Mareferans ma Mudimu ni Mashakamin ma In Kristu Mukand wa Chikumangan
© 2024 Watch Tower Bible and Tract Society of Pennsylvania
RUBING RA 6-12 NGOND WA 5
YOM YA USEY YIDA MU DIZU DA NZAMB KUSENG 36-37
“Kangal Wiyakamishany Mulong wa Antu Ayimp”
w17.04 paj 10 par. 4
Yom ik Yikudioshau Anch Want wa Nzamb Wez?
4 Mutapu ik ukwetau antu ayimp usu padi etu nlel? Kambuy Paul walonda anch mu machuku ma kwinsudien, makez kwikal “ma mar nakash.” Kupwa wawejinaku anch: “Antu ayimp ni in [makasu] akez kuya kurutu nakash mu kuyip.” (2 Timote 3:1-5, 13) Ov, ukat kuman yom yiney? Antu avud pakach petu ayimeshin kal mar kudi antu ayimp mudi kuyitendish, katond ka ulombu wa chikit, ni kuyijip kudi antu ayimp. Amwing pakach pau kakupakishangap kwau kujindjik yom yau yiyimp yisadiningau. Akwau akat kutong mutapu wa kuyikwash antu, pakwez mu kulond win kashinsh adi antu ayimp. Mwawiy, ap anch kand kal atumeshangap mar kudi antu ayimp, pakwez adandamedin kwikal ni usu padi etu. Tukat kwov nayimp anch twatesh piur pa mutapu uyimp uyisadidinau an, antu apamina kal, nau antu akwau akad kwikal ni mutapu wa kwichidij ayinau. Antu inay ayimp akat kusal mu mutapu wa kumesh anch adi mudi annam ayidiany ap mudi ayilembil. (Jakobu 3:15) Cha musangar, Dizu dia Yehova ditwinkishin ruchingej.
Yehova Ukat Kuyiyukish Antu Akata Kulikishin
10 Chid cha ubaj kulam rukuny. Yehova ukatin anch tusanger chisambu tukata kwov anch twadiosh rukuny ku muchim. (Tang Efes 4:31, 32.) Ulondin anch “ikuchika ku kuswej, ulika ujim.” (Kus. 37:8) Chid cha manangu nakash kulondul chiyul chinech. Kulam rukuny kukutwish kwikal ni yibudikin yiyimp pa ukash wetu wa mujimbu ni wa mu manangu. (Jnsw. 14:30) Kumulamin muntu rukuny kud mud kuna ulemb ni chitongijok cha kumusal muntu mukwau nayimp. Pakwez mu uyakin chinech chikutwishap kumusal muntu waturumbukinang nayimp ap pakemp. Chawiy, anch twayilikishin antu akwau, tukat kutaninamu ayinetu. (Jnsw. 11:17) Tukat kwikal ni chisambu cha mu manangu ni mu muchim, ni chikat kutuswapel kudandamen mu mudimu wa Yehova.
“ANCH TWIYOV ANCH TUZIYIN MU YIKOKUJOL YIKASH NAKASH”
11 Yehova kakatap kwambamb netu mud mutapu wasalay ni Job, pakwez ukat kwambamb netu kusutin Dizu diend, Bibil. (Rom 15:4) Ukat kutukasikesh kusutin kutwinkish ruchingej mulong wa machuku ma kurutu. Tushinshikinanaku kwetu yitongijok yimwing yidia mu Bibil yikutwisha kutwongoj chisu tudia mu yakamish. Mu Mifund, Yehova utwinkishin kashinsh anch kwikil chom—yikal yikokujol yikash—“chikutwisha kutwauril etu ku rukat ra [rend].” (Rom 8:38, 39) Utwinkishin kand kashinsh anch ud “piswimp kudi awonsu akata kumutazuk ndiy” mu malembil. (Kus. 145:18) Yehova utulejin anch ang twakungamen mwi ndiy, tukutwish kujijamen chikokujol chawonsu ni kutan musangar mu chilik kanang pa chisu tumena mar. (1 Kor. 10:13; Jak. 1:2, 12) Dizu dia Nzamb dituvurishin kand anch yikokujol turishina nich yid kwau ya mu kachisu kakemp ni yikemp nakash mu kuyilakej ni yiyukish ya chikupu tukutambula. (2 Kor. 4:16-18) Yehova utwinkishin ruchingej rakin anch ukupwish misul yawonsu yikata kuletish mar—Satan Djabul ni awonsu akata kulondul njil yend yiyimp ya wintombwij. (Kus. 37:10) Ov, walaminaku kal mu manangu mifund yimwing yikasikeshina yikutwisha kukukwash kujijamen yikokujol ya machuku ma kurutu?
Mapit ma mu Spiritu
it-2-F p. 341 par 7
MUKANDU
Kulik kunyikek, kwikalaku, kulep. Kulik kunyikek ni kwikalaku, kumekeshin mutapu yiding mikandu. (Is 54:10; Aba 3:6; tal kand Ks 46:2.) Chawiy pafanakeshay kutentam kwa Yehova ni “mikandu ya Nzamb.” (Ks 36:6) Nfund a kuseng wading ukimbin kulejan piur pa kutentam kwa Yehova kwakad kuswimpang. Pading patongidinay piur pa kulep kwa mikandu, wading ukimbin kulejan anch kutentam kwa Nzamb kud kwa piur nakash kusutamu kwa antu (Tal Is 55:8, 9.) Kukwatijan ni Kujingunik 16:20, “mikandu kiyamekenap kand” kupwa kwa kwichil rupas ra sambwad ra ujim wa Nzamb. Chinech chimekeshin anch ap yom yizambukina mud mikandu yikwiyepap ku kusheshik kwa ujim wa Nzamb. —Tal Yer 4:23-26.
