Yesu Kristu —Mishoner Mujim

“Am [nidiokila] kudiay ndiy, ndiy wantuma am.”—YOH. 7:29.

1, 2. Mishoner udi nany, ni nany ukutwishau kutazuk anch Mishoner mujim?

UVURIKINING chom ik anch watesh dizu “mishoner”? Antu amwing ayivurikining amishoner a Kristendom, avud au iyandjikining mu milong ya chipolitik ni mu ya nfalang mu jingand musadidinau. Pakwez, chiudia umwing wa Atuman a Yehova, uyivurikin kamu amishoner atumau kudi Chisak Chitakedila chakwel akalejana rusangu ruwamp mu jingand kushalijan pa divu. (Mat. 24:14) Amishoner inay asadidil pakad choy chisu chau ni usu wau mu mudimu wa usey wa kuyikwash antu amushejin Yehova Nzamb ni ata nend urund wa pakampwil.—Yak. 4:8.

² Dizu “mishoner” ni “amishoner” kimadiap mu maverse ma Les Saintes Écritures — Traduction du monde nouveau. Pakwez, mu mazu mend ma kwishin kwa paj pa Efes 4:11, Bibil ukweta referans ulondil anch dizu dia Grek diakarumunau anch “in kurumburil rusangu ruwamp” akutwish kand kudikarumun anch “mishoner.” Yehova udi Mwin Kurumburil mujim Rusangu Ruwamp, pakwez chitwishikinap kumutazuk anch Mishoner mujim nakash, mulong kwikil muntu wamutuma. Chawiy lel, Yesu Kristu walonda piur pa Tatukwend wa mwiur anch: “Am [nidiokil] kudiay ndiy, ndiy wantuma am.” (Yoh. 7:29) Payimekeshinay antu rukat rend rijim, Yehova wamutuma Mwanend kapokal pa divu. (Yoh. 3:16) Chawiy chitwishikina kumutazuk Yesu anch Mishoner mujim nakash, Mishoner upandikena kuwap, dimwing dia mayingishin mamutuminau pa divu didi “kumekesh uman wa uyakin.” (Yoh. 18:37) Ndiy wapandakana nakash mu kulejan rusangu ruwamp ra Want, ni yiyukish ya mudimu wend yichidandamedin kutukwash niyetu. Chilakej, tukutwish twasadil nkeu ja kulejan nich mu mujikit wetu, twikala amishoner ap bwat.

3. Ov, yom ik tukushinshikina?

³ Mudimu wa Yesu mudi katwambil wa Want ulangwishin yipul mudi yiney: Chom ik chamushikena Yesu padingay pa divu? Mulong wak malejan mend madinga nich yibudikin yiwamp? Chom ik chasala anch mudimu wend wikala usongina nakash?

Yesu Waswiridina Spiritu wa Kwipan mu Ngikadil Yisu

4-6. Ov, yom ik yimwing yaswimpa mu mwom wa Yesu pamutumay pa divu?

⁴ Amishoner a katat ni in Kristu amwing ayil kwi ndond kudia kuswir kukash kwa atutwambil a Want afanyidina kwiyijidish mikadil ya mashakamin madia mwishin mwa mashakamin madingau nich kol kwau. Pakwez tukutwishap kutongin kushalijan kudia pakach pa mikadil yadingay nich Yesu pansh ni yadingay nich mwiur, mwadingay ni Tatukwend pakach pa angel adinga amusadidila Yehova nich michim yitok. (Yob 38:7) Kwading mudi ik kushakam mukach mwa antu akayitil mu mangand mijondila! (Mar. 7:20-23) Yesu warisha nich kupwitijan kwadinga pakach pa in kwilejend a piswimp. (Luka 20:46; 22:24) Chakin kamu, warisha mu mutapu uwanyidina nich yom yawonsu yamushikena pa divu.

⁵ Yesu kasambishap kulond rudim ra antu mu chilay; pakwez wasambish bil kwilej mudi mwanikanch. Chadinga chishalijadina mud ik kudiokal ku kuyitakel angel mwiur! Padingay pa divu, chimeken anch Yesu wasadila rudim rumwing kusu ra “jindim ja antu.” Rading rishalijadin kulemp nich ‘jindim ja angel.’ (1 Kor. 13:1) Pakwez, pasambishay kulond mazu ma ranaken, kwikil muntu ap umwing walondap kal mudi Yesu.—Luka 4:22.

