Ov, Kwez Kwa Kristu—kurumburikin Ik Kudi ey?
“Chijingidij ik chikeza kulejan chisu cha kushik kwey, ni cha disudiel dia mangand?”—MAT. 24:3, Manswik Masu.
1. Ov, chipul ik cha chamwipulau Yesu kudi atwimbuy end?
PASUT kal mivu tunan twaad, atwimbuy anying a Yesu amwipula padingau ni kwambamb kuns ni Mwant wau pa mukandu wa Olivet. Amwipula anch: “Ov, chisu ik chikez kushik yom yiney ap chijingidij ik chikeza kulejan chisu cha kushik kwey, ni cha disudiel dia mangand?” (Mat. 24:3, MM) Mu chipul chinech, atwimbuy asadila mazu maad ma usey nakash, “kushik kwey” ni “disudiel dia mangand.” Ov, mazu minam misambidin ik?
2. Ov, dizu “disudiel” dirumburikin ik?
2 Chakusambish, tukushinshikinany dizu “disudiel,” dikarumwinau dizu dia Grek syn·teʹlei·a. Mu Traduction du monde nouveau, dizu dined adikarumwin chisu chawonsu anch “disudiel,” pakwez dizu dia Grek te’los diambatena nich, adikarumwin anch “nsudiel.” Kushalijan kwa kurumburik kwa mazu minam maad akutwish akufanikesh nich kulejan diskur disadilau ku Chot cha Want. Disudiel dia diskur didi chikunku cha nsudiel, mukatau mwin kulond kusutish chisu chikemp mulong wa kuyivurish in kutesh yom yisambidinau ni kulejan mutapu jinsangu jidi ja ukwash kudi awiy. Nsudiel ya diskur yiding chisu chidiokilay mwin kulond pa chimet. Chilik chimwing kwambatan nich kulond kwa Bibil, dizu “disudiel dia mangand” dirumburikin chirung chiyila djat ni kwinsudiel ya mangand.
3. Ov, yom ik yimwing yishikedina pa kushik kwa Yesu?
3 Ov, dizu “kushik” dipulau atwimbuy dirumburikin ik? Didi dikarumun dia dizu dia Grek pa·rou·siʹa.a Pa·rou·siʹa wa Kristu, ap anch kushik, kwasambisha pamudishau Yesu want mudi Mwant wa mwiur mu muvu wa 1914 ni kudandamedin djat ni chisu chikezay kuyishesh antu ayimp mu “mar mapandakena.” (Mat. 24:21) Yom yivud kushalijadina, pamwing ni “machuku ma kwisudiel” ma ditenchik dined dia yom yiyimp, kuyikumangej antu atondau, ni kusangukin kwau ku mwom wa mwiur, kusadikin pa kushik kwinoku kwa Yesu. (2 Tim. 3:1, MM; 1 Kor. 15:23; 1 Tes. 4:15-17; 2 Tes. 2:1) Chitwishikin kulond anch chirung cha “disudiel dia mangand” ma yom (syn·teʹlei·a) chambaten nich ap chiyil pamwing nich chirung chitazukinau anch kushik kwa Kristu (pa·rou·siʹa).
Chirung Chilemp
4. Kushik kwa Yesu kufaniken nchik nich yinship ya pa chirung cha Noa?
4 Mulong dizu pa·rou·siʹa disambidin chirung chilemp cha chisu chambaten nich yalonday Yesu piur pa kwez kwend. (Tang Mateu 24:37-39.) Shinshikinany anch Yesu kafanikeshap kwez kwend nich chisu chikemp cha Mabeb ma Mem pa chirung cha Noa. Pakwez, wisikeja kwez kwend nich chirung chilemp chaya djat ku Mabeb ma Mem. Pamwing nich chisu chatungay Noa wat ni cha mudimu wend wa kulejan, djat ni pa chisu chashika Mabeb ma Mem. Yinship yiney yashikena mu makum ma mivu. Chilik chimwing, mu kushik kwa Kristu mudi yinship yatwala djat ku pamwing ni mar mapandakena.—2 Tes. 1:6-9.
5. Mazu mafundau mu Kuburik shapitre wa 6 malejen nchik anch kushik kwa Yesu kudi kwa chirung chilemp?
5 Mauprofet makwau ma Bibil malejen anch kushik kwa Kristu kudi chirung chilemp ni anch kudiap ching kusu chisu chikwezay kuyishesh antu ayimp. Mukand wa Kuburik umulejen Yesu wendidin pa kabar mutok ni amwinkisha chibangul. (Tang Kuburik 6:1-8.) Kupwa kwa kumudish Want mu muvu wa 1914, Yesu amulejen mudi uyil ni “kurish ni kuyipandikan akwau usu.” Rusangu rilejen kand anch amulondwil kudi in kwendin pa atubar a ulombu kushalijan. Mauprofet minam mafanikeshin njit, kuburen kwa yakudia, ni yipupu ya mayej, yom yiney yawonsu yashikena mu chirung chilemp chijimbwilau anch “machuku ma kwisudiel.” Tumen kuwanyin kwa uprofet winou mu mwom wetu.