RUBING RA 13-19 NGOND WA 5
YOM YA USEY YIDA MU DIZU DA NZAMB KUSENG 38-39
Chifanyidinap Kudandamen Kwifish Nich Nakash
“Shinshikin Mes Mey pa Machuku ma Kurutu
12 Tang 1 Yohan 3:19, 20. Kwifish nich kuyipinap ni yisu yimwing etu awonsu tukat kwifishang nich. Chilakej, antu amwing akat kwifish nich mulong wa uyimp wasalau kurutu kwa kwilej uyakin. Akwau akat kwifish nich mulong wa yitil yasalau kupwa kwa kutambul dibatish. (Rom 3:23) Chakin kamu, tukatining kusal yom yiwamp. Pakwez “etu awonsu tukat kurumbok mu mitapu yivud.” (Jak. 3:2; Rom 7:21-23) Ap anch tukusangerangap yovil ya kwifish nich, pakwez yisu yimwing yovil yiney yiding yiwamp. Mulong wak? Mulong yovil ya kwifish nich yikutwish kutubachik kulikap chisal chiyimp ni kukwat mupak wa kulik kuchichirikin.—Heb. 12:12, 13.
13 Ku mutambu ukwau, chitwishikin kwifish nich kusut chipim—charumburik anch kudandamend kwifish nich ap anch twakarumukin kal ni Yehova watulikishidin kal. Kwifish nich kwa mutapu winou kudi kwa ubaj. (Kus. 31:10; 38:3, 4) Mutapu ik? Shinshikin chilakej cha nambaz umwing wadandamena kwifish nich mulong wa yitil yasalay pakur. Walonda anch: “Niyova anch nifanyidinap kwam kwipan nakash mu mudimu wa Yehova mulong chimeken anch nikupandap kwam.” Avud pakach petu akutwish kwiyov mudi mwiyovay nambaz winou. Kulik kwifish nich kusut chipim kudi kwa usey. Tongin bil musangar ukwovay Satan anch twiziyish kwetu ayinetu—ap anch Yehova ndiy katulikinap!—Ilakej ni 2 Korint 2:5-7, 11.
w02-F 11/15 p. 20 par 1-2
Mutapu ik Tukutwisha Kusal Chakwel Machuku Metu Mikal ma Usey kud Yehova?
Machuku ma mwom wetu mad makemp ni ma mar. Nfund a kuseng watongijokina nakash piur pa kwiswip kwa mwom; yitongijok yiney yamubachika kulembil anch: “ngijikisha disudiel diam, ni chilik cha machuku mam mudi muchidia, chakwel nishinshika kukep kwa chisu cham. Tal, wangilikina machuku mam mudi kujimb kwa chikas, mwom wam udi mudi chom chamwamu kudi Ey. “David wading wiyakamishin mulong wa kushakam mu mutapu umusangareshina Nzamb, mu mazu ni mu yisal. Mulong wading wij anch mwom wend wimedin paday Nzamb, walonda kand anch: “Ruchingej ram rudi mudi Ey.” (Kuseng 39:4, 5, 7) Yehova watesha malembil mend. Chakin kamu, washinshikina mijikit ya David ni wamuyukisha.
Tukutwish kukwatakan nakash mwa aminit akemp pa dichuku ni kwikal nich mwom wizwila sens ni mijikit. Yiney yikutwish kusal anch tulik kusanger mwom ni kwikal ni yakamish, mu mwom mud yom yivud ya kusal ni ya kujingunin pakwez chisu chitukepen. Ov, twiyakamishin mud David mulong wa kwikal ni mwom witiyijinay Nzamb? Kangal twavuramenany anch Yehova ukat kushinshikin ni kutal muntu ni muntu wa pakach petu. Kwasut kal mivu 3 600, Yobu, muntu wading umovila Nzamb wom walonda anch wading nich kashinsh anch Yehova washinshikina jinjil ni jinzau jend jawonsu. Wipula chipul ech: “Ov, nikwakul nchik anch Nzamb wampompish?” (Yob 31:4-6, 14) Chiswapel kusal anch machuku metu mamusangaresh Yehova mukwitekin ntong ja mu spiritu, kulimish mbil jend ni kusadin chisu chetu ni manangu. Tushinshikinany nawamp yom yisatu ey.
Chirish Urund Wey wa Piswimp ni Yehova
Mulembilang Yehova yisu yawonsu. Tatukwey wij nawamp anch kudandamen kwifish nich kukutwish kukukangesh kumulembil. (Rom 8:26) Pakwez ey “[lembil ]yisu yawonsu,” muleja Yehova rusot rey ra kuchirish urund wa piswimp ni ndiy. (Rom 12:12) Andrej uvurikin anch: “Nifishang nich nakash ni kwov usany. Pakwez chisu chawonsu nalembilang, niyovang nawamp. Novang chisambu nakash mu manangu mam.” Anch umenap ya kwit mu malembil, shinshikin malembil ma kukarumuk ma Mwant David mafundinau mu Kuseng 51 ni 65.
Mapit ma mu Spiritu
Mekesh Anch Uwanyidin Kukuchingejin
16 Chid cha usey nakash kwikal mwin kwilam anch tukimbin anch antu akwau atuchingejin. Mwikadil winou ukutukwash kulam pa kan chisu chitupakinau kulond yom ya ujindj. (Tang Jinswir 10:19.) Tukutwish kuman anch chikasiken nakash kwilam chisu tusadidina tupend twa Internet twa kutumijadin jinsangu. Anch tubabelap, tukutwish pakad kutongin kulejan nsangu ja ujindj kud antu avud nakash. Ni anch twatum nsangu pa Internet, tukwetap mutapu wa kwijik yom yikusalau nich antu, ap kukangesh milong yikutwisha kwikalaku. Kwilam kukutwish kand kutukwash kunenet anch akankuny netu apakish kutubachik kulejan yom yikutwisha kuyitek akadivar ni anambaz netu mu ubaj. Yom mud yiney yikutwish kushiken anch atwipul piur pa dirijek dietu kud ampurij mwi ngand mukangeshinau mudimu wetu. Mu chishiken mud chinech ni yikwau kand, tukutwish kusadin mbil jilondina anch “kinikulondap dizu padiay muntu muyimp piswimp.” (Kus. 39:2) Tufanyidin kwikal antu a kuchingejin kud antu awonsu, ikal antu a mu dijuku dietu, arund netu, akadivar ni anambaz netu, ap kud muntu win mwawonsu. Ni mulong wa kwikal muntu wa kuchingejin, tufanyidin kwikal in kwilam.
RUBING RA 20-26 NGOND WA 5
YOM YA USEY YIDA MU DIZU DA NZAMB KUSENG 40-41
Mulong Wak Kuyikwash Antu Akwau?
