Tushakamany Kwambatan Nich Kwipan Kwetu

¹ Wikala ubatishinau katat ap pasutin kal mivu yivud, chakin kamu anch ukat kuvurikang chinship chinech cha usey mu mwom wey. Dibatish dietu didiap nsudiel pakwez, didi kwau disambishil dia kwipan mu mudimu wa mwom ukutwisha kushal chikupu. (1 Yohan 2:17) Kushakam kwambatan nich kwipan kwetu kwitin yom ik?

² Tulondulany Chilikej cha Kristu: Kupwa kwa kubatishiu, Yesu “wasambisha mudimu wend,” wa kulejan “Rusangu Ruwamp ra Want wa Nzamb.” (Luka 3:23; 4:43) Chilik chimwing kand, kupwa kwa kwijikish kwipan kwetu kud Yehova kusutin ku dibatish, tukat kwikal atushalapol inkinau mbil ya kulejan rusangu ruwamp. Ap anch yitining chisu chivud ni usu nakash chakwel kuwanyish maswir ma yom ya ku mujimbu, mudimu wetu wa kusambish, udi mudimu wa Ukristu. (Mat. 6:33) Pa ndond pa kurish mulong wa kwikal nich dipit ap katumb, antu ipanina kud Nzamb akimbining mutapu wa ‘kutumbish mudimu wau,’ mud mwasalay mupostol Paul. (Rom 11:13) Ov ukatin nakash chisend chey cha kumusadil Yehova ni kusal usu chakwel kutumbish mudimu wey ukata kumusadilang?

³ Mud muchadinga ku mutambu wa Yesu, tufanyidin ‘kurish nend Djabul.’ (Jak. 4:⁠7) Satan wamupaka Yesu kupwa kwa dibatish Diend, chilik chimwing kand ndiy ukat kuyirishish atushalapol a Yehova nlel. (Luka 4:​1-13) Mangand ma Satan chimatunyingumukina, tufanyidin kwipup ayinetu, kwipuk chom chin chawonsu chikutwisha kujondish manangu metu ap kuyipish muchim wetu. (Jinsw. 4:23; Mat. 5:​29, 30) Ayibabeshin in Kristu anch “kiukutwishanyap kwibomb nend Nsalejetu pa kudia ku ‘Mes ma Mwant [Yehova, NW]’ chad wibombany kand nau ayilembil.” (1 Kor. 10:21) Chinech chitin anch twilama ku masengan mayimp, urund uyimp, ni ubaj wa Internet. Chitwitin kand kwipuk kulondul malejan ma mwin kupumbok. Kubabel yom yiney ni mipit yikwau yijingamina ya Satan kukez kutukwash kushakam kwambatan nich kwipan kwetu.

⁴ Tusadilany Yitenchik ya Nzamb: Chakwel kutukwash kushakam kwambatan nich kwipan kwetu, Yehova utwinkishin ukwash kusutin ku Dizu diend ni ku chikumangen cha Ukristu. Sal kutang Baibel ni malembil yikala chaku chey cha pichuku-pichuku. (Jos. 1:8; 1 Tes. 5:17) Sanger yikumangan ya chikumangen. (Kus. 122:⁠1) Kwat urund ni antu akata kumwov Yehova wom ni kulam mbil yend.​—⁠Kus. 119:⁠63.

⁵ Nich ukwash wa Yehova, ukutwish kushakam kwambatan nich kwipan kwey kud Yehova ni kwikal nich musangar wa kumusadil chikupu.​—⁠Kus. 22:​26, 27; Flp. 4:⁠13.

Mudimu Umwing Witina Kwikepish

¹ Dizu dia Nzamb dituyudil kwikal ‘in kwikepish, kangal wafundakeshany kuyip ku kuyip . . . pakwez, yiyukishany akusadilanya nayimp.’ (1 Pita 3:​8, 9) Chiyul chinech chidi cha kusadil kamu mu mudimu wa kulejan. Chakin kamu, mudimu wa win Kristu ukutwish kwikal kupakiu kwa kwikepish kwetu.

² Kwikepish yidi ngikadil yimwing yikata kutukwash kujijaman mu mikadil yimwing yakad kusangaresh. Pitukata kulejan, tukat kwisamb nau aeny akad kusot kwisamb netu, ni kwijik anch amwing akutwish kwakul mu mutapu wakad kutusangaresh. Ap kand kudandamen kulejan mu mikadil mud yiney chitufanyidin kwikepish. Mu teritwar umwing mukash nakash, anambaz aad ayibol ayendinanga antu ku chis ni chis dichuku ni dichuku mu mivu yaad pakad kutan muntu ap umwing ukuyaka chakwel ambamba! Pakwez, awiy ajijamana, nlel mu teritwar winou mwikadil kal yikumangen yaad.

³ Kupandakan Chibud: Kwikepish kukutwish kutukwash kumwimburij Yesu paburedinau antu akwau kalimish ap patuswingishinau. (1Pita 2:​21-23) Nambaz umwing amupepa masal ku chikumbu chimwing, cha kusambish bil kud mband ni kupwa kand kud ikundj, wamwopata mu rupangu. Nambaz wasipa kusu ni walonda anch uchingejin kwisamb nau chisu chikwau. Chom chinech chayishimokisha ambay a uruw inay ni amutesha Kaman mukwau weza kuyendil ni itiya diladikij dia kukumangan ku chikumangan ku Chot cha Want. Nambaz wa kusambish waswingishau wadingaku ni wayilangwisha ni kuyikinsh kand uman ukwau. Tukutwish niyetu kuyitudish antu akad kutwak nich kusadil “kwitudish ni kalimish.”​—⁠1 Pita 3:​15, TMK; Jinsw. 25:⁠15.

⁴ Ipukany Kwitutul: Ronganyin retu ra Baibel ritwinkishinap diyingish ap dimwing dia kuyiman antu mud amwamu ap kuyilondil mu mutapu umwing wa kuyiswingish. (Yohan 7:49) Pakwez, Dizu dia Nzamb dituyudil anch “kangal kulond dizu diyimp mulong wa muntu.” (Titus 3:​2, TMK) Anch tudi in kwikepish mu muchim, mud mwadingay Yesu, tukat kuyikasikesh antu akwau. (Mat. 11:​28, 29) Kushejin kwa kwikepish kukat kuwejinaku usu ku uruu wetu.

⁵ Mwaning, kwikepish kukat kutukwash kujijaman mu teritwar mukash. Kukutwish kuyisangaresh antu akad kututesh, ni kuyipwitin akwau ku uruu wa Want. Chipandikenamu, kwikepish kukat kumusangaresh Yehova, ndiy ‘ukat kuyanaken in kwikepish.’​—⁠1 Pita 5:⁠5.