BIBLIOTEK Udia pa Kapend
BIBLIOTEK
UDIA PA KAPEND
Uruund
  • BIBIL
  • MIKAND
  • YIKUMANGAN
  • mwbr24 Mwinses map. 1 ​-​ 13
  • Mareferans ma “Mudimu ni Mashakamin ma In Kristu Mukand wa Chikumangan”

Kwikil video ukimbina

Video winou umukimbinap amboku nawamp.

  • Mareferans ma “Mudimu ni Mashakamin ma In Kristu Mukand wa Chikumangan”
  • Mudimu ni Mashakamin ma In Kristu—Mukand wa Chikumangan—2024
  • Tumitu twa milong
  • RUBING RA 2-8 NDOND WA 9
  • RUBING RA 9-15 NGOND WA 9
  • RUBING RA 16-22 NGOND WA 9
  • RUBING RA 23-29 NGOND WA 9
  • RUBING RA 30 NGOND WA 9–6 NGOND WA 10
  • RUBING RA 7-13 NGOND WA 10
  • RUBING RA 14-20 NGOND WA 10
  • RUBING RA 21-27 NGOND WA 10
  • RUBING RA 28 NGOND WA 10–3 NGOND WA 11
  • w23.05 paj 26 par. 2
Mudimu ni Mashakamin ma In Kristu—Mukand wa Chikumangan—2024
mwbr24 Mwinses map. 1 ​-​ 13

Mareferans ma Mudimu ni Mashakamin ma In Kristu Mukand wa Chikumangan

© 2024 Watch Tower Bible and Tract Society of Pennsylvania

RUBING RA 2-8 NDOND WA 9

YOM YA USEY YIDA MU DIZU DA NZAMB KUSENG 79-81

Mekesh Rukat Mulong wa Dijin Ditumbila da Yehova

w17.02 paj 9 par. 5

Difut Chidi Chom ‘Chiwanyidina’ Chidiokila Kud Tatuku

5 Mutapu ik tukutwisha kumekesh anch tukatin dijin dia Yehova? Kusutin mwikadil wetu. Yehova witin anch twikal atumbila. (Tang 1 Pita 1:15, 16.) Chinech chirumburikin anch tumwifukwidin ching ndiy ni tumuziyidil ni muchim wetu wawonsu. Ap anch atuzengol, tusadin usu wetu wawonsu wa kushakam kukwatijan ni yom yitufundishinay Yehova. Mu kushakam kukwatijan ni mbil ja Yehova, tupanin katumb mulong wa dijin dend. (Mateu 5:14-16) Tumekeshin anch yijil yend yidi yiwamp ni anch Satan udi mukamakasu. Tudiap antu awanyidina, chawiy tukutwish kurumbuk. Pakwez anch twarumbuk, tukukarumuk ni kusal usu wa kulik kusal yom yikupipeja dijin dia Yehova.​—Kuseng 79:9.

ijwbv-F p. 3 par. 4-5

Rom 10:13​—“Mwawonsu Ukutazuka pa Dijin da Yehova”

Mu Bibil, mazu “mwawonsu ukutazuka pa dijin da Yehova” marumburikin yom yivud kusutamu kwau kwijik dijin da Nzamb ni kudisadin mu difukwil detu. (Kuseng 116:12-14) Marumburikin kumuchingejin Nzamb ni kukimb ukwash wend.​—Kuseng 20:7; 99:6.

Yesu Kristu wakwata dijin da Nzamb nich usey nakash. Mu mazu mend ma kusambish mu malembil ma chilakej mading anch: “Tatukwetu uda mwiur, dijin dey aditumbish” ap dikal ditumbila. (Mateu 6:9) Yesu walejana kand anch tufanyidin kwijik, kuziyin ni kumukat muntu ukweta dijin dined mulong wa kwikal nich mwom wa chikupu.​—Yohan 17:3, 6, 26.

Mapit ma mu Spiritu

it-2-F p. 53 par. 3-4

Jozef

Dijin da Jozef dizambwishinau. Mulong Jozef wading ni ndond ya usey nakash pakach pa an a Yakob, chawiy chasala anch dijin dend adisadin mulong wa kumekesh michid yawonsu ya Isarel (Kus 80:1) ap pakach pa antu asala want wa kwiyand. (Kus 78:67; Am 5:6, 15; 6:6) Dijin dend did kand mu mauprofet ma Bibil. Mu chishimushimu cha uprofet chamanay Ezekiel, uswan wa Jozef ukwet yikunku yaad (Eze 47:13), chimwing piur pa yis ya musumb yitazukinau anch “[Yehova] ud Mwinomu” pad dijin da Jozef (Eze 48:32, 35), ni piur pa kubombakesh kwa antu a Yehova, Jozef amutazukin mud mwant wa chikunku chimwing cha muchid, ni Yuda mud mwant wa chikunku chakwau cha muchid. (Eze 37:15-26) Uprofet wa Abadias wamekesha anch “majuku ma Jozef” makez kashesh “majuku ma Esau” (Abi 18), pakwez uprofet wa Zakariy walejan anch Yehova ukupandish “majuku ma Jozef.” (Zak 10:6) Jozef ndiy uda pakach pa michid ya Isarel wa mu spirit, pakwez Efrayim bwat​—Kuj 7:8.

Mulong Jozef amujimbwil mu Kujingunik 7:8 chinech chimekeshin anch uprofet walonday Yakob pashikay piswimp ni kufa wading utadin kand Isarel wa mu spiritu. Pakwez chid cha usey kuman anch Yehova Nzamb wa Yakob ukweta Dikand, wamwikadisha Yesu Kafung muwamp ni wapana mwom wend mulong wa amikoku end. (Yh 10:11-16) Kristu Yesu ud kand diyal da pa dikonk da mufulandal pashicha tempel wa Nzamb, muda Isarel wa mu spiritu. (Ef 2:20-22; 1Pi 2:4-6) Chikwau kand, Kafung winou uda Diyal ud pamwing ni Nzamb Mwin Dikand Dawonsu.​—Yh 1:1-3; Mid 7:56; Heb 10:12; ilikej ni Dis 49:24, 25.

RUBING RA 9-15 NGOND WA 9

YOM YA USEY YIDA MU DIZU DA NZAMB KUSENG 82-84

Sanger Yisend Ukweta

wp16.6 paj 8 par. 2-3

Twilejinany ku Chilakej cha Atujil

Antu a mu Yerusalem ading ayij atwimbimb nawamp atungang yinswal yau mu jinzenzil ja yikumbu. Amwing atungang yinswal yau mu tempel ya Salomon. Chawiy, atwimbimb atungang muvu wawonsu mu tempel ading mu diking ni afanyinang kupamish anau pakad chakamish.

