Yipul Ya In Kutang

Ov, mukand wa Mulej 5:8 wisambidin ching kusu kwau antakel a chiwuntu bil anch wisambidin kand piur pa Yehova?

Verse winou ulondin anch: “Anch waman ngand yikat kuyizengol atuzwendj ni kuyirumburish wakad kutentam, kangal washimwok. Mulong muntu mwin kutakel ukwet mukwau umusutilaku, chad awonsu mwaad wau akwet akwau ayisutilamu.”—Mul. 5:8.

Antu akutwish kutong anch verse winou wisambidin kwend ching piur pa antakel a chiwuntu. Pakwez, verse winou ulejen kand uyakin umwing piur pa Yehova, uyakin ukutwisha kutukasikesh nakash.

Mulej 5:8 wisambidin piur pa ntakel wakad kutentam uyimeshina atuzwendj mar. Ntakel winou ufanyidin kuvurik anch, kudi muntu udia piur nakash, ukweta ulabu upandakena kumusutamu ndiy, umena yom yawonsu yisadinay. Ufanyidin kand kwijik anch kudi anyikel akwau akweta ulabu kumusutamu ndiy. Cha ushon, mu mant ma antu, antakel awonsu inay chiswapel kuyikatul milamu, ni antu akat kuman mar mulong wa kuburen kutentam kwinoku.

Pakwez, ap anch chimeken mudi kwikil ruchingej, tukutwish kutan rongoj kusutil kwijik anch, Yehova uyimen, ap antakel akweta ndond ja piur mu mant. Tukutwish kumwit Nzamb ukwash ni kumudjubwil yisend yetu. (Kus. 55:22; Fil. 4:6, 7) Twij anch “[Yehova] wendishil mes mend pansh pawonsu, chakwel ayimanyin apanyina michim yau yawonsu kudi ndiy.”—2 Jsng. 16:9.

Chawiy, mukand wa Mulej 5:8 umekeshin mutapu udiau anyikel atutakedila mu mangand minam; kupwa, umekeshin kand anch kudi muntu udia wa piur nakash, ukweta ulabu upandikena kuyisutamu anyikel awonsu a chiwuntu. Pakwez cha usey nakash, verse winou utuvurishin anch Yehova ndiy udia wa piur nakash, ndiy ukweta ulabu upandikena kuyisutamu antakel awonsu. Katat uyikedil kusutil Mwanend Yesu Kristu wadishinay kal Want. Mwin Dikand Diawonsu ukata kuman yom yawonsu ni antu awonsu, uding chisu chawonsu utentamina, ni wawiy mutapu udingay kamu Mwanend.