Yom Twilejidina ku Chilay cha Mikat

1. Mikat yading ni usey ik kud antu a pakur?

PAKUR mikat yading yakuda ya pakampwil nakash. (Dis. 14:18; Luka 4:4, TMK.) Mikat yading kamu ya usey nakash. Chawiy yisu yimwing Bibil usadidin dizu mukat ap “dibot” mulong wa kumekesh yakuda yawonsu. (Mid. 20:7, TMK.) Yesu wasadina kand mikat mu yilay yend yaad yijikena nawamp. (Mat. 16:9, 10) Chilay chimwing pakach pa yilay yiney achilejen mu Yohan shapitre wa 6. Pitushinshikidina rusang riner, tukuman malejan tukutwisha kwilej ni kusadin nlel.

2. Chisu ik chaswirikenau antu avud yakuda?

² Papwishau atwimbuy a Yesu kulejan, Yesu wayisenda waya nau mu waat ushad wa Karung wa Galaliya chakwel apimaku. (Mar. 6:7, 30-32; Luka 9:10) Ashika kwi ndond yikuchikina yading piswimp ni Betsayida. Pakwez, kupwa kwa chisu chikemp, tunan twa antu eza kwinakwa mulong wa kumutal Yesu. Yesu kayiduulap. Witekina chisu cha kuyifundish piur pa Want wa Nzamb ni kwok ayej. Pikwazweka urel, in kwilej iyipula mutapu welau antu inay awonsu kuman chom cha kuda. Amwing pakach pau ading ni yakuda yikemp, pakwez avud ading akwet kuswir kwa kuya mu mal mulong wa kuland yakuda. (Mat. 14:15; Yoh. 6:4, 5) Yom ik yasalay Yesu?

CHILAY CHA MIKAT

3. Yesu wayileja atwimbuy end kusal yom ik mulong wa kuwanyish maswir ma antu amulondula? (Tal kand chipich cha pa chibur.)

³ Yesu wayileja atwimbuy end anch: “Bwat, ashakam kwau kunoku. En iyinkishany yakuda!” (Mat. 14:16) Winou wading kamu mulong ujim, mulong kwading piswimp amakundj 5 000. Ni anch twawejaku amband nau an, chimeken anch chading chifanyidin kudish antu 15 000. (Mat. 14:21) Andre walonda anch: ‘Kunoku kud nsand ukweta mikat yitan ya wung wa masang ni tuyish twaad. Pakwez ov, yom yiney yikutwish kuyiwanyin antu avud mwamu?’ (Yoh. 6:9) Mikat ya wung wa masang ayidangang kud atuzwendj ni antu akwau ni chimeken anch tuyish twading tuumin, twakutek mung. Pakwez yom yadingay ni nsand winou yafanyinap kuyiwanyin antu inay awonsu, kimwauyap?

4. Yom ik tukutwisha kwilejin ku Yohan 6:11-13? (Tal kand yipich.)

⁴ Mulong wakata kumekesh mwikadil wa kupan, Yesu wayileja antu kushakam pa masuku mu yisak. (Mar. 6:39, 40; tang Yohan 6:11-13.) Kupwa, Yesu wamujikitisha Tatukwend mulong wa mikat ni ansh. Mu kusal mwamu, wamekesha anch Nzamb ndiy kamu wading Musul wa yakuda yiney ni wamekesha kujikitish mulong wa yakuda. Niyetu tufanyidin kulondul chilakej cha Yesu kusutin kulembil kurutu kwa kuda, twikal ayinetu, ku mudimu, ku shikol ap ni dijuku detu. Kupwa Yesu wayileja in kwilej end kuyangen antu yakuda ni awonsu ada ikut. Antu kapwishap yakuda yawonsu mulong yading yivud nakash. Yesu kakatap anch adjibula yashalap. Chawiy wayileja in kwilej end kukumangej yakuda yashalap chakwel ez ayisadin kand chisu chikwau. Yesu wasadinang yom nich manang. Chinech chid chilakej chiwamp tufanyidina kulondul. Anch ud nvaj, ukutwish kwisambin rusang riner pamwing ni aney ni kushinshikin pa malejan ukutwishanya kudoshinaku piur pa malembil, kwakan ni kwikal mwin kupan.

5. Antu akimba kusal yom ik kupwa kwa kutesh ni kuman yom yishimwokishena yasalay Yesu pa dichuku dinida, pakwez yom ik yasalay Yesu?