Muntu wafunda Kuseng 84​—wading mwan wa Kora, wasadinang ku tempel rubing rumwing mwa angond musamban. Wakata kwikal mud kambimb wakamang rawonsu mu chikumbu cha Yehova, walonda anch: «A! Yehova Mwin Dikand, ndond yiushicha ey yikatishena. Muchim wam ukwet impu ni kwinan mulong nisotil kwandam mu chikumbu cha Yehova. Muchim wam ni mujimbu wam yikat kumuwangil Nzamb mwom nich musangar [. . .] Mud mukatay kukimb muswese chinswal chend, mud mukatay kukimb kambimb chinswal chilididinay anend, mwawiy kand muchim wam ukata kukimb chintamb chey​—A Yehova! Mwind Dikand, Mwant wan, Nzamb wam.» (Kuseng 84:1-3). Ov, etu nau anetu, tukat kumekesh maswir mud minam ma kwikal chisu chawosu mu chikumangen cha antu a Nzamb ni tukat kujikitish ? (Kuseng 26:8, 12).

w08 15/7 paj 30 par. 3-4

Ikalany Nich Kuchingejin Kwisikena, ni Sangarany

Upal ap mayej ma ku mujimbu yikutwish yakukangesh kusal yiwadia usotila kusal mu mudimu wa Yehova. Anch udi nvaj, ukutwish waman mudi anch dilejan diey ni yikumangan ya Ukristu yikusakidin pakemp mulong chisu chey chivud ni usu wey uvud yiyil kudi aney. Pakwez, ov, chitwishikin anch kukungin manangu mey pa yikangesh yey kukutwish pa chisu chinech kukukangesh umana yiukutwisha kusal?

Tunan twa mivu twasutila kal, mwin Levi umwing wamekesha maku mend madinga makash kudi ndiy kuwanyish. Witapila dilau dia kusadil ku tempel mbing jaad pa muvu. Pakwez, wamekesha nich dizu dia piur anch usotil ashakama chikupu piswimp ni chintambu. (Kus. 84:1-3) Chom ik chamukwasha ikundj winou ushinshamena chakwel ikala nich musangar? Ndiy wajingunina anch ap dichuku dimwing mu rupang ra tempel radinga kwitapin dilau dijim dia pakampwil. (Kus. 84:4, 5, 10) Chawiy chimwing, pa ndond pa kwimen ching pa yikangesh yetu, tufanyidin kusal usu wa kutal ni kusanger yisend yitukutwisha kuwanyish

w20.01 Paj 17 par. 12

Ukwet Usey Nakash ku Mes ma Yehova Nzamb Wey!

12 Anch uyedin, ikal nich kashinsh anch Yehova wij mar umena. Mwita ukwash chakwel ukudish chitongijok chiwamp piur pa mayej mey. Kupwa sadin Bibil mulong wa kutan mazu mawamp malonday Yehova mulong weyey. Shinshikin maverse mamekeshina mutapu Yehova uyikwatinay atushalapol end nich usey nakash. Kusutil kusal mwamu, ukuman anch Yehova udi muwamp kudi awonsu amusadidina nich kushinshaman.​—Kus. 84:11.

Mapit ma mu Spiritu

it-2-F p. 459 par. 5-6

Mwan Anshon Wakad Tatuku

Mulong chadingap chiswapela kuyibangin antu a mutapu winou akad in kuyilondin, Yehova wasadina mazu “mwan anshon wakad tatuku” parumburilay piur pa yom yading yimekeshina kutentam ap kuburen kutentam kwa in Isarel. Pawading muchim wa Isarel mu urund uwamp ni Nzamb, mwan anshon wakad tatuku amubanginang. Pakwez pasambisha kuyip yom mwi ngand, mwan anshon wakad tatukwend amuduulang ni chinech chid chijingidij chamekesha anch muchid wasambish kal kufa. (Kus 82:3; 94:6; Is 1:17, 23; Jer 7:5-7; 22:3; Eze 22:7; Zak 7:9-11; Mal 3:5) Yehova wayishingang antu ayimeshang an anshon akad atatukwau mar. (Kuv 27:19; Is 10:1, 2) Yehova amwinend ud Mwin Kuyikol (Jnsw 23:10, 11), Nkwash (Kus 10:14), ni Tatuku (Kus 68:5) wa an anshon. Ndiy ukata kuyilondin (Kuv 10:17, 18), ni kuyovil riy (Ozey 14:3), ni kuyikwash (Kus 146:9), ni kuyichidij.​—Jer 49:11.

In Kristu akin akat kwijikan kusutin kuyibangin antu anenganenga mulong afishin kal anfumwan ap anvajau. Kambuy Yohan wayifundina in Kristu anch: “Ritiy ra zwang rakad chitaj rusotilay Nzamb Tatuku rawiy riner, kuyikwash an anshon ni adaafu, ni kwiyep wakad kwijond nich yom yiyimp ya mu mangand.”—Jak 1:27.

RUBING RA 16-22 NGOND WA 9

YOM YA USEY YIDA MU DIZU DA NZAMB KUSENG 85-87

Malembil Makat Kutukwash Kujijaman

w12 15/5 paj 28 par. 10

Ov, Ukat Kumunyik Uyaj wa Yehova?

10 Chakwel tumunyika uyaj wa Nzamb, niyetu tuswiridin ‘kulembil yisu yawonsu.’ (Rom 12:12) Tukutwish ni tufanyidin kulembil anch Yehova atukwasha chakwel tumusadila mu mutapu witiyikina. Chakwel tusala mwamu, tukutwish kumwit spiritu utumbila, chakwel twikala ni usu wa kurish nich yoziu, ni kwikal nich ukaliweny wa “kulejan dizu dia uyakin nich kutentam.” (2 Tim. 2:15; Mat. 6:13; Luka 11:13; 17:5) Mudi mukatay mwan kukimb ukwash wa tatukwend, chawiy chimwing tuswiridin ukwash wa Tatukwetu wa mwiur, Yehova. Anch twamwit chakwel atukwasha tumusadila nakash, tukutwish kwikal nich ruchingej anch ndiy ukez kutukwash. Kangal wiyovany anch tukat kumuletin masok! Pakwez, mushimanany amboku mu malembil, mujikitishany, kimbany umutakel wend anch tudi mu yoziu, ni itany chakwel atukwasha kumusadil mu mutapu wakwel anch tushimana dijin diend ditumbila.​—Kus. 86:12; Jak. 1:5-7.

w23.05 paj. 13 par. 17-18

Mutapu Ukatay Yehova Kwakul ku Malembil Metu

17 Tang Kuseng 86:6, 7. Nfund a Kuseng David wading nich kashinsh anch Yehova wateshang ni kwakul ku malembil mend. Niyey ukutwish kwikal nich kashinsh mud kinak. Yilakej twisambina kal mu mutu wa mulong winou yatwinkish kal kashinsh anch Yehova ukutwish kutwinkish manangu ni usu tuswirikedina mulong wa kujijaman. Ukutwish kusadin dijuku dietu dia mu spiritu ap kand antu akad kumwifukwil ndiy nlel mulong wa kutukwash mu mitapu kanang.

