Tukudishany Ukaliweny Wetu mu Mudimu wa Kulejan​—Mu Kwimik Kwilej Nau Antu Akad Kuya Kurutu

MULONG WAK CHIDI CHA USEY: Antu afanyidin kutazuk pa dijin dia Yehova chakwel apanda. (Ro 10:13, 14) Pakwez antu awonsu twilejina nau Bibil kakukatap kushakam kukwatijan ni mbil ja Yehova. Tukat kusadin nawamp chisu chetu mu mudimu wa kulejan mu kuyikwash antu akatina kuswimp mulong wa kumusangaresh Yehova. Anch mwin kwilej wa Bibil kayilap kurutu kupwa kwa kwilej nend mu chisu kanang, chidi cha manangu kwimik kwilej nend ni kusadin chisu chetu mulong wa kuyikwash antu apwitinay Yehova kudi ndiy ni ku dirijek diend. (Yh 6:44) Mu kusut kwa chisu, anch muntu waswimp yom yimwing ni wamekesh anch udi ‘mu mwikadil ufanyidina kutambul mwom wa chikupu,’ tukuchirikin kand kwilej nend Bibil.​—Mid 13:48.

MUTAPU WA KUSADIN:

• Mujikitisha mulong usotin kwikal ni ronganyin rakin.​—1Tm 2:4

• Kasikeshin pa usey wa kusadin yom yilejinay kal​—Lk 6:46-49

• Muleja mu mutapu uwamp chishimu cha Yesu piur pa mwin kukus, ni kumwipul atonga piur pa yom yimukangeshina kuya kurutu.​—Mt 13:18-23

• Nich nkeu murumburila mulong wak wimik kal kwilej nend

• Muleja anch ukwezang kumutal chisu ni chisu mulong wa kumukasikesh ni ukutwish kand kwilej nend Bibil machuku ma kurutu anch wamekesh anch uyil kurutu

TAL VIDEO, NI KUPWA AKUL KUYIPUL YILONDWILAKU EY:

• Yom ik wilejina kal kusutin mambamb mamekeshina anch mwin kwilej kayilap kurutu mu spiritu?

• Mutapu ik wamukwashau kal mwin kwilej kudi mwin kulejan kwijik anch ukwet kuswir kwa kuswimp?

• Mutapu ik usadinay mwin kulejan mu mutapu wa kumukwash mwin kwilej chakwel achirikina kand kwilej machuku ma kurutu?