Yom ik Ufanyidina Kusal Mulong wa Kutambul Mwom wa Chikupu?

1. Mulong wak antu avud akat kutong anch chikasiken kushakam chikupu?

ANTU avud akat kwikasikesh kuda yom yiwamp ni kwiyijidish mulong wa kushakam machuku mavud pa divu. Pakwez, ij anch kusal mwamu kukutwishap kuyikangesh kunanap ap kufa. Pamwing ap akat kutong anch chikasiken kushakam chikupu pa mangand. Pakwez, Yesu walonda anch antu akutwish kwikal ni “mwom wa chikupu” mud mufundinau mu Yohan 3:16 ni 5:24.

2. Yohan shapitre wa 6 ulondin ik piur pa mwom wa chikupu? (Yohan 6:39, 40)

² Dichuku dimwing, Yesu wayidisha antu avud nakash mikat ni ansh mu chilay.a Yom yiney yading kamu yishimwokishen, pakwez yom yalonday dichuku dalondulaku, yading yishimwokishen kupandakan. Antu amulondula ku Kapernaum, ni kwinikwa ku chikum cha Karung wa Galaliya, Yesu wayileja anch antu akutwish kuvumbuk ni kusanger mwom wa chikupu. (Tang Yohan 6:39, 40.) Chawiy tongijokin piur pa aruney nau anamakwey afila kal. Yom yalonday Yesu yikwinkishin kashinsh anch antu avud afila kal akutwish kuvumbuk ni anch ey ni akatish ney ukutwish kusangerany mwom wa chikupu! Pakwez antu avud kateshap kurumburik kwa yom yalonday Yesu mu maverse makwau ma Yohan shapitre wa 6. El twisambinany yom yiney.

3. Kukwatijan ni Yohan 6:51 yom ik yalonday Yesu piur pa amwinend?

³ Kupwa kwa Yesu kuyidish antu mu chilay, avurika mana mayinkishau in Isarel kud Yehova padingau mwi mpay. Bibil utazukin mana anch ‘mukat udokila mwiur.’ (Kus. 105:40; Yoh. 6:31) Pa chisu chinech Yesu wasadina yom yading yijay piur pa mana mulong wa kuyifundishinaku antu dilejan da usey nakash. Ap anch mana yading yakuda yapanay Nzamb mu chilay, antu awonsu amada afil kal. (Yoh. 6:49) Pakwez, Yesu witazuka amwinend anch ‘mukat wakin udokila mwiur,’ ‘mukat wa Nzamb,’ ni ‘mukat wa mwom.’ (Yoh. 6:32, 33, 35) Yesu wamekesha patok anch kud kushalijan kujim pakach pendendiy ni mana. Walonda anch: ‘Yam mukat ukata kupan mwom wadokala mwiur. Muntu mwawonsu ukuda mukat winou ukez kashakam chikupu.’ (Tang Yohan 6:51.) In Yuda inay kasangarap pateshau yom yiney. Kateshap mulong wak Yesu walonda anch ndiy ‘mukat’ wadokala mwiur ni anch mukat winou wading uwamp kusutamu mana mayinkishau angakiril au kud Nzamb. Kupwa Yesu wayileja anch: ‘Mukat nikupana am ud mujimbu wam.’ Yom ik yading yikimbinay kulond? Tufanyidin kusal usu wa kutesh kurumburik kwa mazu minam mulong yikutukwash kuman mutapu tukutwisha etu nau akatish netu kutambul mwom wa chikupu. El tumanany yom yakimbay Yesu kulond.

MUKAT WA MWOM NI MUJIMBU WEND

4. Mulong wak yom yalonday Yesu yayinenganesha antu amwing?

⁴ Antu amwing amutesha Yesu anenganana palonday anch ukupan ‘mujimbu wend mulong wa mwom wa mangand.’ Pamwing ap atonga anch wading kamu ukimbin kuyinkish mujimbu wend wakinakin. (Yoh. 6:52) Pakwez kupwa Yesu wayileja chom chimwing chayinenganesha chad nakash. Wayileja anch: ‘Anch udilanyap mujimbu wa Mwan a muntu ni kuna mash mend, ukwikalanyap nich mwom.’​—Yoh. 6:53.