18 Ap anch chisu chawonsu Yehova kakwilingap ku malembil metu mu mutapu tuchingejina, twij chakin kamu anch ukwakul. Ukutwinkish yom tukweta nich kuswir ni ukusal mwamu pa chisu tuyiswirikedina. Chawiy, dandamen kulembil nich ritiy, ni ikal nich kashinsh anch Yehova ukukwakul nlel ni ukuwanyish ‘maswir ma antu awonsu akweta mwom’ mwi ngand yisu yikweza.​—Kus. 145:16.

Mapit ma mu Spiritu

it-1-F p. 492 par. 2

Muchim

Kusal nich “Muchim Wawonsu.” Muchim wakin ufanyidin kwikal wakabuj mulong wa kusal nawamp, pakwez muchim wa chifanakesh ukutwish kwaurik. David walembila anch: ‘Bombakesh muchim wam mulong wa kwov dijin dey wom,” chinech chimekeshin anch muchim wa muntu ukutwish kwaurik pantaliken ni yovil ni wom wend. (Kus 86:11) Muntu wa mutapu winou ukutwish kwikal ni muchim ‘waurokina’​—charumburik anch kumwifukwil Nzamb nich kalengidij. (Kus 119:113; Kuj 3:16) Muntu ukutwish kwikal kand nich “michim yaad” (mu Heb, muchim ni muchim), mud kupakish kusadin antu aad, ap kulond yom yindj oku ukat kutong kwey yom yindj. (1Jsng 12:33; Kus 12:2) Yesu wasaula rubabek ra antu akweta michim yaad.​—Mt 15:7, 8.

RUBING RA 23-29 NGOND WA 9

YOM YA USEY YIDA MU DIZU DA NZAMB KUSENG 88-89

Mutapu wa Kuyikel wa Yehova Upandaken Kuwap

w17.06 paj 22 par. 5

Tukwashany Ukaleng wa Yehova!

5 Tongin kand piur pa diyingishin dikwau disadina anch Yehova ikala ni mbil ya kuyikel. Ndiy ukat kusadin ulabu wend mu mutapu utentamina. Utulejin anch: ‘Am nidi Yehova, Muntu ukata kumekesh rukat rishinshamena, kutentam ni kurumburish pa divu, ni mulong wa yom yiney nikat kusangar.’ (Jeremiy 9:24) Yehova kakwetap kuswir kwa yijil ya antu mulong yimukwasha kukwat mipak piur pa yom yidia yiwamp. Pakwez, ndiy ukat kutek mbil mulong wa yom yidia yiwamp. Ni mulong mbil yiney yimedin pa kutentam kwend kuwanyidina, chawiy Yehova ukat kuyinkish antu yijil. Nfund a kuseng walonda anch: ‘Kutentam ni kurumburish madi manguj ma nkwas yey.’ Chawiy chijil chawonsu, mbil yawonsu ni mipak yawonsu yidiokila kudiay Yehova yiding yitentamina. (Kuseng 89:14; 119:128) Satan walonda anch Yehova kadiap Nyikel muwamp. Chawiy Satan kakutwishap kulet kutentam pa mangand.

w17.06 paj 24 par. 10-11

Tukwashany Ukaleng wa Yehova!

10 Winyikel wa Yehova uyipinap. Pakwez, antu amuziyidina akwet want ipau ni musangar. (2 Korint 3:17) David walonda piur pa Yehova anch: “Kalimish ni katumb yidi kurutu kwend, ukash ni musangar yizwil kushichay.” (1 Jinsangu 16:7, 27) Nfund a kuseng Etan wafunda anch: ‘Ayuk kwau antu ija dizu dia mpuny yey, A Yehova, awiy akata kwendil mu kutok kukata kudiokal mwis mwey. Akat kusangar mu dijin diey machuku mawonsu, akat kwitumbish mulong wa kutentam kwey.’​—Kuseng 89:15, 16.

11 Anch twatongijokin piur pa uwamp wa Yehova, tukwikal nich kashinsh anch winyikel wend udi uwamp. Tukwiyov mudi mwiyovay nfund a kuseng pamulejay Nzamb anch: “Kushakam dichuku dimwing mu dibur diey, kuwapil kupandakan kushakam machuku kanan kwindjing!” (Kuseng 84:11) Yehova watusala ni watutanga, chawiy wij kamu nawamp yom yikutwisha kutusangaresh. Utwinkishin kwa kwikatin yom yivud nakash kusutamu yitukweta nich kuswir. Yom yawonsu yitwitinay Yehova kusal yidi mulong wa uwamp wetu. Ap anch twipan, tukwikal ching ni musangar anch twamuziyin Yehova.​—Tang Isay 48:17.

w14 1/10 paj 13 par. 14

Ikal ni Ritiy Rikash mu Want

14 Shinshikin bil pa yamukanau Mwant David wa mu Isarel wa pasak kudi Yehova mu yitazukinau anch manswik ma David. (Tang 2 Samwel 7:12, 16.) Yehova wasala manswik minam ni David pa chirung cha want wa David mu Yerusalem, wamukana anch Mesia wafanyina kwikal wa mu dijuku diend. (Luka 1:30-33) Chawiy lel, Yehova walejana patok piur pa mu dijuku mukuvadikina mbut yiney ni walonda anch mwin kumuswan David ufanyidin kwikal “umwing unatonda” mulong wa ditand dia Want wa Umesia. (Ezek. 21:25-27) Kusutil kudi Yesu, want wa David ‘ukushakam chikupu.’ Chikwau kand, mbut ya David “yikez kikalaku chikupu, nkwas yend ya katumb yikez kushakam chikupu mudi muten.” (Kus. 89:34-37) Mwaning, winyikel wa Mesia kakezap kaukatul milamu, ni yom tukutaninamu mu wiyikel winou yikwikal ya chikupu!

