In Kwilej Milong Ya Atutumbu Ayil Kumutal Yesu

Antu amwing adiokala Kwingangel. Antu inay ading in kwilej milong ya atutumbu—alondang anch, ang asal mwamu akutwish kuyilej antu yom yikutwisha kuyishiken mu machuku ma kurutu. (Isay 47:13) Padingau Kwingangel, amana “katumbu” ni asala weny mu makilometre mavud mulong wa kumulondul, katumbu winou kayap ku Betlehem pakwez waya ku Yerusalem.

Pashikau in kwilej milong ya atutumbu ku Yerusalem ipula anch: “Ov, kwisu kwavadikinay mwan ukeza kwikal mwant wa in Yuda? Etu twamen katumbu wend udiokil kwingangel, chad twezin mulong wa kumwifukwil.”—Mateu 2:1, 2.

Mwant Herod wa mu Yerusalem pateshay rusangu riner wajimana nakash. Chawiy, wayitazuka in kupesh ni antakel a relijon akwau in Yuda ni wayipula chakwel amuleja ndond yavadikinangay Kristu. Amwakula kukwatijan ni mazu madia mu Bibil malondina anch: “mu Betlehem.” (Mateu 2:5; Mike 5:2) Pa chisu chinicha, Herod wayileja in kwilej milong ya atutumbu ku ujindj anch: “Yangany, ukamusurabany mwan. Anch wamumanany nlejanyamu, chakwel niya kand ni kumwifukwil.” (Mateu 2:8) Pakwez, Herod wading ukimbin ijika kudiay mwan winou chakwel amujipa!

Payau in kwilej milong ya atutumbu, kwasadika chom chimwing chishimokishina. “Katumbu” wading ulondwilau padingau Kwingangel wasambisha kand kushemunik. Chakin kamu, kadingap katumbu mudi atutumbu akwau, pakwez wading kwend mulong wa kuyitakel. In kwilej milong ya atutumbu inay amulondula katumbu winou djat ni pimanay piur pa chikumbu chadingay Josef ni Mariy pamwing ni mwanau ikundj.

Pandamau in kwilej milong ya atutumbu mu chikumbu, amutana Mariy umusendin mwan—Yesu. Pa chisu chinicha, in kwilej milong ya atutumbu, asa manungun pansh, amwifukwil mwan. Amwinkisha yipan ya utad wa or, malash, ni mira. Pading pachirikinau chakwel aya kudiay Herod, Nzamb wayibabesha mu chilat anch kafanyidinap kuya kudiay Herod. Chawiy, ayila njil yikwau mulong wa kuchirik kwol kwau.

Utongin anch nany waleta “katumbu” winou wayitakela in kwilej milong ya atutumbu? Vurik anch, katumbu winou kayitwalap kapamp kamwing kwi ndond yadingay Yesu ku Betlehem. Pakwez, wayitwala ku Yerusalem, kwadingay Mwant Herod wakimba kumujip Yesu. Anch Nzamb kayibabeshap in kwilej milong ya atutumbu kulik kumulej Herod ndond yadingay Yesu, mwant winou wafanyina kumujip. Chimeken patok anch, wading mukankuny wa Nzamb, Satan wakimba anch amujipa Yesu, wawiy mutapu wasadinay mulong wa kuwanyish chitongijok chend.