⁵ Antu ashimwoka mulong Yesu wasala yilay ni mulong wading mulej mujim. Ading ij anch Moses walonda anch Nzamb ukuyitumin muprofet mujim, chawiy atonga anch Yesu ndiy wading muprofet winou. (Kuv. 18:15-18) Anch mwawiy, amana anch Yesu ukwikal nyikel muwamp nakash, wafanyina ap kuyinkish in Isarel awonsu yakuda. Chawiy akimba ‘kumukwat mulong wa kumudish want.’ (Yoh. 6:14, 15) Anch Yesu witiya kwikal mwant, wafanyina kwiyandjik mu milong ya politik ya in Yuda ading atakedinau kud in Rom. Ov, mwawiy mwasalay? Bwat. Bibil ulondin anch Yesu ‘wachirika ku mukandu amwinend.’ Chawiy chikalap nchik yibachikin ya antu akwau, kiyandjikap mu milong ya politik. Dilejan diwamp mud ik kud etu!

6. Mutapu ik tukutwisha kumekesh anch twimburijin chilakej cha Yesu? (Tal kand chipich.)

⁶ Chakin kamu, antu kakutwishap kutwit kuyinkish yakuda mu chilay, kuyok ayej ap kwikal nyikel wa ngand. Pakwez akutwish kutubachik kuvot ap kumukwash muntu kampand umenau anch ukutwish kwikal nyikel muwamp. Pakwez, chilakej cha Yesu choviken nawamp. Walika kwiyandjik mu milong ya politik, ni kupwa walonda anch: ‘Want wam udap wa mangand minam.’ (Yoh. 17:14; 18:36) Mulong tud in Kristu, tufanyidin kutong mud Yesu ni kwimburij chilakej chend. Mud ndiy tukat kukwash Want wa Nzamb, kuyilej antu akwau piur pa Want winou ni kulembil chakwel weza. (Mat. 6:10) Katat el tuchirikany ku rusang ravudishay Yesu mikat mu chilay ni tumanany yom yikwau tukutwisha kwilejin ku chilay chinech.

“KURUMBURIK KWA CHILAY CHA MIKAT”

7. Chilay ik chasalay Yesu ni yom ik yasalau atwimbuy end? (Yohan 6:16-20)

⁷ Papwishay Yesu kudish chisak cha antu, wayileja atwimbuy end kudokal kwinikwa ni kuchirik ku Kapernaum mu waat ni ndiy wachirika ku mukandu mulong wa kuyichin antu akimba kumudish want. (Tang Yohan 6:16-20.) Pading paukinau atwimbuy, kweza rinkind mukash ni waleta mambek. Kupwa Yesu weza kud awiy, ukat kwend pa mem. Ni wamuleja kambuy Pita kwendin pa mem mud ndiy. (Mat. 14:22-31) Pandamay Yesu mu waat, rinkind wanineta. In kwilej ashimwoka nakash ni alonda anch: “Chakin kamu ey ud Mwan a Nzamb.”a (Mat. 14:33) Chishimwokishin pa kuman anch in kwilej alonda yom yiney kupwa kwa Yesu kwendin pa mem, pakwez kadap kupwa kwa kuvudish mikat mu chilay. Marko uwejidinaku anch: “[Atwimbuy] ashimwoka nakash, kwovap kurumburik kwa chilay cha mikat, mulong michim yau yading yichinchikin pa kutesh.” (Mar. 6:50-52) In kwilej kajinguninap anch Yehova wamwinkisha Yesu usu wa kusal yom yivud kusutamu kuvudish mikat. Pakwez, kupwa kwa chisu chikemp Yesu walonda kand piur pa chilay cha mikat mulong wa kutufundishinaku dilejan dikwau da usey.

8-9. Mulong wak antu amukimba Yesu? (Yohan 6:26, 27)

⁸ Antu inkishau yakuda kud Yesu ading ashinshikidin pa kuwanyish maswir mau ma ku mujimbu. Mulong wak? Dichuku dalondulaku, kamumanap Yesu nau atwimbuy end mulong ading ayang kal. ‘Maat makwau madokala ku musumb wa Tiberiad mashika piswimp ni ndond yadilau antu mikat.’ Chawiy antu akandama mwinimwa ni aya ku Kapernaum mulong wa kumukimb Yesu. (Yoh. 6:22-24) Ov, asala weny winou mulong ading akwet kuswir kwa kutesh yom yivud piur pa Want wa Nzamb? Bwat. Ading ayil kwau mulong wa kuda mikat. Mulong wak tulondina mwamu?

