DILEJAN DIA 35
Mutapu wa Kukwat Mipak Yiwamp
Etu awonsu tukwatining mipak. Mipak yivud yikutwish kwikal ni yibudikin pad etu ayinetu ni pa urund wetu ni Yehova. Chilakej, tukutwish kukwat mupak piur pa ndond tukushakama, mutapu wa kukimb nfalang ja kwikwash nich, ni anch tukwatan ap bwat. Anch twakwat mipak yiwamp, tukutwish kwikal ni mwom usangareshina ni kumusangaresh kand Yehova.
1. Mutapu ik ukutwisha kusadin Bibil mulong wa kukwat mipak yiwamp?
Kurutu kwa kukwat mupak, mulembila Yehova chakwel akukwash ni ileja Bibil mulong wa kuman mutapu umenay yom yiney. (Tang Jinswir 2:3-6.) Pa milong yimwing, Yehova ukat kupan yijil yovikena patok. Anch chid mwamu, kukwat mupak wa kuziyin yijil yend chawiy chom chiwamp nakash ukutwisha kusal.
Pakwez chid nchik anch kwikil yijil ya Bibil yilejena patok yom ufanyidina kusal? Yehova ukukutakel mwi ‘njil yiufanyidina kuya.’ (Isay 48:17) Mutapu ik? Kud mbil jikutwisha kukutakel. Mbil ja Bibil ud uyakin wa pa dishin umekeshina yitongijok ni yovil ya Nzamb. Yisu yivud tukat kwijik mutapu utonginay Yehova piur pa mulong kanang anch twatang nsangu jidia mu Bibil. Anch twijik mutapu utonginay Yehova, tukutwish kukwat mipak yimusangareshina.
2. Yom ik ufanyidina kutongin kurutu kwa kukwat mupak?
Bibil ulondin anch: “Muntu ubabela ukat kushinshik kuyilay.” (Jinswir 14:15) Chinech chirumburikin anch kurutu kwa kukwat mupak, tufanyidin kwitekin chisu cha kutongin piur pa mipak yetu. Piushinshikidina mupak ukimbina kukwat, iyipula anch: ‘Mbil ik ya Bibil yitadina mulong winou? Mupak ik ukwinkwasha kwikal ni chisambu cha mu manangu? Mupak wam ukwikal ni yibudikin ik pad antu akwau? Ni cha usey nakash, ov, ukumusangaresh Yehova?’—Kuvurik Yijil 32:29.
Yehova ukwet mbil ya kutulej yom yidia yiwamp ni yidia yiyimp. Anch twijik nawamp yijil yend ni mbil jend, ni twasal usu wa kujilondul, tukufumb kom ketu. Kom ud nchakal wa mukach ukata kutulej anch yom yiwapin ap yiyipin. (Rom 2:14, 15) Kom kafumbinau nawamp kakutukwash kukwat mipak yiwamp.
ILEJA CHIKURIKINA
Shinshikin mutapu mbil ja Bibil ni kom yikata kutukwash kukwat mipak yiwamp.
3. El Bibil akutakela
Mutapu ik ukutwisha mbil ja Bibil kututakel chisu tukwatina mipak? Talany VIDEO, kupwa isambinany yipul ey:
Want ipau chom ik?
Mulong wak Yehova watwinkisha want ipau?
Yom ik yatwinkishay mulong wa kutukwash kusadin nawamp want ipau wetu?
Mulong wa kuman chilakej chimwing chilejena mbil ya Bibil, tang Efes 5:15, 16. Kupwa isambinany mutapu ukutwisha ‘kusadin nawamp chisu chey’ mulong wa . . .
kutang Bibil pakad kujing
kwikal mbay wa uruw muwamp, nvaj muwamp, ap mwan muwamp.
kukumangan ku yikumangan.
4. Fumb kom key mulong wa kukwat mipak yiwamp
Chiswapeling kukwat mupak anch kud yijil ya Bibil yilejena patok chom cha kusal. Pakwez chid nchik anch kwikil chijil? Talany VIDEO, kupwa isambinany chipul ech:
Mu video winou, yom ik yasalangay nambaz mulong wa kufumb kom kend ni kukwat mupak umusangareshina Yehova?
