Tusalany Yiwamp ni Kwikal Abazinau!

¹ “Awiy akwet chisambu pakach pau chinakad am kwez kuman kud antu akwau.” “Chidi cha musangar kwikal ni chisak chinech.” Yiney yidi milad ya uman uvud uwamp twatambwila kud in kututal kupwa kwa yikunguril ya distrik ya muvu wasutina ou, uman utekidina kashony pa ngikadil yiwamp tukweta mu dirijek. (Jinsw. 27:2; 1 Kor. 4:⁠9) Chakin kamu, kushiman mud kwinoku kukat kuyang kud Yehova. (Mat. 5:16) Chisu chikwau chipandakena kuwap cha kumushiman Nzamb chidi katat kurutu kwetu ku Chikunguril cha Distrik cha muvu unou “Alej a Dizu Dia Nzamb.”

² Muvu ni muvu tukat kutambul yivurish ya rukat piur pa ngikadil yifanyidina ku chikunguril. Ov mulong wak? Mulong yitongijok, kudjal, ni ngikadil ya mangand chiyidandamedina kuyip, tulikin kwilikej chaku chau. Tusotinap kuyipish ngikadil yetu yiwamp. (Efe. 2:2; 4:17) Tulamany mu manangu yibabesh yilondwila ey.

³ Tusalany Yiwamp​—⁠Yisu Yawonsu: Twijiken mu mangand mawonsu mulong wa ngikadil yetu yiwamp. (1 Pit 2:12) Chawiy lel ndond yawonsu tukutwisha kwikal, mu chikumbu cha muntu, mu makashiny makemp ap mu chiku, ngikadil yetu yiwamp yikutwish kwikal uman upandakena kuwap anch tudi alej a kashinsh a Dizu dia Nzamb. Chitusendina dijin dia Yehova, tukwet chisend chijim nakash cha kwipuk anch alondina nayimp pa dijin dined yikala ngikadil yetu ap nich mutapu wetu wa kulond. Ngikadil yetu yiwamp yikutwish kuyitwal antu akwau ku kwikal in kumwifukwil Yehova.​—⁠Tal 1 Pita 3:​1, 2.

⁴ Antu in kututal akat kushimokang pa kuman kalimish ni kuziyil kwa ansand tudia nau. (Efe. 6:​1, 2) Pa chinech anvaj afanyidin kushinshikin ngikadil ya anau. Chidi chisend chau kuyital anau yisu yawonsu. Chinech chidi chisend chiyinkinau kud Nzamb. (Jinsw. 1:⁠8) Chifanyidin kuyilam nawamp chakwel kangal ayawol chisu ni chisu ku misalany pa chisu chisadinau program. Chisu cha program chidiap chisu cha kusengan. An afanyidin kushakam piswimp ni anvajau, kutesh ni kwilej kumwov Nzamb wakin wom.​—⁠Kuv. 31:​12, 13.

⁵ Tusalany Yiwamp​—⁠Nich Mutapu Wetu wa Kudjal ni Kwileng: Kupwa kwa chikunguril chimwing cha distrik cha mu yikunguril ya muvu wasutina ou, mwin kufund umwing wa jurnal umwing wa musumb ujim wafunda anch: “Kupandakan chom chikwau ap chisu, ngikadil ya Atuman ayinau yawiy yadia yisangarishina nakash. Chading chikasikeshin mud ik kuman antu avud mwamu afanyidina ni akweta kalimish. Chidjitau maswin mau mapandakena kuwap ma dichuku Diarubing, yitot ya majuku yimekeshina kushalijan kwawonsu kwa ulomb ni tubil yadinga ni kwandam pakemp pakemp mu dibur dia chikunguril. Ngikadil yau yading yishalijadin nakash nich ya antu akwau akat kukumangen mu dibur dined. Chakin, Atuman ashalijadin kamu nakash ni antu akwau. Chikadil kal chijikena kwawonsu kuman ngikadil muyimp wa antu avud. . . . Chakin kamu, yisak ya Atuman yikasikeshing.” Kangal twashil ap pakemp mutapu wetu wa kudjal ni kwileng ap ngikadil yetu yikarumuna mwi njil ap yisu mwikadil wa muspiritu wa chikunguril.​—⁠Filp. 1:10; 1 Tim. 2:​9,10.

⁶ Tusalany Yiwamp​—⁠Nich Kuyikwash Antu Adia mu Kuswir: Marapor mamekeshin anch akadivar nau anambaz kanang akangeny kukumangan ku yikunguril mu mivu yikemp ya kwinyim mulong wa kuburen kwau maswin mawamp. Pakwez, mikalap nchik makur, tufanyidin kusal usu wa kukumangan ku chikunguril. Chom cha usey chidi kwikal udishinau ni ukasikeshinau muspiritu. Anch akadivar kanang mu chikumangan ad mu kuswir, amakurump awapidil kutal chikutwishau kusal mulong wa kuyikwash antu mud inay. Chakin kamu, tukatin kuman muntu ni muntu mu chikumangan kutambul ukwash ku chikunguril. Jakobu 2:​15-17 uletin chiyul piur pa mutapu tufanyidina kushakam nau ambay netu In Kristu adia mu kuswir kukash. Anch tukutwishap kuyikwash nich maswin masu, ov chitwishikin kumanaku ap maswin makur ap kuyisondjik maswin metu?

⁷ Tusalany Yiwamp​—⁠ku Dibatish: Antu akutambula dibatish awapidil kusadil chinship chinech nich kalimish nakash. Kudjal maswin mafanyidina ma kwandam nich mu mem kukumekesh usey tumena nich kutumb kwa chisu chinech. Chikwikal cha ukwash nakash kud in kutakel malejan ma Baibel kuchirikin nau antu ilejina nau kurutu kwa kukumangan ku chikunguril “Yipul ya In Kutang” mu La Tour de Garde wa Ndol 1, 1995.

⁸ Tusalany Yiwamp​—⁠Nich Yaku Yiwamp: Yaku yiwamp yisendin kand mitambu yawonsu ya mwom wetu. Kupwa kwa yikunku ya chikunguril, pa chisu tukata kuyang kukandam miotak ya kusend antu awonsu mulong wa kuchirik kwol kwetu, tukumekesh yaku yiwamp anch twipuk spiritu wa am bil, anch twayilik bil amapal, amaku ni an chakwel akandama a kusambish. Tukumekesh kand yaku yiwamp nich kusadil pamwing mulong wa kusha ndond tusadidina chikunguril yinangina. Anch twichil chom kanang pa chisu cha kudia pa chisu cha kupim, ap anch twaman dipapel pansh, manangu metu ma win Kristu ma kwikal inangina makez kutubachik kudinon ni kudidjibul mwi ndond ya kutekin yishoshot. Anvaj afanyidin kuyijidish anau kukwash kulam ndond yetu ya kwifukwil yinangina.

⁹ Kalimish ketu ni ngikadil yetu ya winzamb yiletin uman ku yitiyij yetu ya win Kristu ni kusal anch chikala chiswapela kud antu akweta michim yitentamina kujingunin uyakin. Chawiy lel, ‘tudandamenany kusal yom yiwamp’ ni kwikal abazinau pitukumangena ku Chikunguril cha Distrik “Alej a Dizu Dia Nzamb”.​—⁠Rom. 13:⁠3.