Kwijik Kurish ni Milong

KWIJIK KURISH NI MILONG CHOM IK?

Muntu wija kurish ni milong ukat kupandakan yikangesh ni kakuziyangap. Ukaliweny winou ukat kudiokal ku yom yikata kumushiken muntu mu mwom. Mulong mwan mukemp kakutwishap kwijik kwend pakad kuwawol chisu ni chisu, chilik chimwing kakutwishap kwikal ni mwom uwamp pakad kupandakan milong yikumushikena.

MULONG WAK KWIJIK KURISH NI MILONG KUD KWA USEY?

An amwing akat kuziy anch akangany kusal chom kanang, arish ni milong ni anch ayilond nayimp. Akwau akat kulikap kamu. Pakwez, afanyidin kutesh kurumburik kwa manans malondwilaku am:

• Tukutwishap kutwish yom yawonsu tusadining mu mwom.​—Jakobu 3:2.

• Milong yikat kuyishiken antu awonsu.​—Mulej 9:11.

• Ukutwish kukul anch muntu mukwau wakulej yom ufanyidina kuwapish.​—Jinswir 9:9.

Kwijik kurish ni milong kukumukwash mwaney kujijamen milong nich kashinsh.

MUTAPU WA KUYIFUNDISH ANEY KWIJIK KURISH NI MILONG

Anch mwaney wakangany kusal chom.

MBIL YA BIBIL: “Anch mwin kutentam wawa tupamp sambwad, ukulank kand.”​—Jinswir 24:16.

Mukwasha mwaney kwijik kujimb kwa mulong. Chilakej, yom ik yikusalay anch wakangany kusal chom kanang ku shikol? Ukutwish kuziy ni kulond anch: “Nid kwam muntu wa chamwamu!”

Mulong wa kumukwash mwaney kwijik kurish ni milong, mukwasha kutongijokin piur pa yom yikutwishay kusal nawamp chisu chikwau. Mwamu ukusal usu wa kupwish mulong ni kakwiyovap anch amurumbukin kal.

Pa chisu chawiy chimwing, ipuk kupwish mulong pa ndond ya mwaney. Pakwez, mukwasha kuman mutapu wa kuupwish amwinend. Ukutwish kumwipul anch: “Yom ik ukutwisha kusal chakwel utesha nawamp dilejan difundishinau?”

Anch kwashiken milong.

MBIL YA BIBIL: “En kiwijanyap chom chimwing chikushika diamashik.”​—Jakobu 4:14.

Kwikil muntu wija mutapu ukwikala mwom wend diamashik. Muntu udia mpich nlel ukutwish kwikal kazwendj diamashik; muntu ukweta ukash wa mujimbu uwamp nlel ukutwish kuyel diamashik. Bibil ulondin anch: “In kubambil mau akat kukangany kupandakan njit, . . . [mulong] chisu cha mar chikat kushik kudi antu awonsu.”​—Mulej 9:11.

Mulong ud nvaj, ukat kusalang usu wa kumuchidij mwaney ku ubaj ukutwisha kumushiken. Pakwez mu win yakin, chikasiken kumuchidij mwaney ku yom yawonsu yiyimp yikata kushiken mu mwom.

Chakin kamu, mwaney kand kal apama mulong wa kwijik mutapu ukatay muntu kwiyov anch washadish mudimu ap waburen nfalang. Pakwez, ukutwish kumukash kurish ni milong yikwau, mud kufish murund nend ap muntu wa mu dijuku.a

Anch amulej mwaney kuwapish yom kanang.

MBIL YA BIBIL: “Tesh ku chiyul . . . chakwel wikal ni manangu kurutu.”​—Jinswir 19:20.

Anch muntu wamulej mwaney kuwapish chom kanang, kadiap anch ukimbin kumwovish wom ap kumusal nayimp, pakwez ukatin kumukwash kuswimp chom chifanyidinay kuwapish.

Anch wamufundish mwaney kwitiy kukand, en awonsu ukutaninanyamu. Nvaj umwing utazukin anch John ulondin anch: “Anch chisu chawonsu twalik anch anetu alika kurijek kurumbuk kwau, kakwilejap chom ap chimwing mu mwom. Akwikal ni milong yivud nakash ni mulong ud nvaj wau, yeya chad ukupwishang milong yiney. Chikat kuletish mar nakash mu mwom wa anvaj ni wa an.”

Mutapu ik ukutwisha kumukwash mwaney anch amulej yom ya kuswimp? Anch mwaney amulej yom ya kuswimp, chikala ku shikol ap ndond yikwau—ikasikesha kulik kulond anch kafanyidinap kumulej mwamu. Pakwez, ukutwish kumwipul anch:

• “Utongin anch mulong wak akulejang kusal mwamu?”

• “Mutapu ik ukutwisha kuwapish yom?”

• “Anch kwashiken kand yom mud yiney, yom ik ukusala?”

Vurik anch, kukand kukutwish kumukwash mwaney, kusambish katat ni pakupamay.