Mapit ma mu Spiritu

cl paj 281 par. 4-5

‘Ey Yey Kusu Kwey Ushinshamena’

4 “Kushinshaman” mudi mwisambidinau mu Mikand ya Hebereu udi uwamp wa kushinshikin nich rukat pa chom kanang djat ni pakeza kuwanyin rutong riner. Kupandikenamu kwikal muntu wa kashinsh. Chawiy lel, muntu ukutwish kwikal ushinshamena anch wij anch ufanyidin kusal mwamu. Pakwez, kushinshaman kwimedin pa rukat. Chikwau kand, dizu “ushinshamena” akutwish kudisadil piur pa yom yakad kwikal nich mwom. Chilakej, Nfund a Kuseng watazuka ngond anch “uman wa mwiur udia wakin” mulong umekening uchuku ni uchuku. (Kuseng 89:37) Pakwez chitwishikinap kulond anch ngond ushinshamen. Ov, mulong wak? Mulong kushinshaman kudi kumekesh rukat​—chom chakad kwikal nich mwom chikutwishap kumekesh mwikadil winou.

5 Kukwatijan ni yilondinay Bibil, kushinshaman chidi chirungul. Udi mwikadil ukata kumekanang pakach pa muntu umekeshina mwikadil winou ni muntu umekeshinau. Kushinshaman kwinoku kukatap kwidjidjekang bwat. Kudiap mudi mabeb makatau kubachikang kudi rinkind. Pakwez, kushinshaman ap rukat ra kashinsh, udi usu wa kupandakan yikokujol yijim nakash.

RUBING RA 30 NGOND WA 9–6 NGOND WA 10

YOM YA USEY YIDA MU DIZU DA NZAMB KUSENG 90-91

Muchingejina Yehova Chakwel Mwom Wey Wikal Ulemp

wp19.3 paj 5 par. 4-6

Kukimbijol kwa Antu Mulong wa Kulepish Mwom

In siyans avud alondin anch ap anch kudi mitapu yivud ya kukangesh upal, antu kakutwishap kusal mivu yivud kusutamu mivu yisadinau nlel. Chakin kamu, kusambish mu mivu yitot dikum ni chidivu, ruchingej ra antu ra kulal mivu yivud riwejin. Pakwez, chidi mwamu mulong wa kwinang kuwamp, mwon yiyichidijina antu ku mayej ni mwon yikwau yokina mayej mavud. In siyans amwing itiyijin anch kulep kwa mwom wa muntu kukwet mimbu ya chivadik.

Kwasutin kal mivu 3 500, kudiosh kwafunday Moses mu Bibil anch: “Mivu ya mwom yetu yishikin ku makum sambwad, ap anch usu uwanyidin yikushik ku makum chinan, ni kuvul kwa mivu yetu yin yidi kusu kwau ya mar ni ushon. Mwom yetu yikat kupwa swa chadi tukat kuya.” (Kuseng 90:10) Chikalap nchik usu usadinau antu mulong wa kulepish mwom wetu, mwom udandamedin kwikal kamu mudi mwalonday Moses.

Mu kwilakej nich mwom wiswimp ukwetau antu, yitangil yimwing mudi atufur amwing akat kusal mivu 150 ni kusut ni mitond mudi baobab yikutwish kusal tunan twa mivu. Anch twilakej kulep kwa mwom wetu ni yitangil yiney ni yikwau kand yikweta mwom, ov, yitubachikinap kwiyipul anch: ‘Ov, mwom win wawiy kwau winou wa mivu 70 ap 80?’

wp19.1 paj 5, mushet

Dijin Dia Nzamb Nany?

Antu avud akat kwiyipul chipul chinech. Pamwing ap niyey wiyipulap kal mwamu. Tukutwish kuchipul kand mu mutapu ukwau anch: Anch mangand ni yom yawonsu yidiamu ayitanga kudi Nzamb, chadi ndiy nany wamutanga?

Antu a siyans itiyijining anch yom yawonsu yidia pa mangand yikweting disambishin. Mazu minam makwatijadin ni chitongijok chidia mu mukand wa kusambish wa Bibil chilondina anch: ‘Kwinsambishil Nzamb watanga diur ni divu.’​—Disambishil 1:1.

Atutumbu awonsu ni maplanet yiyezinap ayinau. Pakwel anch yom kanang yikalaku, chifanyidin kwikala muntu kanang ukuyitanga. Pakad sakatang, yom yawonsu tumena, kuwejaku etu, yelap kwikalaku. Chakin kamu, anch kwadingap nsambishin, komb kwelangap kand kwikal nsudien. Chawiy, komb kufanyidin kwikal sakatang! Sakatang winou udi spiritu ukweta usu nakash ni dijin diend ndiy Yehova.​—Yohan 4:24.

Bibil ulondin piur pa Nzamb anch: “Piyadinga mikandu kayitangilap kal, ap piwadinga kiutangilap kal ngand, kudokal chikupu ni chikupu, ey uding kwey Nzamb.” (Kuseng 90:2) Chawiy, komb Nzamb udingaku kwend chisu chawonsu. Komb ‘kwinsambishil’ Nzamb ndiy watanga yom yawonsu yidia mu mangand.​—Kujingunik 4:11.

w22.06 paj 18 par. 16-17

Mutapu Ukutwisha Rukat ra Yehova Kutukwash Kupandakan Wom

16 Satan wij anch tukatin mwom nakash. Chawiy, ulondin anch tukutwish kulikap yom yin yawonsu​—ap urund tukweta ni Yehova—​mulong wa kuchidij mwom tukweta katat. (Job 2:4, 5) Satan ud mukamakasu nakash! Pakwez, mulong “[ukwet] ukash wa kulet rufu,” Satan ukat kusadin wom wa chivadik tukweta piur pa rufu mulong wa kutubachik kumulik Yehova. (Heb. 2:14, 15) Yisu yimwing, antu a Satan akat kuyilej atushalapol a Yehova anch akuyijip anch alik kutun ritiy rau. Yisu yikwau, anch tuyedin nakash ni chitin kutwok pakad kulab, Satan ukutwish kusadin chisu chinech mulong wa kutubachik kwitiy milad yiyimp ya kwiyokish. Adokter ni anamakwetu akad kwikal Atuman akutwish kutushindin chakwel atutek mash, yom yikutwisha kutushikij kujip chijil cha Nzamb. Ap muntu mukwau ukutwish kusal usu wa kutubachik kwitiy mulad wa kwiyokish wakad kukwatijan ni mbil jidia mu Mifund.

