Kusangar Kujim Anch Mukayitil Wakarumuk

Yisu yivud mu mudimu wend wa kulejan, Yesu wakasikeshina usey wa kwikepish. (Luka 14:8-11) Wading ukimbin kutan antu ading akatina kumusadin Nzamb nich kwikepish. Pakwez amwing pakach pau adandamena kusal yitil.

Afaris nau alej a yijil ayimananga antu inay—amanau anch akad usey—awiy ayangang kumutal Yesu mulong wa kutesh uruu wend. Chawiy Afaris nau alej a yijil alonda anch: “Muntu winou ukat kuyak in yitil ni kudia nau!” (Luka 15:2) Afaris nau alej a yijil imananga mudi adi a usey nakash chawiy chayisadinangau antu akwau mudi rufunfut radjatangau. Mulong wa kumekesh mutapu wayikisau antu inay, antakel amwing asadina dizu dia Hebereu dilondina anch ‛am ha-arets’ , “antu a mangand [divu]”.

Chinyim ni chinech, Yesu wayisadina antu awonsu nich kalimish, ranaken ni riy. Antu avud ading akad usey, ading ijau anch adi akayitil awiy akata kuya kutesh yom yafundishay Yesu. Mutapu ik Yesu wiyovay ni mwakulay ku mazu mayimp mayilondau antu inay eza mulong wa kuyikwash?

Mutapu wakulay wovakana kusutil chilakej chikash chasadinay, mudi chilakej chasadinay kand padingay mu Kapernaum. (Mateu 18:12-14) Yesu walonda yom yimwing yayimekesha Afaris mudi adi antu atentamina ni apandina kal ku mes kwa Nzamb. Pakwez, antu inay akad usey wayimekesha mudi antu ashadikina kal kamu. Yesu walonda anch:

“Anch muntu umwing wa pakach penen ukwet amikoku chitot, chad pashadik umwing, ov, ndiy ukusal nchik? Ndiy ukusha akwau makum chidivu ni chidivu mu madil, ukuya ni kukimb umwing ushadikina, djat ni pakumutanyinay. Pakumutanay, ukusangar nakash, ukumusend pa makij, chad ukumutwal pol. Chawiy ndiy ukuyitazuk arund nend, ni akwau atunginay nau, ukuyilej anch: ‘Am nikwet musangar nakash, mulong namutan kal mukoku wam washadikina. Chifanyidin tusangarany!’”—Luka 15:4-6.

Dilejan ik dia usey diatufundishay Yesu? Ndiy walonda anch: “Chawiy chimwing, nikulejinany, kukez kwikal musangar mwiur anch mwin yitil umwing wakarumuk kudiokal ku yitil yend. Musangar ukwovau mwiur mulong wa mwin yitil winou ukupandakanamu ukwovau mulong wa antu makum chidivu ni chidivu atonga anch: ‘Kitukwetap kuswir kwa kukarumuk kudiokal ku yitil yetu.’”—Luka 15:7.

Mazu malonday Yesu ma kukarumuk mafanyina kuyijimesh Afaris. Awiy imananga ayinau mudi adi antu atentamina ni atonga anch kakwetap kuswir kwa kukarumuk ku yitil. Chisu chamulondau Yesu nayimp kudi Afaris amwing kupwa kwa mivu yaad chisu chadinga chidilay pamwing ni in kulambwish yitad ni akayitil, ndiy wayakula anch: “Am kinezap ni kuyitazuk antu atentamina, pakwez neza mulong wa kuyitazuk akayitil.” (Marko 2:15-17) Afaris inay ading imena mudi atentamina akanganya kwijik mutapu wa kukarumuk ku yitil yau, ni chinech chaletap musangar mwiur. Pakwez chadingap mwamu anch mukayitil wakarumuk kamu chakin.

Mulong wa kukasikeshin pa musangar udinga mwiur anch mukayitil washadika wachirik, Yesu wasadina chilakej cha muntu udia mu dijuku palonday anch: “Anch mband umwing ukwet nfalang ja utad wa argent dikum [drachme], chad pashadik rumwing, ov, ndiy ukusal nchik? Ndiy ukulimik [lamp] wend, ukukomb mu chikumbu chend, kusurab kwawonsu djat ni pakurutanyinay. Anch warutan kand, ukuyitazuk arund nend, ni akwau atunginay nau, ukuyilej anch: ‘Am nikwet musangar nakash, mulong narutan kal rufalang ram. Chifanyidin tusangarany!’”—Luka 15:8, 9.

Dilejan diafundishay Yesu didi dia chilik chimwing ni dilejan diafundishay mu chishimu cha mukoku washadika. Chawiy walonda anch: “Chawiy chimwing, nikulejinanya, [angel] a mwiur akez kusangar nakash anch mwin yitil umwing wakarumuk kudiokal ku yitil yend.”—Luka 15:10.

Tong mutapu wovilingau angel a Nzamb musangar pamumeningau muntu wasala chitil wachirik! Chom chinech chidi cha usey nakash mulong akayitil akarumukininga akat kwikal kand ni ndond yau mu Want wa Nzamb wa mwiur ni akat kwikal kand ni ndond ya piur kusutamu yikwetau angel! (1 Korint 6:2, 3) Pakwez angel kakovangap mukau. Chawiy, mutapu ik tufanyidina kwov niyetu anch akayitil amuchirikin Nzamb?