⁶ Tushinshikinany kand mu jinjil jikwau muyaswimpa yom nakash ku mutambu wa Mwan a Nzamb pezay pa divu. Ap anch Yesu kaswanap chitil cha Adam, Ndiy wikala muntu, mudi in eza kwikal “anamakwend,” ap anch in kwilej azizidilau many. (Tang Hebreu 2:17, 18.) Pa uchuku wa nsudiel wa mwom wend pa divu, Yesu kamwitap tatukwend amutumina ‘yisak dikum ni yaad ya angel.’ Pakwez watongina piur pa angel adingay ni kutakel mudi Mikayel Mukurump wa angel! (Mat. 26:53; Yuda 9) Mwaning, Yesu wasala yilay; pakwez, yasalay padingay pa divu yidi yikemp kwilikej nich yikezay kusal pakwikalay mwiur.

7. Ov, mutapu ik Ayuda asala kulemp nakash nich yadinga yitina Chijil?

⁷ Mudi “Dizu” mu kwikalaku kwend kurutu ikala muntu, Yesu wading Muruu wa Nzamb wayitakela in Isarel mwi mpay. (Yoh. 1:1; Kub. 23:20-23) Pakwez, awiy ‘atambula yijil yayinkishau kusutil kudi angel, pakwez alika kuyisadil.’ (Mid. 7:53; Heb. 2:2, 3) Chakin kamu, antakel a relijon wa Ayuda akanganya kujingunin kurumburik kwakin kwa chijil. Chilakej, tushinshikinany chijil cha Sabat. (Tang Marko 3:4-6.) In kufund ni Afarise alika kusal “yom yijim yifanyidina kupan mudi mudia chijil: kutentam, riy, ni ritiy.” (Mat. 23:23) Chikalap nchik mwamu, Yesu kalikap kuyikwash ap kulejan uyakin.

8. Mulong wak Yesu ndiy ukutwisha kutukwash?

⁸ Yesu wadinga ni spiritu wa kwisotil. Kuyikat antu kwamubachika ni wasota nakash kuyikwash. Kandikal ashadishap spiritu wa kulejan. Ni mulong wa kushinshaman kwend kudi Yehova padingay pa divu, Yesu “wikala mwin kupan dipandish dia chikupu kudi awonsu akumuziyila ndiy.” Chikwau kand, “amwinend wamana mar mu yoziu, ndiy ukutwish kuyikwash [mudi etu] ozilau.”—Heb. 2:18; 5:8, 9.

Mulej Wayiyau Nawamp

9, 10. Ov, diyiy dia mutapu ik diatambulay Yesu kurutu amutuma pa divu?

⁹ Ilel, kurutu kwa kuyitum in Kristu mudi amishoner, Chisak Chitakedila chitenchikining anch ayiyiya bil. Ov, Yesu Kristu amuyiya? Inge, pakwez ndiy kilejap ku shikol ya in rabi kurutu kwa kumuzizin many mudi Mesia; ni kamulejap kudi antakel a katumb a relijon. (Yoh. 7:15; isikej nich Mid. 22:3.) Ov, mutapu ik lel washikenay Yesu kukwikal mulej chifuvu?

¹⁰ Chikalap nchik yamulejau Yesu kudi makwend, Mariy, ni tatukwend nlij, Yosef, ndiy amuyiya mulong wa kulejan kudi Musul wa piur nakash. Pa chinech, Yesu walonda anch: “Mulong kinilondilip yidiokila kudi amwinam; pakwez ching ya Tatuku wantuma, ndiy wanginkisha kal am chijidik cha kulond ni cha kulejan.” (Yoh. 12:49) Shinshikin anch amwinkishin Mwan yany pa kachom ni kachom ka kulejan. Kurutu kwa kwez pa divu, pakad kwidjidjek Yesu wasutisha yisu yivud mu kutesh yany ya Tukwend. Diyiy dipandakenamu kuwamp mudi ik diatambulay?

11. Mu chilik ik chamekeshay Yesu mwikadil wa Tatukwend pantaliken nau antu?

¹¹ Kudiosh pa chisu chamutangau, Mwan wading ni urund wa piswimp ni Tatukwend. Mu kwikalaku kwend kurutu ikala muntu, Yesu wijika mwikadil wa Nzamb pantaliken nau antu kusutil ku kutal mutapu wadingay Yehova ni kuyisadil. Mwan wamekesha rukat ra Nzamb pantaliken nau antu mu chilik chijim chakwel anch mudi manangu mafanikeshinau ni muntu ndiy walonda anch: “nasanger kand mu antu.”—Jinsw. 8:22, 31.