17 Ap anch tukatinap kufa, twij anch Yehova ukudandamen kutukat ap anch twafap nchik. (Tang Rom 8:37-39.) Anch arund a Yehova afa, ukat kudandamen kuyilam mu manangu mud padiau aom. (Luka 20:37, 38) Ukwet impu nakash ya kuyichirish ku mwom. (Job 14:15) Yehova wafuta difut dipandakena kujimb chakwel tutwisha “kwikal nich mwom wa chikupu.” (Yoh. 3:16) Twij mutapu utukatinay Yehova chikurikina ni mutapu utubangidinay. Pa ndond pa kumulik Yehova anch tuyedina nakash, ap anch atulejin anch akimbin kutujip, tufanyidin kumukungamen ndiy chakwel atwongoj, atwinkish manang, ni usu. Winou wawiy kamu mutapu wasalay Valérie ni nfumwend.​—Kus. 41:3.

Mapit ma mu Spiritu

wp17.5 5

Ov, Ukwet Mangel Ukulamining?

Bibil kafundishinap anch muntu ni muntu ukweting mwangel umulemining. Chid chakin kamu anch Yesu walonda anch : «Babalany mulong kangal wamupipejany umwing wa an akemp inay, mulong nikulejinany chakin kamu anch angel a mwiur ad chisu chawonsu kurutua kwa Tatukwam uda mwiur» (Mateu 18:10, NWT). Chawiy, pa ndond pa kulond anch muntu ni muntu ukweting mwangel umulamining, Yesu walonda anch angel akat kumubangin mwin kwilej wend win mwawonsu. Chawiy in kwifukwil akin a Nzamb kakusalangap yom pakad manang ni kwitek mu ubaj, ni kutong anch angel a Nzamb akuyichidij.

Ov, chinech chirumburikin anch angel kakuyikwashangap antu? Bwat kwau (Kuseng 91:11). Antu amwing itiyijin anch Nzamb watuma angel mulong wa kuyichidij ni kuyitakel. Mwamutonginay Kenneth, twisambinang mu mutu wa mulong wa kusambish. Pakad kumufish nich nakash, pamwing ap ulondin yakin. Chisu chikatau kulejan, Atuman a Yehova akat kuman yom yimekeshina anch angel akat kuyikwash. Chawiy, mulong angel kakumekanangap, tukutwishap kulond kamu nawamp mutapu uyisadidiningap Nzamb mulong wa kuyiwash antu arishina ni milong kushalijan. Ap mwamwap nchik, tufanyidinap kumujikitish Mwin Dikand Dawonsu mulong wa ukwash ukatay kutwinkish (Kolosay 3:15 ; Jakobu 1:17, 18).

RUBING RA 7-13 NGOND WA 10

YOM YA USEY YIDA MU DIZU DA NZAMB KUSENG 92-95

Kumusadin Yehova Chawiy Chom Chiwamp Nakash mu Mwom

w18.04 paj 28 par. 5

En Ansand, ov, Ukat Kushinshikinany pa Mipak ya mu Spiritu?

5 Diyingishin dia usey nakash dia kwitekin mipak ya mu spiritu didi mulong wa kumujikitish Yehova mulong wa rukat rend ni mulong wa yom yatusadinay. Nfund a Kuseng umwing walonda anch: “Chidi chiwamp kumujikitish [Yehova] . . . A! [Yehova], ey wansangaresha mulong wa yisalijok yey yikwamushena. Nikat kujikitish mulong wa midimu ya makas mey.” (Kuseng 92:2, 5) Tong piur pa yom yawonsu yakwinkishau kal kudi Yehova mudi mwom, ritiy, Bibil, chikumangen ni ruchingej ra kushakam chikupu mu Paradis. Anch witekin mipak ya mu spiritu, umekeshin kudi Yehova anch ujikitishin mulong wa yom yiney yawonsu ni anch usadin anch wikala nend piswimp.

w18.11 paj 23 par. 8

Ov, Nany Ukata Kuumb Yitongijok Yey?

8 Mudi nvaj muwamp, Yehova ukatin anend ikal ni mwom uwamp. (Isay 48:17, 18) Chawiy ukat kutufundish mbil ja pa dishin piur pa mwikadil uwamp ni mutapu tufanyidina kuyisadin antu akwau. Utwitin kwilej kuman yom mutapu uyimenay ndiy ni kushakam kukwatijan ni yom yitufundishinay. Yom yiney yidiap chikangesh. Pakwez, yikat kutusal twikal in manangu ni kukwat mipak yiwamp. (Kuseng 92:5; Jinswir 2:1-5; Isay 55:9) Tukutwish kwetu kudandamen kusanger yom tukatina, pakwez tukutwish kutond yom yikutuletina musangar. (Kuseng 1:2, 3) Anch twikal ni yitongijok ya Yehova, tukat kutaninamu mu mitapu yivud!

w20.01 paj 19 par. 18

Ukwet Usey Nakash ku Mes ma Yehova Nzamb Wey!

18 Chituyila mu kunanap tukutwish kwikal nich kashinsh anch Yehova uchikwet mudimu tukutwisha kusal. (Kus. 92:12-15) Yesu watufundisha anch ap anch yom tusadina yamekan mudi yikwetap usey, Yehova ukat kusanger nakash chom chawonsu tukutwisha kusal mu mudimu wend. (Luka 21:2-4) Chawiy shinshikin pa yom ukutwisha kusal. Chilakej, ukutwish kulond piur pa Yehova, kulembil mulong wa akadivar ney, ni kuyikasikesh antu akwau chakwel ashal ashinshamena. Yehova ukumen mudi mbay nend wa mudimu, kadiap mulong wa yom usadina, pakwez mulong wa rusot rey ra kumusadin.​—1 Kor. 3:5-9.

Mapit ma mu Spiritu

cl paj 176 par. 18

‘A Kujimb Kwa . . . Manang ma Nzamb!’

18 Kambuy Paul wamekesha mutapu manangu ma Yehova masutinamu kulemp manangu min mawonsu palonday anch: “A, kujimb kwa rupit ni [manangu] ni ronganyin ra Nzamb! Dirumburish diend diakad kwijikan ni jinjil jend jakad kurumburik kudi antu!” (Rom 11:33) Pasambishinay Paul kulond mazu mend anch: “A,” ndiy wamekesha mutapu washimwokangay​—nich kalimish kapandakena. Dizu dia Grek diajimbulay mu verse winou dikarumwinau anch “kujimb” diambaten nich dizu “dibuku dikurikina.” Chawiy, mazu mend minam makwet chitongijok chimwing chikash mu manangu. Pitushinshikidininga manangu ma Yehova, tudi mudi antu adjibwidilau mu dibuku dikurikina diakad nsudiel; manangu minam madi majim ni makurukina, tukutwishap kwijik kuvul kwamu, ap kupakish kurumburil kujimb kwamu ap chimadia. (Kuseng 92:5) Ov, mulong winou utubachikinap ku kwikepish?

