YIPUL YIKATAU ANSAND KWIYIPUL
Ov, Chid Chiwamp Kusal Yom Yivud Kapamp Kamwing?
Ov, ukwet ukaliweny wa kusal yom yivud kapamp kamwing?
Ov, ukweting ukaliweny wa kusal yom yivud pa chisu chimwing? Antu avud atongin anch an apamina kudiosh ku wanikanch wau ni yom ya teknoloji—akutwish kusal yom yivud kapamp kamwing kusutamu antu ayikwatidina ku ukurump. Pakwez, ov, chid kamu chakin?
MWAWIY anch KAMWAWIYAP?
Kusal yom yivud kapamp kamwing kukukukwash kusal yom mau mau.
Kusutin kwiyijidish, ukutwish kwikal ni ukaliweny wa kusal yom yivud kapamp kamwing.
Ansand akutwish kusal nawamp yom yivud kapamp kamwing kuyisutamu amakurump.
Anch wakulang anch “mwawiy” ku chitongijok chimwing pakach pa yitongijok yajimbulau kal, chimeken anch widimbin kusutin chitongijok chilondina anch muntu ukutwish kusal yom yivud kapamp kamwing.”
Yitongijok ya makasu piur pa kusal yom yivud kapamp kamwing
Ov, utongin anch ukutwish kusal yom yaad kapamp kamwing? Pamwing ap kud yom yimwing ukutwisha kusal kapamp kamwing pakad kurumbangan mu manangu. Chilakej, ukutwish kurijek nawamp mu kapalikany key ka kulal oku ukat kutesh mizik.
Pakwez anch wapakish kusal midimu yaad yitina kutek manangu ndond yimwing, ukukangany kamu kuyisal muchifanyidina. Pamwing ap diawiy diyingishin diamubachika Katherine kurumburil anch kusal yom yivud kapamp kamwing kutwadin ku: “Kukangany yawonsu kapamp kamwing.”
Caleb ulondin anch: “Nading nambambin ni muntu, ni pa chisu chawiy chimwing nading nifanyidin kwakul ku uruu wantuminau pa telefon. Napakisha kusal yawonsu yaad kapamp kamwing. Mud chibudikin, nakanganya kutesh yom yading yinlejinau, ni nafunda uruu ukweta yilim nakash.”
Sherry Turkle, mwin kwilej mwikadil wa antu pantaliken ni teknoloji ufundin anch: “Ang twatong anch tukat kutwish kusal yom yivud kapamp kamwing, . . . chisu chawonsu tukata kuwej mudimu pa ukwau, tukatap kand kuyisal nawamp mud muchifanyidina. Kusal yom yivud kapamp kamwing kukat kubachik wong wetu kusal mau mau mulong wa kubangin midimu yawonsu ni kutong anch tusadin yom nawamp, pakwez mu uyakin tuyipishin yom.”a
Tamara ulondin anch: “Yisu yimwing nikat kusalang oku nafund lel mesaj, oku nambamb lel ni muntu, ni kutong anch nisadin kwam yawonsu yaad nawamp, djat ni pinikata kujingunin anch yinifundina yawiy nifanyidina kulond, ni yinilondina yawiy nifanyidina kufund!”
Antu akata kupakish kusal yom yivud kapamp kamwing akat kwimeshikish kwau mar ayinau. Chilakej, chikat kuyisend chisu chilemp nakash mulong wa kusal ma devwar. Ap chikuyit kusaliril mudimu wading utonginau anch aupwishang kal. Mu yishiken yawonsu yaad, kusal mwamu kukat kuyishil chisu chikemp cha kusal midimu yikwau!
Dokter ni mwin kuyiyul ansand a shikol, Thomas Kersting, wading ni diyingishin diwamp dia kulond anch: “Anch tutongin anch wong ud mud ndond tukutwisha kulamin nawamp nsangu ja usey, chawiy mu wong wa antu asadining yom yivud kapamp kamwing muvundangen nakash.”b
Teresa ulondin anch: “Anch wapakish kusal yom yivud pa chisu chimwing, ukuvuramen kusal tuyom tukemp tukemp tudia twa usey. Disudiel, ukushiken kwirund midimu yivud ya kusal ni kushadish chisu wafanyinang kusal yom yindj.”
Kupakish kusal yom yivud kapamp kamwing kud mud kupakish kwendin mu jinjil jaad pa chisu chimwing
Mutapu uwamp
Iyijidisha kusal chom chimwing ku chimwing. Chikutwish kukukasiken kusal mwamu anch wijidin kal kusal yom yivud kapamp kamwing, chilakej anch ukweting chaku cha kutum mesaj chisu usadina devwar. Pakwez Bibil utulejin “kujingunin yom yipandakena kuwap.” (Filip 1:10) Yom yawonsu tusadina yikwetap usey wa mutapu umwing. Chawiy kwat mupak wa kushinshikin chom ufanyidina kusal pa ndond ya kusambish, ni chisala djat paukuchipwishina.
Maria ulondin anch: “Manangu makad kushinshikinang pa chom chimwing mad mud mudingay mwan mukemp. Chitin kubabel yom yimashinshikidina mud mutapu tukata kumushinshikin mwanikanch uzupela ukatina kusal yawonsu yikatinay.”
Diosh chom chin chawonsu chikutwisha kukuletin kampuw. Ov, ukat kusot kushinshikin uruu udia mu telefon wey chisu wilejina? Ukutwish kumutek mu kapalikany kakwau. Jimish televizion, ni kangal kand watwal manangu ku tupend twa kutumijadin jinsangu! Bibil ulondin anch: ‘Sadinany chisu chen nich manangu.”—Kolosay 4:5.
Onya ulondin anch: “Namen kal anch chid chiwamp nakash kud am kushinshikin chom chimwing pa chisu chimwing. Chawiy, anch napwish kuchisal, nikweting musangar wa kuchijip pa list ni kusut ku chisend chikwau chilondwilaku. Kusal mwamu kukat kwinletinang kamu musangar chakin.”
Lik kampuw chisu wambambina ni muntu. Kutal pa telefon chisu wambambina ni muntu kukweting yibudikin yiyimp ni kumekeshining kuburen kalimish. Bibil utulejin kuyisadin antu akwau mu mutapu tukatina anch atusadin niyetu.—Mateu 7:12.
David ulondin anch: “Yisu yimwing anch nikat kwambamb ni mpanyam, ukuman ndiy ukat kumufundin muntu mukwau uruu ap kusal chom chikwau pa telefon wend. Chikat kwingovishang fu ku muchim! Pakwez mu kulond uyakin, yisu yimwing niyam nikat kusalang mwamu!”