Antu Akata Kupanang Akweting Musangar
16 In kupan akin kakatap kupan nich ruchingej ra kuyichirishin chom kampand. Yesu walonda anch: “Anch wasal musambu, yitazuka atuzwendj ni ayilim, ni amputames. Chawiy ey ukez kuyuk, mulong awiy kakutwishap kukutazuk ey.” (Luka 14:13, 14) Bibil ulondin kand anch: “Kuyuk kukez kwikal kudi muntu ukweta muchim wa kukwash,” ni anch: “Wayuk muntu ukata kuyitong ayimanamar.” (Jinswir 22:9; Kuseng 41:2) Tufanyidin kwikal in kupan mulong tukatin kuyikwash antu akwau.
17 Pajimbulay Paul mazu ma Yesu malondina anch “chiyukish cha mwin kupan chipandakenamu cha mwin kutambul,” kisambinap kwend ching kusu pa kupan yom ya ku mujimbu. Tukutwish kand kuyikasikesh antu, kuyinkish yiyul yidiokila mu Bibil ni ukwash wa kusadin. (Midimu 20:31-35) kusutin yom yalonday ni yasalay Paul, watufundisha mutapu chidia cha usey kwikal in kupan chisu chetu, usu wetu, kubangin kwetu ni rukat retu.
18 In kukimbijol akata kwilej yaku ya antu ajingunin kand anch kupan kukat kuyiletin antu musangar. Kukwatijan ni jurnal umwing, antu alondin anch akat kwov musangar nakash kupwa kwa kuyisadil antu akwau yom yiwamp. In kukimbijol alondin anch chisu tukata kuyikwash antu akwau, tukat kwiyov anch mwom wetu ukwet chitongijok ni kurumburik. Chawiy in manangu amwing alondin anch antu afanyidin kusal mudimu wa kwikatin mulong wa kwikal ni ukash wa mujimbu uwamp ni musangar. Chakin kamu, yom yajinguninau yitushimwokishinap, mulong Sakatang wetu wa rukat, Yehova walonda anch kupan kukat kutuletin musangar.—2 Timote 3:16, 17.
w15 12/15 paj 24 par. 7
Yehova Ukukukwashany
7 Pakwez anch uyedin, Yehova ukukukasikesh ni ukukukwash, mudi mwayisadinay atushalapol end a pasak. Mwant David wafunda anch: “Wayuk muntu ukata kuyitong ayimana mar, chawiy [Yehova] ukumukamunin mu dichuku dia mar. [Yehova] ukamulam, ukamwikadish mwom, chad ukez kayuk pansh panap; kakumupanap ku rusot ra akankuny end.” (Kuseng 41:1, 2) Chakin kamu, David kakimbap kurumburil anch muntu muwamp wadingaku chisu chinicha ni wading kuyitongin ayimana mar kafanyinap kufa. Chawiy, mutapu ik wafanyinay Yehova kumukwash muntu muwamp winou? David urumburil anch: “[Yehova] ukat kumutalang pa ulal wa kuyel. Ndiy ukata kumwok ku mayej mend mawonsu.” (Kuseng 41:3) Yehova uyij nawamp atushalapol end amena mar, ni kayivuramedinap. Ukutwish kuyinkish kutakaman ni manangu. Yehova watanga kand mujimbu wa muntu mu mutapu wa kutwish kwiyok awinau.
w17.09 paj 12 par. 17
Imburijany Ranaken ra Yehova
17 Ap anch kumekesh ranaken kudi kuwamp kudi etu, diyingishin dijim dia kumekesh ranaken didi anch tukatin kumwimburij Yehova ni kumwinkish ntumb. Ndiy udia Musul wa rukat ni wa ranaken. (Jinswir 14:31) Watushila chilakej chend chiwanyidina. Komb el tusalany yom yawonsu tukutwisha kusal mulong wa kumwimburij Nzamb kusutin kumekesh ranaken. Mwamu tukusej piswimp ni akadivar nau anambaz netu ni tukwikal mu urund uwamp nau antu tudia nau piswimp.—Galatiya 6:10; 1 Yohan 4:16.
Mapit ma mu Spiritu
it-1-F p. 1261 par. 5
Yehova
Mazu mada mu Bibil makasikeshidin nakash pa kutumbish ukaleng wa Yehova ni mamekeshin anch chitongijok cha kusambish cha Yehova chid cha kushitwish bil cha kusambish dijin dend. Kusal mwamu kwitin anch dijin da Nzamb adidosha masaal mawonsu. Chikwau kand, chitin anch yitang yawonsu yibabela yida mwiur ni pansh kulimish dijin dined ditumbila. Kupwa, chinech chitin kud yitang yiney kwitiy ni kulimish ukaleng wa Yehova, kwa kwikatin, kumusadin kusutin kusal rusot rend mulong wa kumekesh anch amukatin. Mu malembil mend kud Yehova mu Kuseng 40:5-10, David wamekesha chitongijok chinech palonday piur pa kushitwish chakin kamu dijin da Yehova. (Tutangin kand mu Hebereu 10:5-10 piur pa kambuy umwing wasadina mazu mamwing ma mu kuseng winou paday Yesu Krisu.)
RUBING RA 27 NGOND WA 5–2 NGOND WA 6
YOM YA USEY YIDA MU DIZU DA NZAMB KUSENG 42-44
Sadin Nawamp Mbil Jidokila Kud Nzamb
w06 1/7 paj 9 par. 4
Manans Majim ma Buku wa Kaad wa Kuseng
42:4, 5, 11; 43:3-5. Anch atwauril kulemp ni chikumangen cha Ukristu mulong wa mayingishin kanang, kuvurik musangar wa urund winou kukutukwash. Ap anch tukwov cha kusambish ushon nakash wa kwikal pa ayinetu, tukez kuvurik kand anch Nzamb udi kwikang kwetu ni tufanyidin kumuchingejin mulong wa kutupandish.