RUBING RA 14-20 NGOND WA 10

YOM YA USEY YIDA MU DIZU DA NZAMB KUSENG 96-99

“Lejan Rusang Ruwamp”!

w11-F 1/3 p 6 par. 1-2

Rusang Ruwamp chom ik?

IN KRISTU afanyidin kulejan ‘rusang ruwamp ra want’ kusutin kuyilej antu akwau piur pa want winou, kuyirumburil anch Want ud guvernema wa machuku ma kurutu wa pa mangand mawonsu ukuyikela pa divu nich kutentam. Pakwez, mazu ‘rusang ruwamp’ amasadidin kand mutapu ukwau mu Bibil. Chilakej, tutanin mazu mud ‘rusang ruwamp ra dipandish’ (Kuseng 96:2); ‘rusang ruwamp ra Nzamb’ (Rom 15:16); ni “rusang ruwamp piur pa Yesu Kristu.”​—Marko 1:1.

Mu wiswimp, rusang ruwamp rikwet uyakin wawonsu walonday Yesu ni wafundau in kwilej end. Kurutu kwa kuya mwiur, Yesu wayileja in kwilej end anch: “yangany kud antu a michid yawonsu, ni ikadishany in kwilej pakach pau, yibatishany mu dijin da Tatuku ni da Mwan ni da spiritu utumbila, yifundishany kuziyin ku yom yawonsu yinakulejanya.” (Mateu 28:19, 20) Chawiy mudimu wa in Kristu akin udap ching wa kuyijikish antu akwau piur pa Want, afanyidin kand kwikadish in kwilej.

w12 1/10 paj 16 par. 1

Ov, Chom ik Chikeza Kushiken pa Dichuku dia Dirumburish?

Mudi mulejenau pa chipich chidia ku chikas cha katatuku, antu avud akat kutong anch pa Dichuku dia Dirumburish tutikit ni tutikit twa antu akez kutulet kurutu kwa nkwas wa Nzamb chakwel ayirumburisha kwambat nich yom yasalau pasak​—amwing akez kutambul mwom mwiur, ni akwau akez kayimesh mar mu karung ka misiny. Pakwez, Bibil ulejen anch, rutong ra Dichuku dia Dirumburish ridi ra kuyikol antu ku kuburen kutentam. (Kuseng 96:13) Nzamb wamuteka Yesu chakwel ikala Nkalansambu ukeza kutek kutentam pa mangand.​—Tang Isay 11:1-5; Midimu 17:31.

w12 15/9 paj 12 par. 18-19

Chisambu Mu Mivu Kanan​—Ni Kurutu!

18 Urund winou wa piswimp wapwil payibachikau antu chakwel abwambwila ku ukaleng wa Yehova. Pakwez, kudiosh muvu wa 1914, Want wa Mesia wasambishin pakemp-pakemp kuchirish uumwing ni urund winou. (Efes 1:9, 10) Mu Mivu Kanan ya Kuyikel, yom yamushena yidia katat “yakad kumekan” yikeza kwikal yakin. Chawiy chikeza kwez “disudiel,” kupwa kwa Mivu Kanan ya Kuyikel kwa Kristu. Ov, chom ik chikeza kushiken? Ap anch amwinkishin kal “ulabu wawonsu wa mwiur ni wa pansh,” Yesu kakatap kukimbang want bwat. Ndiy kakwetap rutong ra kusend ndond ya Yehova bwat. Nich kwitudish ndiy “ukez kapan Want kudi Nzamb Tatuku.” Ndiy ukez kusadil mwikadil wend wa pakampwil ni ulabu wend mulong wa “kupan uyaj kudi Nzamb.”​—Mat. 28:18; Fil. 2:9-11.

19 Kupwa, antu awonsu akeza kwikal mwishin mwa wintakel wa Want pa mangand, akez kuyishikij ku kuwanyin. Akez kulondul chilakej cha Yesu, ni kwitudish ni kwitiy kwa kwisotin ukaleng wa Yehova. Awiy akez kwikal ni chisu cha kumekesh anch asotin kusal mwamu mu kushinshaman pa chirung cha kupakiu kwa nsudiel. (Kuj. 20:7-10) Kupwa, ambwambol awonsu—a ukauntu ni a muspiritu—akez kuyishesh chikupu. Chikez kwikal chisu cha musangar ni cha kuzangijal mud ik! Dijuku didia pa mangand mawonsu dikez kumushiman Yehova nich musangar, ndiy ukeza “kutakel [yom] yawonsu.”​—Tang Kuseng 99:1-3.

Mapit ma mu Spiritu

it-1-F p. 425 par. 5

Muminy

Isambidin piur pa “muminy usu” ni udap kwau ching kusu mu Kuseng, pakwez ud kand mu mifund ya Isay ni ya kambuy Yohan. (Kus 33:3; 40:3; 96:1; 98:1; 144:9; 149:1; Is 42:10; Kuj 5:9; 14:3) Kushinshikin jindond jisambidinau mazu “muminy usu” kumekeshin anch akat kuuwang anch kwashiken chom chisu chijim chimekeshin mutapu usadidinay Yehova ukaleng wend pa mangand mawonsu. Mud mulejenau nich musangay mu Kuseng 96:10 anch: “[Yehova] ndiy uyikedila.” Yom yisu yimekeshina kujimb kwa want wa Yehova, ni yibudikin yau yimekena mwiur ni pansh, yikutwish kwikal mutu wa mulong wa “muminy usu” winou.​—Kus 96:11-13; 98:9; Is 42:10, 13.

RUBING RA 21-27 NGOND WA 10

YOM YA USEY YIDA MU DIZU DA NZAMB KUSENG 100-102

Jikitish Mulong wa Rukat Rishinshamena ra Yehova

w23.03 paj 12 par. 18-19

Mutapu wa Kwirijek Mulong wa Dibatish

18 Rukat ukweta mulong wa Yehova ud mwikadil uwamp nakash, wawiy mwikadil uwamp nakash ukweta. (Tang Jinswir 3:3-6.) Kumukat Nzamb nakash kukutwish kukukwash kurish ni yakamish tukweta. Yisu yivud Bibil ukat kwisambin rukat rishinshamena ra Yehova mulong wa atushalapol end. Mwikadil winou urumburikin anch Yehova kakutwishap kuyidjibul atushalapol end ap kwimik kuyikat. (Kus. 100:5) Akutanga mu chifu cha Nzamb. (Dis. 1:26) Mutapu ik ukutwisha kumekesh rukat mud riner?

