Yakul Ku Yipul yen

◼ Yijil ik ya kudjal ni kwileng tufanyidina kulondul chisu tuyila ni kutal yikumbu ya Betel ni ya mitiy?

Chisu tuyila ni kutal Betel, chikala nich rutong ra kuya kusu ni kunyingumukaku ap kuya ni kutal pamwing yid ya dijuku dia Betel, “kudjal kwetu, kwileng kwetu ni ngikadil yetu yifanyidin kwikal chilik chimwing ni mutapu utwitinau chisu tukata kukumangan ku yikumangan mulong wa kwifukwil ku Chot cha Want.” (om 131) Pakwez, chimeken anch chisu chikatau kuya ni kutal mabiro ma mitiy, akadivar amwing ni anambaz akat kudiul nakash mu mutapu wau wa kudjal. Chinech chifanyidinap bwat pituyila ni kutal yikumbu yiney. Kudjal kwetu kufanyidin kwikal kwishitwila nawamp, ni kwa kwikepish, kufanyidin kumekesh kwinang ni kalimish kayifanyidina atushalapol a Yehova Nzamb.​—⁠1 Tim. 2:​9, 10.

Chinech chidi kamu cha usey pituyila kutal yikumbu ya Betel ni ya mitiy mulong yikat kupwitang manangu ma antu avud akad kwikal Atuman akata kuyishinshikin. In kutal inay akutwish kwikal nich yitongijok kanang piur pa antu a Nzamb ni dirijek diend yengamidina pa yom yimenau. Chikwikal cha manangu kwisamb nau in kwilej a Baibel ni antu akwau akutwisha kuya ni kutal chakwel kuyivurish usey wa kubangin nakash mutapu ufanyidina wa kudjal ni kwileng. Dijiku dia Betel dikusangar kamu nakash anch wasal mwamu.

Chitudia atushalapol in Kristu, tufanyidin kudimukin nakash anch mutapu wetu wa kwimekesh kangal wikal wa kupwakesh. (2 Kor. 6:​3, 4) Pakwez, kusutin ku yaku yetu yifanyidina ya kwileng, tukutwish chisu chin chawonsu kumekesh “mu yom yawonsu katumb ka malejan ma Nzamb Mupandish wetu.”​—⁠Titus 2:⁠10.