Yehova Ukatin Anch Antu Awonsu Akarumuk

1. Chirumburikin ik kukarumuk?

ANCH twasal chom chiyimp, chid cha usey kukarumuk. Mu Bibil, muntu ukarumukina ud muntu uswimpina manang mend piur pa chisal chiyimp, wimikina kuchisal, ni ukwatina mupak wa kulik kuchichirikin.​—Mat. 3:8; Mid. 3:19; 2Pita 3:9.

2. Mulong wak tufanyidina etu awonsu kwilej piur pa kukarumuk? (Nehemiy 8:9-11)

² Antu awonsu ada aom afanyidin kwilej piur pa kukarumuk. Mulong wak? Mulong etu awonsu tukat kusal yitil dichuku dawonsu. Mulong tud an a Adam ni Ev, etu awonsu twaswana chitil ni rufu. (Rom 3:23; 5:12) Kwikil muntu ap umwing widoshinamu. Ap amakundj ading akweta ritiy rikash, mud kambuy Paul, niyau arisha ni chitil. (Rom 7:21-24) Ov, chinech chirumburikin anch tufanyidin kwikal chisu chawonsu mu ushon mulong wa yitil yetu? Bwat, Yehova ud mwin ranaken, ni ukatin anch twikal ni musangar. Shinshikin chilakej cha in Yuda a pa chirung cha Nehemiy. (Tang Nehemiy 8:9-11.) Yehova kakatap anch ova ushon kupandakan mulong wa yitil yau ya pakur, pakwez wakata anch ikal ni musangar mu difukwil dend. Yehova wij anch kukarumuk kukat kuletish musangar. Chawiy ukat kutufundish piur pa kukarumuk. Anch twakarumuk kudokal ku yitil yetu, tukutwish kwikal ni kashinsh anch Tatukwetu wa ranaken ukutulikishin.

3. Yom ik tukwisambina mu mutu wa mulong winou?

³ Mu mutu wa mulong winou tukwisambin yom yisatu piur pa kukarumuk. Cha kusambish, tukwilej yom yayifundishay Yehova in Isarel piur pa kukarumuk. Cha kaad, tukuman mutapu Yehova wayikwashay akayitil kukarumuk. Ni cha kasatu, tukwisambin yom yilejau in kwilej a Yesu piur pa kukarumuk.

YOM YAYIFUNDISHAY YEHOVA IN ISAREL PIUR PA KUKARUMUK

4. Yehova wayifundisha in Isarel yom ik piur pa kukarumuk?

⁴ Payitenchikay in Isarel kwikal muchid, Yehova wasuka nau mansuk, ni amukana anch akumaziyin. Anch adandamena kuziyin yijil yend, Yehova wafanyina kuyiking ni kuyiyukish. Piur pa yijil yiney, wayinkisha kashinsh anch: “Mulong yijil yiney yinikulejinany[a] ilel unou kiyidiap kulemp, ap kiyikasikenap kwau kuyitesh.” (Kuv. 30:11, 16) Pakwez anch amubwambwil​—chilakej, kusutin kutond kuyifukwil anzamb akwau—​wafanyina kuyitambul chiyukish chend, ni afanyina kuman mar. Pakwez chinech chirumburikinap anch Yehova wafanyina kuyidjubul rawonsu. Ading ni mutapu wa ‘kuchirik kud [Yehova] Nzamb wau ni kutesh dizu dend.’ (Kuv. 30:1-3, 17-20) Mu kulond kukwau, afanyina kukarumuk. Anch asala mwamu, Yehova wafanyina kuyisejin piswimp ni kuyiyukish kand kapamp kakwau.

5. Mutapu ik wamekeshay Yehova anch kayilikap antwend? (2 Ant 17:13, 14)

⁵ Antu atonday Yehova amubwambwila tupamp ni tupamp. Ifukwila atupwany, ni asala kand yom yikwau yiyimp nakash. Mud chibudikin, amana mar. Pakwez Yehova wadandamena kuyikwash antwend chakwel amusadin kand. Watuma aprofet tupamp ni tupamp mulong wa kuyikasikesh antwend kukarumuk ni kumuchirikin kand ndiy.​—Tang 2 Ant 17:13, 14.

