ADJALANG YIJINGIDIJ YA MAKONK MASATU YA ULOMBU WA VIYOLE
Maud ushich mu Frans ni ukat kusal mudimu ku shikol mulong wa kuyikwash an adia ayilim. Pasut kal chisu chikemp, mu kalas kamwing ansand ading akat kwilej piur pa rusangu ra kuyinongish in Yuda ni piur pa kompony wa mar wa in Nazi. Mulej warumburila anch kwading yijingidij kushalijan yachiminangau pa masun ma antu a rukan. Mutapu wading chijingidij ni ulombu wach yawiy yom yakwashang kwijik mulong wak muntu udjadina chijingidij kanang amukwata.
Pisambinay piur pa chijingidij cha makonk masatu cha viyole, mulej walonda anch: “Nitongin anch antu adjalang chijingidij chinech ading in utun.” Kwinsudien kwa dilejan, Maud waya kumuman mulej mulong wa kumulej anch chijingidij cha ulombu wa viyole achisadinang mulong wa kuyimekesh Atuman a Yehova.a Wamuleja kand anch ukumuletin mikand yisambidina mulong winou. Mulej witiya, ni wamwita Maud kufundish yom yiney mu shikol kurutu kwa ansand awonsu.
Pa chisu cha dilejan dia mutapu umwing, pakwez mu kalas kakwau, mulej mukwau wasadina tablo ulejena yijingidij kushalijan yadjalangau antu a rukan ading mu kompony. Tablo winou wading ulejen anch chijingidij cha makonk masatu cha viyole achidjalang kud Atuman a Yehova. Kwinsudien kwa dilejan, Maud wamwita mulej kumuletin mikand yikweta nsangu jivud pa mulong winou. Mulej witiya ni wamwita niyend Maud kufundish yom yiney mu shikol kurutu kwa ansand awonsu.
Maud walamang kal mikand yasadinay
Maud warijeka kufundish yom yiney mu aminit 15, pakwez pading payilay kufundish mu kalas ka kusambish, mulej wamuleja anch: “Ukutwish kusal saa wa kabuj wa dilejan.” Maud walejana bil chakusambish video ulejena mutapu wayizengolau Atuman a Yehova mu kompony wa Nazi. Pashikay video palondinau anch in Nazi atambula an 800 kud anvaj au Atuman a Yehova, Maud wimika video mulong wa kutang yom yalondau an asatu pakach pa an inay. Kupwa pashikay video kwinsudien, watang mukand wafunday nsand Kaman wa Yehova wa mu Otrish, Gerhard Steinacher, mu muvu wa 1940. Mu mukand winou, nsand winou wa mivu 19 wading ukat kuyiladik anvajend, asaa akemp kurutu kwa kumujip kud in Nazi.b
Maud wafundisha kand yom yiney mu kalas ka kaad. Mulong wa kutakaman kwend, pakatau alej inay aad kufundish piur pa kompony wa mar mu nazi, akat kufundish anch Atuman a Yehova ading ni yau pakach pa antu a rukan.
a Pa chisu cha Njit ja Kaad ja pa Mangand Mawonsu, Atuman a Yehova ading mu Alemany, atazukangau kand anch Bibelforscher (In Kwilej a Bibil), ayikasang mulong alikang kunung chikas ku want wa Nazi.
b Gerhard Steinacher amufisha nich kwa kumujip mulong walika kwikal disalay mu Alemany. Mu mukand wend wakanay nich wafunda anch: “Nichid kwam mwan mukemp. Nikutwishap kujamish anch Nsalejam kanginkishinap usu, ni yawiy kamu yom nimwitina.” Gerhard amujipa pamanch pa dichuku diambakenap. Pa nzay yend afundinap anch: “Wafa mulong wa katumb ka Nzamb.”