19 Sambish kujikitish. (1 Tes. 5:18) Dichuku diawonsu iyipula anch: ‘Mutapu ik wanmekeshinangay Yehova rukat?’ Kupwa mujikitisha Yehova mu malembil mey, ni jimbul yom ya pakampwil yakusadinangay. Man yisal ya rukat ya Yehova mud ukusadidinay ey pakampwil, mud mutapu wajinguninay kambuy Paul niyend yom yiney piur pa Yehova. (Tang Galatia 2:20.) Iyipula anch: ‘Ov, niyam nikatin kumekesh anch nimukatin?’ Rukat ukweta mulong wa Yehova rikukukwash kujijamen yoziu ni kurish nawamp ni yikokujol ukweta. Rikukubachik kulimish program wey wa mu spiritu ni kumekesh pichuku pichuku anch umukatin Tatukwey wa mwiur.

w23.02 paj 17 par. 10

“Ilamany Ayinen, Babalany!”

10 Pakach pa ubaj tufanyidina kwipuk pad yom mud kwizez ni muntu pakad chitongijok cha kwatijan nend, kwifunt kuna, kwifunt kudia, kulond mazu mayitapina antu akwau ku muchim, kwipuwangej kukweta yom ya chisum, pornografi, ap kand yom yikwau ya mutapu winou. (Kus. 101:3) Mukankuny netu Djabul ukat kukimb yisu yawonsu mitapu ya kuyipish urund wetu ni Yehova. (1 Pita 5:8) Anch tubabelap, Satan ukutwish kukun mu manangu ni mu michim yetu yovil ya mukau, kuburen win kashinsh, ris, rukis, kwitutul, ni rukuny. (Gal. 5:19-21) Kwinsambishin tukutwish kutong anch yovil yiney yidiap kamu kwau ya ubaj. Pakwez anch tukwatinap mupak wa kuyipuk pakad kulab, yovil yiney yikudandamen kukul mud mutond ukweta ulemb ni yibudikin yikwikal yiyimp.​—Jak. 1:14, 15.

w11 15/7 paj 16 par. 7-8

Ov, Ukez Kutesh Kubabesh Kwovikena Patok Kwa Yehova?

7 Ov, chom ik chirumburikina kwipuk alej amakasu? Tufanyidinap kuyak ku yikumbu yetu ap kuyilangwish. Tufanyidinap kand kutang mikand yau, kutal maprogram mau matekinau ku Televizion, kukimb ma Site mau ku Internet, ap kwisambidin piur pa ma jurnal mau. Ov, mulong wak tufanyidin kwilam mutapu winou? Mulong wa rukat. Tumukatin “Nzamb wakin,” chawiy lel, tufanyidinap kusanger malejan mau ma makasu matadikijadina nich Dizu diend dia uyakin. (Kus. 31:5, TMK; Yoh. 17:17) Tukatin kand dirijek dia Yehova, kututambwidila malejan mamushena ma uyakin​—dijin dia Yehova ni kurumburik kwa dijin dined, rutong ra Nzamb piur pa divu, mwikadil wa afu, ni ruchingej ra disanguk. Ov, ukutwish kuvurik mutapu wiyova kapamp ka kusambish piwileja uyakin winou ni uyakin ukwau wa usey? Chad, mulong wak ukutwish kulikidil amwiney muntu kanang akovisha kuyip mulong ukat kulond nayimp piur pa dirijek diakuleja uyakin winou?​—Yoh. 6:66-69.

8 Chikalap nchik yilondinau kudi alej a makasu, tukezap kuyilondul! Tufanyidinap kuya ku dijiy diumina mudi dined chakwel atudimba ni kutuziyish. Pakwez, kwatany amboku mupak wa kushinshaman kudi Yehova ni ku ditenchik dined dipwishina impu yetu nich mem mawamp matudishina ma uyakin madiokila mu Dizu dia Nzamb diapepilau nich spiritu utumbila.​—Isay 55:1-3; Mat. 24:45-47.

Mapit ma mu Spiritu

it-2-F p. 522 par. 8-9

Ikubu

Yisu yivud anch ikubu wikut, ukat kuya kwi ndond kwa amwinend, kwinikwa ukat kunenganan ni kutek mutu wend mu mapur, chawiy ukat kushakam pakad kunyikek, ni palemp ukutwish kumekan mud diyal ditok. Kajil winou ukat kushakam mwamu mu asaa avud, yawiy yimekeshina kamu nawamp mwikadil wa runeng wisambinay nfund a kuseng chisu chilonday piur pa kusansan kwend kukash anch: “Nidi mudi ikubu udia mwi mpay.” (Kus 102:6, TMK) Pinap dizu “mwimpay” dirumburikinap kamu kabeng, pakwez dirumburikin ndond yida kulemp nau antu, pamwing ap disaz. Mu yirung yimwing, masaz mamwing mada kurul kwa Nkurubuk ya Yordan mukat kuwil amakubu ni nlel unou. Kud milad yisatu ya amakubu mu Isarel. Mulad uvudina nakash ud wa amakubu atok (Pelecanus onocrotalus); amakubu a rimbundwambundu (Pelecanus crispus) ni amakubu asunzirikina pa nyim (Pelecanus rufescens) akat kutanijan pa chipatu.

Ikubu ukat kutond kuya kwi ndond ya amwinend, kwakad masok ma antu. Kwawiy kwinaku kukatay kutungin chinswal, kutetwil twanend ni kuchinin kupwa kwa kuta. Mulong ukatining kwi ndond kwa amwinend ni kwakad antu, Bibil ukat kumusadin kajil winou mulong wa kumekesh chijingidij cha kusheshik kwa chikupu. Mulong wa kufanakesh mutapu wafanyinay Edom kusheshik, Isay wasambela kulejan anch ikubu ukushakam mwi ngand yiney. (Is 34:11) Sofoniy wasambela kulejan uprofet anch amakubu akez kushakam pa yiuj ya musumb wa Niniv, chinech chimekesh kusheshik kwa rawonsu ni kulik kwikaku kwa antu.​—Sof 2:13, 14.