12, 13. (a) Mutapu ik Yesu wileja kusutil ku kuman yisal ya Tatukwend pantaliken nau in Isarel? (b) Mutapu ik wasadilay Yesu diyiy diatambulay?

¹² Mu diyiy diatambulay Mwan mudi kand kulondul yasalay Tatukwend mu mikadil ya mar. Chilakej, shinshikin yasalay Yehova pantaliken nau in Isarel antombuj. Nehemi 9:28 ulondil anch: “Chikalau mu chisambu, chad awiy ading ni kusaliril kand kuyip ku mes kwey [Yehova], niyey wading ni kuyishidin mu makas ma akankuny nau adinga ni kuyiyikel. Awiy ading ni kukudidil kand ey, niyey wading ni kuyiteshil mwiur. Ey wading ni kuyikamunin tupamp tuvud, mulong wa riy rey rijim!” Pasalay pamwing ni kumushinshikin Yehova, Yesu wakudisha riy ra chilik chimwing pantaliken ni antu a mu teritwar wend.—Yoh. 5:19.

¹³ Yesu wasadila diyiy dined payisadilay nich riy in kwilejend. Pa uchuku wa kurutu kwa rufu rend, atwimbuy end awonsu akatay nakash “amuchina, aya mau.” (Mat. 26:56, MM; Yoh. 13:1) Ap kambuy Pita wamwituna Kristu tupamp tusatu! Chikalap nchik mwamu, Yesu wa yifungwila atwimbuy end njil chakwel amuchirikidina. Ndiy wa muleja Pita anch: “Am nalembilang mulong weyey, chakwel kangal ritiy rey rikanganya; ni yey sal mwamu, piukukarumuka kand kapamp kakwau: kasikesh michim ya anamakwey.” (Luka 22:32) Isarel wa muspiritu amutungidin pa “apostol ni aprofet,” ni mayal ma mufulandal wa rubumbu ra Yerusalem musu padi majin ma atwimbuy 12 ashinshamena a mwan a mukoku, Yesu Kristu. Ilel unou, in Kristu azizidilau many pamwing ni arund nau ipanina, a “amikoku akwau,” ayil kurutu mudi dirijek dia atutwambil a Want mu chikas cha dikand cha Nzamb ni umutakel wa Mwanend mukatish.—Efes. 2:20; Yoh. 10:16; Kubur. 21:14.

Mutapu Yesu Walejana

14, 15. Malejan ma Yesu mashalijana nchik nich ma in kufund ni Afarise?

¹⁴ Mutapu ik wasadilay Yesu diyiy diend mulong wa kuyilej in kwilejend? Anch twisikej malejan ma Yesu nich ma antakel a relijon, tukuman patok anch mutapu wa kulejan kwa Yesu wading wa piur. In kufund ni Afarise ‘ashesha dizu dia Nzamb mulong wa yishankur yau.’ Pakwez, yalonday Yesu yadingap ya amwinend; yimedina pa dizu dia Nzamb, ap uruu. (Mat. 15:6; Yoh. 14:10) Mwamu tufanyidin kusal niyetu.

¹⁵ Kudi chom chikwau chamusala Yesu ashalijana nakash ni antakel a chirelijon. Piur pa in kufund ni Afarise, ndiy walonda anch: “Yom yawonsu yikunilejau kusal, salany kwen ni kuziyil; pakwez kangal ulondulany kusal midimu yau, mulong awiy akat kulond kusu, kusal bwat.” (Mat. 23:3) Yesu wasadila yom yalejanay. El tushinshikinany amboku chilakej chimekeshina uyakin wa mazu minam.

16. Mulong wak ulondina anch Yesu washakama kwambatan nich mazu mend mafundau mu Mateu 6:19-21?

¹⁶ Yesu wayikasikesha in kwilejend anch “jindjikany yipau . . . mwuir.” (Tang Mateu 6:19-21.) Ov, Yesu amwinend walondula chiyul chinech? Mwaning, mulong wilondila nich kashinsh anch: “Amiyeu akwet mabuku, ni atujil a mwiur akwet yiswal; pakwez Mwan a muntu kakwetip pa kuladik mutu wend.” (Luka 9:58) Yesu wading ni mwikadil wa mwom upipela. Wading ukwachikin chakusambish nich kulejan rusangu ruwamp ra Want, ni walejana chirumburikina kushakam pakad yisotijol kudiokila ku kujindjik yipau pa divu. Yesu walejana mutapu uchidia cha usey nakash kwijindjikin yipau mwiur, “kimudingip musu ap kusu rikal ukuyishesha, mwakad kushik mwij kuumbol ap kwiy.” Ov, usadidil chiyul cha Yesu cha kujindjikin yipau mwiur?

