Uumwing Wetu wa Ukadivar

MU MIVU 1500, Isarel wading muchid wading ukweta dijin dia Yehova Nzamb. Kupwa Yehova ‘watonda antu a michid mulong wa kwikal antu akweta dijin diend.’ (Mid. 15:14) Antu akweta dijin dia Yehova afanyina kwikal atuman end, adia mu umwing mu manangu ni mu yisal chikalap nchik ndond yishichau. Antu inay akweta dijin dia Nzamb afanyina kwikal mu umwing kusutin mudimu wapanay Yesu kudi in kwilejend anch: ‘Yangany kudi antu a michid yawonsu, ni yikadishany in kwilejam, yibatishany mu dijin dia Tatuku, ni dia Mwan, ni dia spiritu utumbila, yilejany kuziyil ku yom yawonsu yinakulejanya.’—Mat. 28:19, 20.

² Mulong wipana kudi Yehova ni watambula dibatish, wikala mwin kwilej wa Yesu Kristu. Udi katat niyey pakach pa akadivar nau anambaz in Kristu adia mu uumwing, alikina anch yom mudi wan a ngand, tubil, mapit ap uzwendj kangal yiyaurila. (Kus. 133:1) Mudi chibudikin, ukatin ni ulimishin urund ukwetau nau in Kristu akwau a mu chikumangen. Amwing pakach pau akutwish kwikal ni ulomb wa chikit, ngand, shikol yilejau yishalijadina niyeyey, ni pamwing ap pakur wafanyinap kwibomb nau mulong wa kushalijan mudi kwinoku. Moj wa rukat ra ukadivar ukubombina nlel unou pamwing nau udi ukash nakash kusutamu urund win wawonsu ukutwisha kwikalaku pakach pa antu, pa relijon ap mu dijuku.—Mar. 10:29, 30; Kol. 3:14; 1 Pita 1:22.

KWIKAL NI YITONGIJOK YIWAMP

³ Anch in Kristu amwing achid kal ni chaku cha kasolikany ka ulombu wa chikit, yom ya politik, mashakamin ap yitongijok yikwau yiyimp, afanyidin kutongin piur pa in Yuda ading in Kristu a pa chirung cha atwimbuy ading akweta kasolikany piur pa antu akwau. Chisu chamutumau Pita mulong wa kuya ku chikumbu cha Korney wading mukurump wa chisak cha amasalay a Rom, Yehova wamurijeka Pita nawamp mulong chisend chinech.—Mid. shapitre 10.

⁴ Amuleja Pita mu chilay kujip ni kudia annam amwing ading ijondila kulondwish yishankuru ya in Yuda. Palikay Pita kusal mwamu, dizu diadiokala mwiur ni kulond anch: ‘Kangal watazuk yom yatokishay kal Nzamb anch yijondil.’ (Mid. 10:15) Chafanyina anch Nzamb asala mwamu chakwel Pita aswimpa yitongijok yend mulong wa kwitiy chisend chinech cha kuya kumutal muntu wa muchidi ukwau. Paziyinay kwi mbil ya Yehova, Pita wayileja antu akumangana anch: ‘En ayinen wijany nawamp anch, chidi chijidik kudi mwin Yuda kuya kwambamb, ap kwibomb nau antu a michid yikwau. Pakwez Nzamb wanlejin am anch, nifanyidinap kumutazuk muntu mukwau anch wijondil ap anch utakanen. Chawiy piwantumeshanya am, nezin pakad kwidjidjek.’ (Mid. 10:28, 29) Kupwa, Pita waleta uman anch Yehova wamwitiya Korney ni dijuku diend diawonsu.

⁵ Saul wa ku Taris, Mufaris umwing wileja nakash, wikepisha mulong wa kubombakan ni antu ading akisinay pakur. Chamwita kand kulondul umutakel udiokila kudi antu inay. (Mid. 4:13; Gal. 1:13-20; Fil. 3:4-11) Tukutwish kutongin mutapu wafanyinau antu amwing kuswimp yitongijok yau mudi Serigius Paulus, Denis, Damaris, Filimon, Onezim, ni akwau chisu chitiyau rusangu ruwamp ni kwikal in kwilej a Yesu Kristu.—Mid. 13:6-12; 17:22, 33, 34; Flm. 8-20.