w12-F 15/1 p. 15 par. 2
Mutapu wa kusal anch dilejan da Bibil dikala diwamp ni da kutaninamu
1 KULEMBIL: Rizau ra kusambish kud kulembil. (Ks. 42:8) Mulong wak? Chid mulong dilejan da Bibil ud mutapu wa kumwifukwil Yehova. Chitufanyidin kumwit Yehova chakwel atwinkisha muchim wa kutesh ni ukwash wa spirutu wend utumbila. (Luk 11:13) “Barbara mishoner walabina kal nakash ulondin anch, nikat kulembil yisu yawonsu kurutu kwa kutang ap kwilej Bibil. Mwamu nikat kwiyov anch Yehova ud nam piswimp ni ukat kusanger yom nisadina.” Kulembil kurutu kwa kwilej, kukat kutukwash kwikal ni muchim wa kutesh ni kwitiy yom tutangina, yakuda ya mu spirutu yitwinkishinau.
w16.09 paj 9 par. 11-12
“Kangal Walikumukany mu Makas”
11 Yehova ukat kutukasikesh kand kusutil ku mafundish mend tukata kutesh ku yikumangan yetu ya win Kristu, ku yitentam ya munyingumuku ni ku yitentam ya rejon ni kand ku shikol yetu ya uteokras. Mafundish minam makutwish kutukwash chakwel tumusadin Nzamb nich yitongijok yiwamp ni kuwanyish nawamp yisend yetu ya win Kristu. (Kuseng 119:32) Ukat kutaninamu mu mafundish minam matulejiningay Yehova?
12 Yehova wayikwasha antu end chakwel ayiwin in Amalek ni in Etiopi ni wamwinkisha Nehemiy ni in Yuda akwau usu wa kutung kamu rubumbu ra Yerusalem. Chilik chimwing kand, Nzamb ukutwinkish usu ukutukwasha tudandamena ni mudimu wetu wa kulejan yikalap nchik yakamish, rupompat ni kulik kusanger kwa antu akwau. (1 Pita 5:10) Yehova kakutwishap kupwish milong yetu mu chilay. Pakwez, tufanyidin kusal chom kanang. Mutapu ik? Tufanyidin kutang Dizu dia Nzamb dichuku diawonsu, kurijek ni kuya ku yikumangan yetu rubing rawonsu, kudandamen kwilej dilejan dia muntu panrend ni kusal difukwil dia mu dijuku ni kumuchingejin Yehova mu malembil. Kangal twalikidil chom ap chimwing chituletina kampuw pa yom yikatay Yehova kutwinkish mulong wa kutukasikesh. Anch wasambish kwiyov anch makas mey masambish kal kulikumuk mu yom yiney, mwita Nzamb chakwel akukwasha. Kupwa tal mutapu spiritu wa Nzamb “usu wa kusal mudi mudia kutenchik kwend.” (Filip 2:13) Ov, ukutwish kukasikesh makas ma antu akwau?
Mapit ma mu Spiritu
it-1-F p. 417 par 8
MUYEU
Mifund yikat kwisambin piur pa muyeu mulong wa kulejan chom chishikedina. Chilakej, pisambinay piur pa chishiken chiyimp charishay nich, Yobu ulejen anch “Nilaken kal nau amiyeu.” (Yob 30:29) Palonday piur pa yom yayishikena antu a Nzamb, nfund a kuseng umwing wafanakesha yom yiney nich ndond yikatau amiyeu kutanijadin mulong wa kufil yakuda. (Tal Ks 68:23.) winanin anch “Pakwez watudjibula mwi ndond ya amiyeu.” (Ks 44:19) Kumunyingumuk Yerusalem kud in Babilon mu muvu wa 607 K.C.C. kwaletisha nzal yayibachika amaku kuyisadin anau kwa chisum nakash. Chawiy chamubachika Yeremi kufanakesh chisum cha ‘antu a Nzamb’ ni mutapu ukatau amiyeu kulam anau.—Mad 4:3, 10.
RUBING RA 3-9 NGOND WA 6
YOM YA USEY YIDA MU DIZU DA NZAMB KUSENG 45-47
Muminy Piur pa Uruw wa Mwant
w14 1/2 paj 14-15 paj. 8-9
Tusangarany Mulong wa Uruw wa Mwan a Mukoku!
8 Tang Kuseng 45:13, 14a. Amumekeshin ngachik mudi ‘wa ufun nakash’ mulong wa musambu wa want. Mu Kujingunik 21:2, ngachik amufanikeshin ni musumb, Yerusalem Musu, ni “wirijekang kal nawamp mulong wa kuya kudi nfumwend.” Musumb winou wa mwiur uzutin ni “uyaj wa Nzamb” ni ukat kulay, “mudi diyal dia usey dilayina dia mem ma matamb, dimekena mutambu ni mutambu mudi matalital.” (Kuj. 21:10, 11) Kuzut kwa Yerusalem Musu akulejen mu mutapu wa ufun mu mukand wa Kujingunik. (Kuj. 21:18-21) Chishimokishinap anch nfund a kuseng wisambidin piur pa ngachik winou mudi ‘wa ufun nakash’! Kupwa, musambu wa uruw ukusadikin mwiur.
9 Ngachik amutwadin kudi Ngatan—Mwant Mesia. Wamurijekin, ‘wamutokisha kal ni kumowish ni mem ma dizu.’ Udi ‘utumbila wakad ulim.’ (Efes 5:26, 27, TMK) Ngachik wend ufanyidin kudjal maswin mawanyidina mulong wa musambu wa uruw. Mwawiy mudjitay! Chikwau kand, “amudjikidin mu chikumbu chend yidjal yakuriyek nich utad wa or,” ni “akat kumutwal kudi mwant nich yidjal yend yakurijek.” Mulong wa uruw wa Mwan a Mukoku, “amwinkish kudjal amwinend ni maswin ma linen mazutila ni kutok, Mulong maswin ma linen mawiy kutentam kwa antu a Nzamb.”—Kuj. 19:8, TMK.
Buku wa Kujingunik—Urumburikin ik Piur pa Machuku Mey ma Kurutu?
10 Mutapu ik ukusalay Yehova pantaliken ni kurishikish kwinoku kwa chisum kwa Gog wa Magog? Utulejin anch: “Nikez kumujimen.” (Ezek. 38:18, 21-23) Kujingunik shapitre wa 19 ulejen yom yikusadika kupwa kwa yiney. Yehova ukumutum Mwanend mulong wa kuyiking atushalapol End ni kuyishesh akankuny nend. Yesu pamwing ni “amasalay a mwiur,” charumburik anch angel ashinshamena pamwing ni antu 144 000, akumurishikish Gog wa Magog. (Kuj. 17:14; 19:11-15) Yibudikin ik yikwikalaku kwi njit jinej? Akushesh chikupu antu ni yitenchik yawonsu yimubwambwidina Yehova!—Tang Kujingunik 19:19-21.
