“Mulong Wa Yitil Yetu Yawiy Yamutapodilau Yitat”—kashalapol Wa Yehova
“Mulong wa yitil yetu yawiy yamutapodilau yitat. Amubula mulong wa kuyip kwetu. . . . Ni yitat yend yatupandisha.”—ISAY 53:5.
1. Yom ik tufanyidina kulam mu manangu chisu chitusadila Chivurikish, ni uprofet ik ukutukwasha kusal mwamu?
TUSADILING Chivurikish mulong tuvurika rufu ra Yesu ni chakwel tuvurika kand yawonsu yawanisha rufu rend ni disanguk diend. Chivurikish chikat kutuvurish kuchidij ukaleng wa Yehova, kutumbish dijin diend, ni kuwanish kwa rutong rend, pamwing ni dipandish dia antu. Chimeken pamwingap anch kwikil kand uprofet ukwau mu Bibil urumburila kachom kamwing ni kamwing piur pa mulambu wa Kristu ni yawawanisha mudi mutapu ulejenau kamu mu Isay 53:3-12. Isay wabwaka mar ma Kashalapol ni wasambela kulond yom kushalijan piur pa rufu ra Kristu ni yiyukish yikuleta rufu rend mulong wa akadivar nend azizidilau many ni “amikoku akwau.”—Yoh. 10:16.
2. Uprofet wa Isay udi uman wa chom ik, ni ukwikal nich chibudikin ik padi etu?
2 Mivu yitot sambwad kurutu Yesu avadika panap pansh, Yehova wamupepila Isay chakwel abwaka anch Kashalapol Wend watonday ukez kwikal ushinshamena ap anch amupak nchik ni kwisudiel. Uprofet winou umekeshin anch Yehova umuchingejidin nakash Mwanend ushinshamena. Mudi mutushinshikidina uprofet winou, michim yetu yikwizul nich musangar ni ritiy retu rikukasikan.
‘Amudiurola’ ni “Kwikil . . . Wamubangaku”
3. Ov, mulong wak Ayuda ading afanyidin kumwak Yesu, chad mutapu ik wamwakau?
3 Tang Isay 53:3. Tongap bil chadinga chimwitin ik Mwan kapokal wa Nzamb kulik musangar wend wa kusal pamwing ni Tatukwend chakwel eza pansh mulong wakupan mwom wend mudi yakupesh chakwel ayipandisha an a antu ku chitil ni rufu! (Filip. 2:5-8) Yakupesh yend yadinga mulong wa dilikishin diakin dia yitil, yawiy yadinga yifanikeshinau nich milambu ya annam mu Chijil cha Moses. (Heb. 10:1-4) Ov, kadingap ufanyidin kumwak nawamp ni kumulimish, pakampwil kudiau Ayuda, adinga achingedina kwez kwa Mesia washilaumu? (Yoh 6:14) Pakwez, Kristu ‘amudiurola’ kudiau Ayuda, ni “kwikil . . . wamubangaku,” mudi kamu mwabwakay Isay. Kambuy Paul wafunda anch: “Ndiy weza kudi aend amwinend, ni adinga aend kamwakap.” (Yoh. 1:11) Kambuy Pita wayileja Ayuda anch: “Nzamb wa Aburaham ni wa Isak ni wa Yakob, Nzamb wa angaketu, ndiy wamutumbish kal mwanend Yesu, wapananya en, wamwitunany kurutu kwa Pilat pasotay ndiy kumulikishaku. Pakwez en wamwitunanya Umwing Utumbila.”—Mid. 3:13, 14.
4. Mutapu ik wovangay Yesu kusansan?
4 Isay wabwaka kand anch Yesu “witiya kusend chisend cha mar ni kusansan.” Pasalay mudimu wend, pa yisu yimwing, Yesu waziyanga kamu, pakwez kwikil uman ulejena anch wayela. (Yoh. 4:6) Pakwez, wova kusansan kwa mayej ma antu alejangay. Wayovila riy ni wayoka avud au. (Marko 1:32-34) Yesu wawanyisha uprofet ulondila anch: “Chakin kamu, wasenda mar metu, ni kwitwik chisend cha kusansan kwetu.”—Isay 53:4a; Mat. 8:16, 17.
