Ilejina Kusutil ku Kurumbuk kwa in Isarel

IN ISAREL ading ij yadingau yiyichingejinau kudi Yehova padingau ayil mwi Ngand ya Kushilamu. Kusutil kudiay Moses, Nzamb wayileja anch: “Ukayopatangany in ngand awonsu kurutu kwen. Ukashesholangany akish au a mayal, ukaumbolangany yirumbidij yau yawonsu ya utad wa kuchil, ni kupuchol jindond jau jawonsu ja piur jikat kuyifukwilau.”—Kuch. 33:52.

In Isarel kafanyinap kusuk manswik nau antu a mwin ngand, ap kwatijan nau bwat. (Kuv. 7:2, 3) Kupwa, antu a Nzamb ayibabesha anch: “Babal kamu kwey kwovijan nau antu in ngand uyila ni kwandam, chamwamu akwikal mupit pakach pey.” (Kub. 34:12) Chakin, in Isarel kamuziyilap Nzamb ni awila mu mupit. Ov, chom ik chayishikija ku kuwa kwau? Malejan ik makash tukutwisha kwilej kusutil ku yom yayishikena?—1 Kor. 10:11.

Asambisha Nich Urund Djat ku Kwifukwil Akish

Pandamau mwi Ngand ya Kushilamu, in Isarel ayipandikana antu adinga ashicha mwi ngand. Pakwez, an a Isarel akanganya kuziyil ni muchim wawonsu ku chijil cha Nzamb. Kamwopatap mukankuny. (Ank. 1:1–2:10) Chinyim ni chinech, pashakamau in Isarel mukach mwa “michid [. . .] sambwad” yadinga mwi ngand, kushakam chisu ni chisu pamwing ni antu a michid yiney kwayishikija ku kuta nau urund. (Kuv. 7:1) Chom chinech chikala ni usu ik padiau in Isarel? Bibil ulondin anch: “Awiy asambisha kwat anau amband mulong wa ayinau, ni apana anau amband kudi anau amakundj, ni asambisha kuyisadil anzamb au. Chawiy lel an a Isarel asala yom yiyimp kurutu kwa Yehova, ni amuvuramena Yehova Nzamb wau ni aya ayisadila a Baal ni akish atumbishau.” (Ank. 3:5-7) Mulong in Isarel ata urund ni antu a mwin ngand, kwawiy kwayishikija ku kwatijan nau ni ku kwifukwil akish. Pasambishau kwatijan, in Isarel asambisha kushadish mushiku wa kuyopat mwi ngand. Difukwil diakin dijonda, ni in Isarel asambisha kuyisadil anzamb a makasu.

Mudi arund nau, antu adinga mwi Ngand ya Kushilamu ikala chak chijim cha muspiritu kudi in Isarel kupandikanamu padingau akankuny nau. Shinshikin mutapu ukwau ukutwisha kujondish chirelijon.

Asambisha Nich Kudim Aya Djat ku Kumwifukwil Baal

Pandamau mwi Ngand ya Kushilamu, an a Isarel alika kwendangan ashakam pamwing ni avud au ikala andim. Mitapu ya kudim yasadilau yading pamwingap ya chilik chimwing ni yasadidilau antu adinga ni kudim mwi ngand kurutu kwa kwez kwau. Chimeken anch, mu mwikadil winou in Isarel kalondulap mitapu ya kudim ya in Kanan. Pakwez, kuta urund ni antu a mwi ngand kwayibachika in Isarel ku kwitiy yitiyij yau yambatena nich kudim.

In Kanan adinga ni kwifukwil a Baal avud—adinga ni atongin anch anzamb akez kusongish divu. Kuwejinaku pa kudim divu ni kwangul mabuj mad, in Isarel inunga nau mu kwifukwil anzamb a in Kanan mudi awiy in kupan yom yivud. Chawiy lel, antu avud mu Isarel ading ni kutong anch akat kumwifukwil Yehova, pakwez ading ipanin kal chakin kamu mu kupumbwok kukash.

Dibabesh Dikash Kudi Etu Nlel Unou

Chidap anch in Isarel adinga nich chitongijok cha kwiyandjik mu difukwil dia Baal ni mu uyimp wa difukwil dined pa chisu chasankanijanau kapamp kau ka kusambish ni antu a mwi Ngand ya Kushilamu. Pakwez, kwawiy kwayishikija kubombakan kwau. Ov, tukutwishap kuchingejin yibudikin yiyimp anch twata urund ni antu akutwisha kwikal arund pakwez kitiyijinap yitiyij, yijidik ya mwikadil, ni yany ya win Kristu? Chakin kamu, urund umwing ni antu akad kwitiy ukutwish kwikal wa usey kwi ndond tusadila mudimu, kushikol, ap ku chikumbu. Pakwez, yayishikena in Isarel yidi dibabesh kudi etu nlel unou anch kukimb urund wa mutapu winou kuletining ruvundu. Bibil ulejen uyakin wakad kutadik anch: “Urund uyimp ukat kuyipish yaku yiwamp.”—1 Kor. 15:33.

Nlel unou, turishin nich yoziu yivud yifanikena ni yarishau nich in Isarel. Antu a pa chirung chetu akat kwifukwil akish. Akat kwifukwil nfalang, in kwipuwangesh, in masengan, yitenchik ya chipolitik, in kutakel amwing a chirelijon, ni ap yid ya dijuku. Yiney yawonsu yikutwish kwikal yituswiridina mu mwom. Kukudish urund wa piswimp ni antu akad kumukat Yehova kukutwish kutushikij ku kusheshik kwa muspiritu.

Masandj mading chom cha kusambish mu difukwil dia Baal chayipwita ni kuyidimb in Isarel avud. Mipit ya chilik chimwing yiyikwatin amwing pakach pa antu a Nzamb. Chilakej, kufungul kapamp kamwing ordinater mu ujindj mu chikumbu cha muntu amwinend kukutwish kumutwal muntu usotina kwijik ap wakad nkeu ku kutal yom yikutwisha kuyipish kom kend katok. Chikwikal cha ushon mudi ik anch mwin Kristu wawil mu pornografi ku Internet!

“Ayuk Kwau Akata Kulam Malejan Mend”

Mupak wa kumuziyil Yehova ap kulik kumuziyin ndiy mu kutond arund netu udi kwau wa muntu ni muntu ipend. (Kuv. 30:19, 20) Chawiy lel, tufanyidin kwiyipul ayinetu anch: ‘Nikwatin urund ni nany pinikata kwiswedish? Ov, yisu yijidik ni mikadil yau? Ov, akat kumwifukwil Yehova? Ov, kuta urund nau kukez kwinkasikesh chakwel nikala mwin Kristu muwamp?’

Nfund a Kuseng wawanga anch: “Ayuk kwau awanyidina mwi njil, akata kwendil mu yijil ya [ Yehova]. Ayuk kwau akata kulam malejan mend, akata kumusot ni muchim wa kabuj.” (Kus. 119:1, 2) Chakin kamu, “wayuk muntu mwawonsu ukat kumwovil [ Yehova] wom ni kwendil mu jinjil jend.” (Kus. 128:1) Pitutondina arund netu, tufanyidin kwilej kusutil kurumbuk kwa in Isarel ni kumuziyil rawonsu Yehova.—Jinsw. 13:20.

[Chipich chidia pa paj wa 26]

Kuta urund ni antu akad kumukat Yehova kukutwish kutushikij ku kwifukwil akish