6. Kuburik shapitre wa 12 utukwashin kutesh ik piur pa kushik kwa Kristu?
6 Kuburik shapitre wa 12 ulejen kachom pa kachom piur pa kutenchikiu kwa Want wa mwiur wa Nzamb. Tutangin mwinimwa piur pa njit jakad kumekan ni mes. Mikayel—Yesu Kristu mu mwaz wend wa mwiur—ni angel end arishin ni Djabul ni ayilembil end. Mudi chibudikin, Satan Djabul ni yisak yend ayidjibwila pansh. Pa chinech, rusangu ritulejin anch, Djabul ujimen nakash, mulong “wij kal chakwel anch kwamushal kal chisu chikemp kusu.” (Tang Kuburik 12:7-12.) Chimeken patok anch, kudishiwu kwa Want wa Kristu mwiur akulondwil nich chisu cha “riyind” rikash pa divu ni kudi in kushakamap.
7. Kuseng wa 2 ulondilap nchik, ni wisambidin chisu ik?
7 Kuseng wa kaad wisambidin niyend mu uprofet piur pa kumudish Yesu Want pa Mukandu wa Zion. (Tang Kuseng 2:5-9; 110:1, 2.) Pakwez, kuseng winou ulejen anch kudi chisu chayinkishau antakel a pa divu, ni antu au, chakwel aziyila ku winyikel wa Kristu. Chawiy ayiyula anch “babalany” ni ayilikidila ayinau chakwel ‘iyiya’. Mwaning, pa chisu chinech “ayuk kwau awiy akat kukungamen mwi Ndiy [Nzamb]” ku kumusadil Yehova ni Mwant wend watonday. Chawiy lel, ayinkishin chisu cha kukarumuk pa kushik kwa Yesu mu usu wa want.—Kus. 2:10-12.
Kujingunin Chijingidij
8, 9. Nany ukeza kutwish Kujingunin chijingidij cha kushik kwa Kristu ni kutesh muchirumburikina?
8 Pamwipulau kudi Afarise chisu chikweza Want, Yesu wayakula anch “kiukwezap mu mutapu ukutwishau kuuman” kwambatan nich yitongijok yau. (Luka 17:20, 21, MM) Antu akad kwitiyij kakuteshap. Kakuteshap nchik? Kamwitiyap ap kumwitiyij kwin Yesu mudi Mwant wau wa kurutu. Chawiy lel, nany ukeza kutwish kwijik chijingidij cha kushik kwa Kristu ni kutesh kurumburik kwach?
9 Yesu walonda anch in kwilejend akez kuman chijingidij patok mudi mukatau kuman “mulayilay ukat kusut mwiur kudiokal mutambu umwing djat ni ku mutambu ukwau.” (Tang Luka 17:24-29, MM.) Chidi cha usey kwijik anch Mateu 24:23-27 wisambidin patok chijingidij cha kushik kwa Kristu.
Dijuku Dimena Chijingidij
10, 11. (a) Mutapu ik warumburilau bil “dijuku” disambidinau mu Mateu 24:34? (b) In kwilej a Yesu kadingap ni chinshilend piur pa nany kadiap mu “dijuku” dined?
10 Pasak, gazet winou walejana anch mu mivu chitot ya kusambish, “dijuku dined” dijimbwilau mu Mateu 24:34 dirumburikin “dijuku dia pa chirung cha Ayuda akad kwitiyij.”b kurumburil kwinoku kovikana mulong mikand yawonsu yikwau yilejen anch Yesu wasala anch dizu “dijuku” mu mutapu wa chitongijok chiyimp, ni yisu yivud Yesu wasadila dilij diyimp, mudi “muyimp” mulong wa kudirumburil dijuku. (Mat. 12:39; 17:17; Mar. 8:38) Chawiy lel, gazet winou walejana anch mu kuwanyin mu chirung chetu, Yesu wisambina piur pa “dijuku” diyimp dia antu akad kwitiyij akumana yijingidij yimekeshina “disudiel dia mangand” (syn·teʹlei·a) ni nsudiel ya ditenchik (teʹlos).
