Mwin Kurijek Kwez Kwend Wavadik kal

Elizabet udi piswimp ni kuval. Mwanamakwend Mariy washakama nend mu angond asatu. Katat chisu chawanyin kal kudi Mariy cha kumuladik mwanamakwend ni kusal weny ulemp mulong wa kuchirik kwol kwend kwinkaj kwa Nazaret. Piswimp kupwa kwa angond musamban, Mariy ukuval mwan ikundj.

Machuku makemp kupwa kwa Mariy kuchirik, Elizabet wavala. Chading chisangareshina mud ik pavalay Elizabet nawamp ni mwanend wading mukash! Chisu chamutadishay Elizabet mwanend ikundj kudi antu akwau ni anamakwend, asangara nakash.

Chijil cha Nzamb chayinkishau in Isarel chalonda anch pa dichuku dia chinan kupwa kwa kumuval mwan ikundj, afanyidin kumutwal ku mukand ni afanyidin kumupil dijin. (In Levi 12:2, 3) Antu amwing atonga anch Zakariy wafanyina kumupil mwanend dijin diend. Pakwez, Elizabet walika ni walonda anch: “Bwat! dijin diend ndiy Yohan.” (Luka 1:60) Vurik anch mwangel Gaburiel walonda anch mwan winou ikundj afanyina kumupil anch Yohan.

Antu akwau ni anamakwend alika ni alonda anch: ‘Kwikil muntu wa mu dijuku dien ukweta dijin dined.’ (Luka 1:61) Antu inay iloka miny mulong wa kumwipul Zakariy dijin dikumupilay mwan winou. Zakariy wita disalet ni wafundap kwakul kwend anch: “Dijin diend ndiy Yohan.”—Luka 1:63.

Mu chisu chinech, Zakariy wasambisha kand kulond mu chilay. Uvurikin anch ndiy washadisha ukaliweny wend wa kulond palikay kwitiyij yom yamulejau kudi mwangel—anch Elizabet ukuval mwan ikundj. Katat, pasambishay kal kand Zakariy kulond, amutej nend ashimoka nakash ni iyipula anch: “Mwan winou ukwikal mutapu ik?” (Luka 1:66) Amana ukash wa Nzamb mutapu wamupilau Yohan dijin.

Kupwa, Zakariy amutakela nich spiritu utumbila ni walonda anch: “Kuyuk kwikala kudi [Yehova], Nzamb wa Isarel, mulong ndiy wayital kal antu end ni kuyikol; watulangwishin kal kand musengu wa dipandish mu chikumbu cha kashalapol wend David.” (Luka 1:68, 69, TMK) “Musengu wa dipandish,” urumburikin Nsalejetu Yesu, wading kandikal avadika. Piur pa Mwan winou, Zakariy walonda anch Nzamb “washilamu kutukamunin mu makas ma akankuny, chad watwitiya etu kumusadil pakad wom. Wasala mwamu chakwel etu twikal antu atumbila ni atentamina kurutu kwend machuku mawonsu mitudia aom.”—Luka 1:74, 75.

Piur pa mwanend ikundj, Zakariy wasambela kulond anch: “Ey, mwanam, akez kukupil anch [muprofet] wa Nzamb Upandakena Piur pa yawonsu. Ey ukez kutakelaku kurutu kwa [Yehova] mulong wa kurijek njil yend. Ey ukez kuyilej antwend akeza kupand anch wayilikishina yitil yau, mulong Nzamb wetu udi mwin riy ni ranaken. Ndiy ukez kututumin dipandish, mudi muten ukata kusasumuk pamanch. Dipandish didi dia mwiur dikez kuyimunyikin antu awonsu ashicha mu mididim ya rufu. Dikez kututakel chakwel tukwendil mwi njil ya chisambu.” (Luka 1:76-79) Uprofet winou wading ukasikeshin mud ik!

Pa chisu chinicha Mariy wading kandikal amwata, washika kwol kwend mu Nazaret. Yom ik yamushikena pamwijikau anch wimishin kal?