Ikal Chilikej mu Midimu Yiwamp
1. Ov mulong wak tufanyidina kubangin nakash mwikadil wetu ku chikumangan cha distrik?
Chisu tukata kukumangan pamwing antu avud ku yikumangan ya distrik, yisalijok yetu ni mutapu tukata kuyisadil antu akwau yikat kumekanang nakash kamu kud antu atutadila. Chawiy lel, muntu ni muntu pakach petu, ufanyidin kuta muchim nakash ku dibabesh dia Baibel: “Ikal wishitwila mu manangu, mu yom yawonsu imekesha amwiney kwikal chilikej mu midimu yiwamp.” (Titus 2:6, 7, NW) Chikutwish kwit kusal usu chakwel “muntu ni muntu atala nawamp ku yom ya mwom wa mukwau, wakad kutal nawamp ching kusu ku yom ya mwom wend amwinend.” (Filp. 2:4) Tushinshikinany mitapu yimwing mutukutwisha kusadil dikasikesh dined ku Chikumangan cha Distrik “Panany Uyaj Kud Nzamb” chezina kurutu oku.
2. Ov chom ik tufanyidina kuvurik piur pa yitenchik yitadila ndond ja kulal?
2 Yitenchik Piur pa Ndond ya Kulal: Chisu chimwing chiwamp cha kumekesh midimu yiwamp chambaten nich yitenchik piur pa ndond ya kulal. Pitukumangena ku chikumangan, chiding chaku cha kuyipan antu itina yikumbu ya kulal kushakam pamwing ni akadivar itiyidina kuyak angendj ezina kukumangan ku yikumbu yau. Pakwez, amwing akutwish kutond kushakam ni yid ya dijuku diau nich rutong ra kwambambin nau pamwing nau rusangu ruwamp ni kuyitazuk kwez kukumangan ku chikumangan. Chinech chidi chom chimwing chiwamp nakash. Mu mikadil yiney yawonsu yaad, chidi cha usey nakash kumekesh mwikadil uwamp wa manangu ni kumekesh mabuj ma spiritu wa Nzamb. (Gal. 5:22, 23) Mu mwikadil umwing ni umwing, tusotinap kwikal chisend chilimina mu milong ya nfalang kud in kutwak etu. Kurutu kwa kuya ku chikumangan, chikwikal cha rukat ku mutambu wetu kwirijek chakwel kuwanyish maswir metu, mud yakudia ni nfalang ja kufutin weny anch chiswiridikin pa chirung cha chikumangan. Kitusotinap kwisakin muchim wau wa kwakan chakwel kudandamen kushakam machuku mavud pakad kufanyidin kupwa kwa chikumangan mulong wa yisakin ya muntu ipend. Mutapu winou tukez kumekesh kalimish mulong wa rukat rau.
3. Mutapu ik tukutwisha “kusal nawamp kudi antu awonsu” ku chikumbu cha muntu watwakina?
3 Tufanyidin kulam mu manangu anch kwi ndond kutushicha, tudi angendj, ni chinech chitin anch tumekesha kalimish kafanyidina piur pa milong yiyitadila ayinau ni yom yau. Chikwikalap chiwamp kusadil yom ya mu chikumbu pakad kwit mbil ya mwin kutwak. Pa chisu tushicha kwolikwau chikez kwikal chisal cha rukat ku mutambu wetu kusadil pamwing nau mu midimu mud ya kukomb mu yikumbu ni ya kulam yom wakad kanvundangesh. Kurutu kwa kutumbuk, tufanyidin kushinshikin anch tumushidilap mwin kutwak midimu yivud mulong wa kwikal kwetu mu chikumbu chend. Mazu ma Yesu madia mu Mateu 7:12 malejen chijidik chifanyidina kututakel mu mikadil mud yiney. Mu mitapu yiney tukez “kusal nawamp kudi antu awonsu” ni kupan lel uman uwamp kud antu akwau.—Gal. 6:10.
4, 5. Mutapu ik ukatau an kumushiman Yehova, ni chisend ik chikwetau anvaj?
4 Anvaj ni An: Mu mangand mudi anikanch avud akweta yaku yiyimp, anetu ashalijadin, ni chinech chikat kulet kushiman padiay Yehova ni dirijek diend. Pakwez, yisu kanang, kukat kubudikin milong anch an kayilaminap nawamp. (Jinsw. 29:15) Anvaj kafanyidinap kuyisha anau pakad kuyishinshikin kwi ndond ya chikumangan. Chamwamu, an akusambish kuwayiway kwau chamwamu pa chisu chisadikina yikunku ya chikumangan, kakutap kand matu, akusambish kulet masok chamwamu ni kuyizuwol lel antu asotina kutesh. Chifanyidinap kuyilik ayawolang chisu chin chawonsu ku misalany pa chisu chisadikina yikunku. Ang chakin kamu ukwet kuswir kwa kuya ku musalany, nvaj ndiy ufanyidina kumutwal mwan. An afanyidin kwikal pamwing ni anvajau, mwan ni mwan ufanyidin kwikal nich Baibel wend, karne mwa kufundin Mifund, chawiy chikeza kuyikwash kutesh, kwilej ni kumwov Yehova wom.—Kuv. 31:12.
5 Kurutu kwa chikumangan anvaj amwing amana anch chidi cha ukwash kuchirikin pamwing ni anau mulad wa mwikadil uyichingejidinau kud awiy. (Ef. 6:4) Awiy ayikwashining an kutesh anch rukat rakin ra Ukristu “kirukwetap dichim” ap “kwitong.” (1 Kor. 13:5) Chikumangan cha distrik chidi chisu chimwing chawurilau mulong wa kwikal afundishinau kud Yehova, an pamwing ni amakurump akutwish kumekesh kalimish mulong wa ditenchik dined kusutil ku ngikadil yau pa ndond yisadidinau chikumangan ni ndond yin yawonsu yikwau.—Is. 54:13, NW.
6. Usu ik ukweta mwikadil wetu padi antu akwau?
6 Mwikadil wetu uwamp ukutwish kupwish yitongijok yiyimp ni kuyipwitin antu ku difukwil diakin. (Mat. 5:16; 1 Pi. 2:12) El antu in awonsu tusankena ku chikumangan cha distrik atambula uman uwamp kusutil ku yisal ni ku mutapu tuyisadidila. Mwi njil yiney tukez ‘kwimekesh ayinetu kwikal chilikej mu midimu yiwamp’ ni kumutumbish Yehova.—Titus 2:7.
[Caption on page 1]
[Study Questions]
[Caption on page 4]
[Picture on page 4]
Yitonginap Antu Akwau
▪ Ikal mwin kushimpish muchim ni mwin kalimish pantaliken nau akadivar ni anambaz pamwing ni mwin kukwak
▪ Mulong wa kuwap kwetu ni kwa antu akwau sadil pamwing ni kulondul umutakel upaninau kud antu atakedila
▪ Kangal wasadil nayimp muchim wa kupan ni kwakan wa mwin kukwak
▪ Yilama nawamp aney