11 Chidi chakin anch pasadinay Yesu dizu “dijuku” mu uyimp, ndiy wisambidin mulong ap piur pa antu ayimp a pa chirung chend. Ov, yalonday yifundinau mu Mateu 24:34 yisambidin chakin kamu antu ayimp a pa chirung chend? Vurikany anch in kwilej anying a Yesu aya “pau ayinau” kudiay ndiy. (Mat. 24:3) Mulong Yesu kasadinap mazu mayimp payilejau piur pa “dijuku dined,” chimeken anch atwimbuy kelap kwidjidjek kutesh anch awiy ni ambay nau in kwilej ading pakach pa “dijuku” kidikezap kusut “ching yom yiney yawonsu yez yawanyin.”
12. Yidia kwiur ni kwishin yilejen ik piur pa antu adinga isambidinay Yesu pasadilay dizu “dijuku”?
12 Ov, pa dishin ik tukutwisha kushiken ku kulond mwamu? Chidi kusutil ku kushinshikin nawamp yilondinau kwiur ni kwishin. Mudi mufundilau mu Mateu 24:32, 33, Yesu walonda anch: “Ilejany malejan milikejinau nich mutond wa nfung. Anch mitiy yau yasambish kufufumwok, chad yasapuk mayij, en ukat kwijikany anch, chirung cha ruvul chidi piswimp. Chawiy chimwing kand , anch wamanany yom yiney yawonsu yikat kushik, ukez kwijikany anch, Mwan a Muntu udi piswimp, udi kamu ku chis.” (Isikej nich Marko 13:28-30; Luka 21:30-32.) Chawiy lel, mu Mateu 24:34, MM, tutangin anch: “Chakin kamu nakulejany anch: Dijuku dined kidikez kwisutilip ching yom yiney yawonsu yez yawanyin.”
13, 14. Ov, mulong tukutwish twalond anch “dijuku” disambinay Yesu difanyidin kwikal in kwilejend?
13 Yesu walonda anch in kwilej end, akuzizilau piswimp ap many ma spiritu utumbila, awiy akeza kutwish kushiken ku kutesh mwamu pakezau kuman “yom yiney yawonsu” yawanyin. Komb, Yesu wading wisambidin in kwilejend palonday kand yitutangina mu verse ulondwila anch: “Dijuku dined kidikez kwisutilip ching yom yiney yawonsu yez yawanyin.”
14 Kushalijan nau antu akad kwitiy, in kwilej a Yesu kakezap kusu kuman ching chijingidij pakwez akez kutesh kand kurumburik kwach. Akez “kwilej” kusutil ku yom ya chijingidij chinech ni “kwijik” kurumburik kway kwakin. Akez kutesh nawamp win kamu anch “ndiy udi piswimp, ku yis kwin kamu.” Ap anch chidi chakin anch Ayuda akad kwitiyij ni in Kristu azizidilau many ashinshamena amana mu wiswimp kuwanyin kwa mazu ma Yesu mu mivu chitot ya kusambish, ching kusu in kwilejend azizidilau many awiy ilejina kusutil ku yinship yiniya—awiy kusu akutesha kurumburik kwakin kwa yom yamanau.
15. (a) Anany asadila “dijuku” dia katat disambinay Yesu? (b) Ov, mulong wak tutwishinap kupampish kulep kwakin kwa “dijuku dined”? (Tal mushet udia pa paj wa 25.)
15 Antu akad chovu cha uyakin wa Nzamb nlel unou iyovil anch kwikil chom chimekeshina ‘patok kwez’ kwa Want kwambatan nich chijingidij cha kushik kwa Yesu. Atongin anch yom yawonsu yidandamedin mudi muyadinga pasak. (2 Pita 3:4) Ku mutambu ukwau, akadivar azizidilau many a Kristu, chisak cha Yohan cha katat, chajingunina chijingidij chinech mudi mulayilay ni atesha kal kurumburik kwakin. Mudi chisak, azizidilau many inay adi “dijuku” dia katat dia pa chirung chinech kichikezap kusut “ching yom yiney yawonsu yez yawanyin.”c Chinech chirumburikin anch kukez kwikal akadivar a Kristu azizidilau many amwing pa divu chisu chikeza kusambish mar mapandakena mabwakau.
“Chishany ku Mes”
16. Ov, yik yifanyidinau kusal in kwilej a Kristu awonsu?
16 Kudi yom yivud yiswirikena kusal, pa ndond pa kujingunin kwau ching chijingidij kusu. Yesu walonda anch: “Yom yinikulejinanya en niyilejen kand kudi antu awonsu anch: ‘Chishany ku mes!’” (Mar. 13:37, MM) Chidi cha usey nakash kudi etu awonsu nlel unou twikalap azizidilau many ap a mu chisak chijim. Pasutin mivu makum chidivu kudiosh pamudishau Yesu Want mwiur mu muvu wa 1914. Ap anch chikutwish kukasikan, tufanyidin kwikal tayad ni kuchish ku mes. Kutesh anch Yesu udiaku pakad kumekan ni mes mu uyaj wa Want kutukwashin kucha ku mes. Chitubabeshin kand anch piswimp ap ndiy ukwez ayishesha akankuny nend ‘pa muten wakad etu kutongin.’—Luka 12:40.