11 Tongin mutapu ukwiyovau antu ashinshamena pa divu pakupandau chisu chikuyisheshau chikupu akankuny a Nzamb! Chikwikal chisu chisangareshina mud ik! Ap anch kukwikal kutoy kwa musangar mwiur chisu chikumusheshau Babilon Mujim, pakwez kukwikal kand chom chikwau chikuleta musangar nakash. (Kuj. 19:1-3) Kukwikal chinship cha usey nakash chilejenau mu buku wa Kujingunik—‘uruw wa mwan a mukoku.’—Kuj. 19:6-9.
12 Chisu ik chikusadika uruw winou? Chisak chawonsu cha antu 144 000 chikwikal mwiur kurutu kwa njit ja Harmagedon kusambish. Pakwez, chawiyap chisu chikusadika uruw wa Mwan a Mukoku. (Tang Kujingunik 21:1, 2.) Uruw winou ukusadik kupwa kwa njit ja Harmagedon, ni kupwa kwa kuyishesh akankuny awonsu a Nzamb.—Kus. 45:3, 4, 13-17.
it-1-F p. 1041 par 2
Njit
Nkwinsuden kwa njit jinej divu dikwikal mu chisambu mu mivu kanan. Mufund wa kuseng ulondin anch: “[Yehova] ndiy ukat kukatwish njit ni kwisudiel ya mangand. Ndiy ukat kubukon mat, ukat kukatwol mirumbu yikunku yikunku, ukat kwosh matemb mu kasu.” Verse winou wawanina kapamp kakusambish pa chisu chaletay Yehova chisambu mwi ngand ya Isarel pasheshay yom ya njit ya akankuny. Pa chisu chikuyipandakanay Kristu antu akuletisha njit ja armagedon, kukwikal chisambu pa divu dakabuj. (Ks 46:8-10) Antu akusangera mwom wa chikupu awiy akeza kachil “jimpak, jinkasu, ni mirumbu yau kwikal jimpak ja kukatul nich yakwangul” ni kakez ‘kilejap kand kurish njit’, ‘mulong Yehova wa yisak ya amasalay ndiy ulondina.’—Is 2:4; Mik 4:3, 4.
Mapit ma mu Spiritu
w17.04 paj 11 par. 9
Yom ik Yikudioshau Anch Want wa Nzamb Wez?
9 Yom ik yikuswinkeshau pa yitenchik yiyimp? Kupwa kwa Armagedon, kukwikal kand ditenchik dikwau panap pansh? Bibil ulondin anch: ‘Etu tukat kuchingej maur masu ni mangand masu mudi mwashilayimu Nzamb. Chad mwinimwa mwawiy mukeza kwikal kutentam.’ (2 Pita 3:13) Maur ni mangand makur mawiy mant mayimp ni antu atakedinau. Kupwa kwa kumadiosh, yom ik yikumaswinkana? “Maur masu ni mangand masu.” Maur masu marumburikin Want usu, usadinau kudi Yesu nau antu 144 000 akuyikela nend pamwing. Divu disu dirumburikin antu akuyikelau kudi Want wa Nzamb. Yesu nau antu akuyikela nend akumwimburij kamu Yehova Nzamb, udia Nzamb wakad kanvundangesh. (1 Korint 14:33) Chawiy “mangand masu” akumatenchik nawamp. Mukwikal antu awamp akulama yom nawamp. (Kuseng 45:16) Antu inay akuyitakel kudi Kristu nau antu 144 000. Tongin chisu chikupwa yitenchik yiyimp ni kuyiswinkan kudi ditenchik dimwing dikweta antu adia mu umwing ni kakutwishap kudiyipish!
RUBING RA 10-16 NGOND WA 6
YOM YA USEY YIDA MU DIZU DA NZAMB KUSENG 48-50
Anvaj—Kasikeshan Majuku Men Kutek Kashinsh mu Dirijek da Yehova
Difukwil Diakin Dikukuletin Musangar Nakash
11 Tukat kumwifukwil Yehova chisu twilejina Dizu diend ni kuyifundish anetu piur pend. Sabat wayinkishang in Isarel dilau dia kusha kuns mijikit yau ya pichuku pichuku ni kushinshikin pa urund wau wa piswimp ni Yehova. (Kub. 31:16, 17) Amwing ading ashinshamena pakach pau ayifundishang anau piur pa Yehova ni kuwap kwend. Tufanyidin pakampwil kwikal ni program muwamp wa kutang ni kwilej Dizu dia Nzamb. Chinech chid chikunku cha difukwil dietu kud Yehova, ni kusal mwamu kukutukwash kumusejin piswimp. (Kus. 73:28) Ni anch twilej pamwing mu dijuku, tukutwish kuyikwash anetu kukudish urund wa piswimp ni Tatukwetu wa mwiur.—Tang Kuseng 48:13.
w11-F 3/15 p. 19-20 par. 5-7
Rusangu ra musangar kud antu a mudijuku dakabuj
“Nyingimukan Zion, munyingimukan, chindany yikumbu yikash yidiamu. Talany mpwembu yau, onganyinany yikumbu yidiamu, chakwel ukez kuyishimuninany ku majuku makeza kez.” (Ks. 48:12, 13) Nfund a kuseng wayikasikesha in isarel kumushinshikin Yerusalem piswimp. Tongin mutapu majuku mavud mafanyina kuvurik yom yiwamp pa chisu cha yangangau mu musumb utumbila mulong wa misambu ni pamanangau tempel upandakena kuwap. Afanyina “kuyishimunin ku majuku makeza kez.”
Tongin piur pa mwant mband wa ku Seba, kwinsambishin widjidjeka pa kutesh anch winyikel wa Salomon ni manangu mend yading kamu ya pakampwil mud mwamurumburilau. Ov, kud yom yamanay yishalijadina? Walonda anch“Pakwez kinasotap kwitiy mazu anch am kand kal nishika ni kuman nich mes mam.” (2 Js. 9:6) Chakin kamu, yom tukata kuman ni “mes metu” yikutwish kwikal ni yibachikin yikash pad etu.
