DILEJAN DIA 03
Ov, Ukutwish Kwitiyij Anch Yom Yilondinay Bibil Yid Yakin?
Mu Bibil mud kushilamu ni yiyul yivud. Pamwing ap ukatin kwilej yom yifundishinay, pakwez widjidjekin kand. Ov, ufanyidin kuchingejin kwey kushilamu ni yiyul yipaninay buku mukur mwamu? Ov, witiyijin kamu anch yom yilondinay Bibil yikutwish kukukwash kwikal ni musangar katat ni mu machuku ma kurutu? Antu avud itiyijin mwamu. El tuman anch niyey ukutwish kwitiyij.
1. Ov, yom yilondinay Bibil yid yakin bil anch yid kwau ngany?
Bibil amwinend ulondin anch mazu mend “mading makin.” (Mulej 12:10) Ulejen yom yakin piur pa antu adingaku. (Tang Luka 1:3; 3:1, 2.) In kufund nsangu ja pakur ni in kukimbijol yom ya pansh ya pakur apanin kashinsh anch machuku ma ngond, antu, jindond, ni yinship yilejenau mu Bibil yid yakin.
2. Mulong wak tukutwish kulond anch Bibil ud buku wa kuchingejin ap anch ud buku mukur?
Bibil wisambidin yom yivud yading yakad kwijikan pa chirung chamufundau. Chilakej, wisambidin yom ya siyans. Chisu chamufundau Bibil, antu avud kitiyijap yom yivud yalonday pa milong ya siyans. Pakwez, nlel unou in siyans apanin kashinsh anch yom yilondinay Bibil yid yakin. Chawiy, “malejan mend madi makin . . . chikupu ni chikupu.”—Kuseng 111:7, 8.
3. Mulong wak tufanyidin kuchingejin yom yilondinay Bibil piur pa machuku ma kurutu?
Bibil ukwet uprofeta wasambela kulejan “yom yikeza kez.” (Isay 46:10) Wasambela kulejan nich kashinsh yom yivud kurutu yisadik. Wasambela kand kulejan yom yikwau yivud yisadikina nlel. Mu dilejan dined, tukwisambinaku mauprofet mamwing pakach pa mauprofet minam. Kashinsh ka mauprofet minam kashimokishen!
ILEJA CHIKURIKINA
Isambinany mutapu yom yilondinay siyans nlel yikwatijadina ni yom yilondinay Bibil, ni isambinanyaku kand mauprofet makemp ma Bibil mashimokishena.
4. Yom yilondinay siyans yikwatijadin ni yilondinay Bibil
Pakur, antu avud itiyijang anch divu dishich pa chom kanang. Talany VIDEO.
Tal yom yasambelau kulejan mu mukand wa Job kwasut kal mivu piswimp 3 500. Tang Job 26:7, kupwa isambinany chipul ech:
Bibil walonda kal anch divu ap ngand ayisala “wakad kuyizezidik ku chom.” Mulong wak uyakin winou ukushimokishin?
Antu ashikedin kwau chad ku kutesh nawamp munyingumuku wa mem kwasut kal mivu yitot yaad. Pakwez, tal yom yalonday Bibil kwasutin kal tunan twa mivu. Tang Job 36:27, 28, kupwa isambinany yipul yilondwilaku ey:
Mulong wak kurumburil kwinoku kuswapela piur pa munyingumuku wa mem kukushimokishin?
Ov, maverse watanga kal minam makukwash kal kumuchingejin Bibil?
5. Bibil wasambela kulejan piur pa yom yijim yikeza kasadik
Tang Isay 44:27–45:2, kupwa isambinany chipul ech:
Yom ik yasambelay kulejan Bibil mivu 200 kurutu kwa Babilon kusheshik?
In kufund nsangu ja pakur apanin kashinsh anch Mwant Sirus wa in Peris ni amasalay end akwata musumb wa Babilon mu muvu wa 539 K.C.C.b Apumbula kawit wading uchidijina musumb. Kupwa kwa kwandamin ku yis yatanau kwau yawash, akwata musumb pakad kurish. Nlel unou kwasut kal mivu 2 500, Babilon washadin kal mankur kudiosh kwamusheshinau. Tal yom yasambelay Bibil kulejan.
Tang Isay 13:19, 20, kupwa isambinany chipul ech:
Yom yaushikena musumb wa Babilon yimekeshin mutapu ik kuwanyin kwa uprofet winou?
Mankur ma Babilon nlel mwi ngand ya Irak
6. Bibil wasambela kulejan yom tumena nlel unou
Bibil utulejin anch tushich mu “machuku ma kwinsudiel.” (2 Timote 3:1) Tal yom yasambelay Bibil kulejan piur pa chirung chinech:
Tang Mateu 24:6, 7, kupwa isambinany chipul ech:
Bibil walejana anch machuku ma nsudiel makwikal mutapu ik?
Tang 2 Timote 3:1-5, kupwa isambinany yipul yilondwilaku ey:
Bibil walejana anch antu a mu machuku mansudiel akwikal ni yisalijok ik?
Yisalijok ik yimwing umena ey yikwetau antu?
ANCH MUNTU WAKWEL ANCH: “Bibil ud kwend buku wa ngany ni wa nsangu ja makasu.”
Yom ik yikwinkishina kamu ey kashinsh anch Bibil ud buku wa kuchingejin?
YOM TWILEJA KAL
Nsangu ja pakur, siyans, ni uprofet, yawonsu yiney yimekeshin anch Bibil ud buku ukutwisha kuchingejin.
Ov, uvurikin?
Ov, Bibil ud buku wa ngany ni nsangu ja makasu?
Jimbulaku yom yimwing yilondinau in siyans yitanijadina ni yilondinay Bibil.
Ov, utongin anch Bibil ukutwish kulejan yom yikusadika mu machuku ma kurutu? Rumburil.
JINGUNIN KAND
Ov, Bibil ufundishin yom yimwing yakad kutanijan ni siyans?
“Ov, Siyans Utanijadin ni Bibil?” (Mutu wa mulong udia pa jw.org)
Yom ik yimekeshina anch tushich mu “machuku ma kwinsudiel”?
“Uprofet 6 wa Bibil Umen Kuwanyin Kwau” (Chinong cha Kalam cha 1 Ngond wa 6, 2011)
Tal mutapu wawanyina uprofet wa Bibil piur pa Want wa Grek.
Jingunin mutapu uprofet wa Bibil waswimpa yitongijok yadingay nich ikundj umwing piur pa Bibil.
a Uprofet ud uruu wa Nzamb ulejena yom yikusadika kurutu.
b K.C.C. urumburikin anch “Kurutu kwa Chirung Chetu,” ni C.C. urumburikin anch “Chirung Chetu.”