17. Ov, chovu chinech chifanyidin kutwovish nchik, ni mupak ik tufanyidina kukwat chakwel tuchisala?
17 Chovu chetu piur pa kurumburik kwa kushik kwa Kristu kutukwashin tukasikesha nakash yovil yetu ya kuswapej. Twij anch Yesu washika kal ni wasambishin kal kuyikel mudi Mwant pakad kumekan kudiosh mu muvu wa 1914. Piswimp ap ukez kuyishesh antu ayimp ni kuswimp yom yawonsu pa divu dia kabuj. Tufanyidin kukwat mupak ukash wa kwipan nakash mu mudimu wisambinay Yesu palonday anch: “Katumb kawamp ka want akez kukalejan ku mangand mawonsu, kakez kikal uman kudi michid yawonsu; chawiy lel disudiel [te’los] chidikweza.”—Mat. 24:14.
[Mazu madia kwishin kwa paj]
a Kurumburik kwa pa·rou·siʹa kumeken kusutil ku kushalijan kudia pakach pa “kwikalaku” ni “kuburen kwikalaku” kwa kambuy Paul kulejenau mu 2 Korint 10:10, 11 ni mu Filip 2:12. Mulong wa kutan minsamb yivud, tal Étude perspicace des Écritures, Volim 2, paj 648-651.
b Tal Chinong cha Kalam, cha Kalang 1, 1995, paj wa 12-15, 19, 30, 31 (Français).
c Dijuku dimeken mudi disotil kuwanyish chishimushimu cha kusambish chidia mu buku wa Kuburik. (Kubur. 1:10–3:22) Dichuku dia Mwant disambishidin mu muvu wa 1914 diyil kushik ni pa kufilau azizidilau many ashinshamen ansudiel ni pakuvumbukau.—Tal Révélation : le grand dénouement est proche ! paj wa 24, paragraf wa 4.
Ov, Mutapu ik Ukwakula?
• Mutapu ik twija anch kushik kwa Yesu kudi chirung chilemp?
• Nany ujingunina chijingidij cha kwez kwa Yesu ni uteshin kurumburik kwach?
• Anany asadila dijiku dia katat dijimbwilau mu Mateu 24:34?
• Mulong wak tukangenya kupampish kulep kwa “dijuku dined”?
[Kamushet kadia pa paj wa 25]
Ov, tukutwish twapampish kulep kwa “Dijuku Dined”?
Dizu “dijuku” yisu yivud disambidining antu a mivu kushalijan ashichinga pa chirung kanang ap pa chinship kanang. Chilakej, Kubudik 1:6 kutulejin anch: “Chawiy Josef wafa, ni anamakwend awonsu, ni [dichuku diend diawonsu].” Josef ni anamakwend ashalijana mivu, pakwez amana yom ya mutapu umwing yayishikena pa chirung chimwing. Mu “dijuku dined” mwadinga anamakwend a Josef amwing avadika kurutu kwend. Amwing pa antu inay ashakama mivu yivud kwinyim kwa Josef kufa. (Dis. 50:24) Akwau a mu “dijuku dined,” mudi Benjamin, adinga anikanch kudiay Josef ni ashakama aom kwinyim kwa kufa kwend.
Chawiy lel, anch dizu “dijuku” adisadidil mulong wa kwisambin piur pa antu ashicha pa chirung kanang, chawiy kulep kwach kwin kamu kutwishikiningap kwijikan ching kusu anch chasul ni kichifanyidinap kuya kulemp kand nakash. Chawiy lel, ku kusadil dizu “dijuku dined,” mudi mudifundilau mu Mateu 24:34, Yesu kayinkishap in kwilejend mutapu wa kupampish ukuyitwishisha kwijik pimakeza kupwa “machuku mansudiel.” Pakwez, Yesu wakasikeshina anch kakezap kwijik “dichuku dinidia ni chisu.”—2 Tim. 3:1; Mat. 24:36.
[Chipich chidia pa paj wa 22, 23]
Kupwa kwa kumudish Want mu muvu wa 1914, Yesu amumekeshin mudi mwin “kurish”
[Chipich chidia pa paj wa 24]
“Dijuku dined kidikez kwisutilip ching yom yiney yawonsu yez yawanyin”