Atwimbuy Akimbin Kand Kwikal Ni Ntumb

Padiokalay Yesu nau in kwilejend kwindum kwa Pere mulong wa kuya ku Yerusalem, awiy apwisha weny wau paukau ushad wa Wit wa Yordan mulong wa kushik ku Yeriko. Antu akwau aya nau pamwing mulong wa kuya ku musambu wa Pasak wa muvu wa 33 C.C.

Pading payilau Yesu wading kurutu kwa in kwilejend, ading ni mupak wa kushik kurutu kwa chisu mulong wa musambu wa Pasak. Pakwez, in kwilej ading ovil wom. Pafay Lazar, Yesu wading ukimbin kudiokal ku Pere mulong wa kuya ku Yudeya, chawiy Tomas wayileja in kwilej akwau anch: “Ez, tuyany etu awonsu nend Mulej chakwel tukafany nend pamwing!” (Yohan 11:16, 47-53) Weny wa kuya ku Yerusalem wading wa ubaj, chawiy in kwilej ova wom wa kuya.

Mulong wa kuyirijek in kwilejend piur pa yom yikushikena, Yesu waya nau atwimbuy end kuns ni wayileja anch: “Teshany, tuyilany katat ku Yerusalem. Kwinikwa akez kumupan Mwan a muntu mu makas ma in kupesh ajim, ni ma alej a yijil. Awiy akez kumufish nich kwa kumujip. Chad akez kumupan mu makas ma antu a michid yikwau. Awiy akez kumuswingish, ni kumubul nfimbu, chad akez kumupamp pa mutond wa [mar]. Pakwez pa dichuku dia chisatu ukez kuvumbuk.”—Mateu 20:18, 19.

Kawiy kapamp ka chisatu ka Yesu kuyilej in kwilejend piur pa rufu rend ni piur pa kuvumbuk kwend. (Mateu 16:21; 17:22, 23) Pakwez, pa chisu chinech wayilej kal patok anch akez kumupampin pa mutond wa mar. In kwilej atesha mazu malonday, pakwez kijikap kurumburik kwa mazu minam. Pamwing ap awiy ading atongidin piur pa kuchirish kwa want wa Isarel pa divu, wading uchingedinau chakwel akutwish kusanger ntumb mu want winou pamwing ni Kristu.

Makwend a kambuy Jakobu nenday Yohan pamwing wading Salome waya nau pamwing mu weny winou. Yesu wayipila atwimbuy inay aad dijin dirumburikina anch: “An a chidjimin cha Nzaj,” mulong awiy kwovap wom. (Marko 3:17, TMK; Luka 9:54) Kusambishin pinipa, atwimbuy inay aad asambisha kutong anch akez kwikal ni ntumb mu Want wa Kristu. Makwau niyend wading utongin mutapu umwing. Chawiy, waya kudi Yesu mulong wa kuyilondin anend, wasa manungin kurutu kwa Yesu mulong wa kumulej mulong winou. Yesu wamwakula anch: “Ov, usotil ik? Ndiy wamwakula anch: “Nshilamu chakwel anam amakundj aad ay akez kushakam ou ku chikas chey cha katatuku, ou ku chikas chey cha kamaku piukwikala mu Want wey.”—Mateu 20:20, 21.

Chimeken anch Yohan ni Jakobu awiy amuleja makwau chakwel ayilondina. Pading patonginay Yesu piur pa usany ni kumuswingish kwafanyina kumushiken, Yesu wayileja anch: “Kiwijanyap kwen chom chiwitilanya. Ov, ukutwishany kunany rupas rinikuna am?” Awiy amwakula anch: “Etu tukutwish.” (Mateu 20:22) Chawiy, kateshap kand kurumburik kwa mazu mayilejau.

Kupwa, Yesu wayileja kand anch: “Chakin kamu, ukez kunany rupas rinikuna am. Pakwez am kinikwetap ulabu wa kutond nany ukushakama ku chikas cham cha katatuku, ap cha kamaku. Tatukwam ulamin jindond jinej mulong wa antu atonday kal.”—Mateu 20:23.

Pajinguninau atwimbuy akwau dikum piur pa yom yitau kudi Jakobu ni Yohan, chawiy inana. Ov, chimeken anch Jakobu ni Yohan asambela kupwitijan nau atwimbuy akwau mulong wa kwijik nany udia mukurump pakach pau? (Luka 9:46-48) Kwit kwinoku kumekeshin patok anch atwimbuy dikum ni yaad kateshap chiyul chayiyulau kudi Yesu mulong wa kwikepish kwikal mudi mwanikanch. Awiy adandamena kwikal ni maswir ma kukimb ntumb.

Chawiy, Yesu wakwata mupak wa kupwish mulong winou waleta rukuny pakach pau. Ndiy wayitazuka atwimbuy inay dikum ni yaad, wasambisha kuyiyul nich rukat anch: “En wijany kal antu adia in kutakel au in mangand akat kwizambwish, chad antau ajim akat kuyiyikel ku ulabu. Pakwez kichidap mwamu pakach pen. Anch muntu umwing wa pakach pen usotil kwikal muntu mujim kukupandakananyamu en awonsu, chifanyidin ndiy kwikal kashalapol wen. Ap anch muntu umwing wa pakach pen usotil kwikal muntu wa kusambish, chifanyidin ndiy kwikal muswik wenen awonsu.”—Marko 10:42-44.

Chawiy Yesu wasadina chilakej chimwing chafanyinau kwimburij—chidi chilakej chend. Ndiy wayileja anch: “Mwan a muntu kezap mulong wa kumusadil, pakwez weza mulong wa kuyisadil antu akwau, ni kupan kand mwom wend mudi [difut] mulong wa kuyikwol antu avud.” (Mateu 20:28) Mu mivu yisatu, Yesu wasala mudimu wa kulejan mulong wa kuyikwash antu akwau. Ni wasala kand mwamu pafay mulong wa antu awonsu! Chawiy, in kwilej niyawiy afanyina kwikal ni mwikadil mudi wadingay nich Kristu wakuyisadin antu akwau pa ndond pa kuyisadin awiy ni kafanyinap kukimb ndond ya katumb.