⁹ Shinshikin yom yashikena pamutanau Yesu kud antu inay ku Kapernaum. Yesu wayileja patok anch eza kwau mulong wa kuda. Wayileja anch ‘wadangany mikat ni wikutany . . . yom yikata kuyip.’ Pakwez wayikasikesha kusal mudimu mulong wa ‘yakuda yakad kuyip, yikata kulet mwom wa chikupu.’ (Tang Yohan 6:26, 27.) Yesu walonda anch Tatukwend ndiy ukata kulet yakuda yiney. Antu inay pateshau anch kud yakuda yikata kulet mwom wa chikupu afanyina kamu kushimwok nakash! Yakuda ik yiney ni mutapu ik wafanyinau antu kuyikal nich?

10. Yom ik yading yifanyidinau antu kusal mulong wa kutambul ‘mwom wa chikupu’?

¹⁰ Pamwing ap, antu inay atonga anch ading afanyidin kusal yom kanang mulong wa kutambul yakuda yiney. Pamwing ap atongina yom yading yilejenau kusal mu Chijil cha Moses. Pakwez Yesu wayileja anch: ‘Ou wawiy mudimu wa Nzamb: Mekeshany ritiy muday muntu watumay.’ (Yoh. 6:28, 29) Ading afanyidin kumekesh ritiy muday Yesu mulong wa ‘kwikal ni mwom wa chikupu.’ Yesu wading wisambina kal kand piur pa yom yiney machuku ma kwinyim. (Yoh. 3:16-18, 36) Ni mu machuku ma kurutu walonda kand yom yikwau yivud piur pa mutapu tukutwisha kutambul mwom wa chikupu.​—Yoh. 17:3.

11. Mutapu ik wamekeshau in Yuda anch ading kwau ashinshikidin pa kutambul chakuda cha ku mujimbu? (Kuseng 78:24, 25)

¹¹ Antu inay kitiyap anch ading afanyidin kumekesh ritiy muday Yesu. Amwipula anch: ‘Ey usadinap chilay ik, chakwel etu tuchiman ni tukwitiyija ey?’ (Yoh. 6:30) Kupwa alonda anch pa chisu cha Moses antu ayinkisha mana mu chilay, ni chikala chakuda chau cha dichuku dawonsu. (Neh. 9:15; tang Kuseng 78:24, 25.) Chimeken patok anch ading akwet kwau kuswir kwa kutambul chakuda cha ku mujimbu. Ni chisu chalonday Yesu piur pa ‘mukat wakin udokila mwiur’ wading mud mana uletina mwom wa chikupu, kamwipulap kurumburik kwa mazu minam. (Yoh. 6:32) Ashinshikina nakash pa maswir mau ma ku mujimbu mu chilik cha kulik kutesh malejan ma Yesu piur pa mwom wa chikupu. Yom ik tukutwisha kwilejin ku rusang riner?

YOM YIFANYIDINA KWIKAL YA USEY KUD ETU

12. Mutapu ik wamekeshay Yesu yom yida ya usey nakash?

¹² Ed dawiy dilejan da usey tudoshina mu Yohan shapitre wa 6. Yom yifanyidina kwikal ya usey kud etu mad maswir metu ma mu spiritu. Pamupakau kud Satan, Yesu wamekesha anch kumuziyin Yehova kud kwa usey nakash kusutamu yakuda ya ku mujimbu. (Mat. 4:3, 4) Ni mu Malejan ma pa Mukandu, wakasikeshina pa usey wa kuwanyish maswir metu ma mu spiritu. (Mat. 5:3) Chawiy tufanyidin kwiyipul anch: ‘Ov, mashakamin mam mamekeshin anch nikat kushinshikin nakash pa maswir mam ma mu spiritu pa ndond pa maswir mam ma ku mujimbu?’