5. Mulong wak tukutwish kwikal ni kashinsh anch Yesu kayilejap antu kuna mash mend makinakin?

⁵ Pa chirung cha Nowa, Nzamb wayijidika antu kuda mash. (Dis. 9:3, 4) Yehova wachirikina kand mbil yiney mu Chijil chapanay kud in Isarel. Chijil chinech chading chilondin anch: ‘Mwawonsu ukuda mash, akumujip.’ (Lev. 7:27) Yesu wayifundisha in Yuda kuziyin ku yijil yawonsu yayinkishau kud Nzamb. (Mat. 5:17-19) Chawiy kafanyinap ap pakemp kuyilej in Yuda kuda mujimbu wend wakinakin ap kuna mash mend. Pakwez kusutin kusadin mazu minam, Yesu wakimba kuyifundish antu mutapu wa kupat mwom, charumburik anch “mwom wa chikupu.”​—Yoh. 6:54.

6. Mutapu ik tufanyidina kutesh mazu malonday Yesu piur pa kuda mujimbu wend ni kuna mash mend?

⁶ Chimeken patok anch Yesu wading ulondin mu mutapu wa chifanakesh pading palondinay kud in Yuda. Yesu walonda kand mu mutapu wa chifanakesh chisu chamulejay mband mwin Samariya anch: ‘Muntu mwawonsu ukuna mem manikumwinkisha am, kakez kwovap kand impu, pakwez mem nikumwinkisha makwikal musul wa mem mukach mwend makumwinkisha mwom wa chikupu.’ (Yoh. 4:7, 14)b Yesu kalondap anch mband mwin Samariya ukutambul mwom wa chikupu anch wana kwend mem mamwing mwamu ma mu mwingoch. Chilik chimwing, kayilejap antu ading ambambinay nend mu Kapernaum anch akwikal ni mwom wa chikupu anch ada mujimbu wend wakinakin ni kuna mash mend.

CHISU CHIKWAU CHASADINAY YESU MAZU MA MUTAPU UMWING

7. Yom ik yilondiningau antu amwing piur pa mazu mada mu Yohan 6:53?

⁷ Antu amwing akat kulond anch mu Yohan 6:53, Yesu warumburila yom yifanyidinau antu kusal pa chisu cha Yakuda ya Urel ya Mwant, mulong pa chisu chinicha wasadina mazu ma mutapu umwing. (Mat. 26:26-28) Akat kulond anch muntu mwawonsu ukukumangana ku Yakuda ya Urel ya Mwant ufanyidin kuda mukat ni kuna nviny ukatau kuyisutishin in kukumangan. Ov, yid yakin? Chid cha usey kwijik anch yid yakin ap bwat mulong muvu wawonsu antu avud pa mangand mawonsu akat kukumangan netu ku chinship chinech. Tukuman anch yom yalonday Yesu mu Yohan 6:53 ni yom yalonday chisu cha Yakuda ya Urel ya Mwant, yishalijadin kamu kulemp nakash.