Mutapu ik ukutwishanya kuyikwash anen chakwel imenap ayinau ni “mes mau” anch dirijek da Yehova did kamu dishimokishena? Anch ushichanap kulemp ni Betel, ikasikeshany kwendinaku. Mandy ni Bethany apamina kwi ndond ya akilometre 1500 ni kwi ndond yida mutiy wa ngand yau. Pakwez, anvajau ayitwalangaku chisu ni chisu mulong wa kutal yom yidaku. Alondin anch “Pakur twatongang anch, yading ndond yikash, kushiching kwau ching akadivar nau anambaz ananapina kal. Pakwez twatanaku ansand avud ading asadina mudimu ukash mulong wa Yehova ni asangaredina yom yisadinau. Twajingunina anch dirijek da Yehova dimanyinangap kwau pa yom yatusadinangau mwi ngand yetu. Chisu chawonsu twadokalang ku Betel twikalang ni usu mu spirutu.” Kwimenap ayinau yom yisadina dirijek da Yehova kwamukwasha Mandy ni Bethany, kupwa ikala ayibol. Ni ayitazuka kusadin ku Betel mud in kwisotin mu chisu chikemp.
w12 1/8 paj 19 par. 5
aYaku Yen Yifanakana ni ya An a Ngand a Want!
5 Kwilej rusangu ra ngand. Muntu usotina kwikal mwan a ngand wa winyikel wa antu ufanyidin kwilej piur pa rusangu ra pasak ra winyikel. Chilik chimwing, antu asotina kwikal an a ngand a Want afanyidin kusal usu wa kwilej yom yawonsu piur pa Want wa Nzamb. Shinshikin bil chilakej chapanau kudi an a Kore, asala mu Isarel wa pasak. Awiy asangera nakash piur pa Yerusalem, ndond ya difukwil ni kulejan rusangu ra musumb winou. Mayal ni pot-pot yayakamishap pakwez, chayakamisha chading kurumburik kwa musumb ni ndond ya difukwil. Yerusalem wading “musumb wa Mwant mujim,” Yehova, mulong yading ndond ya difukwil diakin. Kwawiy kwinikwa kwadingau ni kwilej Chijil cha Yehova. Yehova wamekesha rukat rend ridimukina kudi antu ayikelau kudi Mwant wa Yerusalem. (Tang Kuseng 48:1, 2, 9, 12, 13.) Ov, usotin mudi awiy kwilej ni kulejan rusangu ra chikunku cha dirijek dia Yehova didia pa divu? Anch wilej nakash piur pa dirijek dia Nzamb ni mutapu uyilaminay Yehova antwend, Want wa Nzamb ukez kwikal wakin kamu kudi ey. Rusot rey ra kulejan rusangu ruwamp rikez kwikal rikash kamu.—Jer. 9:24; Luka 4:43.
Mapit ma mu Spiritu
it-2-F p. 799-800 par 7
MAPIT
Mulong ading muchid ujim, in Isarel ading ni ya kuda ni ya kunang. (1At 4:20; Mul 5:18, 19), ni mapit mau mayichidija ku uzwendj. (Jsw 10:15; Mul 7:12) Chawiy, in Isarey ikala ni yom yivud mulong wa mudimu wau ukash wasalangau ap anch yading yikwatijadin ni rusot ra Nzamb. (Tal Jsw 6:6-11; 20:13; 24:33, 34.) Yehova wayibabesha kand ku ubaj wa kuvuramen anch mapit mau madokalang kud ndiy ni kangal achingejin mu mapit mau. (Kuv 8:7-17; Ks 49:6-9; Jsw 11:4; 18:10, 11; Yer 9:23, 24) Wayivurisha anch mapit mau mading kwau ma kachiusu kakemp. (Jsw 23:4, 5), ni kafanyinap kumwinkisham Nzamb mulong wa kumukol muntu ku rufu. (Ks 49:6, 7) ni madingap ni usey mulong wa afu. (Ks 49:16, 17; Mul 5:15) Wayivurisha kand anch kutek mapit pandond yakusambish kwafanyina kuyishikij ku kuburen win kashinsh ni kuyishikij ku kumulik Yehova. (Jsw 28:20; tal kand Yer 5:26-28; 17:9-11.) Ayikasikesha kand ‘kumutumbish [Yehova] nich yom yau ya usey.’—Jsw 3:9.
RUBING RA 17-23 NGOND WA 6
YOM YA USEY YIDA MU DIZU DA NZAMB KUSENG 51-53
Kwat Mipak ya Kwipuk Kurumbuk Kukash
Mutapu ik Ukutwisha Kulam Muchim Wey?
4 Mu Jinswir 4:23, dizu “muchim” adisadidin mulong wa kumekesh ‘muntu wa mukach.’ (Tang Kuseng 51:6.) Mu kulond kukwau, dizu “muchim” dimekeshin yitongijok yetu ya mukach, yovil, yibachikin, ni maku metu. Dimekeshin chitudia chakin kamu mukach, kadiap mutapu tumekena pol.
5 Shinshikin mutapu umekeshina ukash wetu wa mujimbu usey wa mutapu tudia kamu mukach. Chakusambish, chakwel anch tulam mujimbu wetu nawamp, tufanyidin kutond yakudia yiwamp ni kwijidish mujimbu. Chilik chimwing, mulong wa kulam nawamp ukash wa muchim wetu wa chifanakesh, tufanyidin kutang Bibil chisu chin chawonsu ni mikand yimedina pa Bibil, ni kumekesh chisu chawonsu anch tukwet ritiy mudiay Yehova. Kwiyijidish mudi kwinoku kwitining kusadin yom twilejina ni kulond piur pa ritiy retu. (Rom 10:8-10; Jak. 2:26) Cha kaad, anch twimen nakash pa mutapu tumekena pol, tukutwish kutong anch tukwet ukash wa mujimbu uwamp pakwez twayedin kal mukach. Chilik chimwing, anch twimen pa yaku yetu piur pa yom ya chiteokras, tukutwish kutong anch tukwet ritiy rikash, pakwez maku mayimp makutwish kupam mukach mwetu. (1 Kor. 10:12; Jak. 1:14, 15) Tufanyidin kuvurik anch Satan ukatin kutuyipish nich yitongijok yend. Mutapu ik ukutwishay kusal mwamu? Ni mutapu ik tukutwisha kwichidij?
