Mwilikejany Mishoner Mujim

“Ngilakejany am mudi niyam munikata kumwilakej Kristu.”—1 KOR. 11:1, Manswik Masu.

1. Mulong wak tufanyidin kumwilakej Kristu?

KAMBUY PAUL wamwilakeja Mishoner mujim, Yesu Kristu. Paul niyend wayikasikesha ambay nend in Kristu anch: “Ngilakejany am mudi niyam munikata kumwilakej Kristu.” (1 Kor. 11:1, MM) Kupwa kwa Yesu kuyinkish atwimbuy end chilakej cha kwikepish payowishay mend yau, wayileja anch: “Nakwinkishany kal chilik chakwel niyen ukez kusalany mudi munakusalanya kal en.” (Yoh. 13:12-15, MM) Chitudia in Kristu a pa chirung chinech, tukwet chisend cha kumwimburij Yesu Kristu mu mazu ni mu yisal ni mu ngikadil tumekeshina.—1 Pita 2:21.

2. Ap anch kandikal akutondap kudi Chisak Chitakedila wikala mishoner, ufanyidin wikal ni muchim wa mutapu ik?

² Mu mutu wa mulong wasutina, twilejin anch mishoner udi muntu utuminingau mudi mwin kulejan—muntu uyilejina antu akwau rusangu ruwamp. Pa chinech, Paul wipula yipul yimwing yiwamp. (Tang Rome 10:11-15.) Shinshikinany anch kambuy wipula anch: “Akutesh nchik wakad mulej?” Chad, wajimbula mazu madia mu uprofet wa Isay anch: “Chidi chom chiwamp nakash kumuman muruu ukat kwez, . . . uletil rusangu ruwamp.” (Is. 52:7) Ap anch kandikal akutondap ni akutumap mudi mishoner mu teritwar wa wingendj, ukutwish kwikal nich muchim wa kulejan, ni kumwilakej Yesu mudi mwin kulejan wa mushiku wa rusangu ruwamp. Mu muvu wasutina ou, in kulejan a Want 6957852 ‘asadil mudimu wa kulejan’ mu jingand 236.—2 Tim. 4:5.

“Etu Twashil Kal Yawonsu, Twakulondul ey”

3, 4. Yom ik yashay Yesu mwiur, ni chom ik tufanyidina kusal chakwel twikal in kwilejend?

³ Chakwel awanyish mudimu wend wamwinkishau pa divu, Yesu “wilika amwinend, watambula chifu cha kashalapol,” walika mwom wend ni ntumb yend yadingay nich mwiur. (Filp. 2:7) Chawonsu tukusala mulong wa kumwilakej Kristu, kwikil chikutwishap kwisikan nich yasalay Yesu pezay pansh. Pakwez tukutwish twajijamen dang mudi in kwilejend, pakad kunenganan mu yom yitwadinga nich kwinyim mu mangand ma Satan.—1 Yoh. 5:19.

⁴ Dichuku dimwing, kambuy Pita wamwela Yesu anch: “Tal kwa, etu twashil kal yom yawonsu, twakulondula ey.” (Mat. 19:27, MM) Pita, Andre, Yakob, ni Yohan asha swa mand mau payitazukau kudi Yesu amulondul. Alika mudimu wa kuta ansh ni asala mudimu wa kulejan wikal mudimu wau wa kusambish. Kukwatijan nich Rusangu ruwamp rafunday Luka, Pita walonda anch : “Tal, etu twashil kal kwol kwetu twakulondul ey.” (Luka 18:28) Avud pakach petu kashap “yom” yawonsu chakwel amulondula Yesu. Pakwez, ‘twituna ayinetu’ chakwel twikala in kwilej a Kristu ni atushalapol akashinsh a Yehova. (Mat. 16:24) Mashakamin mudi minam maleta yiyukish yivud nakash. (Tang Mateu 19:29.) Kwikal ni muchim wa kulejan nich mushiku ni kumwilakej Kristu kukat kusangaresh muchim wetu, nakash-nakash anch twamukwasha ap pakemp kusu muntu kanang amushejina Nzamb piswimp ni Mwanend mukatish.