8. Kushalijan ik kuda pakach pa yinship yiney yaad? (Tal kand yipich.)

⁸ El tumanany kushalijan kuda pakach pa yom yalonday Yesu kud in Yuda ni yom yalonday pa chisu cha Yakuda ya Urel ya Mwant. Cha kusambish, chisu ik ni kwisu kwalondinay Yesu mazu mada mu Yohan 6:53-56? Walonda mazu minam mu muvu wa 32 C.C kud in Yuda mu Galaliya. Wasala mwamu muvu umwing kurutu kwa kutek mufulandal wa Yakuda ya Urel ya Mwant mu Yerusalem. Cha kaad, anany alejay? Walonda yom yiney kud antu ading amulondwila mulong kwau wa kuda pa ndond pa kukat kwilej yom yivud piur pa Yehova ni Want wa Nzamb. (Yoh. 6:26) Chawiy, chisu chalonday Yesu chom chakanganyau kutesh kurumburik, alika kumwitiyij. Ap in kwilej end amwing alikap kumulondul. (Yoh. 6:14, 36, 42, 60, 64, 66) Antu inay ading ashalijadin kulemp ni atwimbuy 11 ading ni Yesu chisu cha Yakuda ya Urel ya Mwant mu muvu wa 33 C.C. Pa chisu chinicha, atwimbuy end 11 ashinshamena ading nend pamwing, ap anch kateshap nawamp yom yading yifundishinay. Pakwez, chinyim ni antu avud a mu Galaliya, atwimbuy inay ashinshamena ading akwet kashinsh anch Yesu wading Mwan a Nzamb wadokala mwiur. (Mat. 16:16) Wayileja anch: ‘En walamatinany kud am mu mar mam.’ (Luka 22:28) Kushalijan kwinoku kumekeshin anch mazu ma Yesu mada mu Yohan 6:53 madingap mufulandal wa Yakuda ya Urel ya Mwant. Pakwez kud kand kushalijan kukwau kuda pakach pa yinship yiney yaad.

MAZU MA YESU MAKUTADIN NIYEY

9. Mazu malonday Yesu piur pa Yakuda ya Urel ya Mwant mayitadil anany?

⁹ Chisu cha Yakuda ya Urel ya Mwant, Yesu wapana mukat wakad chivish kud atwimbuy end, ni wayileja anch mukat winou wading umekeshin mujimbu wend. Kupwa wayinkisha kand rupas ra nviny ni wayileja anch nviny winou wading umekeshin ‘mash ma mansuk.’ (Mar. 14:22-25; Luka 22:20; 1 Kor. 11:24) Mazu minam marumburikin yom yijim nakash. Mansuk masu wamasala pamwing ni “in Isarel [a mu spiritu]” akwikala “mu Want wa Nzamb,” kadap nau antu awonsu. (Heb. 8:6, 10; 9:15) Atwimbuy kateshap kamu nawamp yom yiney pa chisu chinicha, pakwez ading afanyidin kuyizizin many nich spiritu utumbila kupwa kwa chisu chikemp ni kwandam mu mansuk masu mulong wa kushakam pamwing ni Yesu mwiur.​—Yoh. 14:2, 3.

10. Kushalijan ik kukwau kuda pakach pa yom yalonday Yesu pa chisu cha Yakuda ya Urel ya Mwant ni yalonday mu Galaliya? (Tal kand chipich.)

¹⁰ Mazu malonday Yesu pa chisu cha Yakuda ya Urel ya Mwant mading mayitadil antu ada mu “chisak chikemp.” Chisak chinech chikemp chasambisha nau atwimbuy ashinshamena adingay nend pamwing mu kapalikany pa chisu chinicha. (Luka 12:32) Awiy antu alejau kud Yesu kuda mukat ni kuna nviny urel winiwa. Antu akwau afanyina kwandam mu chisak chinech mu machuku ma kurutu niyau afanyina kuda mukat ni kuna nviny pa chisu cha Yakuda ya Urel ya Mwant. Awiy inay antu akushakama ni Yesu pamwing mwiur. Yom yalonday pa chisu chinech kud atwimbuy end yishalijadin kamu ni yalonday mu Galaliya, yading yiyitadina antu avud nakash kamu.

11. Yom ik yalonday Yesu mu Galaliya yimekeshina anch kadingap kalondina piur pa chisak chikemp?

¹¹ Padingay Yesu mu Galaliya mu muvu wa 32 C.C., wading uyedin in Yuda ading akatina kwau kuda mikat. Pakwez, wapakisha kuyikwash kutesh anch wading ni chom chikwau cha usey chisutinamu yakuda​—chom chafanyina kuyinkish mutapu wa kutambul mwom wa chikupu. Ni walonda kand anch antu afila kal akutwish kuvumbuk pa dichuku da nsuden ni kwikal ni mutapu wa kushakam chikupu pa divu. Kadingap kalondina piur pa chisak chikemp, mud mwasalay pa chisu cha Yakuda ya Urel ya Mwant. Pakwez, mu Galaliya wading wisambidin piur pa yiyukish yikutwishau kutambul antu awonsu. Walonda anch: ‘Muntu mwawonsu ukuda mukat winou ukez kashakam chikupu; . . . Mukat nikupana am ud mujimbu wam mulong wa mwom wa mangand.’​—Yoh. 6:51.c

