DILEJAN DIA 09
Musejina Nzamb Kusutin Malembil
Ov, wiyovilap kal anch ukwet kuswir kwa mwin kukutakel? Ov, ukwet yipul ya usey nakash ukweta kuswir kwa kutan yakul? Ov, ukwet kuswir kwa kukongoj ni kukukasikesh? Ov, ukatin kwikal piswimp ni Yehova? Malembil makutwish kukukwash mu yom yiney yawonsu. Chad wisu mutapu uwamp wa kulembil? Ov, Nzamb ukat kutesh malembil mawonsu? Yom ik ufanyidina kusal chakwel Nzamb atesh malembil mey? El tumana.
1. Tufanyidin kulembil kud nany, ni piur pa yom ik?
Yesu wafundisha anch tufanyidin kumulembil ching Tatukwetu wa mwiur. Niyend amwinend wamulembilang Yehova. Walonda anch: “Chifanyidin kulembilany mwamu: ‘Tatukwetu udia mwiur . . .’” (Mateu 6:9) Pitukata kumulembil Yehova tukat kukasikesh urund wetu ni ndiy.
Tukutwish kulembil mulong wa chom chin chawonsu. Pakwez Nzamb ukwakul malembil metu, ching anch makwatijadin ni rusot rend. “Anch twamwit [Nzamb] chom, chad tumwit mudi mudia rusot rend, ndiy ukututesh.” (1 Yohan 5:14) Yesu watwinka yilakej ya yom yimwing tukutwisha kwit mu malembil. (Tang Mateu 6:9-13.) Tukutwish kulembil mulong wa maswir metu, pakwez tufanyidinap kuvuramen kumujikitish Nzamb mulong wa yom yatusadinay kal, ni kumwit kand chakwel ayikwash antu akwau.
2. Mutapu ik tufanyidina kulembil?
Bibil utukasikeshin anch: “Anzurilany michim yen kudi ndiy.” (Kuseng 62:9) Chawiy malembil metu mafanyidin kwikal ma kashinsh, madiokila ku muchim. Tukutwish kulembil ni dizu dia piur ap mu muchim, ni kwikal mu mutapu umekeshina anch tumulimishin Yehova. Tukutwish kulembil pa chisu ni ndond tukatina.
3. Mutapu ik ukatay Nzamb kwakul ku malembil metu?
Ukat kwakul mu mitapu kushalijan. Yehova watwinkisha Dizu diend Bibil mutukata kutan yakul ku yipul yetu. Kutang Dizu dia Nzamb kukutwish “kulet ronganyin kudi muntu uburedina.” (Kuseng 19:7; tang Jakobu 1:5.) Ukutwish kutwinkish chisambu cha mu manangu paturishina ni yakamish. Ni ukutwish kand kuyibachik atushalapol end kutukwash chisu tudia kamu mu maswir nakash.
ILEJA CHIKURIKINA
Shinshikin mutapu ukutwisha kulembil mu mutapu umusangareshina Nzamb, ni mutapu ukutwisha malembil kukukwash.
4. Yom yitinay Nzamb piur pa malembil
Yom ik yikutwisha kusal anch Nzamb itiy ap alik kwitiy malembil metu? Talany VIDEO.
Yehova ukatin anch tumulembil. Tang Kuseng 65:3, kupwa isambinany chipul ech:
Ov, utongin anch ‘Mwin kutesh malembil’ ukatin anch ey umulembila? Rumburil.
Tufanyidin kusal usu wa kushakam kukwatijan ni mbil ja Nzamb anch tukimbin anch atesha malembil metu. Tang Mike 3:4 ni 1 Pita 3:12, kupwa isambinany chipul ech:
Yom ik tufanyidina kusal chakwel Yehova atesha malembil metu?
Pa chisu cha njit, amasalay a mitambu yawonsu yaad akat kulembil chakwel awin. Ov, utongin anch Nzamb ukwakul malembil minam?
5. Malembil metu mafanyidin kudiokal ku muchim
Antu amwing akat kuyifundish kuchirokin malembil. Pakwez, ov, wawiy mutapu ukatinay Nzamb anch tumulembil? Tang Mateu 6:7, kupwa isambinany chipul ech:
Mutapu ik ukutwisha kwipuk kuchirokin ‘yom yimwing pa yimwing’ mu malembil mey?
Dichuku diawonsu ufanyidin kutongijokin pa chom kanang chakusadinangay Yehova, ni kumujikitish mulong wa chom chinech. Sal mwamu dichuku diawonsu mu rubing rumwing, mwamu ukulembil piur pa yom sambwad yishalijadina pakad kuyichirokin.
Nvaj muwamp ukatining anch mwanend amulej yom yawonsu yidia ku muchim. Chilik chimwing, Yehova niyend ukatin anch tumulembil pakad kumujindjikin chom
6. Malembil chid chipan chidiokila kud Nzamb
Malembil makutwish kutukwash mutapu ik, pakampwil chisu turishina ni yakamish? Talany VIDEO.
Bibil ushidinamu anch malembil makutwish kutukwash kwikal ni chisambu cha mu manangu. Tang Filip 4:6, 7, kupwa isambinany yipul ey:
Ap anch malembil makupwishangap milong yetu kapamp kamwing, pakwez mutapu ik makata kutukwash?
Yom ik yimwing ukatina kwit mu malembil?
Ov, wij?
Kulond anch “amen” kurumburikin anch “chikala mwamu” ap anch “chakin kamu.” Kudiosh pakur nakash, antu akat kwakulang anch “amen” kwinsudiel kwa malembil.—1 Jinsangu 16:36.
7. Itekina chisu cha kulembilang
Yisu yimwing tukutwish kukwatikan nakash mu chilik cha kuvuramen kulembil. Yesu wading ukwatin malembil nich usey nakash. Tang Mateu 14:23 ni Marko 1:35, kupwa isambinany yipul ey:
Yom ik yasalangay Yesu mulong wa kwitekin chisu cha kulembil?
Ey umen anch chisu ik ukwishadinang mulong wa kulembil?
ANCH MUNTU WAKWEL ANCH: “Kulembil kud kwau kusutish chisu, mulong kwikil kwau muntu umateshining.”
Ey ukwakul mutapu ik?
YOM TWILEJA KAL
Malembil ma kashinsh makat kutusejish piswimp ni Nzamb, kutwinkish chisambu cha mu manangu ni kutwinkish usu mulong wa kusal yom yimusangareshina Yehova.
Ov, uvurikin?
Tufanyidin kulembil kud nany?
Mutapu ik tufanyidina kulembil?
Malembil makwet ukwash ik?
JINGUNIN KAND
Tan yakul ku yipul yikatau antu avud kwiyipul piur pa malembil.
“Yom Sambwad Uswiridina Kwijik Piur pa Malembil” (Chinong cha Kalam cha 1 Ngond wa 11, 2010)
Tal mulong wak chid cha usey kulembil ni mutapu wa kuwapish malembil mey.
“Mulong Wak Nifanyidin Kulembil?” (Mutu wa mulong udia pa jw.org)
Tal yom yifundishinay Bibil piur pa muntu tufanyidina kulembil.
“Ov, Nifanyidin Kulembil Kud Ansant?” (Mutu wa mulong udia pa jw.org)
Mu video wa mizik ou, tal anch chid cha usey kwikal ni ndond ya pakampwil ap chisu cha pakampwil mulong wa kulembil.