5. Rumburil chom chasadika chimekeshina mupak wakwatay muntu umwing wadinga mwi ngand ya wingendj kupwa kwa kwilej uyakin wa Bibil.

⁵ Valmir, ikundj umwing wa mu Brezil ushicha mu Suriname, wasalanga mu mwingoch wa or. Wadinga china maar ni chitet a ikundj. Dichuku dimwing pezay mu musumb, Atuman a Yehova asambisha kwilej nend Bibil. Wileja dichuku ni dichuku, wakarumuka nakash, ni kupwa watambula dibabatish. Pamanay anch mudimu wend wamukangesha ashakam kulondulijan nich malejan ma Bibil, walandisha yom yend ya kwisakin nich ni wachirika ku Brezil chakwel akayikwasha anamakwend kutan mapit ma muspiritu. Kupwa kwa kwilej uyakin wa Bibil, antu avud ashicha mu jingand ja wingendj alikining cha kwisotil midimu yau mu jingand ja mapit ni achirikining kwol kwau nich rutong ra kuyikwash anamakwau ni akwau amushejina Yehova piswimp. Atutwambil inay a Want amekeshin muchim wa kashinsh wa kulejan.

6. Chom ik tukutwisha kusal anch tutwishinap kuya kwi ndond kuswiridinau nakash in kulejan a Want?

⁶ Atuman avud atwisha kuya kwi ndond kwadinga kuswir kujim kwa in kulejan a Want. Amwing aya mwi ngand yikwau mulong wa kulejan. Kitukutwishap etu awonsu kushemunik kwindjing mutapu winou, pakwez tukutwish kumwilakej Yesu kusutil ku kwipan kwetu mu mudimu wa kulejan.

Yehova Uletin Kufumb Kuswiridikina

7. Mashikol ik madiaku mulong wa kuyifumb antu asotina kuwapish ukaliweny wau mudi atutwambil a Want?

⁷ Mudi kamu mwamufumbau Yesu kudi Tatukwend, tukutwish kwitapil dilau dia diyiy dipaninay Yehova katat. Yesu amwinend walonda anch: “Achifundil kal mu aprofet anch, Awonsu akez kayilej kudi Nzamb.” (Yoh. 6:45; Is. 54:13) Nlel kudi mashikol ma pakampwil masadilau mulong wa kutuwanyish mudi atutwambil a Want. Pakad kwidjidjek, etwawonsu twatambwil kal ukwash mu jinjil kanang udiokila ku Shikol ya Mudimu wa Teokras mu yikumangen ya pol petu. Ayibol itapidil dilau dia kukumangan ku Shikol ya Mudimu wa Uchibol. Ayibol avud asala kal mivu yivud asangera kwilej shikol yiney kapamp ka kaad. Amakurump ni ankwasha a mudimu ileja Shikol ya Mudimu wa Want chakwel kuwapish ukaliweny wau wa kulejan ni mudimu uyisadidilau ambay nau akaritiy. Amakurump ni ankwash a mudimu avud ajich ayifumba ku Shikol ya Diyiy dia Mudimu, yiyiwanyishina chakwel ayikwasha antu akwau mu mudimu wa kulejan. Ni akadivar ni anambaz avud atumau mu mudimu wa umishoner mu jingand ja wingendj ayifumba bil ku Shikol ya Bibil ya Gilead.