12. Yom ik yitina kusal mulong wa kutambul mwom wa chikupu?

¹² Yesu kayilejap in Yuda a mu Galaliya anch yiyukish yiney akuyitambul kud muntu win mwawonsu. Ching kusu antu ‘akuda mukat winou,’ charumburik anch akumekesha ritiy muday ndiy. In Kristu avud a dijin alondining anch akupand anch kusu kwau alond anch amwitiyijin Yesu ni kumuman mud mupandish wau. (Yoh. 6:29) Pakwez, antu avud ading mu Galaliya ading amwitiyijina Yesu kwinsambishin amulika. Mulong wak?

13. Yom ik yitina kusal mulong wa kwikal mwin kwilej wakin wa Yesu?

¹³ Antu avud ading mu chisak chinech ading akatin kumulondul Yesu mulong wayinkisha yom yading yikatinau. Ading asangaredin kwau kuyok, kuyinkish yakuda yamwamu ni kuyifundish yom yading yikatinau kutesh. Pakwez, Yesu wamekesha anch mulong wa kwikal mwin kwilej wend wakin, chitin kusal yom yivud. Kezap kwend pa divu mulong kwau wa kuwanyish maswir ma ku mujimbu ma antu. Mulong wa kwikal in kwilej akin a Yesu, antu ading afanyidin kwitiy kutazuk kwend kwa ‘kuya kud ndiy,’ kusutin kutesh ni kuziyin ku yom yawonsu yayifundishangay.​—Yoh. 5:40; 6:44.

14. Yom ik tufanyidina kusal mulong wa kutambul mwom wa chikupu?

¹⁴ Yesu wayileja antu usey wa kumekesh ritiy. Kumekesh ritiy mu yom ik? Mu usu wa kukwol ukweta mujimbu ni mash yafanyinay kupesh mu kusut kwa chisu. Ritiy mud riner rading ra usey kud in Yuda, ni rid kand ra usey kud etu nlel. (Yoh. 6:40) Inge, mulong wa kutambul mwom wa chikupu, mud mulejenau mu Yohan 6:53, tufanyidin kumekesh ritiy mu difut. Antu avud akutwish kutambul chiyukish chinech.​—Efes 1:7.

15-16. Yom ik ya usey twileja kal kusutin Yohan shapitre wa 6?

¹⁵ Kusutin Yohan shapitre 6, twilej kal yom yivud ya usey nakash, ni yatukasikesha kal etu awonsu. Twilej kal anch Yesu uyibangidin antu nakash. Padingay mu Galaliya, Yesu woka ayej, wayifundisha antu piur pa Want wa Nzamb, ni wayinkisha antu yakuda chisu chading chiyiswirikedinau. (Luka 9:11; Yoh. 6:2, 11, 12) Cha usey nakash, wafundisha anch ndiy ‘mukat wa mwom.’​—Yoh. 6:35, 48.

¹⁶ Antu atazukay Yesu anch “amikoku akwau” kafanyidinap kuda mukat ni kuna nviny pa chisu cha Yakuda ya Urel ya Mwant. (Yoh. 10:16) Pakwez akat kuda ‘mukat wa mwom’ mu mutapu wa chifanakesh. Akat kusal mwamu kusutin kumekesh ritiy rau mu usu wa kukwol wa yakupesh ya Yesu. (Yoh. 6:53) Antu akata kuda mukat ni kuna nviny akat kumekesh anch ad mu mansuk masu ni akwet ruchingej ra kuyikel pamwing ni Yesu mu Want wa mwiur. Chawiy, twikal azizidilau many ap amikoku akwau, rusang rida mu Yohan shapitre 6 rid ra usey nakash kud etu. Ritufundishin anch mulong wa kutambul mwom wa chikupu, tufanyidin kukudish ritiy rikash.