6. Mutapu ik Yehova wasadinay aprofet end mulong wa kuyifundish antwend piur pa usey wa kukarumuk? (Tal kand chipich.)

⁶ Yisu yivud Yehova wasadina aprofet mulong wa kuyibabesh ni kuyikand antwend. Chilakej, Nzamb walonda kusutin Jeremiy anch: “Ey, Isarel wimikin dis, chirik kudi am. Am nidi mwin riy, kinikwovap ujim. Kinikez kakujimenap chikupu. Ching kamu kwitiyil kufa nich kwey kuwamubwambwila [Yehova] Nzamb wey.” (Jer. 3:12, 13) Yehova walonda kand kusutin Jowel anch: “Karumukany kwen chakin, udiokalany ku yitil, chad wezany kudi am.” (Jow. 2:12, 13) Wamupepila Isay kulond anch: “Itokishany, dioshany yisalijok yen yiyimp kurutu kwam. Likany kusal nayimp.” (Isay 1:16-19) Ni kusutin Ezekiel, Yehova wipula anch: “Ov, utongilany am nikat kusangar mulong wa rufu ra muntu muyimp? Bwat, nikusangar anch ndiy wakarumuk ni kwitiyil yitil yend chakwel apanda. Am kinisotilap umwing wenen afa. . . . Karumukany, udiokalany ku yitil chakwel upandany.” (Ezek. 18:23, 32) Yehova ukat kwov musangar anch wayiman antu akat kukarumuk, mulong ukatin anch adandamen kushakam chikupu! Pakwez Yehova kakatap kwend kuvung makas ni kuchingel anch muntu aswimp ni kupwa chad amukwasha lel. El tumanany yilakej yimwing.

7. Yom ik yayifundishay Yehova antwend kusutin kusadin rusang ra muprofet Ozey ni mukajend?

⁷ Shinshikin yom yayifundishay Yehova antwend kusutin chilakej chakin cha Gomer, mband wa muprofet Ozey. Kupwa kwa kusal makaj, wamulika Ozey mulong wa kwend ni amakundj indj. Ov, wading ni mutapu wa kukarumuk? Yehova ukata kuman yida mu muchim wa muntu wamuleja Ozey anch: “Yang kand ukamekesh rukat rey kudi mukajey ukata kusochik kudi nfumwend wa kuns. Chakin kamu, ufanyidin kumukat mudi am chiniyikatila antwam in Isarel, ap anch angombap nchik nyim, aya kudi [anzamb akwau].” (Ozey 3:1; Jnsw. 16:2) Umen anch mband wa Ozey wading uchidandamedin mu chitil chend chikash. Pakwez chikalap nchik mwamu, Yehova wamuleja Ozey kumukimb Gomer, kumulikishin, ni kumuchirish ku chikumbu.a Kusutin chilakej chinech, Yehova wakata kuyifundish antwend mutapu wiyovay piur pau. Ap anch ading awidin kal mu yitil yikash, Yehova wadandamena kuyikat, kuyikimb, ni kuyikwash chakwel akarumuk ni aswimp mwikadil wau. Ov, chilakej chinech chimekeshin anch Yehova, ukata ‘kushinshikin yida mu muchim,’ ukumukimb muntu udandamedina mu chitil chikash ni kusal usu wa kumukwash chakwel akarumuk? (Jnsw. 17:3) El tumanany.

MUTAPU UKATAY YEHOVA KUYIKWASH AKAYITIL KUKARUMUK

8. Yom ik yasalay Yehova mulong wa kumukwash Kayin kukarumuk? (Disambishil 4:3-7) (Tal kand chipich.)

⁸ Kayin wading mwan wa kusambish wa Adam ni Ev. Mud an akwau a Adam, Kayin niyend waswana kud anvaj end chibachikin cha kusal yom yiyimp. Chikwau kand, Bibil ulondin piur pend anch: “Yisalijok ya [Kayin] yading yiyimp.” (1 Yoh. 3:12) Pamwing ap dawiy diyingishin damubachika Yehova “[kumulik Kayin] ni mulambu wend walambulay” chisu chapanay yakupesh. Pa ndond pa kuswimp mwikadil wend, “[Kayin] wova ujim nakash, chad mpal yend yayipa mulong wa ujim.” Yom ik yasalay kand Yehova kupwa kwa yom yiney? Wisamba nend Kayin. (Tang Disambishil 4:3-7.) Yehova wamutongisha Kayin nich kwitudish, wamuleja anch wafanyina kumuyukish anch wasal yom yiwamp, ni wamubabesha anch ujim wend ukutwish kumushikij kusal yom yiyimp. Cha ushon, Kayin walika kutesh. Walika kwitiy yom yasalay Yehova mulong wa kumukwash kukarumuk. Palikay Kayin kumutesh Nzamb, ov, Yehova wakwata mupak wa kulik kuyikwash akayitil akwau kukarumuk? Bwat kamu!

