“Teshany ni Kuwejuku Kwilej Kwen Kakwau”
1 Mukand wa Jinswir umekeshin manangu mud makat kutazuk anch: ‘Teshany, nikwet yom yakin ya kukulejany, ku kan kwam kukat kudiokal mazu matentamina. Chiyul chidi kudi am, ni manangu madi kudi am. . . . Teshany kudi am, musangar wikala kudi awiy alamina jinjil jam. Muntu ukwintana am watan kal mwom, ukez kapit kand dilau dia Yehova.’ (Jinsw. 8:6, 14, 32, 35) Mazu minam malejen nawamp kamu mafundish matuchingedina ku Chikunguril cha Distrik “Alej a Dizu Dia Nzamb.”
2 Ashinshikidin kal kuswir kwa ukadivar wa mangand mawonsu, ni kurijek program wa chikunguril chakwel anch kwisambin nswir jinej. Mafundish ma muspiritu ni yiyul yifanyidina yikupanau, anch ayisadil, yikutukwash kwikal ni musangar, kulam urund uwamp nend Yehova, ni kushal mwi njil ya mwom wa chikupu. Chakin kamu, tukwet diyingish diwamp dia ‘kutesh ni kuwejuku kwilej kwetu kakwau.’—Jinsw. 1:5.
3 Kurutu Kwa Program: Chakwel anch tumana ukwash sens wa yom yilejenau, tufanyidin kwikal pa jinkwas jetu ni kwikal ni mwikadil uwamp wa manangu pasambishinay program. Chinech chitin kwirijek kuwamp kwa muntu ni muntu. Chakwel kwirijek nawamp chidi cha usey kulank kamu pamanch. Tulangalany kurutu kwa chisu. Tulankany kurutu kwa chisu chiwanyidina ni kumushil muntu ni muntu tudia nend pamwing chisu cha kwirijek ni kudiap yisakwol kanang. Tushikany kurutu kwa chisu ndond yisadidilau chikunguril chakwel tukutwish kuman ndond ya kushakam ni kutal nawamp milong ya usey kurutu kwa program kusambish. Akupaturul yis pa 8:00 pamanch, ni program ukusambish dichuku ni dichuku pa 9:30 pamanch.
4 Rutong ra kusambish ra kukumangan ridi mulong wa kumutumbish Yehova “mu kukumangan,” chikunku ni chikunku chifanyidin kusambish mu mulad umwing wa kumutumbish Nzamb wetu. (Kus. 26:12) Pa chinech, tuyikasikeshin awonsu kwikal ashicha kurutu ijikisha muminy wa kusambish. Chinech chambaten nich kubabesh kwa Mifund: “Chifanyidin usalany yom yawonsu ni kuyirijek nawamp wakad kurumbangan.” (1 Kor. 14:40) Ov chinech chirumburikin ik kud etu? Chisu tukuman ntakel washakam kal ku chimet pa chisu chisambishina, yang swa ni kushakam pa nkwas yey. Chinech chikukukwash kuwang nich muchim wey wawonsu muminy wa kusambish nich chikunku ni chikunku, ni kupan kushiman kud Yehova.—Kus. 149:1.
5 Pa Chisu cha Program: Ezra “warijeka muchim wend mulong wa kushinshikin chijil cha Yehova ni kuchisadil.” (Ezra 7:10, NW) Ov mutapu ik tukutwisha kurijek michim yetu mulong wa kutambul mafundish mapaninay Yehova? Piuchirikidina mitu ya milong ya yikunku kushalijan pa program, iyipula amwiney, ‘Ov chom ik chinlejinay Yehova kusutil program winou? Ov mutapu ik nikutwisha kusadil rusangu riner mulong wa kwikwash nich amwinam ni dijuku diam?’ (Isa. 30:21, NW; Efe. 5:17) Dandamen kwiyipul yipul yiney machuku mawonsu ma chikunguril. Fund milong yijim kanang utongidina kusadil. Itekinaku chisu cha kwisambin yom yiney kwisudiel kwa yikunku ya dichuku. Chinech chikez kukukwash kulam ni kusadil rusangu riner.
6 Kwikuchik kuta muchim asaa avud chisu chimwing kukutwish kwikal kukasikena. Ov chom ik chikutwisha kutukwash kurish nich chibachikin cha kuzuwol manangu? Tusadilany nakash usu wa mes. Chisu chivud, pa chom tushinshikina mes metu pawiy padinga manangu metu. (Mat. 6:22) Chawiy lel, dandamen kwipuk kukarumun mutu wey ku masok mawonsu ap chom chawonsu ukutesha. Shinshikin kamu mes mey padiay mwin kulond. Londul piswimp kamu mu Baibel wey chisu chawonsu chikutangau mufund, ni kulam Baibel wey wa kuburil pa chisu chirumburilau mifund.
7 Rukat ra Ukristu rikez kutubachik kwipuk kuyizuwol antu akwau pasutishinau program. (1 Kor. 13:5) Chinech chidi “chisu cha kunenet” ni kutesh. (Mul. 3:7) Chawiy, twipukany misamb yakad usey ni kushemunok. Twipukany kuyawol chisu ni chisu ku musalany nich kutongin ku yom ya kurutu. Kangal wadia ap kuna kushikij ni pa chisu chijimbwilau, ching anch ukwet milong yikash ya ukash wa mujimbu. Antu akata kwez ni matelefon mau, kamera, ni yisaj ya kukwat nich yipich kafanyidinap kuyisadil mulong wa kuyizuwol antu akwau. Anvaj afanyidin kwirijek nawamp kamu mulong wa dijuku diau diawonsu—kuwejinaku ansangarum—chakwel kushakam nau ndond yimwing chakwel awiy akutwish kuyital nawamp anau.—Jinsw. 29:15.
8 Muvu wasutina ou mukurump umwing wadinga ni kukumangan ku yikunguril makum ma mivu walonda anch: “Natonga anch chikunguril chinech chadinga chipandakena kuwap mulong wa diyingish dikwau. Piswimp muntu ni muntu pakach pa in kutesh wading ni kufund milong yijim, ni an akemp. Chading cha musangar kuchiman. Ading ni kusadil nawamp ma Baibel in kulond padingau ni kuyit kumaburil mulong wa kutang mifund kanang.” Kuta matu kwa mutapu winou kudi chakin kwa kubazin. Chikatap kusu kutuletin etu ni ambayetu ezina ni kukumangan ku chikunguril ukwash pakwez kupandakan yawonsu chikat kumutumbish Mulej wetu Mujim, Yehova Nzamb.—Isa. 30:20, NW.