Ngikadil Yamukatinau Yesu Kudi Antu

17. Ov, ngikadil ik yasala anch Yesu ikala mwin kulejan wamushena?

¹⁷ Ov, ngikadil yisu yasala anch Yesu ikala mwin kulejan wamushena? Ngikadil yimwing yadinga mwikadil wend pantaliken nau antu akwashay. Pakach pa ngikadil yiwamp ya Yehova yamekeshay Yesu pading kwikepish, rukat, ni riy. Tushinshikinany mutapu ngikadil yiney ya yipwitina antu avud kudi Yesu.

18. Mulong wak chitwishikin kulond anch Yesu wading wikepishina?

¹⁸ Pitiyay mudimu wa kwez pa divu, Yesu “wilika amwinend, watambula chifu cha kashalapol, wikala mudi antu.” (Filp. 2:7) Chading chisal cha kwikepish. Chikwau kand, Yesu kayipepishap antu. Ndiy kadingap ni mwikadil wa kwel anch, ‘Am nidiokil mwiur, chawiy lel ufanyidinany kwintesh.’ Chinyim ni amesia a makasu, Yesu katwap rubil mulong wa kwiyijikish anch ndiy Mesia wakin. Yisu yimwing wading nikuyijidik antu alik kuyilej akwau anch udi nany ap yom yasalay. (Mat. 12:15-21) Yesu wasota anch antu akwata mupak wau mulong wa kumulondul kukwatijan nich yom yamanau ayinau. In kwilejend ading ayukishiwin mudi ik pa kwijik anch Mwant wau kadingap ni kuyichingejin anch ikala mudi angel awanyidina adinga nend mwiur!

19, 20. Mutapu ik rukat ni riy yamubachika Yesu ayikwash antu?

¹⁹ Yesu Kristu wamekesha kand rukat—mwikadil ujim wa Tatukwend wa mwiur. (1 Yoh. 4:8) Yesu wayileja in kumutesh end cha rukat rijim. Chilakej, tushinshikinany yovil yend piur pa nsand umwing. (Tang Marko 10:17-22.) Yesu “wamukat[a]” ni wasota kumukwash, mulong nsand ntakel kalikap mapit mend mavud chakwel ikala mwin kwilej wa Kristu.

²⁰ Pakach pa ngikadil ya Yesu yipwitina manangu pading riy rend. Mudi antu awonsu akad kuwanyin, antu itiyija malejan mend ading nich milong. Chijikay mwamu, Yesu wayileja nich ranaken ni riy. Chilakej: Pa chisu chimwing, Yesu ni atwimbuy end ading ni yivud ya kusal chawiy lel kadingap ni chisu cha kusum dizeu pa kachom. Pakwez, chom ik chasalay Yesu pamanay chisak chijim cha antu akumangana? “Ndiy wayovila riy, mulong ading mudi amikoku akad kafung; wasambisha kuyilej yom yivud.” (Mar. 6:34) Yesu wayovila antu adinga mu teritwar wend riy mulong wa mwikadil wau ni wipana amwinend mu kuyilej ni kusal yilay mulong wa kuyikwash. Antu amwing apwichika kudi ndiy mulong wa ngikadil yend yiwamp, mazu mend mayipwita, ni ikala in kwilejend.

21. Chom ik tukwileja mu mutu wa mulong ulondwilaku ou?

²¹ Kudi yom yivud yitukutwisha kwilej piur pa mudimu wasalay Yesu pa divu, mudi muukulejana mutu wa mulong ulondwilaku ou. Ov, mu jinjil ik jikwau mutukutwisha kumwimburijin Yesu Kristu, Mishoner mujim?

Ov, Mutapu ik Ukwakula?

• Ov, diyiy ik diatambulay Yesu kurutu kwa kwez pa divu?

• Ov, mutapu wa kulejan wa Yesu wading upandikenamu nchik wa in kufund ni Afarise?

• Ov, ngikadil ik yamukatinau Yesu kudi antu?

[Chipich chidia pa paj wa 15]

Mutapu ik wayilejay Yesu antu?