9. Mutapu ik Yehova wamukwashay David kukarumuk?

⁹ Yehova wading umukatin nakash Mwant David. Washikena ap kumutazuk anch “muntu wa mutapu nikatila am.” (Mid. 13:22) Pakwez David wasala yitil yijim nakash, mud makaj ni kujipan. Kukwatijan ni Chijil cha Moses, David wading ufanyidin kufa. (Lev. 20:10; Kuch. 35:31) Pakwez, Yehova wakata kumukwash David kukarumuk.b Wamutuma muprofet Natan kuya kumuman mwant, ap anch David wading kand kal amekesh chijingidij ap chimwing cha kukarumuk. Natan wasadina chilakej mulong wa kupukun muchim wa David. David washikena kujingunin anch wamurumbukina Yehova nakash, ni wakarumuka. (2 Sam. 12:1-14) Wafunda kuseng umekeshina mutapu wanengananay piur pa yom yasalay. (Kus. 51:1) Kuseng winou wayongojin kal akayitil avud ni wayibachikin kal kukarumuk. Ov, chitusangareshinap pa kuman anch Yehova wamukwasha nich rukat kashalapol wend David kukarumuk?

10. Mutapu ik wiyovila piur pa mutapu ukatay Yehova kutushimpishin muchim ni kutulikishin etu antu akayitil?

¹⁰ Yehova ukisin chitil, ni uchikisin mu mitapu yawonsu. (Kus. 5:4, 5) Pakwez, wij anch etu awonsu tud akayitil, ni mulong utukatin nakash, ukat kutukwash kurishikish chitil. Chisu chawonsu ukat kusal usu wa kuyikwash ap akayitil ayimp nakash kukarumuk ni kumusejin piswimp. Chitwongojin mud ik kwijik mwamu! Anch twatongijokin pa kushimpish muchim ni dilikishin da Yehova, twiyovil abachikinau kushal ashinshamena kud ndiy ni kwikal aswakela kukarumuk anch twasal chitil. El katat tushinshikinany yom yafundishay Yesu kud in kwilejend piur pa kukarumuk.

YOM YILEJAU IN KWILEJ A YESU PIUR PA KUKARUMUK

11-12. Yom ik yafundishay Yesu kud in kumutesh end piur pa mutapu uswakelingay Tatukwend kulikishin? (Tal chipich.)

¹¹ Mu mivu chitot ya kusambish C.C., chisu cha kushik kwa Mesiya chawanyina. Mud twamanang mu mutu wa mulong wasambelang, Yehova wamusadina Yohan Mubatish ni Yesu mulong wa kuyifundish antu piur pa usey wa kukarumuk.​—Mat. 3:1, 2; 4:17.

¹² Padingay pa divu, Yesu wayifundisha antu anch Tatukwend uswakeling kuyilikishin anch asal chitil. Mutapu umwing wasalay mwamu wading kusutin kuyilej rusang ruwamp ra mwan washadika. Mwan winou nsand watonda kudokal ku chikumbu ni kusal yom yimwing yiyimp nakash. Pakwez kupwa kwa chisu kanang, ‘wachirisha manang’ ni wachirika ku chikumbu. Mutapu ik wasalay tatukwend? Yesu walonda anch “pachadingay kulemp ni kwol kwau, tatukwend wamumana, wamwovila riy nakash. Ndiy waya mau, wamubwikat mwanend, wamulangwisha nich kususu ku kan.” Mwan kachingejinap anch tatukwend ukumulikishin. Chawiy wamwita anch ukutwish kusal mud kashalapol ku chikumbu. Pakwez tatukwend waswakala kumulikishin. Wamutazuka anch “mwanam” ni wamuchirisha pa ndond yend ku chikumbu. Tatuku walonda anch: “Wading washadikin kal, pakwez katat wamekan kal.” (Luka 15:​11-32) Padingay Yesu mwiur kurutu kwa kwez pa divu, chakin kamu wamana tupamp tuvud mutapu Tatukwend wayanakenangay akayitil ni kuyilikishin swa anch akarumuk. Rusang riner ratulejay Yesu ritwongojin chakin kamu ni rimekeshin mutapu uday Tatukwetu, Yehova, mwin ranaken!

