamulika chakwel aya ni wamwinkisha kand ukwash mulong wa kutung rubumbu! (Neh. 2:1-9) Kuwejinaku kumwit mukurump wey wa mudimu koje, ov, watonginap kal pa yitenchik ya weny wey ni ndond ya kulal? Amakurump akez kusanger kuyikwash antu awonsu aswiridina nakash ukwash. Itekina rutong ra kushik kurutu kwa chikunku ni chikunku ni ikal tayad chakwel ‘ulamat dang kupandakan’ ku yom yiukeza kutesh.—Heb. 2:1.
3. Ov, yom ik yikeza kutukwash chakwel turijeka michim yetu mulong wa program winou?
3 Chom chikwau cha usey chikutwisha kutukwash kwikal tayad chidi cha kurijek michim yetu chakwel tutwisha kutesh ni kwilej nawamp. (Esi. 7:10) Program wa chitentam akez kumutek pa kapend ka Web jw.org kurutu kwa chisu ni list wa mitu ya milong ya madiskur mawonsu, mutu ni mutu wa mulong ukwet verse mujim umwing ap aad. Ditenchik dined dikupan yom yiwamp nakash ya kushinshikin pa chisu cha urel wetu wa Kwifukwil mu Dijuku mu rubing ridia piswimp ni kusadik chitentam chetu. In kulejan amwing akubudish pwogram ni kumusadin mulong wa kufund manas majim pa chisu cha chitentam.
4. Ov, mutapu ik anvaj akutwisha kusadil chitentam mulong wa kuyifundish anau?
4 ‘Yifundishany Anen’: Rumwing ra ku jintong jilejau ku chitentan cha ku Mukandu wa Sinay rading mulong wa anvaj in Isarel ‘kuyifundish anau.’ (Kuv. 4:10) Chitentam chikuyiletin anvaj chisu chiwamp nakash chakwel asala mu mutapu winou. Anvaj afanyidin kushakam pamwing ni anau pa chisu chisadikina yikunku ya program ni kuyikwash chakwel atesha nawamp. Kwinsudiel kwa dichuku ni dichuku ni kupwa pa chisu cha difukwil diau mu dijiku, majiku makutwish kwisambin pamwing program winou.
5. Ov, mutapu ik tukeza kutaninamu kusutil ku kukumangan ku chitentam chezina ech?
5 Chitentam chijim cha ku Mukandu wa Sinai chayikwasha in Isarel kusanger chisend chau cha pakampwil cha kwikal antu a Nzamb. (Kuv. 4:7, 8) Chitentam chetu chezina ech chidiaku mulong wa kutaninamu kwetu mu chilik chimwing. Mu machuku aad tukez kutwish kubudik mwi mpay yikash ya mangand ma Satan ni kusanger dikasikesh dia muspiritu ni urund uwamp mu paradis wetu wa muspiritu. (Isay 35:7-9) Pasejin dichuku dia Yehova piswimp, kangal twalikidil chisu chiwamp chinech cha kukumangan pamwing mulong wa kwisamb ni kwongojijan mu ritiy!—Heb. 10:24, 25.