w15 6/15 paj 19 par. 5-6
Tufanyidin Kwikal Ishitwila
5 Chom cha usey chifanyidina kusal mulong wa kurish nich manangu mayimp chidi kumekeshin ruchingej retu mudiay Yehova kusutil mu malembil. Anch twamusejin Yehova mu malembil, niyend ukusej kudi etu. Ukutwinkish mwiku wend utumbila, akukasikesha mupak wetu wa kulik manangu mayimp ni kushal ishitwila. Mu malembil metu, tufanyidin kumulej Yehova anch tusotin kusal yom yikusangareshina. (Kus. 19:14) Tufanyidin kumwit nich kwikepish chakwel atushishikina anch tukwet “chom chiyimp”—maswir ap yitongijok yiyimp—yikutwisha kutushikij kusal chitil? (Kus. 139:23, 24) Ov, tukat kumulembil chisu chawonsu chakwel atukwasha kulam kujijaman chisu turishina nich yoziu?—Mat. 6:13.
6 Anch twilaminap ap anch twakudish kand mwikadil wetu wa pakur chikutwish kutushikij kand ku kusal yom yijidikinay Yehova. Ap mwamu, ukutwish kutukwash kuswimp yom kanang chakwel tudandamena kusal yom yikatinay. Mwant David wijika chom chinech. Kupwa kwa kusal masandj ni Bat-sheba, David walembila wamulej Yehova anch: “Ntanga muchim usu, . . . wingedisha muchim wam wikala wakad kushemunik.” (Kus. 51:10, 12) Mwikadil wa chitil ukutwish wikal nich usu pa mujimb wetu uziyila, pakwez Yehova ukutwish kutukwash chakwel tumuziyila. Ap anch maswir mayimp mijikin kal nakash ni anch makimbin kuyikel manangu metu mishitwila, Yehova ukutwish kukwash chakwel tuziyila yijil yend ni kuyilam. Ukutwish kutukwash chakwel tuyikela yitongijok yetu.—Kus. 119:133.
Mapit ma mu Spiritu
it-1-F p. 663 par 4-5
Doweg
Mwin Edom, kafung mujim wa mwant Saul, wanding ni chisend cha usey cha ukalam. (1Sa 21:7; 22:9) Doweg wading chakin kamu muntu wa michid. Mulong amulama “kurutu kwa Yehova” ku Nob, pamwing ap chading mulong wa machip, kwijond ap kand kumekan kwa mayej ma kalip. Doweg wamumana mwin kupesh mujim Ahimelek pa mwikishay David mabot ma kurutu kwa Yehova ni mpak ya musamun ya Goliat. Kupwa, Saul payilejay atushalapol end anch kud chom chitenchikinau piur pend, Doweg walejana chad yom yamanay ku Nob. Kupwa kwa kutanijan kwa mwin kupesh mujim ni in kupesh a ku Nob, ni kumwipul Ahimelek, Saul wapana mbil ya kuyijip in kupesh. Chawiy palikau, Doweg, witiya mbil ya Saul ni wayijipa pakad kwidjidjek in kupesh 85. Pasadika uyimp winou, Doweg washeshikisha musumb wa Nob, wajipikisha antu awonsu, ansand ni amapal kuwejaku yivam.—1Sa 22:6-20.
Mud murumburilay kuseng 52, David wafunda piur pa Doweg anch: “Rudim rey rusotiling ching kuyip kusu, mudi diyemb ditwila dikata kusal ni kudimban. Ey ukat kuyip kupandakan kuwap, ni kulond makasu kupandikan kulond yakin. Ukat kukat mazu makushesh, ey rudim ra kudimban.”—Ks 52:2-4.
RUBING RA 24-30 NGONS WA 6
YOM YA USEY YIDA MU DIZU DA NZAMB KUSENG 54-56
Nzamb ud Kumutambu Wey
w06 1/8 paj 24-25 par. 10-11
Ikal Mwin Manangu—Mwova Nzamb Wom!
10 Dichuku dimwing, David wachinina kwa Akish, mwant wa musumb wa Gath, wa in Filistin, mu ul wa Goliyat. (1 Samwel 21:10-15) Ayilol a mwant amujingunina David anch udi umwing wa akankuny a muchid wau. Mutapu ik wasalay David mu chisu chinech cha ubaj? Ndiy walembila kud Yehova. (Kuseng 56:1-4, 11-13) Ap anch ndiy warumba kwikal chizarik mulong wa kwipandish, David wading wij anch Yehova ndiy wamupandisha chakin ni kuyukish usu wend. David wamuchingejina Yehova nich muchim wend wawonsu ni ruchingej rend mwi ndiy ramekesha anch David wadinga chakin kamu ni kumwov Nzamb wom.—Kuseng 34:4-6, 9-11.
11 Mud David, tukutwish kumekesh wom wa Nzamb anch twatek ruchingej retu mu kushilamu kwend anch ukutukwash kupwish milong tukweta. David walonda anch: “Pana njil yey kudi [Yehova], ukungamena mwi Ndiy, ni Ndiy ukez kachisal.” (Kuseng 37:5) Chinech chirumburikinap anch tukusend kusu milong tukweta twayitek mu makas ma Yehova wakad kusal chom ap chimwing ni kuchingej anch ndiy atukwasha. David kamwitap Nzamb ukwash ni kupwa washakam wakad kusal chom. Ndiy wasadila ukaliweny wend wa kutong ni manangu mend mamwinkishau kud Yehova ni kupakish kupwish mulong wadingay nich. Pakwez, David wading wij anch usu usadilau antu ukutwishap awinau kupwish milong. Mwamu kand chifanyidina kwikal ku mutambu wetu. Anch twasal yawonsu tukutwisha, tufanyidin kumushil Yehova yashalaku kal. Chakin, chisu chivud kudingap ap yitukutwisha kusal ching kusu kumuchingejin Yehova. Pinap pawiy pafanyidin kumekesh anch tumwovin Nzamb wom. Tukutwish kutan rongoj mu mazu malonday David anch: “Urund wa [Yehova] udi pamwing ni awiy akata kumwov wom, niyend ukez kayilej manswik mend.”—Kuseng 25:14.
