DILEJAN DIA 38
Kwat Nich Usey Chipan cha Mwom
Kud yom yivud yiwamp nakash tukutwisha kusal ni kusanger mulong tud aom. Ap anch turishin ni milong, pakwez tukutwish kusanger yom yimwing mu mwom. Mutapu ik tukutwisha kumekesh anch tukwatin nich usey chipan cha mwom? Ni chom ik cha usey nakash chitubachikina kusal mwamu?
1. Mulong wak tufanyidin kukwat mwom nich usey?
Tufanyidin kukwat mwom nich usey mulong chid chipan chidiokila kud Yehova, Tatukwetu wa rukat. Ndiy udia ‘musul wa mwom’—watanga yom yawonsu yikweta mwom. (Kuseng 36:9) “Ndiy amwinend ukata kupan kudi antu awonsu mwom, ni mwiku, ni yom yikwau yawonsu.” (Midimu 17:25, 28) Yehova utwinkishin yom tukweta nich kuswir mulong wa kwikal aom. Pakwez kud kand yom yikwau. Ukat kutwinkish yom yiney mu mitapu kushalijan chakwel tusangera mwom.—Tang Midimu 14:17.
2. Mutapu ik tukutwisha kumekesh anch tukwatin chipan cha mwom nich usey?
Kudiosh kamu pasambishina mwom wey mwinvumu, Yehova wading ukubangidin. David, kashalapol wa Nzamb, amupepila kulond anch: “Pinading kand kal nivadik, ey wading kwey wingij.” (Kuseng 139:16) Mwom wey ud wa usey nakash ku mes ma Yehova. (Tang Mateu 10:29-31.) Chikumwovish nayimp nakash anch muntu kanang wijip amwinend, ap wamujip mukwau kwa kwisotin.a (Kubudik 20:13) Chikumwovish kand Yehova nayimp anch twatek mwom wetu mu ubaj ap twalik kukwat mipak kanang mulong wa kuchidij mwom wa antu akwau. Anch twalam nawamp mwom wetu ni kulimish mwom wa antu akwau, tumekeshin anch tukwatin nich usey chipan chinech chiwamp nakash.
ILEJA CHIKURIKINA
Ileja mitapu yimwing muukutwisha kumekesh anch ukwatin nich usey chipan cha mwom.
3. Lam nawamp mujimbu wey
In Kristu akat kusadin mwom wau wawonsu mulong wa kumusadin Yehova. Chid mud akat kupan mijimbu yau mud yakupesh kud Nzamb. Tang Rom 12:1, 2, kupwa isambinany yipul ey:
Yom ik yifanyidina kukubachik kulam nawamp mujimbu wey?
Mu mitapu ik yimwing ukutwisha kusal mwamu?
4. Ipuk yom yikutwisha kulet ubaj ap rufu
Bibil utukasikeshin kwipuk yom ya ubaj. Talany VIDEO mulong wa kwijik yom yimwing ukutwisha kusal mulong wa kwichidij.
Tang Jinswir 22:3, kupwa isambinany mutapu ukutwisha kuchidij mwom wey ni wa antu akwau . . .
kwol kwey.
ku mudimu.
chisu usengena.
chisu urijekina, wendishina, ap chikusendinau mu motak, ku moto, ap kwi nking.
5. Limish mwom wa mwan udia mwinvumu
David warumburila anch Yehova ukat kubangin chom chawonsu chisadikina papaminay mwan mwinvumu mwa makwend. Tang Kuseng 139:13-17, kupwa isambinany chipul ech:
Ku mes ma Yehova, ov, mwom wa muntu usambishining pakatay maku kwimish anch pavadikiningay mwan?
Yijil yapanay Yehova kud in Isarel a pakur yading yikat kuyichidij amaku ni anau adia mwinvumu. Tang Kubudik 21:22, 23, kupwa isambinany yipul ey:
Yehova wamumanang mutapu ik muntu wadioshang madikaj ap kujip mwan udia mwinvumu pakad kutongin?
Mutapu ik wiyovangay anch muntu wasal mwamu kwa kwisotin?b
Mutapu ik umena chitongijok chinech cha Nzamb?
Yisu yimwing, ap mband ukwatina mwom nich usey ukutwish kuman anch kakwetap chom chikwau cha kusal, ching kamu kudiosh madikaj. Tang Isay 41:10, kupwa isambinany yipul ey:
Anch mband akat kumubachok chakwel adiosha madikaj, ufanyidin kwit ukwash kud nany? Mulong wak?
ANCH MUNTU WAKWEL ANCH: “Mband amwinend ndiy ufanyidina kutond anch ukudiosh madikaj ap bwat—udia mwinvumu mwanend.”
Yom ik yikwinkishina kashinsh anch Yehova ukwatin nich usey mwom wa maku ni wa mwanend udia mwinvumu?
YOM TWILEJA KAL
Bibil utufundishin kukat, kulimish, ni kuchidij chipan cha mwom chidiokila kud Yehova. Chitin kusal mwamu piur pa mwom wetu ni wa antu akwau.
Ov, uvurikin?
Mulong wak mwom wa antu ud wa usey kud Yehova?
Mutapu ik ukatay Yehova kwiyov anch muntu kanang wajip mwom wa mukwau kwa kwisotin?
Chom ik usangaredina piur pa chipan cha mwom?
JINGUNIN KAND
Mutapu ik tukutwisha kumujikitish Yehova mulong wa chipan cha mwom?
Tan chakul ku chipul ech: Ov, Nzamb ukumulikishin mband wadiosha madikaj kwa kwikatin?
“Yom ik Yilondinay Bibil Piur pa Kudiosh Madikaj?” (Mutu wa mulong udia pa jw.org)
Jingunin mutapu chitongijok cha Nzamb piur pa mwom chikutwisha kwikal ni chibachikin pa mipak tukwatina mulong wa kwipuwangej.
“Ov, Nifanyidin Kusengan ‘Masengan ma Ubaj?’” (Lankany!, wa Ngond wa 8, 2000)
Chid nchik anch muntu wasambish kwikal ni yitongijok ya kwijip? Tal mutapu ukutwishay Bibil kukwash.
a Yehova ukat kuyibangin nakash antu aziyina. (Kuseng 34:19) Wij nawamp yovil yisansena yikutwishau kwikal nich yiyishikijina ku kwikal ni yitongijok ya kwijip, ni ukatin kuyikwash. Mulong wa kuman mutapu ukutwisha ukwash wend kumukwash muntu kwipuk yitongijok yiney, tang mutu wa mulong “Novil ja Kwijip—Ov, Bibil Ukutwish Kwinkwash Anch Nikwet Yitongijok ya Kwijip?” udia mu chikunku Jingunin Kand mu dilejan dined.
b Antu adiosha madikaj kwa kwikatin kafanyidinap kwifish nich nakash—mulong Yehova ukutwish kuyilikishin. Mulong wa kwijik jinsangu jivud, tal mutu wa mulong “Yom ik Yilondinay Bibil Piur pa Kudiosh Madikaj?” mu chikunku Jingunin Kand mu dilejan dined.