Tulamany Ngikadil Yiwamp Yimutumbishina Nzamb
1 Yikalap nchik ndond yitudia, ngikadil yetu, mutapu wetu wa kudjal ni mutapu wetu wa kwirijek mujimbu upanining uman piur petu ni piur pa Nzamb tukata kwifukwil. Chinech chikat kumekanang kamu nakash ku yikumangan yijim ya antu a Nzamb, kukatau kututal antu avud. Anch tukwet chilikej chiwamp, dijin dia Yehova akat kuditumbish. (1 Pita 2:12) Pakwez, ngikadil yiyimp ap yisalijok yakad kutong ya antu kusu akemp yikutwish kulet yitongijok yiyimp piur pa dijin dia Yehova ni piur pa antwend. (Mul. 9:18b) Chitwija anch antu akat kulondil nawamp ap nayimp dirijek dietu ni Nzamb tukata kwifukwil anch aman ngikadil yetu, tufanyidin kukimb ‘kusal yom yawonsu mulong wa kulet uyaj kud Nzamb.’—1 Kor. 10:31.
2 Ngikadil Yiwamp Ndond Yitutekinau: Yisu yivud, antu akat kushimokang nakash pa kuman kuburen kanvundangesh, yaku yiwamp, ni kwinang kwa Atuman’a Yehova. Ikundj umwing padingay ni kwisambin majuku ma Atuman ashikena ku hotel wend walonda anch: “An a Atuman’a Yehova adi an amwing alidinau nawamp nakash inamanap kal! Adjit nawamp; akwet kalimish, chovu ni akwet yaku yiwamp; ni kasarumwinap mulong ap ukemp. Ufanyidinany chakin kamu kubazin mulong wa anen. Twasanger kuyitambul kwol kwetu.” Anch antu tushicha nau akat kulond mwamu ku kukat, chawiy kulond anch amen rukat ni kalimish yidia pakach pa antu a Yehova.
3 Chisangarishin kuman usu usadilau akadivar nau anambaz pamwing nau arund a uyakin mulong wa kwikal inangina ku jindond ja yikunguril. Chinech chikat kuwejin ku uman ukatau kupan ni katumb kawamp ka Atuman’a Yehova. Pakwez, marapor mamekeshin anch majuku mamwing chiyikasikedin nakash anch mulong tatuku katwishinap kuland maswin masu ma mwin kwol kwend ap ma anend. Pa chinech, amwing alika kukumangan ku yikunguril. Mitu ya majuku yafanyidina chad lel kusondam chakwel kuland yisotilau a mu dijuku diau. Pakwez, avud akat kwezang ku yikunguril wikalap nchik uzwendj wau. Mu jindond jimwing, akadivar akat kwisondjik akoch, yikut ni ankol mulong wa kumekan mutapu uwamp ku chimet. Kud ap amwing akata kusutish yikunku yikwetau ku mend kwakad yisapat! Kakulikangap chom ap chimwing chiyikangesha kutambul yikasikesh yikatau kupan ku yikunguril. Winou udi mwikadil muwamp mudi ik pantaliken ni kukumangan kwa Ukristu! Ap anch tusotin kulimish kufanyin kwa yikumangan yetu nich kwikal chisu chawonsu inangina, pakwez tusotin kulam mu manangu anch rutong retu ridap ra “kwibaz mulong wa yom yitukweta.”—1 Yohan 2:16.