RUBING RA 28 NGOND WA 10–3 NGOND WA 11

YOM YA USEY YIDA MU DIZU DA NZAMB KUSENG 103-104

Ukat Kuvurik Anch “Tudi Kwetu Rufunfut

w23.07 paj 21 par. 5

Mwimburija Yehova​—Ni Ikal Wisikena

5 Kwikepish kwa Yehova ni riy rend yawiy yom yikata kumubachik kwikal wisikena. Chilakej, kwikepish kwa Yehova kwamekena patok chisu chasotay kushesh antu ayimp ading mu Sodom. Kusutil angel end, Yehova wamuleja Lot ikundj wading utentamina kuchinin kwi ndond ya mikandu. Lot wova wom wa kuya kwinikwa. Chawiy, wita chakwel ndiy ni dijuku diend achinina ku Zowar, kamusumb kakemp kakimbay Yehova kushesh. Yehova wafanyidina kumushindin Lot chakwel aziyila yom yamulejay. Chawiy, Yehova kamukangeshap Lot kuchinin ku Zowar, ni waswimpa chitongijok chend cha kushesh musumb winou. (Dis. 19:18-22) Mu kusut kwa mivu yivud, Yehova wayovila antu a musumb wa Ninive riy. Chawiy, wamutuma muprofet Yona mulong wa kuya kulejan uruu wa disheshik dia musumb mulong wa antu ayimp. Pakwez, in Ninive akarumuka, ni Yehova waswimpa chitongijok chadingay nich cha kushesh musumb winou.​—Yona 3:1, 10; 4:10, 11.

w23.09 paj 6-7 par. 16-18

Muchingejina Yehova, mud Mwasalay Samson

16 Ap anch Samson wamana mar nakash mulong wa kurumbuk kwend, kaziyap kusal rusot ra Yehova. Niyetu tufanyidinap kwimik kusal rusot ra Yehova anch twarumbuk ni anch atupup ap twashadish yisend. Tuvurikany anch Yehova ukatin kamu kutulikishin. (Kus. 103:8-10) Chikalap nchik kurumbuk kwetu, Yehova ukutwish kutwinkish usu mulong wa kusal rusot rend, mud mwasalay kud Samson.

17 Shinshikin chilakej cha mukadivar nsand umwing utazukinau anch Michael. Wading ukwataken nakash mu mudimu wa Yehova, mulong wading nkwash wa mudimu ni chibol wa rawonsu. Pakwez cha ushon, wasala chitil ni chinech chamushikija kushadish yisend yend mu chikumangen. Ulondin anch, “pa chisu chinicha nading nikwataken nakash mu mudimu wa Yehova. Pakad kuchingejin, niyova anch nikutwishap kand kusal chom ap chimwing mu mudimu wa Yehova. Kandikal nitongangap anch Yehova ukutwish kwindjibul. Pakwez niyipulang anch urund wam ni Yehova ukudandamen kand kwikal ukash, ap anch nikwikal kand ni mutapu wa kumusadin nakash mud nasalang pakur.”

18 Cha musangar nakash, Michael kaziyap. Uwejidinaku anch: “Nashinshikina pa kuchirish urund wam ni Yehova kusutil kumwazuril muchim wam chisu chawonsu mu malembil, kwilej ni kutongijokin.” Mu kusut kwa chisu, Michael amuchirishina yisend mu chikumangen. Nlel ud kand chibol ni mukurump wa chikumangen. Ulondin kand anch “Ukwash ni kukasikesh kwa amakurump, kwankwasha kwijik anch Yehova udandamedin kwinkat. Nikutwish kand kukwash chikumangen nich kom kadia zwaang. Yom yiney yanshikena yanfudisha anch Yehova ukat kumulikishin muntu mwawonsu ukata kukarumuk chakin.” Tukutwish kwikal nich kashinsh anch Yehova ukutwish kutusadin ni kutuyukish chikalap nchik kurumbuk kwetu, ching anch twasal yawonsu tukutwisha kusal mulong wa kuswimp ni kudandamen kand kumuchingejin.​—Kus. 86:5; Jnsw. 28:13.

w23.05 paj 26 par. 2

Ukutwish Kuwanyish Mipak Yey ya mu Spiritu

2 Anch kud mupak witekidina kal pakwez kandikal utwish kuuwanyish, ikal nich kashinsh anch ukangenyap bwat. Yisu yivud ap mupak ukemp witining chisu ni usu nakash mulong wa kuuwanyish. Mulong ni katat ukatin kuwanyish mupak wey, chinech chimekeshin anch ukwatin nich usey urund wey ni Yehova ni ukatin kumusadin nich usu wey wawonsu. Yehova ukwatin nich usey usu usadina. Chakin kamu, kakatap kuchingej anch umwinkish yom wakad kwikal ni mutapu wa kumwinkish. (Kus. 103:14; Mik. 6:8) Chawiy mupak wey ufanyidin kwikal wisikena, ufanyidin kukwatijan ni mutapu udia mashakamin mey. Anch wawiy mutapu udia mupak wey, yom ik chad ukutwisha kusal mulong wa kuuwanyish? El twisambinany yiyul yimwing.

Mapit ma mu Spiritu

cl paj 55 par. 18

Usu wa Kutang​—“Ndiy Kamu Sakatang wa Diur ni Divu”

18 Ov, chom ik twilejidina kusutil ku usu wa chitangil wa Yehova? Yom kushalijan yatangay Yehova yitubachikin chakwel tumulimisha ni tumushimana. Nfund a Kuseng umwing walond anch: “A! [Yehova], midimu yey yivud! . . . Ngand yizwil nich yitang yey.” (Kuseng 104:24) Uyakin mud ik ukweta mazu minam! Machuku minam, in manangu ilejininga milong ya biyoloji ajingunin anch kudi mitapu ya yom yidinga ni mwom pa divu kusut pa uvud wa miliyon umwing; pakwez akwau atongining anch mitapu ya yom yiney yidinga ni mwom yikutwish kwikal pamwingap ma miliyon 10, akwau kand anch yiding ma miliyon 30 ap kusut. Yisu yimwing, mwin kusong usongininga yom uburedining cha kusal. Pakwez, chimekening kamu patok anch usu udingay nich Yehova wa kusal—kutang yom yisu ya mitapu kushalijan​—upwilingapu.

    Mikand ya Uruund (1999-2025)
    Budik
    Andam
    • Uruund
    • Kwangan
    • Yom ukatina
    • Copyright © 2025 Watch Tower Bible and Tract Society of Pennsylvania
    • Mbil ja Kusadin
    • Mbil ja Ujindj
    • Paramètres de confidentialité
    • JW.ORG
    • Andam
    Kwangan