Ov, Chisu ik Chifanyidinay Nambaz Kubwik ku Mutu​—Ni Mulong Wak?

Ov, chisu ik chifanyidinay nambaz kudjal chitambal pasadinay midimu ya Nzamb ni mulong wak ufanyidinay kubwik mutu wend? El amboku tushinshikinany mazu minam mapepilau misambidinau kudiay kambuy Paul. Paul utulejin chitufanyidina kusal mulong wa kukwat mipak yiwamp yimutumbishininga Nzamb. (1 Korint 11:3-16) Ndiy utulejin midimu yisatu tufanyidina kushinshikin: (1) midimu yifanyidinay nambaz kusal nich chitambal ku mutu, (2) Yisu yifanyidinay kuubwik, ni (3) yibachikin yimubachikina kusadil chany chinech.

Midimu. Paul ulejen midimu yiney yaad: kulembil ni kulejan antu Dizu dia Nzamb. (verse 4, 5) Kulembil kudi kwambamb nend Yehova. Nlel unou, kulejan Dizu dia Nzamb kudi antu kurumburikin midimu yawonsu yisadiningay mwin Kristu chakwel afundisha antu Bibil. Ov, Paul usotin kulond anch nambaz ufanyidin kubwik mutu wend chisu chawonsu chikimbinay kulembil ap kulejan uyakin wa mu Dizu dia Nzamb? Bwat. Kudi chisu chifanyidinay nambaz kubwik mutu wend pakatay kulembil ap chisu cha kulejan Dizu dia Nzamb kudi antu, ni chisu chakadiay kufanyin kuubwik.

Yisu. Mazu ma Paul malejen anch, nambaz ufanyidin kubwik mutu wend ku chikumbu ni mu chikumangen, ni ulondin kand anch: “Ikundj ndiy mwant wa mband . . . Mband mwawonsu ukata kulembil ap kurumburil mazu ma Nzamb pakad kudjal chom ku mutu, wamukwatish kal ikundj usany.” (Verse 3, 5, NWT) Mu dijuku, ikundj ndiy utekinau kudi Yehova kwikal ku mutu kwa mband. Anch mband usadin yom yimekeshina mutapu wakadiay kulimish umutu wa nfumwend, pakwez ndiy usendin yisend yimwinkishinau nfumwend kusend kudi Yehova, mband mwinou umufwishin nfumwend usany. Chilakej, chisu chifundishinay Bibil, nambaz ufanyidin kubwik mutu wend chakwel amekesha mutapu ulimishinay umutakel wa nfumwend anch udi pa ndond yin yang, ap anch nfumwend usadin yom yikwau. Ikundj wikalap ubabatishinau ap bwat, mband ufanyidin kubwik mutu wend mulong nfumwend ndiy udia mutu wa dijuku.a Nambaz ufanyidin kand kubwik mutu wend chisu cha kulembil ap chilejenay uyakin wa Dizu dia Nzamb ndond yidia mwanend ikundj wababatishinau kal, chikalap nchik midimu yikwau yisadinay mwan winou. Pa chisu chin chang, nambaz kabwikinap mutu wend mulong wa kumekesh anch mwanend udi mutu wa dijuku bwat, pakwez, mulong Nzamb wayinkisha kal anamakwetu amakundj awonsu ababatishinau kal yisend mu chikumangen.

Paul wisambidin piur pa chikumangen anch: “Anch muntu usotil kutadik mulong wa chom chinech, ufanyidin kwijik anch, etu ni Yikumbu ya Nzamb yikwau kitukwetap chaku chikwau cha kwifukwil.” (Verse 16) Amakundj ababatishinau kal awiy inkishinau yisend kudi Nzamb mu chikumangen cha in Kristu. (1 Timote 2:11-14; Hebereu 13:17) Awiy kusu inkishinau chisend cha amakurump ni ankwash a mudimu mu chikumangen chakwel asala mudimu uyinkishinau kudi Nzamb wa kulam amikoku end. (Midimu 20:28) Pakwez, kuding yisu yimwing, chikutwish kusadik anch nambaz awanyisha chisend chifanyidinay kusal ching kusu kudiay mukadivar chifuvu. Chilakej, ukutwish kutakel kukumangan mulong wa mudimu wa kulejan anch kwikil mukadivar ubabatishinau udia chifuvu.b Ukutwish kumufundish muntu wilejiningay nend Bibil mu mes ma mukadivar wababatishau kal. Chidinga midimu yiney yimwing ya ku yisend ya kufundish yisadikininga mu chikumangen, nambaz ufanyidin kubwik mutu wend mulong wa kumekesh anch ndiy uwanyishin chisend chifanyidinau kuwanyish ching kudi mukadivar.

Chikwau, kuding yisend yikwau ya in Kristu yikutwishay nambaz kusal pakad kubwik ku mutu. Chilakej, kafanyidinap kubwik ku mutu chisu chakwilay ku yipul mu chikumangen, padiay ni nfumwend ap ni mukadivar kanang mu mudimu wa kulejan wa ku chis ni ku chis, ap chisu chiyifundishinay anend akadia kubabatishiu Bibil, ap pa chisu cha kulembil nau pamwing. Pakwez, kukutwish kulank yipul yikwau, anch nambaz kijap cha kusal, chidi cha manangu kudiay kutang Bibil ni kukimbijol mu mikand yikwau.c Anch udandamedin kwidjdjek ni anch kom kend kamubachikin kusal mwamu, kudjal chom ku mutu kukwikalap kuyimp, mudi muchilejenau pa chipich chinech.

Yibachikin. Mu verse 10 tutaninamu yiyingish yaad yisadina chakwel nambaz abwika mutu wend: ‘Mband uwapidil kudjal chom ku mutu chakwel chikala chijingidij cha kuziyil kudi ikundj, mulong wa aruu a mwiur.’ Diyingish dia kusambish, verse winou wisambidin piur pa “chijingidij cha kuziyil.” Pabwikiningay nambaz ku mutu umekeshining mutapu witiyijinay umutakel utekinau kudi Yehova piur pa yisend yinkishinay akadivar ababatishinau kal mu chikumangen. Kusal mwamu kumekeshin rukat rend ni kushinshaman kwend mudiay Yehova Nzamb. Diyingish diakaad didi mu mazu minam malondina anch “mulong wa aruu a mwiur.” Ov, pabwikiningay nambaz mutu wend, kusal mwamu kukweting chibachikin ik pad angel?

Angel asangering palimishiningau umutakel wa Nzamb kusutil ku dirijek dia Yehova, mwiur ni pa divu. Mwikadil winou uyikwashining nakash pameningau antu akayitil akat kuziyil ku umutakel winou, mulong niyawiy afanyidin kuziyil umutakel wa Yehova, wakanganyau kuziyil kudi angel akemp. (Jud 6) Chawiy, angel amening mutapu nambaz uziyidiningay ku umutakel wa mukadivar wababatishinau kal, chikalap nchik uman ukutwishay nambaz winou kwikal nich, ronganyin rend ruvud ap manangu mavud kumusutam mukadivar. Pamwingap nambaz winou ukutwish kwikal mwin Kristu uzizidilau many ukeza kutakel pamwing ni Kristu. Nambaz winou ukez kutan mwaz ujim kusutamu ni angel mulong ndiy ukez kutakel pamwing ni Kristu mwiur. Chilakej chiwamp mud ik chitadiningau kudi angel katat! Chakin kamu, anambaz etu akwet chiyukish chijim cha kumekesh kurutu kwa tunan ni tunan twa angel ashinshamena mutapu umuziyidinau Nzamb kusutil ku kuziyil ku umutakel wend!