Kwikil Chom Chikutwisha “Kutwauril”
9 Yehova ukwatining kand nich usey kujijaman kwetu. (Mateu 24:13) Vurik anch, Satan usotin kutudiosh kudi Yehova. Chawiy lel, dichuku ni dichuku tudandamedina kushal ashinshamena kudi Yehova madi machuku mamukwashina Yehova kumwakul Satan ukata kumusaal. (Jinswir 27:11) Kujijaman chidi chom chimwing chikasikena nakash. Kudi ukash wa mujimbu, kuburen nfalang, mar ma yovil, ni mar makwau makutwisha kusal anch dichuku ni dichuku dikala dikash. Ruchingej ra kulab labe rikutwish kumuziyish muntu. (Jinswir 13:12) Kujijaman kwetu mu mikadil yiney kudi kand kwa usey nakash kurutu kwa Yehova. Chawiy lel, Mwant David wamwita Yehova anch ateka mansoj mend mu “mulond,” ni kuwejaku nich ruchingej anch: “Kayifundilip mu mukand wey anchi?” (Kuseng 56:8, TMK) Mwaning, Yehova umakwatin nich usey ni uvurikin mansoj ni mar mawonsu tumena pitukata kujijaman mulong wa kushal ashinshamena kudi ndiy. Makwet usey nakash ku mes kwend.
Mutapu Ukutwisha Rukat ra Yehova Kutukwash Kupandakan Wom
16 Satan wij anch tukatin mwom nakash. Chawiy, ulondin anch tukutwish kulikap yom yin yawonsu—ap urund tukweta ni Yehova—mulong wa kuchidij mwom tukweta katat. (Job 2:4, 5) Satan ud mukamakasu nakash! Pakwez, mulong “[ukwet] ukash wa kulet rufu,” Satan ukat kusadin wom wa chivadik tukweta piur pa rufu mulong wa kutubachik kumulik Yehova. (Heb. 2:14, 15) Yisu yimwing, antu a Satan akat kuyilej atushalapol a Yehova anch akuyijip anch alik kutun ritiy rau. Yisu yikwau, anch tuyedin nakash ni chitin kutwok pakad kulab, Satan ukutwish kusadin chisu chinech mulong wa kutubachik kwitiy milad yiyimp ya kwiyokish. Adokter ni anamakwetu akad kwikal Atuman akutwish kutushindin chakwel atutek mash, yom yikutwisha kutushikij kujip chijil cha Nzamb. Ap muntu mukwau ukutwish kusal usu wa kutubachik kwitiy mulad wa kwiyokish wakad kukwatijan ni mbil jidia mu Mifun.
17 Ap anch tukatinap kufa, twij anch Yehova ukudandamen kutukat ap anch twafap nchik. (Tang Rom 8:37-39.) Anch arund a Yehova afa, ukat kudandamen kuyilam mu manangu mud padiau aom. (Luka 20:37, 38) Ukwet impu nakash ya kuyichirish ku mwom. (Job 14:15) Yehova wafuta difut dipandakena kujimb chakwel tutwisha “kwikal nich mwom wa chikupu.” (Yoh. 3:16) Twij mutapu utukatinay Yehova chikurikina ni mutapu utubangidinay. Pa ndond pa kumulik Yehova anch tuyedina nakash, ap anch atulejin anch akimbin kutujip, tufanyidin kumukungamen ndiy chakwel atwongoj, atwinkish manangu, ni usu. Winou wawiy kamu mutapu wasalay Valérie ni nfumwend.—Kus. 41:3.
Mapit ma mu Spiritu
it-2-F p. 646 par 2-3
Kwijik Yom ya Kurutu, Kutond Yom ya Kurutu, Kusambel Kutenchik Yom ya Kurutu
Chisal chasalay Yudas Isakariyot chawanisha uprofet wa Nzamb ni kumekesh ukaliweny ukwetay Yehova ni mwanend piur pa kwijik yom ya kurutu. (Ks 41:9; 55:12, 13; 109:8; Mid 1:16-20) Chawiy, chidap chakin kulond anch Yehova ndiy watenchika anch Yudas ukusal mwamu. Uprofet wasambela kulejan anch murund wa piswimp wa Yesu ndiy ukeza kumupan, pakwez walejanap kamu patok nany pakach pau wafanyina kusal mwamu. Chikwau kand mbil ja Bibil jimekeshinap anch Nzamb watenchika mutapu ukwikala yisalijok ya Yudas. Mbil ja nzamb jijimbwilay kambuy Paul anch: “Kangal waswakal kumwanzuk muntu makas mulong wa kumwinkish mudimu wa Nsalejetu. Kangal wamulondulap mwin kusal yitil. Ey amwiney ilama kamu kwey zwang.” (1Tm 5:22; tal kand 1Tm 3:6.) Uman umekeshina anch Yesu watonda atwimbuy end 12 nich manangu ni mu mutapu uwamp, chid mulong wasutisha uchuku wa kabuj mulong wa kumulembil Tatukwend kurutu kwa kukwat mupak. (Luk 6:12-16) Anch Nzamb wading watenchikin kal anch Yudas ndiy ukwikala mwin kumupan, mwamu umutakel wa spiritu utumbila, ni yiyul ya Nzamb yafanyinap kwikal ya usey, ni kukwatijan ni mbil mwamu Nzamb wafanyina kunung chikas ku chitil cha Yudas.
Chimeken anch chisu chamutonmdau Yudas kwikal kambuy, mu muchim wend mwadingap yitongijok yiyimp. Yudas walikidila ‘maku mend mayimp makula’ ni ku muyipish, chawiy chamushikija kulik umutakel wa Nzamb ni kwitiy wa Djabul wamushikija ku kwiy ni kumupan Yesu. (Heb 12:14, 15; Yoh 13:2; Mid 1:24, 25; Yak 1:14, 15; tal YUDAS No 4.) Pakula chisal chend chiyimp, Yesu washinshikina mu muchim wa Yudas ni wasambela kulond anch ndiy kamu ukumupana.—Yoh 13:10, 11.