13. a) Mulong wak chiyipinap kwau kusanger yakuda? b) Kubabesh ik tufanyidina kukwat nich usey? (1 Korint 10:6, 7, 11)

¹³ Chiyipinap kwau kulembil mulong wa yom tuswirikedina ni kuyisanger. (Luka 11:3) Bibil ulondin anch chiwapin anch muntu ‘wada ni kuna’ ni kusangar mulong wa mudimu wend ukash, “yom yiney yawonsu yidiokil kudi Nzamb.” (Mul. 2:24; 8:15; Jak. 1:17) Pakwez, tufanyidinap kutek yom ya ku mujimbu pa ndond ya kusambish mu mwom wetu. Kambuy Paul wakasikeshina pa chom chinech payifundinay in Kristu. Wasadina chilakej chiyimp cha in Isarel padingau mwi mpay, kuwejinaku ni yom yayishikena padingau ku Mukandu wa Sinay. Wayileja in Kristu kulik ‘kusot yom yiyimp mud mwasalau in Isarel.’ (Tang 1 Korint 10:6, 7, 11.) Yehova wayinkisha in Isarel yakuda mu chilay. Pakwez mulong kayikwatap ni usey, yakuda yiney yikala “yiyimp” kud awiy. (Kuch. 11:4-6, 31-34) Ni chisu chifukwilau musamb a ngomb wa or, in Isarel amekesha anch ading ashinshikidin nakash pa kuda, kuna ni kwisangaresh kusutamu kumuziyin Yehova. (Kub. 32:4-6) Paul wasadina chilakej chau mulong wa kuyibabesh nich in Kristu ading ashicha piswimp ni disheshik da musumb wa Yerusalem ni tempel mu muvu wa 70 C.C. Mulong niyetu tushich kwinsuden kwa mangand minam, tufanyidin kukwat chiyul cha Paul nich usey nakash.

14. Piur pa yakuda, yom ik tukutwisha kuchingej mwi ngand yisu?

¹⁴ Patulejay Yesu kulembil piur pa “yakuda tukweta nich kuswir nlel unou,” watufundisha kand kulembil chakwel rusot ra Nzamb risadik “pansh mud mwiur.” (Mat. 6:9-11) Ov, mu manang mey utongin anch mangand makwikal mutapu ik? Bibil ulejen anch chisu chikusadika rusot ra Nzamb pa divu, kukwikal yakuda yiwamp. Kukwatijan ni Isay 25:6-8, kukwikal yakuda yivud yiwamp tukusangera mu Want wa Yehova. Kuseng 72:16 ulondin anch: ‘Kukwikal mbut jivud mwi ngand, ni mitu ya mbut yikuzengamin mu yir pa mikandu.’ Ov, uchingedin nich impu chisu ukwisuka yakuda yiwamp nakash wakad kwisukangap kal? Kudoshaku yom yiney, ukutwish kand kutongin chisu ukukuna mitond ya nviny ni kuda mabuj mau. (Isay 65:21, 22) Ni muntu win mwawonsu pa divu, ukusanger yom yiwamp mud yiney.

15. Yom ik yikwilejau antu akuvumbuka? (Yohan 6:35)

¹⁵ Tang Yohan 6:35. Tongijokin piur pa antu ada mikat ni ansh avudishay Yesu mu chilay. Pakuvumbukau, ukutwish kumanijan nau amwing a pakach pau. Ap anch pakur kamekeshap ritiy, akutwish kuyivumbul. (Yoh. 5:28, 29) Pakwez afanyidin kwilej kurumburik kwa mazu malonday Yesu anch: ‘Am yam mukat wa mwom. Muntu mwawonsu ukweza kud am kakez kwovap kand nzal.’ Afanyidin kand kukudish ritiy mu yakupesh ya difut yapanay Yesu ni kwitiyij anch Yesu wapana mwom wend mulong wa awiy. Pa chisu chinicha, antu akuvumbulau ni an akuvadika mwi ngand yisu akwilej uyakin piur pa Yehova ni piur pa rutong rend. Tukwikal kamu ni musangar wa kuyifundish yom yiney yisangareshina! Kuyikwash antu akwau kukudish urund wa piswimp ni Yehova kukutukwash kwikal ni musangar nakash kusutamu chakuda chin chawonsu tukuda mwi ngand yisu.

16. Yom ik tukushinshikina mu mutu wa mulong ulondwilaku ou?

¹⁶ Twashinshikin kal chikunku cha rusang rida mu Yohan shapitre wa 6, pakwez Yesu wading kand ni yom yivud ya kufundish piur pa “mwom wa chikupu.” In Yuda alejau kud Yesu ading afanyidin kuta matu nakash ku yom yalonday. Niyetu tufanyidin kusal mwamu. Tukudandamen kushinshikin Yohan shapitre wa 6 mu mutu wa mulong ulondwilaku ou.