13-14. Yom ik yilejay kambuy Pita piur pa kukarumuk, ni yom ik yayifundishay antu akwau piur pa kukarumuk? (Tal kand chipich.)

¹³ Kambuy Pita wileja malejan ma usey kud Yesu piur pa mutapu ukatay Yehova kuyilikishin akayitil akata kukarumuk. Pita warumbukang tupamp tuvud, ni Yesu waswakalang kumulikishin. Chilakej, kupwa kwa Pita kumutun Nsalejend tupamp tusatu, wiyova nayimp nakash piur pa yom yasalay. (Mat. 26:34, 35, 69-75) Pakwez pavumbukay Yesu, wamumekena Pita—pamwing ap panrend. (Luka 24:33, 34; 1 Kor. 15:3-5) Yesu wading wij anch Pita wading ukarumukin ni wakata kumwinkish kashinsh anch wading wamulikishidin kal.​—Tal Marko 16:7.

¹⁴ Mulong pita wijika mutapu wiyovilingay muntu anch wakarumuk ni amulikishin, wading ni mutapu wa kuyifundish antu akwau piur pa kukarumuk ni piur pa dilikishin. Chisu chikemp kupwa kwa musambu wa Pantekot, Pita wafundisha kurutu kwa chisak cha in Yuda akad kwitiyij, wayirumburila anch awiy amujipa Mesiya. Pakwez, wayikasikesha nich rukat anch: ‘Chawiy karumukany ni chirikany chakwel yitil yen ayijimwangesh, chakwel yirung ya kwiswedish yeza kud Yehova amwinend.’ (Mid. 3:14, 15, 17, 19) Pita wafundisha anch kukarumuk kukat kumubachik muntu kuswimp, charumburik anch kuswimp yitongijok ni yisal yiyimp, kwimik kusal yom yiyimp, ni kusambish kusal yom yimusangareshina Nzamb. Kambuy Pita wamekesha kand anch Yehova wafanyina kulikishin yitil yau ni kuyikusul chikupu. Ni kupwa kwa mivu yivud, Pita wayinkisha in Kristu kashinsh anch: “[Yehova] . . . ukat kukushimpishinany muchim, mulong kasotilap muntu ap umwing kusheshik, pakwez usotil antu awonsu kukarumuk kudiokal ku yitil yau.” (2 Pita 3:9) Ruchingej ruwamp mud ik rikwetau in Kristu anch asal chitil​—ap anch chikalap nchik chitil chikash!

15-16. (a) Mutapu ik wilejay kambuy Paul piur pa kulikishin? (1 Timote 1:12-15) (b) Yom ik tukwisambina mu mutu wa mulong wambakedinap ou?

¹⁵ Antu akemp kusu awiy ikadina kal ni kuswir kwa kukarumuk ni kuyilikishin kusutamu Saul wa ku Tarisis. Wading mwin kuyizengol in kwilej a Yesu muyimp nakash. In Kristu avud amana pamwing ap anch kakezap ap pakemp kukarumuk. Pakwez, chinyim ni manang ma wuntu, Yesu wading wij anch Paul wafanyina kuswimp ni kukarumuk. Ndiy ni Tatukwend amana mikadil yiwamp muday Saul. Yesu walonda anch: “Am namutond kal ndiy.” (Mid. 9:15) Yesu washikena ni ku kusal chilay mulong wa kumukwash Paul kukarumuk. (Mid. 7:58–8:3; 9:1-9, 17-20) Kupwa kwa kwikal mwin Kristu, Saul wijikana kwikal kambuy Paul, wamekesha yisu yivud kujikitish kwend piur pa mutapu wamumekeshinau kuwap ni riy kud Yehova ni Yesu. (Tang 1 Timote 1:12-15.) Nich kujikitish, Paul wafundisha anch: “Ku ranaken rend, Nzamb ukimbin kukukwash kukarumuk.”​—Rom 2:4.

¹⁶ Pateshay Paul piur pa mwikadil wa masandj ukwatishena usany wading mu chikumangen cha ku Korint, mutapu ik wapwishay mulong winou? Kusutin yom yalonday, tukutwish kwilej mutapu umekeshiningay Yehova rukat pakatay kuyipup atushalapol end nich ranaken ni kuyovil riy anch akarumuk, ni mutapu tukutwisha kumwimburij. Tukwisambin yom yiney chikurikina mu mutu wa mulong wambakedinap.