TULAMANY UUMWING WETU WA PA MANGAND MAWONSU

⁶ Chimeken patok anch rukat ra akadivar nau anambaz a mu chikumangen rakukwasha kumusejin Yehova ni dirijek diend. Wamen chijingidij cha rukat riyimekeshina in kwilej akin a Yesu Kristu, mudi mwalonday Yesu anch: ‘Am nakwinkishany kal chijil chisu, katijanany muntu ni mukwau, mudi munakukatanya en, en niyen katijanany umwing ni mukwau. Mwamu antu awonsu akez kwijik anch en udiany in kwilejam anch en wakatijanany.’ (Yoh. 13:34, 35) Ni washikena kumukat Yehova ni dirijek diend nakash chisu wajingunina anch rukat ridia mu chikumangen rawiy kand rikwetau akadivar ni anambaz adia pa mangand mawonsu. Wimedin ni mes mey kuwanyin kwa uprofet wa Bibil piur pa kukumangej antu mu machuku minam mansudiel mulong wa kumwifukwil Yehova mu chisambu ni mu uumwing.—Mike 4:1-5.

⁷ Mulong kudi yom yivud nakash yiyaurila antu nlel, ukutwish kwiyipul anch mutapu ik chitwishikina anch antu a ‘ngand jawonsu, ni ku michid yawonsu, ni ku antu awonsu, ni ku jindim jawonsu’ ikala mu umwing? (Kuj. 7:9) Tongin kushalijan kudia pakach pa antu asadidina nakash tekinoloji wa katat ni antu alamatina nakash ku yinshakuru yau ya tubil. Tal kand matend ma antu a mu relijon akweta ulombu wa chikit chimwing ni adia a ngand yimwing. Mulong milong ya ngand yidi ya usey nakash, antu avud akat kwaurok nakash mu milong ya politik kusutamu pasak. Ni anch washinshikin kushalijan kudia pakach pa atuzwendj ni ampich ni milong yikwau yivud yiyaurila antu, kuyibomb antu adiokila ku michid, mazu, yisak ya antu kushalijan mu moj wa rukat ni wa chisambu chidi kamu chilay chikutwishay kusal ching Nzamb wa Dikand diawonsu.—Zak. 4:6.

⁸ Pakwez uumwing udi kamu wakin, anch wipan ni kutambul dibatish ni kwikal Kaman wa Yehova, niyey ukwikal mu dijuku dined. Mulong utanidinamu mu uumwing winou, niyey ukwet chisend cha kuulam. Ukutwish kusal mwamu anch wasadin mazu ma kambuy Paul madia mu Galatia 6:10 malondina anch: ‘Yisu yawonsu yitumena nawamp chifanyidin etu kusal nawamp kudi antu awonsu, pakwez kupandakan kudi anamakwetu a mu ritiy.’ Tukat kulondul kand chiyul ech: ‘Kangal wasalany yom mulong wa kwitong ayinen ap mulong wa kwibaz, pakwez ikepishany, muntu ni muntu amumana mukwau mudi udi muwamp kumupandakanamu. Chifanyidin muntu ni muntu atala ku yom ya mwom wa mukwau, wakad kutal ching kusu ku yom ya mwom wend amwinend.’ (Fil. 2:3, 4) Anch twasal usu wa kuyiman akadivar ni anambaz netu mudi muyimenay Yehova ni kulik kuyiman mudi mumekenau ku mes, tukudandamen kusanger urund wa chisambu ni uwamp pamwing nau.—Efes 4:23, 24.

TUBANGIJADINANY UMWING NI MUKWAU

⁹ Mudi mwalonday kambuy Paul, chikumangen chaurikinap, pakwez antu adiamu akat kubangijadin umwing ni mukwau. (1 Kor. 12:14-26) Milong yikutwisha kuyishiken antu amwing a mu dirijek yiyitadin kand antu awonsu a Nzamb. Ap anch tudi kulemp nakash ni akadivar nau anambaz netu a pa mangand mawonsu, pakwez chinech chitukangeshinap kuyibangin. Anch akadivar ni anambaz netu amwing ayizengol, etu awonsu tukat kwiyakamish nakash. Chisu chidiau in Kristu amwing mu maswir ap mar madiokila ku yom yatangau, njit, ap kupwitijan kwa tubil kwayishiken, tukat kusal usu wa kuyikwash mu spiritu ni kuyinkish yom yikwau ya ku mujimbu.—2 Kor. 1:8-11.