Mudi Anch “Nzamb Wamuleja Kal Kadimu”
5. Ayuda avud amana mutapu ik rufu ra Yesu, ni mulong wak chawejinaku kand ku mar mend?
5 Tang Isay 53:4b. Antu avud a pa chirungu cha Yesu kovap kwau kurumburik kwa mar mend ni rufu rend. Itiyija anch Nzamb ndiy wadinga umupupina, mudi uyedila musong wijondila. (Mat. 27:38-44) Ayuda amufunda Yesu anch usalen. (Marko 14:61-64; Yoh. 10:33) Pakwez, Yesu kadingap mwin yitil ap mwin masaal. Pakwez, mulong wa rukat rend rijim mulong wa Tatukwend, chitongijok cha kwel anch wadinga ufanyidin kufa ni kumufish nich mulong wa masaal, kwawejina ku mar mend mudi Kashalapol wa Yehova. Ap mwamu, ndiy wadinga tayad kuziyil ku rusot ra Yehova.—Mat. 26:39.
6, 7. Mu mutapu ik Yehova ‘wamumesha mar’ Kashalapol wend ushinshamena, ni mutapu ik ‘chamusangaresha’ Nzamb?
6 Chishimokishinap pitutangina anch uprofet wa Isay ulondil anch antu akwau amumana Kristu mudi anch “Nzamb wamuleja kal kadimu” pakwez tukutwish twashimok uprofet walonda kand anch, Yehova ulondil anch: “Riner rading rusot ram chakwel ndiy amana mar.” (Isay 53:10) Yehova walonda kand anch: “Mwinou ndiy kashalapol wam . . . umwing unatonda, unikata kusanger,” ov, mutapu ik radinga “rusot [ra Yehova] chakwel ndiy amana mar”? (Isay 42:1) Mu mutapu ik wasangeray Yehova?
7 Chakwel anch tutesha kurumburik kwa chikunku chinech cha uprofet, tufanyidin kuvurik anch pasambishay Satan warishish ukaleng wa Yehova, Satan widjidjeka piur pa kushinshaman kwa atushalapol a Nzamb a mwiur ni adia pansh. (Yob 1:9-11; 2:3-5) Pakwez, kusutil ku kushinshaman kwend djat ni ku rufu, Yesu wakula mu mutapu utentamina kusarumun kwa Satan. Chawiy lel, palikay Yehova anch Kristu amujipa kudi akankuny nend, pakad kwidjidjek Yehova wova kusansan pamumanay Kashalapol wend watonday akat kumujip. Pakwez, kushinshaman kukash kwa Mwanend kwawiy kwamusangaresha nakashYehova. (Jinsw. 27:11) Chikwau kand, Yehova wadinga wij anch rufu ra Mwanend rikuyiletin yiyukish antu akukarumuka, ni chawiy kand chamuletina musangar ujim.—Luka 15:7.
“Mulong wa Yitil Yetu Yawiy Yamutapodilau Yitat”
8, 9. (a) Mutapu ik ‘amutapola Yesu yitat mulong wa yitil yetu’? (b) Mutapu ik washinshikay Pita pa mulong winou?
8 Tang Isay 53:6. Mudi amikoku ashadikina, antu akayitil akat kutamb-tamb, mulong wa kukimb kukolik ku mayej ni ku rufu yaswanau kudi Adam. (1 Pita 2:25) Chidiau akayitil, kwikil muntu ukutwisha kuchirish yom yashadishay Adam. (Kus. 49:7) Pakwez, mulong wa rukat rend rijim, “Nzamb wamumesha ndiy mar ma kufa nich kwetu,” Mwanend mukatish ni Kashalapol wend watonday. Chitiyijay ‘amutapola yitat mulong wa yitil yetu’ ni “amubula mulong wa kuyip kwetu,” chawiy Kristu wasenda yitil yetu pafay pa mutond wa mar mulong wetwetu.
