Ntakel Ukweta Usu Wa Kuninetish Rinkind Mukash Ni Yom Yikwau

Chilay chijim chasalay Yesu cha kuyidish antu chading nich chibachikin chikash padi antu. Chawiy antu inay ashikena ku kulond anch: “Chakin kamu, muntu winou udi [Muprofet] wa Nzamb wadinga ufanyidin kwez mu mangand”, ndiy Mesia, mulong ndiy kamu uwanyidina kwikal ntakel muwamp. (Yohan 6:14; Kuvurik Yijil 18:18) Chawiy, antu akimba mutapu wa kumukwat Yesu chakwel amudisha want.

Pakwez, Yesu wajingunina yom yading yikimbinau antu kusal. Wishinya mukach mwa yisak ya antu ni wayileja kapamp kamwing in kwilejend chakwel andama mu waat mulong achirika. Kwisu kwayau? Asutina ku Betsaida mulong wa kuya ku Kapernaum. Padingay Yesu amwinend, waya ku mukandu kwi ndond yading yakad masok mulong wa kulembil uchuku.

Uchuku winiwa ngond wading utokishin, chawiy Yesu wamana waat wading palemp. Pa karung pading patutin mambek makash mulong kwading rinkind mukash, ni atwimbuy ‘ading akat kurish mulong wa kwauk, mulong kwading rinkind mukash.’ (Marko 6:48) Yesu washirika ku mukandu ni wasambisha kwendin pa mambek mulong wa kuya ndond yadingau in kwilej. In kwilej ading “ashikang kal chintampu cha akilometre atan ap musamban.” (Yohan 6:19) In kwilej amumana Yesu ukimbin kuyisut chawiy ova wom ni atoya anch: “Mutar!”—Marko 6:49.

Yesu wayikasikesha payakulay anch: “Ikasikeshany! Yam kangal wovany wom.” Pakwez, Pita walonda anch: “Nsalejam, anch yey chakin, ngela niyam neza kudi ey, nikwendin pa mem.” Yesu wamwakula anch: “Ez kwey!” Pakad kulab Pita washirika mu waat ni wasambisha kwendin pa mem mulong wa kuya kudiay Yesu. Pakwez, pasambishay kushinshikin pa rinkind winou mukash, Pita wova wom ni wasambisha kujiy. Chawiy watoya anch: “Nsalejam, mpandisha!” Pawiy pinipa kamu, Yesu watandjeka chikas chend wamukwat Pita ni wamwel anch: “Ey ukwet ritiy rikemp! Ov, mulong wak widjidjekina?”—Mateu 14:27-31.

Pita ni Yesu akandama mu waat kupwa rinkind wasambisha kudut. In kwilej afanyina kushimok pa mulong winou? Anch awiy atesha “kurumburik kwa chilay cha mikat,” chasalay Yesu mulong wa kudish tunan twa antu, chawiy kafanyidinap kushimok pamumanau Yesu ukat kwendin pa mem ni kudutish rinkind mukash. Chawiy, in kwilej amekeshin kuziyin kwau kudi Yesu palondinau anch: “Chakin ey, udi Mwan a Nzamb.”—Marko 6:52; Mateu 14:33.

Kupwa ashika mu kabeng muwamp ni ufukina wa Genesaret wadinga kwindum kwa Kapernaum. Adjibula nkal wa waat mu mem ni atuntuka ku chikum. Antu amumana Yesu, chawiy antu awonsu adiokala mu misumb kushalijan amuletina Yesu ayej. Chawiy, ayej amwing akwata ku masun ma Yesu ayerika kamu.

Chawiy lel, yisak ya antu amana chilay chasalay Yesu cha kudish tunan twa antu ashikena ku kwijik anch Yesu waya kal. Pashika maat madiokala ku Tiberia, antu akandama mu maat minam mulong wa kuya kumutan Yesu ku Kapernaum. Pashikau kwinikwa amwipula anch: “Mulej, ov, chisu ik chiwashikanga ey kunoku?” (Yohan 6:25) Yesu wayifisha nich antu inay ni diyingishin diwamp mudi mutukumana mu chikunku chilondwilaku.