8. Akadivar amwing akwatin nich usey ik diyiy dia Yehova?

⁸ Atuma a Yehova avud asala yitenchik yivud mulong wa kwilej mashikol minam. Chakwel kwilej ku Shikol ya Diyiy dia Mudimu mu Canada, Yugu walika mudimu wend wa ku mujimbu mulong mukurump wa mudimu walika kumwinkish konje. Yugu walonda anch: “Kinovap runeng. Pa chinech, anch nitapila dilau diau dia kwinginkish konje wa pakampwil, ela kwinchingejin chakwel nimekesha kushinshaman mu kushal mu mudimu rawonsu. Pakwez katat nidi tayad mulong wa kusal mudimu win wawonsu wingikishinay Yehova.” Chakwel kwisakin ukwash wa diyiy dia Nzamb, antu avud alika kal yom yadinga yimenau pakusambish ya usey ujim.—Luka 5:28.

9. Let chilakej chimekeshina chibudikin cha malejan ma Bibil ni cha usu ukash.

⁹ Malejan ma Bibil ni usu ukash yikutwish kuyikwash antu kuya kurutu. (2 Tim. 3:16, 17) Tushinshikinany yamushikena Saulo mu Guatemala. Wavadika ni mayej ma manangu, ni umwing wa alej end wamuleja makwend anch kafanyidinap kumushindil mwanend ileja kutang, anch mulong chikutwish kusu kumwovish ujim. Saulo wadiokala ku shikol pakad kwijik kutang. Kupwa, Kaman umwing wamuleja Saulo kutang, wasadila broshir Iyijidisha Kutang ni Kufund. Kwisudiel, Saulo waya kurutu ni washikena mu chilik cha kusal yikunku ya ku Shikol ya Mudimu wa Uteokras. Makwend a Saulo mu kusut kwa machuku wamusankana mulej wend mu mudimu wend wa kulejan ku chikumbu ni chikumbu. Pateshay anch Saulo wijikin kal kutang, muleja wamwita chakwel eza nend kwol kwend rubing rambakenap. Payay Saulo kwa mulej rubing rambakenap, mulej wamwipul Saulo anch, “Yom ik usotina kwinlej?” Saulo wasambisha kutang paragraf umwing mu buku Chom ik Chakin Kamu Chifundishinay Bibil? Mulej walonda anch: “Nikutwishap nitiyij anch winlejin katat.” Wasukumuna mansoj mu mes, wamubwikata Saulo.

Malejan Mashikina ku Muchim

10. Chom ik cha mudimu chiwamp chidiaku chitukutwisha kusadil mulong wa kulejan uyakin wa Bibil?

¹⁰ Yesu washatina malejan mend pa yom yamulejau kudi Yehova amwinend ni pa yany yidia mu Dizu dia Nzamb difundinau. (Luka 4:16-21; Yoh. 8:28) Tukumwilakejin Yesu ku kusadil chiyul chend ni ku kulam malejan madia mu Bibil. Chawiy lel anch etwawonsu twalond ni kutong mu kwovijan nich, chom chinech chikutukwash twikala mu uumwing. (1 Kor. 1:10) Tujikitishin mudi ik anch “kashalapol ushishamena ni kubabal” upalangeshin mikand yengamidina pa Bibil chakwel kutukwash tulama uumwing mu malejan metu ni tuwanyisha mudimu wetu wa kulejan! (Mat. 24:45; 28:19, 20) Umwing wa mikand yiney udi buku Chifundishinay Bibil, udiaku nlel mu jindim 179.

11. Mutapu ik wapandakanay nambaz umwing rupompat nich kusadil buku Chifundishinay Bibil?

¹¹ Kwilej Bibil nich kusadil buku Chifundishinay Bibil kukutwish ap kukarumun michim ya akankuny. Dichuku dimwing Lula, nambaz chibol wa mu Éthiopie, wadinga utakedil dilejan dia Bibil pezay kapamp kamwing mband umwing mwanamakwend a mwin kwilej walonda anch kaswiridinap dilejan dined. Nich kushimpish Lula watongijokina nend pamwing, wasadila chilikej cha nfalang ja makasu chidia mu shapitre wa 15 wa buku Chifundishinay Bibil. Mband winou witudisha ni wayilika chakwel apwisha kwilej. Pa chinech, wikalaku pa dilejan diambakenap ni wita dilejan dia Bibil, wasota asambisha kufut nfalang mulong wa kwilej! Wasambisha kwilej tupamp tusatu pa rubing ni waya nawamp kurutu mu spiritu.

