DILEJAN PIUR PA KULIKISHIN

Antu akula ni asala mu mutapu kushalijan ku yom yalonday ni yasalay Yesu kukwatijan ni mwikadil wa michim yau. Yom yiney yamekana patok mu chikumbu cha muntu umwing wadinga ku Galalia. Mufaris umwing utazukinau anch Simon wamutazuka Yesu kwol kwend mulong wa kudia, pamwing ap wamutazuka kand mulong ashinshikin mutapu ukusalay chilay. Pamanay Yesu anch chading chisu chiwamp cha kuyilej antu ading kwinikwa, Yesu witiyija kuya, mudi mwasalay kand pamutazukau kuya kudia pamwing nau in kulambwish yitad ni akayitil.

Pakwez, Yesu kamwakap nich chisambu mudi mwayakangau angendj akwau. Njil ya kuya ku Palestin yading ni rufunfut nakash, chawiy yisapat ya antu ayangang mwin njil yiney yikisang nakash nich rufunfut, chawiy kwadinga chaku cha kuyak angendj ni kuyowish ku mend mau nich mem makwetaku ka chirungul. Pakwez, Yesu kamusadinap mwamu. Kamubwikatap pamwakau mudi mwading chaku chau. Kwading kand chaku cha kuyizizin angendj many ku mutu mulong wa kumekesh muchim uwamp ni muchim wa kwak angendj. Yom yiney yawonsu kamusadinap Yesu ap pakemp. Chawiy, mutapu ik wamwakau?

Paletau yakudia ku tebur, angendj asambisha kudia. Padingau ni kudia, mband umwing wandama pakad kumutazuk pakemp-pakemp mu chikumbu mwadingau angendj. Mband winou ading ‘amwij mudi mwin yitil.’ (Luka 7:37) Antu awonsu akad kuwanyin adi akayitil, pakwez mband winou wading ni mashakamin mijondila, pamwing wading mband mwin kusochik. Chimeken anch ndiy watesha malejan ma Yesu mayitazukay antu awonsu ‘akweta yisend yilimina mulong wa kuyinkish kwiswedish.’ (Mateu 11:28, 29) Pamwing ap mazu minam ni yisal ya Yesu yawiy yamubachika kuya kumukimb Yesu.

Mband winou weza ku tebur kwadingay Yesu ni wasa manungun ku mend ma Yesu. Wasambisha kudil ni mansoj mend madjila ku mend ma Yesu ni wasambisha kumakuswol nich nsuch jend. Wasambisha kusus mend ma Yesu ni wazizilaku malash mezay nich. Simon wamana yom yiney ni kasangarap chawiy chalonday anch: “Ikundj winou anch wading muprofet ing wamujinguninang mband winou umupukwina chidiay anch mukayitil.”—Luka 7:39, TMK.

Pajinguninay Yesu chitongijok cha Simon wamwela anch: “Simon, nikwet dizu dia kukulej.” Ndiy wakula anch: “Mulej, lond kwey!” Yesu wamuleja anch: “Kwading muntu umwing wayisondjika antu aad nfalang. Umwing wading ukwet chikal cha nfalang ja utad wa argent yitot yitan, mukwau wading ukwet chikal cha nfalang ja utad wa argent makum matan. Awonsu mwaad wau kwikil umwing watwisha kumuchirishin, chawiy ndiy wayilikishina awonsu yikal yau. Ov, nany wa pakach pau ukumukata ndiy kupandakan?” Pamwing ap Simon wakula nich kapipej anch: “Am [ni]tongin anch muntu walikishinau chikal chijim.”—Luka 7:40-43.

Yesu witiya. Kupwa pamutalay mband winou, Yesu wamuleja Simon anch: “Ov, ey umen [mband] winou? Pinandamanga mu chikumbu chey, ey kiwanginkishangap mem ma kowish yidjatil yam. Pakwez mband winou woyishang kal yidjatil yam nich mansoj mend, wayikuswol kand nich nswich jend ja ku mutu. Ey wangakang wakad kwinsusu, pakwez kudiokal pinandaminanga ndiy kalikinap kususu yidjatil yam. Ey kiwanzizilangap many pa mutu wam. Pakwez ndiy wanzizilang kal malash ku yidjatil yam.” Yesu wamana anch mband winou umekeshin muchim wakin wa kukarumuk ku yisal yend yijondila. Chawiy chalonday kand anch: “Yitil yend yivud ayilikishin kal. Pakwez muntu mwawonsu walikishidinau yom yikemp, ukat kumekesh kand rukat rukemp.”—Luka 7:44-47.

Yesu kakatap kusanger yisal yijondila. Pakwez, umekeshining ranaken kudi antu akata kusal yitil yikash ching anch antu inay anenganan mulong wa yitil yau ni kukarumun mwom wau kwikal in Kristu. Rongoj mud ik rovay mband winou palonday Yesu anch: “Yitil yey ayilikishin kal. . . . Ritiy rey rakupandish kal; yang ni chisambu”—Luka 7:48, 50, TMK.