Mulong wak tufanyidinap kuyit antu akwau chakwel atukwatina mipak? Tang Hebereu 5:14, kupwa isambinany yipul ey:
Ap anch chiswapel kuyit antu akwau kutukwatin mipak, yom ik tufanyidina ayinetu kwijik kwauril?
Chom ik chikutwisha kukukwash kufumb kom key ni kukwat mipak yiwamp?
Mud kart, kom ketu kakat kutukwash kukwat mipak mu mwom
5. Limish kom ka antu akwau
Antu kushalijan akutwish kukwat mipak yishalijadina. Mutapu ik tukutwisha kumekesh anch tulimishin kom ka antu akwau? Tal yilakej yaad:
Chilakej cha 1: Nambaz umwing ukatining kwipent washemunikin kal mu chikumangen mudia anambaz avud akata kwiyov nayimp anch akwau ipent.
Tang Rom 15:1 ni 1 Korint 10:23, 24, kupwa isambinany yipul ey:
Kukwatijan ni maverse minam, mupak ik ufanyidinay nambaz winou kukwat? Yom ik ukusala anch ud ni muntu ukweta kom kamulikishina kusal chom kanang chiumena ey anch chiwapin kwau?
Chilakej cha 2: Mukadivar umwing wij anch Bibil kajidikinap kuna maar mu chilik chisikena, pakwez watondin kal kwend kulik kuna. Chad amutazuk kal ku musambu umwing kudia akadivar anila maar.
Tang Mulej 7:16 ni Rom 14:1, 10, kupwa isambinany yipul ey:
Kukwatijan ni maverse minam, mupak ik ufanyindinay mukadivar winou kukwat? Yom ik ukusala anch waman muntu mukwau ukat kusal chom chikukangeshina ey kom key kusal?
Yom ik ufanyidina kusal mulong wa kukwat mipak yiwamp?
1. Mwita Yehova akukwash.—Jakobu 1:5.
2. Kimbijol mu Bibil ni mu mikand yimedina pa Bibil mulong wa kuman mbil jikwatijadina ni mulong wey. Ukutwish kand kwambamb ni in Kristu akweta ukaliweny.
3. Shinshikin yibudikin yikutwisha mupak wey kwikal nich pa kom key ni pa kom ka antu akwau.
ANCH MUNTU WAKWEL ANCH: “Ukwet kwey mbil ya kusal yom yawonsu ukatina. Yom yikutongau antu akwau yidiap kwau ya usey.”
Mulong wak tufanyidin kutongin yovil ya Nzamb ni ya antu akwau?
YOM TWILEJA KAL
Tukat kukwat mipak yiwamp anch twijik mutapu wiyovilay Yehova piur pa mulong kanang ni kushinshikin anch yisal yetu yikuyikwash antu akwau ap kuyisal nayimp.
Ov, uvurikin?
Mutapu ik tukutwisha kukwat mipak yimusangareshina Yehova?
Mutapu ik ukutwisha kufumb kom key?
Mutapu ik ukutwisha kumekesh anch ulimishin kom ka antu akwau?
JINGUNIN KAND
Mutapu ik ukutwisha kukwat mipak yikasikeshina urund wey ni Nzamb?
“Tukwatany Mipak Yimulimishina Nzamb” (Chinong cha Kalam cha 1 Ngond wa 4, 2011)
Kudish ronganyin rey piur pa mutapu ukatay Yehova kutwinkish yiyul.
Tal yom yamukwasha ikundj umwing kukwat mupak ukash nakash.
Ileja nakash piur pa mutapu wa kumusangaresh Yehova anch kaletinap umutakel wovikena patok piur pa mulong kanang.
“Ov, Ukwet Kuswir kwa Chijil cha Bibil mu Yom Yawonsu?” (Chinong cha Kalam cha 1 Ngond wa 12, 2003)