9 Kambuy Pita wafunda anch: “Mulong kwawiy kwanitazukinau; mulong Kristu kand wakumenanya en mar, wakushilanya chilik chakwel ulondulany mu ruzau rend. Ndiy amwinend wasenda yitil yetu mu mujimbu wend pa mutond, chakwel etu twafila mu yitil tukwikal aom ku kutentam.” Kupwa, palonday ya uprofet wa Isay, Pita wawejaku kand anch: “Ku yisupusupu yend kwawiy kwakokilanya kal en.” (1 Pita 2:21, 24; Isay 53:5) Chom chinech chayanzurila akayitil njil chakwel achakula nend Nzamb, mudi mwalonday Pita anch: “[Kristu] kamu muntu utentamina wafa kapamp kamwing wakad kand kuswir kwa kufa kapamp kakwau mulong wa akayitil, chakwel atushikij kudi Nzamb.”—1 Pita 3:18, Manswik Masu.
“Wading Mudi Mwan a Mukoku Utwadilau ni Kumujip”
10. (a) Yom ik yalonday Yohan mubabatish piur penday Yesu? (b) Mulong wak mazu ma Yohan madinga mafanyidin kamu?
10 Tang Isay 53: 7, 8. Chisu Yohan mubabatish chamumanay Yesu ukat kwez, walonda anch: “Talany mwan a mukoku wa Nzamb, ukata kusend yitil ya mangand!” (Yoh. 1:29) Palonday anch Yesu udi mwan a Mukoku, chimeken anch pamwingap Yohan wadinga utongidina mu manangu mazu ma Isay, malondila anch: “Wading Mudi Mwan a Mukoku Utwadilau ni Kumujip.” (Isay 53:7) Isay wabwaka anch: “Ndiy wapana mwom wend ku rufu.” (Isay 53:12) Cha musangar, pa uchuku watenchikay Yesu Chivurikish cha rufu rend, wayinkisha atwimbuy 11 ashinshamena dikopu dia nviny ni wayileja anch: “Minam madi mash mam ma manswik mayichilau avud ku dijimangeshil dia yitil.”—Mat. 26:28.
11, 12. (a) Mutapu witiyijay Izak kumulambul yifanikeshin nchik ni mulambu wa Kristu? (b) Yom ik tufanyidina kulam mu manangu mulong wa Aburaham Mujim, Yehova chisu tukusala Chivurikish?
11 Mudi kand Izak wa pasak, Yesu wipana mudi mulambu pa chintamb cha Yehova mulong wa kusal rusot rend. (Dis. 22:1, 2, 9-13; Heb. 10:5-10) Pitiyijay Izak chakwel amulambula, Abraham ndiy wadinga usotila kumulambul. (Heb. 11:17) Chawiy chimwing, Yesu ni ndiy witiyija kufa, pakwez Yehova ndiy Watenchika difut dined. Mulambu wa Mwanend ikundj wadinga uman wa rukat rikurikina ra Nzamb mulong wa antu.
12 Yesu amwinend walonda anch: “Mulong Nzamb wakata ngand, ndiy wapana Mwanend wa kuval kwend umwing, chakwel mwawonsu ukwitiya kudia ndiy kakujiyip, pakwez ukwet kal mwom wa chikupu.” (Yoh. 3:16) Kambuy Paul wafunda anch: “Pakwez Nzamb watuleja rukat rend mwamu: pitwading akayitil Kristu watufila.” (Rome 5:8) Pachinech, anch twamutumbish Kristu mu kuvurikang rufu rend, kangal twavuramen anch watenchika mulambu winou wikalaku udi Aburaham Mujim, Yehova. Tusadil Chivurikish mulong wa kumutumbish.