4 Ndond ya kulal yiding chisu chivud yikumbu ya antu a chijikan. Tufanyidin kumekesh kujikitish pantaliken ni akadivar ni anambaz itiyidina kutuladik kwol kwau. Chikwau kand, chiwapilap anch antu akinau mutapu winou asadila kwak kwinoku mutapu uyimp ni kwit anch ayiladika machuku mavud kwinyim kwa chikunguril. Ndond ya kulal ayipanining ching kamu pa muten wa chikunguril. Awiy isakidina ndond ya kulal mud yiney afanyidin kulimish yom ya mwin kuyak, pikil kuyipish chom ap chimwing, pikil kuya ndond kwakadau kuyitazuk, ni kutal nawamp anch anau asal chilik chimwing. Anch in kwakan akwet matat kanang ku mutambu winou, afanyidin kapamp kamwing kwijikish Departema wa ndond ya kulal, ukusangara kupan ukwash wend. Kusadil kuwamp ni kuwap kwa Departema wa ndond ya kulal kushindamedin kusadil pamwing kwa muntu ni muntu. (Heb. 13:17) Twatambwil jinsangu ja kwel anch amwing akat kushang ndond ya kulal yiyinkishinau mulong wa kuya ndond yindjing, ndond kukutwisha kwikal murund nau ap muntu wa chijikan nau. Chinech chikat kukadikesh mudimu wa akadivar a Departema wa ndond ya kulal. Tukwitinany amboku en awonsu kusadil pamwing ni departema winou.
5 Chiwapidil kusal usu wa kusadil pamwing ni mwin chikumbu. Chakin anch, tusotinap kusha chitongijok chiyimp piur pa antu a Yehova. Chitudia in Kristu tufanyidin kwikal ni ngikadil yimwing ya win yakin chisu chawonsu. Tufanyidinap kusend maswin ap ‘yom yikwau pa kuvurikin’ ya muntu watutambwila kwol kwend, kusal mwamu udi wij.
6 Yidjal Yifanyidina ku Chikunguril: Yikalap nchik mutapu wa ndond tusadidila, chifanyidin kuyiman mud Chot cha Want chimwing chijim nakash pa chisu cha chikunguril. Mutapu wetu wa kudjal ufanyidina ni wa kwileng ufanyidin kamu kumekan mud pitukata kuya ni kukumangan mu chikumangen chetu. Chikala pa chisu cha chikunguril ap kupwa kwa chikunguril, akadivar nau anambaz awapidil kwipuk kudjal maswin mamwing makad kufanyidin ap yidjal yimwing pafundodilau ya kufund, yom yikata kumekesh spiritu wa mangand ni yikuyikangesh in kututal kutuman mud antu ashalijadina kamu nau antu akwau. Anambaz afanyidin kubabal nich model ni kulep kwa ajip adjitau ap ankandj au chakwel kutal anch afanyidin. (1 Tim. 2:9, 10) Chikala ku chikunguril, ku hotel ap nau akadivar netu, arund netu ap anamakwetu, ap pituyila ni kuland ya kuland ku makashiny, tuwapidil yisu yawonsu kumekesh anch tudi atushalapol a Nzamb, ni kwipuk kuyipwakesh antu akwau.—2 Kor. 6:3.
7 Diampos pamanch ku chikunguril kukwikal dibatish. Tour de Garde wa Ndol 1, 1995, paj 30, urumburil mwikadil tufanyidina kumekesh pa chisu chinech. Ulondil anch tufanyidin “kuman dibatish nich usey ufanyidina. Chidap chisu cha masip, chidap chisu cha kusal musambu, ap chisu cha kuzangam. Chidap kand chisu chimwing cha ushon ap chiyimp.” Chikwikalap chiwamp anch antu akubatishau adjala maswin mamwing ma kubatishiu nich makad kubwik mujimbu nawamp ap mayikwatina nakash, chikala amakundj ap amband. Chawiy lel, awonsu afanyidin kumekesh kalimish ni musangar wa dibatish dia Ukristu.
8 Pita utuvurishin ‘mutapu wa antu tufanyidina kwikal nich mwom utumbila ni yisalijok ni kwikal in kudandamen kudi Nzamb.’ (2 Pita 3:11) Likany mazu metu ni yisalijok yetu ku Chikunguril chinech cha Distrik “In Kusadil a Dizu dia Nzamb” cha muvu unou, mayikwasha antu atutadila in muchim utok kumwijik ni kumwifukwil Nzamb wetu Mujim, ndiy ufanyidina katumb kawonsu ni uyaj.—1 Kor. 14:24, 25.