12. Let chilikej chilejena mutapu ukutwishau ansand kulejan uyakin wa Bibil.

¹² Ansand akutwish kuyikwash akwau nich kusadil buku Chifundishinay Bibil. Keanu wa mu Hawaii pawanyishay mivu 11, wadinga ni kutang buku winou ku shikol, umwing wa arund nend a shikol wamwipula anch: “Mulong wak ukatanyap kusal misambu ya machuku majim?” Keanu wamutangin kamu chakul mu wenjil mu mutu wa mulong “Ov tufanyidin Kusal Misambu ya Machuku Majim?” Kupwa wakarumukina ku tablo wa yidiamu mu buku ni wamwipula nsand mutu wa mulong ik umusangareshina nakash. Asambisha dilejan dia Bibil. Mu muvu wa mudimu wasutina ou, Atuman a Yehova atakela malejan ma Bibil 6561426, avud au asadina nawamp buku Chifundishinay Bibil. Ov, ukat kumusadil buku winou mu malejan ma Bibil?

13. Kwilej Bibil kuding nich usu ukash pad antu mu mitapu ik?

¹³ Kwilej Bibil nich kusadil buku Chifundishinay Bibil kukutwish kwikal nich usu ukash padi antu aswiridina kusal rusot ra Nzamb. Ambay a uruw amwing a mu Norvège asambisha kwilej Bibil pamwing ni dijuku dimwing diadiokala ku Zambie. Ambay a uruw inay in Zambie adinga ni an amband asatu ni kasotap kand kuval mwan mukwau. Chawiy lel pimishay mband, akwata chiyul cha kudiosh madikaj. Machuku makemp kurutu aya akamanijan ni dokter, ileja shapitre ukweta mutu wa mulong “Ikal Nich Chitongijok cha Nzamb Piur pa Mwom.” Chipich cha mwan uchidia mwivum chidia mu shapitre winou chayishika ku muchim nakash pa chinech akwata kand mupak wa kulik kudiosh madikaj. Adandamena kuya kurutu muspiritu ni amupila mwanau wavadika dijin dia nfumwend a Kaman wadia ni kwilej nau Bibil.

14. Rumburil mutapu kukutwish kwikal nich yibudikin yiwamp kushakam kwambatan nich yom tulejena.

¹⁴ Mulad umwing wa usey wa mutapu wa kulejan wa Yesu wadinga anch, ndiy washakama kwambatan nich yadingay ni kulejan. Antu avud ashikedin kal ku kusanger yaku yiwamp ya Atuman a Yehova, amwilakejina Yesu mwi njil yiney. Mwij umwing wapuchola chis cha motak wa ngend a mushing umwing wa mu Nouvelle-Zélande ni wamwiya kamushet kend ka kulamin mapaper. Wayijikisha ampurish, awiy amwakula anch: “Ukutwish kukaman ni kuman yom yidiamu ching anch akaman kudi umwing wa Atuman a Yehova.” Mband umwing Kaman wadinga ni kupan majurnal wakatana. Pijikay anch akatan kal, weza ku chikumbu cha nambaz. Wasangara pa kuman anch mukand wadinga wa usey nakash kudi ndiy wadingamu. Nambaz wamuleja anch: “chading kusu chiwamp anch nichirish kamushet ni yom yidiamu, cha pakampwil mulong nidi umwing wa Atuman a Yehova.” Ngend a mushing washimoka, mulong wavurika yom yamulejau pamanch dichuku dinidia kamu kudiau ampurish. Chakin kamu, in Kristu akashinsh akat kushakamang kwambatan nich malejan madia mu Bibil ni mu kumwilakej Yesu.—Heb. 13:18.