Kashalapol “Ukez Kuyishikij Antu Avud ku Kutentam’”
13, 14. Mutapu ik Kashalapol wa Yehova wayishikija “antu avud ku kutentam”?
13 Tang Isay 53:11, 12, Les Saintes Écritures — Traduction du monde nouveau. Yehova walonda, mulong wa Kashalapol wend watonday anch: “Kashalapol wam muwamp unikweta nend musangar, ukez kuyishikij antu avud ku kutentam.” Mu mutapu ik? Verse wa 12 utwinkishin kwinsudiel mutapu wa kutan chakul chiwamp. “Chad ndiy wayilembidila in kufa nich.” An awonsu a Adam avadika akayitil, “akayitil,” ni afanyina kutambul “difut dia chitil,” rufu. (Rome 5:12; 6:23) Kuchakul kwadinga kwa usey pakach pa Yehova ni muntu mukayitil. Shapitre wa 53 wa uprofet wa Isay ulejen kamu nawamp mutapu ‘walembilay’ Yesu, ap anch wayilondina, mulong wa antu akayitil, walonda anch: “Mar mend matuletila etu chisambu, ni yitat yend yatupandisha.”—Isay 53:5.
14 Pasenday yitil yetu ni kufa mulong wetwetu, Kristu ‘wayishikija antu avud ku kutentam.’ Paul wafunda anch: “Mulong chamusangarisha Nzamb kutek wiNzamb wend wawonsu mu Mwanend. Chawiy mu Mwanend Nzamb wayichakwisha yom yawonsu. Nzamb waleta chisambu ku mash ma Mwanend madjishilay ku mutond . . . , mwamu mwachirishay yom yawonsu ya pansh ni ya mwiur kudi ndiy amwinend.”—Kol. 1:19, 20, MM.
15. (a) Anany adia ‘Yom ya mwiur’ yalonday Paul? (b) Anany kusu itiyijinau kudia yijingidij ya Chivurikish, ni mulong wak?
15 ‘Yom ya mwiur’ yachakwishay Yehova kusutil ku mash michilay Kristu yadinga in Kristu azizidilau many, atazukau mulong wa kuyikel pamwing nend Kristu mwiur. In Kristu “atazukinau kudi Nzamb” ayilejen anch akwet: “kuying kukata kulet mwom.” (Heb. 3:1, MM; Rome 5:1, 18, MM) Yehova uyitiyijin mudi an end a muspiritu. Spiritu utumbila uyinkishining uman uyilejininga anch adi “answan nend Kristu,” ayitazuka ikala ant ni in kupesh mu Want wend wa mwiur. (Rome 8:15-17; Kubur. 5:9, 10) Ikala yid ya Isarel wa muspiritu, “Isarel a Nzamb,” ni ayandjikin mu “manswik masu.” (Yer. 31:31-34; Gal. 6:16) Mudi yid ya manswik masu, ayinkishin usu wa kudia yijingidij ya Chivurikish, pamwing ni kuna rupas ra nviny musuz, ralonday Yesu anch: “Rupas riner rawiy manswik masu ma mash mam, mawiy kamu madjishilau mulong wenen.”—Luka 22:20.
16. Yisu “yom . . . ya pansh,” ni mutapu ik uyishikijinau ku kutentam ku mes kwa Yehova?
16 “Yom . . . ya pansh” yidi amikoku akwau a Kristu, akweta ruchingej ra kushakam chikupu pa divu. Ni kudi inay, Kashalapol watonday Yehova ukuyishikij ku kutentam ku mes kwa Yehova. Mulong itiyijin mulambu wa difut dia Kristu ni chawiy “oyishish kal maswin mau to-o, ayitokishish mu mash ma Mwan a mukoku,” Yehova uyimen anch atentamin, kichidiap mudi an a muspiritu, pakwez mudi arund nend, uyinkishin ruchingej ruwamp ra kupand ku “mar makash.” (Kubur. 7:9, 10, 14; Yak. 2:23) Awiy kadiap mu manswik masu, ni kakwetap ruchingej ra kushakam mwiur, amikoku akwau inay kakatap kudia yijingidij ya Chivurikish pakwez akat kukumangan mudi in kutal a kalimish.