¹⁰ Etu awonsu tufanyidin kulembil mulong wa akadivar ni anambaz netu dichuku diawonsu. Amwing akat kuyipak mulong wa kusal yom yiyimp. Akwau amen kamu mar nakash. Akwau kand akat kurish ni rupompat ra antu asadina nau mudimu ni akwau ashich ni antu akad kwikal Atuman. (Mat. 10:35, 36; 1 Tes. 2:14) Yawonsu yiney yitutadin mulong tudi akadivar ni anambaz a pa mangand mawonsu. (1 Pita 5:9) Avud pakach petu asadin yom yivud nakash mu mudimu wa Yehova mulong wa kutakel mudimu wa kulejan ni kutakel yikumangen. Chikwau kand, kudi akadivar akweta chisend cha kutakel mudimu usadikina pa mangand mawonsu. Tufanyidin kulembil mulong wa antu awonsu inay, anch twasal mwamu tumekeshin rukat ni kuyibangin kwetu kwakin, ap anch etu tukutwishap kusal chom chikwau mulong wa kuyikwash.—Efes 1:16; 1 Tes. 1:2, 3; 5:25.

¹¹ Mulong wa kanrumbangesh kadia pa mangand mu machuku minam mansudiel, atushalapol a Yehova afanyidin kwirijek mulong wa kukwashijan umwing ni mukwau. Pa chisu cha mar, mudi kuzal kwa divu ap kwizul kwa tuwit, chitin kwirijek mulong wa kukumangej yom ya kuyikwash nich antu. In Kristu a mu mivu chitot ya kusambish atushila chilakej chiwamp pa mulong winou. Pavurikau chiyul cha Yesu, in kwilej a ngand jikwau atuma nich musangar yipan kudi akadivar a mu Yudeya ading aburedina yakudia. (Mid. 11:27-30; 20:35) Kambuy Paul warijeka yom yiney ya ukwash chakwel yisadika nawamp. (2 Kor. 9:1-15) Nlel unou, anch mar mayishiken akadivar ni anambaz netu ni ikal ni kuswir kwa ukwash, dirijek ni mwin Kristu mwawonsu akat kusal swa mulong wa kuyikwash.

ATUTONDA MULONG WA KUSAL RUSOT RA YEHOVA

¹² Uumwing wetu wa ukadivar wa pa mangand mawonsu autenchikin mulong wa kusal rusot ra Yehova. Nlel unou, rusot rend ridi anch rusangu ruwamp ra Want arilejana pa mangand mawonsu mulong wa uman kudi antu a michid yawonsu. (Mat. 24:14) Pitusadina mudimu winou, rusot ra Yehova ridi anch twikala ni mwikadil ukwatijadina ni mbil jend ja piur. (1 Pita 1:14-16) Tufanyidin kukwashijan umwing ni mukwau ni kusal usu mulong wa kutwal kurutu mudimu wa kulejan rusangu ruwamp. (Efes 5:21) Kusutamu pakur, chinech chawiy chisu cha kutek bil Want wa Nzamb pa ndond ya kusambish mu mwom wetu, kulik maswir metu. (Mat. 6:33) Kulam chom chinech mu manangu chisu tusadina pamwing mulong wa kutwal mudimu wa kulejan kurutu, kukat kulet musangar nlel ni kukulet yiyukish ya chikupu.

¹³ Mulong tudi Atuman a Yehova, yetwa kamu atondinau pakach pa antu avud mudi antu ishitwila ni akweta mushiku mulong wa kusal mudimu wa Nzamb. (Tit. 2:14) Mutapu wetu wa kumwifukwil Yehova usadin anch tushalijana ni antu akwau. Chidiap kwau anch mulong tusadin chikij ku chikij nau akadivar ni anambaz netu a pa mangand mawonsu, pakwez chidi mulong tulondin dizu dimwing dia uyakin ni tushich kukwatijan ni uyakin winou tulejena. Chom chinech Yehova wasambela kuchilejan kusutin muprofet Sofoniy: ‘Nikez kakarumun dizu dia antu kwikal dizu dishitwila, mwamu antu awonsu akutwish kutazuk dijin dia Yehova, ni mulong amusadina chikij ku chikij.’—Sof. 3:9.

¹⁴ Kupwa Yehova wamupepila Sofoniy mulong wa kurumburil ukadivar udiaku nlel unou pa mangand mawonsu, palonday anch: ‘In Isarel akushala kakez kasalijanap kand nayimp, kakez kalondap kand nayimp, kakez kalondap kand yom ya makasu, ap kudimbijan; akez kazangijal mu chisambu, kwikil kand muntu ukeza kayakamish.’ (Sof. 3:13) Mulong tukwet ni tuteshin nawamp Dizu dia uyakin wa Yehova ni twakarumukin mulong wa kushakam kukwatijan ni mbil ja Yehova, katat tutwishin kusal mu uumwing. Tusadin mudimu umekena anch ukasiken nakash ku mes ma antu. Mwaning, tudi kamu antu ashalijadina, antu a Nzamb, antu amutumbishina pa mangand mawonsu.—Mike 2:12.