Udishin Tunan Twa Antu Nich Mikat Yikemp Ni Ansh

Atwimbuy 12 asangara papwishau mudimu wau wa kulejan mu Galalia, chawiy eza kumulej Yesu “yom yawonsu yasalau ni yalejanau.” Chimeken patok kamu anch ading aziyang kal. Chikwau kand, kadingap ni chisu chakudia mulong kwading antu avud, ading ni kwezol ni kuyawol. Chawiy Yesu wayileja anch: “El tuyany kwi ndond ya ayinetu chakwel tukiswedishaku.”—Marko 6:30, 31.

Andama mu waat mulong wa kuya, chimeken pamwing ap anch aya ku Kapernaum ni aya kwindond yijingamina yadinga kwingangel kwa Wit wa Yordan piswimp ni Betsaida. Pakwez, antu avud ayimana mutapu wayau ni antu akwau ijika anch aya kal. Antu inay aya mau ku chikum cha wit ni asambela kushik kurutu Yesu ni in kwilejend ashika.

Pabudikau mu waat, Yesu wamana chisak cha antu ni wova riy, mulong ading mudi amikoku akad kafung. Chawiy chasambishay “kuyilej yom yivud” piur pa Want. (Marko 6:34) Woka kand ‘antu awonsu ading ni kuswir kwa kuyok.’ (Luka 9:11) Pasuta chisu, in kwilej amuleja Yesu anch: “Muten waya kal, kunoku kudi kulemp ni ku mal. Yilika antu aya ku mal chakwel akalandap yakudia yau.”—Mateu 14:15.

Yesu wayakula anch: “Bwat, ashakam kwau kunoku. En yinkishany yakudia.” (Mateu 14:16) Ap anch Yesu wading wij chom chelay kusal, pakwez wamupaka Filip pamwipulay anch: “Ov, kwisu tukulandanya [mikat] yiwanyidina ya kuyidish antu inay awonsu?” Amwipula Filip mulong ndiy wading piswimp ni Betsaida. Ap anch akimba kuland mikat pakwez antu kelap kwikut. Mulong uvud wa antu wading wa 5000. Uvud wa antu awonsu wafanyina kwikal tunan dikum, mulong kwading amband nau an! Filip wakula anch: “Ap anch twalandap nchik [mikat] ya nfalan yitot yaad ja utad wa argent [denier], [denier umwing ndiy wamufutangau muntu pa dichuku], muntu ni muntu ukutambul kusu kachikunku kakemp.”—Yohan 6:5-7.

Pamwing ap mulong wa kumekesh anch chading chikasiken kuyidish antu inay awonsu Andare walonda anch: “Kunoku kudi nsand ukweta [mikat] yitan ya wung wa masangu ni ansh aad. Pakwez yom yiney kiyikutwishap kwau kuyiwanyin antu avud mwamu ay.”—Yohan 6:9.

Chading chirung cha kapepil, piswimp ni kusal musambu wa Pasak wa muvu wa 32 C.C., ni pa mukandu pading masuku mavud. Yesu wayileja in kwilejend chakwel ayileja antu ashakama pa masuku mu yisak ya antu 50 ap antu 100. Chawiy, Yesu watambula mikat yitan ni ansh aad kupwa wamulembila Nzamb. Kupwa wabukuna mikat yiney ni wangana ansh. Yesu wayinkisha in kwilej chakwel ayangena antu. Chading chom chishimokishena mud ik mulong antu awonsu adia ni ikuta!

Kupwa Yesu wayileja in kwilejend anch: “Kumangejany yikunku yashalanga, kangal pashal kachom.” (Yohan 6:12) In kwilej izwisha yimpay 12 ya yikunku ya mikat ni ya ansh yashalaku!