Tumujikitishin Nakash Yehova ni Kashalapol Wend Witiyijinay!
17. Mutapu ik kwilej kwa uprofet wa Isay wisambidina padiay Kashalapol utukwashin kurijek manangu metu mulong wa Chivurikish?
17 Kushinshikin kwa uprofet wa Isay wisambidina padiay Kashalapol yidi njil yiwamp chakwel tutwisha kurijek manangu metu mulong wa Chivurikish cha rufu ra Kristu. Kwatutwishish kal etu kumutala “Yesu, kalal ni mwin kutenchikish wa ritiy retu.” (Heb. 12:2) Twilej kal anch Mwan a Nzamb kadingap mwin kubwambwil. Mulong wa kushalijan kwend ni Satan, ndiy wasangera anch Yehova amuleja, ni wamwitiyija mudi Mwant Mukaleng. Twilej kal anch chisu chasalay Yesu mudimu wend panap pansh, wayanakena antu alejangay, ni wayoka avud au ku mujimbu ni muspiritu. Wamekesha yom yikezay kusal pakwikalay Mwant Mesia mu dirijek dia yom yisu pakutekay “dirumburish ditentamina pa mangand.” (Isay 42:4) Mushiku wamekeshay wa kulejan rusangu ra Want wading mudi “kutok ku michid yawonsu,” yayivurisha in kwilej end kulejan rusangu ruwamp nich mushiku pa divu diawonsu.—Isay 42:6.
18. Ov, mulong wak uprofet wa Isay wizwishin too mu michim yetu kumujikitish Yehova ni Kashalapol wend ushinshamena?
18 Uprofet wa Isay utukwashin kand tutesha nawamp win kamu kurumburik kwa chom chijim chasalay Yehova chisu chamutumay Mwanend mukatish panap pansh mulong wa kuman mar ni kutufil. Rusot ra Yehova kiradingap anch Mwanend amana mar, pakwez ndiy wasangera mu kushinshaman kukash kwa Yesu djat ni ku rufu. Niyetu tukutwish twov musangar mudi wovay Yehova, nich kwijikang anch yom yawonsu yasalay Yesu yadinga mulong wa kumekesh anch Satan udi mukamakasu ni mulong wa kutumbish dijin dia Yehova, chawiy chachidijay mbil ya ukaleng Wend. Chikwau kand, Kristu wasenda yitil yetu amwinend ni wafa mulong wetwetu. Mu mutapu winou, wasala chakwel chitwishika ku kachisak kakemp ka akadivar nend azizidilau many ni kudi amikoku akwau chakwel ashikena ku kutentam ku mes kwa Yehova. Mudi mutukukumangena pamwing mulong wa Chivurikish, el michim yetu yizulijana too nich kumujikitish Yehova ni Kashalapol wend ushinshamena.
Kuchirikin
• Mu mutapu ik ‘wasangeray’ Yehova anch Mwanend ‘amumesha mar’?
• Mutapu ik ‘amutapola Yesu yitat mulong wa yitil yetu’?
• Mutapu ik Kashalapol wayishikija “antu avud ku kutentam”?
• Mu mutapu ik kwilej uprofet wisambidina Kashalapol kurijekin manangu men ni michim yen mulong wa Chivurikish?
[Chipich chidia pa paj wa 26]
‘Amudiurola ni kwikil wamubangaku’
[Chipich chidia pa paj wa 28]
“Ndiy wapana mwom wend ku rufu”
[Chipich chidia pa paj wa 29]
“Amikoku akwau” akat kukumangan ku Chivurikish mudi in kutal akalimish