Ikalany Atumbila mu Yaku Yen Yawonsu
1. Mulong wak chidi cha usey kwikal atumbila mu yaku yetu yawonsu?
1 Mutapu tudia atushalapol a Nzamb utumbila, Yehova, tukat kwikasikesh kwikal atumbila mu yaku yetu yawonsu. (1 Pi. 1:15, 16) Chinech chirumburikin anch twikasikeshin kulam mbil ja Yehova mu mikadil yin yawonsu ya mwom wetu. Chikumangan cha distrik cha muvu unou chikutwinkish chisu cha pakampwil cha kumekesh chaku chitumbila.
2. Ov mutapu ik tukutwisha kumekesh chaku chiwamp ku tushicha?
2 Ku Tushicha: Tushakamap nchik ku chikumbu cha mwin Kristu, cha mukanvadik, ap ku Chot cha Want tuswiridin kulam yivurish yilondwila ey mu manangu: (1) Kurutu kwa kwisuk, mwipula bil mwin kukwak wey ap akadivar akweta chisend cha kuladik antu ku Chot cha Want mulong wa mipak kanang yikwatinau. (Chirikin Mudimu Wetu wa Want wa Kachirikin 2003, paj wa 3.) (2) Kangal kusadil nayimp yom yawonsu yiyitekidinau angendj. Chifanyidin kwikal nich chaku cha kwitudish ni kutong. (3) Kwinang kwambatijadin nich kutumb. Chisu chin chawonsu shang ku ushicha kwa kurijek, kuwanyidina ni kwinangina. (4) Mekesh mabuj ma spiritu mu kwovijan nau akwen, ikalap nchik mwin kukwak wey ap akadivar akwau in Kristu ukutwisha kwikal nau ndond yimwing.—Gal. 5:22, 23.
3. Chaku cha ansand Atuman chikat kuyishimokish nchik antu akwau?
3 Anvaj ni An: Ansand etu avud, akat kuyibaz mulong wa chaku chau chiwamp, chikata kumumekesh nawamp Yehova ni dirijek diend dimekena. In kutal akat kushimok pa kuyiman ansand ikuchikin zong ni kuta matu chisu cha program, akat kufund ni kulondul kutang kwa Mifund mu ma Bibil mau. Pakwez, kwamekana kand anch, ansand amwing, kakatap kwau kuta matu muchifanyidina mulong anvaj au kakatap kuyilam. (Jinsw. 29:15) Chifanyidinap kuyilik an akemp pakad kuyitakel muchifanyidina. Amwing akwet chaku cha kuyawol ku musalany. Chiyul chidi anch nvaj ap muntu mukwau mukurump ayitwalaku. Chikwikalap cha manangu kuburen mem metu, chinech chikutukwash kwipuk kutumbuk pa ndond tushicha. Pa chisu cha kwipimish, tusotil kuyital anetu kangal akink mau mu mapway ma kusutin, chamwamu akuwa ap kuyiwishish antu akwau. Kwikal in kanrumbangesh kukat kulet runeng ni dises pa dijin dia Yehova. Chaku chetu chiwamp chikat kumushiman Yehova ni kutumbish kujimb kwa usey wa malejan ma Bibil.—Titus 2:7.
4. Mutapu ik tukutwisha kuyitongin akwetu chisu tudila?
4 Yakudia: Pasut kal mivu yivud kwikiling kand yakudia ku yikumangan ya distrik, muntu ukutwish kusend yakudia yend ya midi anch usotil kusend. Chiyul chidi anch muntu arijek yakudia yipipela pakwez ya ukwash, chilakej: mabot, mabuj (mud makond), nyimu, yitumbul ap yikwang. Tusotinap kudia yakudia yilimina, yikutwisha kutukangesh kushakam achila ku mes chisu chisadikina program wa urel. Chiyul chidi anch muntu ni muntu asenda yakuna, mud mem, kafe ap chay. Termus ap ndond ya kusendin mem yifanyidin kwikal yom yakad kubarok mulong wa kwipuk yakamish. Chifanyidinap kusend maar maswejina ku chikumangan cha distrik. Anch muntu ni muntu wasend yakudia ni yakuna mulong wa dijuku diend, chinech chikutwipukish rusot ra kuland yakudia ya in kulandish atekang kal tutebur twau kuns kwa ndond ya kukumangen. Chameken anch, antu alandining yakudia kud in kulandish, chisu chawonsu akat kudjibul mayij pansh. Ndond yawonsu yikat kwizul nich mapaper, malejer, yijiku ya milond ya maar masemijadina, ni yikwau. Kwinoku kudiap kulimish ndond ya kukumangen yidia chakin kamu ndond yetu ya kwifukwil pa chirung cha chikumangan cha distrik. Chifanyidinap kwitiy in kulandish kwez mwi ndond ya chikumangan. Yehova udi Nzamb utumbila ni in kumwifukwil end afanyidin kwikal atumbila.—1 Pi. 1:16.
5. Mulong wak chifanyidinap kwisuk yakudia, chisu chidia program kand kal apwa?
5 Chameken kand ku yikumangan yimwing ya distrik anch, amwing akat kwisuk yakudia, chisu chidia program kand kal apwa. Chifanyidinap kwikal mwamu. Tusotin kuta matu nakash ni kutek yom ya muspiritu pa ndond ya kusambish. Tusotinap kwikal in kuletish kampuw kud antu akumangena ku kushemunok chisu chawonsu. Awonsu asadidina mbwabul afanyidin bil kwit mbil kud akadivar akweta chisend cha chikumangan cha distrik chakwel kwijik pisu pakutwishau kumutek. Chifanyidin kudimuk nakash kwipuk kupatikan.—Luka 10:38-42.
6. Chaku chiwamp chitin chom ik kwi ndond ya chikumangan?
6 Ku Chikumangan: Chaku chetu chiwamp chifanyidin kumekan pakampwil kwi ndond ya chikumangan. Sadilany amboku kwambatan nich umutakel wa in kwakan, asadidina kwa kwimikin motak ni jinking, ni mukach mwa kushakamin antu. (Heb. 13:17) Majuku mafanyidin kushakam pamwing pa ndond pa kulik anau, ansangarum nau ayangadim, kushakam pa yisak ya ansand ni akwau. Yikwatin ya mazu ap chom chikwau kanang yifanyidinap kuyinung kwi nzembu ja kasu ap ku yitenchik ya kujimbish mazu ni akutwish kuyisadil ching kusu mu mutapu wakad kuyivundangesh antu akwau. Anch usotin kukwat yipich, kangal kusadin yimunyik chisu cha program. Matelefon mafanyidin kumafung chakwel kangal malet kampuw.
7. Ov mutapu ik chaku chetu chikutwisha kumutumbish Nzamb ku yikumangan?
7 Chaku chetu chiwamp chitushalijadishin ni antu akwau a mangand minam ni chimutumbishin Nzamb wetu. (1 Pi. 2:12) Ku chikumangan, yisalijok ya Atuman’ a Yehova yikez kamekan patok. Pa chinech, kwat mupak wa kwikal utumbila mu yaku yey yawonsu.
[Caption on page 1]
[Study Questions]
[Caption on page 5]
[Picture on page 5]
Mekesh Chaku Chitumbila
◼ Lam mbil jawonsu ja ndond ya kushakam
◼ Yitakela an nawamp
◼ Yitongijokina akwen