Ilakejany Manangu ma Yesu Pantaliken ni Antu

15, 16. Mutapu ik tukutwisha kuyipwitin antu ku rusangu ritulejena?

¹⁵ Manangu ma Yesu pantaliken ni antu mayipwitina ku rusangu rend. Chilikej, rukat rend ni kwikepish yayipwitina piswimp antu in kwikepish mu michim. Wayanakena antu ezanga kudi ndiy ni wayongoja nich mazu mawamp, ni wayoka avud ku mujimbu. (Tang Marko 2:1-5.) Kitukutwishap kusal yilay, pakwez tukutwish kumekesh rukat, kwikepish, ni ranaken—ngikadil yikutwisha kuyipwitin antu ku uyakin.

¹⁶ Ranaken ramukwasha Tariua chibol wa pa kampwil padingay ni kulejan ku chikumbu cha ikundj umwing ipal utazukinau anch Beere, ushicha mu dimwing dia ditung diyikedila dia Kiribati Kurul kwa Pacifique. Ap anch ikundj walonda anch kasotinap kutesh, Tariua wajingunina anch wading nich kalip ni wamwanakena. Wamwipula anch “Wateshap kal yom yikaninay Nzamb mulong wa ayej ni amapal?” Kupwa wamutangina mufund udia mu uprofet wa Isay. (Tang Isay 35:5, 6.) Chasangeray, muntu winou walonda anch: “Natangin kal Bibil mivu yivud ni angendidil kal kudi amishoner a mu difukwil diam mu mivu yivud, pakwez kandikal nimanap chinech mu Bibil.” Wasambisha kwilej Bibil ni waya kurutu muspiritu mu mutapu uwamp. Mwawiy, wading nich ulim ukash, pakwez katat amubabatishin kal, ukat kutakel chirund chidia kwa achinach, ni utwishin kwend ndond jawonsu pa ditung mu kulejan rusang ruwamp.

Dandamenany Kumwilakej Kristu

17, 18. (a) Mutapu ik ukutwisha kwikal mwin kulejan chifuvu? (b) Yom ik yiyitekidinau antu akwatina mudimu wau nich usey nakash?

¹⁷ Yom yisangareshina yimekena tupamp tuvud mu mudimu yimekeshin anch, tukutwish kwikal in kulejan ayifuvu anch twakudish ni kumekesh ngikadil yamekeshay Yesu. Chidi chifanyidina mud ik anch tumwimburij Kristu mudi in kulejan akweta mushiku!

¹⁸ Pikalau antu amwing in kwilej a Yesu mu chitot cha kusambish cha mivu, Pita wipula anch: “Ov, yom ik yitukeza kwikal nich?” Yesu wakula anch: “muntu mwawonsu washila kal yikumbu yend, ap anamakwend amakundj ni amband, ap tatukwend, ap makwend, ap anend, ap yir yend, mulong wa kwingambat am, ukez kutambul yom yiney kupandakan tupamp chitot. Ukez kutambul kand mwom wa chikupu.” (Mat. 19:27-29) Mazu minam makwikal ma kashinsh kudi etu anch twadandamen kumwilakej Yesu Kristu Mishoner Mujim.

Ov, Mutapu ik Ukwakula?

• Mutapu ik ukatau kutufumb kudi Yehova chakwel twikal in kulejan?

• Mulong wak buku Chifundishinay Bibil ukwet yibudikin yiwamp mu mudimu wetu?

• Mutapu ik tukutwisha kwilakej manangu ma Yesu pantaliken ni antu?

[Chipich chidia pa paj wa 17]

Yesu payitazukay Pita, Andre, Yakob, ni Yohan chakwel amulondul, awiy itiya kapamp kamwing pakad kulabijok

[Chipich chidia pa paj wa 19]

Mikand mudi buku “Chifundishinay Bibil” yitukwashin kulam uumwing wa malejan metu