Usey wa Kuyitakel kud Amakurump

CHIRUMBURIKIN IK KUYITAKEL AN?

An akweting kuswir kwa amakurump akutwisha kuyitakel ni kuyinkish yiyul. Mulong ud nvaj, yeya ukutwisha kuwanyish nawamp chisend chinech, ni chid chisend chey kusal mwamu. Pakwez, amakurump akwau akutwish niyau kuyifumb aney.

MULONG WAK KUYITAKEL AN KUD KWA USEY?

Mu jingand jivud, an avud kakusutishangap chisu chivud pamwing ni amakurump. Chilakej:

• An akat kusutish chikunku chijim cha dichuku ku shikol, kudia ansand a shikol avud kusutamu alej.

• Anch abud ku shikol, ansand amwing akat kuchirik ku chikumbu ni kutan anch kwikil muntu mulong anvajau ayang kal ku mudimu.

• Kukimbijol kumwing kwasalau mu États-Unis kwamekesha anch, an akweta mivu pakach pa 8 kushik ku 12 akat kusutish asaa piswimp musamban pa dichuku mu kwipuwangej kusutil kutal televizion, kutesh mizik ap kusengan masengan.a

Buku Hold On to Your Kids ulondin anch: “Anch ansand akwet kuswir kwa malejan, kuyiyul ap kuyitakel, kakatap kuya kud amakwau, atatukwau, alejau ap kud amakurump akwau . . . pakwez akat kuya kud ansand a chimbu chau.”

MUTAPU WA KUYITAKEL

Sutish chisu pamwing ni aney.

MBIL YA BIBIL: “Mufumbila mwan mwi njil yiwapidilay kuya, mulong pakukulay kakez kayilikap kand.”​—Jinswir 22:6.

An akat kuyichingejinang anvajau mulong wa kuyitakel. Chawiy, in kukimbijol alondin anch, ap anch awanyish mivu dikum ni kusut, an akat kukwat nich usey nakash yiyul ya anvajau kusutamu ya arund nau. Profeser Laurence Steinberg wafunda mu buku You and Your Adolescent anch: “Anvaj awiy akweta yibachikin yijim nakash pa mikadil ni yaku ya anau kusambish kamu ku usand wau djat ni pakwikalau amakurump.” Uwejidinaku anch: “Ansand akatining kwijik yom utongina ni kutesh yom ulondina, ap anch kitiyidinap ni kitiyinap yom yawonsu uyilejina.”

Mulong mwan ukweting kuswir kwa umutakel, sal usu wey wawonsu mulong wa kumutakel nawamp. Sutish chisu chivud pamwing ni mwaney, muleja yom utongina, yom yidia ya usey kud ey ni yom yakushikena mu mwom.

Mukwasha kwikal ni muntu mukwau ukumufumba.

MBIL YA BIBIL: “Muntu ukata kwend nau in manangu, niyend ukwikal mwin manangu.”​—Jinswir 13:20.

Ov, ukutwish kutong piur pa mukurump umwing ukutwisha kwikal chilakej chiwamp kud mwaney? Ov, ukutwish kurijek yom chakwel asutisha chisu pamwing ni mwaney? Chakin kamu, chinech chirumburikinap anch wapan kal chisend chey cha kumulil mwaney kud muntu mukwau. Pakwez kukasikesh kudiokila kud muntu mukurump wa kuchingejin wija anch kakumusalap mwaney nayimp kukukwash kufumb umwinkishina mwaney. Mu Bibil, alejenamu anch Timote, ap anch wading wapamin kal, wataninamu nakash mu kusutish chisu pamwing ni kambuy Paul, ni Paul niyend wataninamu mu kubombakan pamwing ni Timote.​3—Filip 2:20, 22.

Nlel unou, majuku mavud mashichap kand pamwing mu chikumbu chimwing ap mu mukal umwing, ni yisu yivud, angak, amantu, asangaj ni anamakwau akwau ashich ku jindond jikwau pa mangand. Anch chid mwamu mu dijuku dien, sal usu chakwel aney ikala ni mutapu wa kwilejin kud amakurump akweta mikadil yiukatina anch niyau ayikala nich.