DILEJAN DIA 11

Kuzangurok

Rom 12:11

MU WISWIMP: Yisangaresha ni yikasikesha in kukutesh kusutin ku kulond nich mushiku.

Sal anch mafundish mapukuna bil muchim wey. Chisu wirijekina mulong wa kusal chikunku chey, tongin nakash piur pa usey ukweta uruu wey. Ijik nawamp yom ufundishina, mwamu ukutwish kulond yom yidiokila ku muchim.
Tongin piur pa in kukutesh. Tongijokin piur pa mutapu ukutaninawamu antu akwau mu yom ukutanga ni kufundish. Shinshikin mutapu ukusala chikunku chey chakwel in kukutesh ey asangera yom ukuyileja.
Kangal wayizuwol antu pakwez sal chikunku chey ni chirungul. Lond nich mushiku. Sadin majest ma chivadik ni chifu mulong wa kumekesh yovil yey yidia yakin.

Babal mulong kangal wayizuwol in kukutesh mu kusadin majest mawiy mamwing mudi in masengan. Sadin majest makweta kurumburik. Chakusambish lond nich kuzangurok chisu ufundishina manans ma usey ni yibachika in kukutesh ku kusal chom kanang. Kangal wayiziyish in kukutesh kusutin kupandakesh kuzangurok chisu usadina chikunku chey.