Twikalany “Atumbila mu Wom wa Nzamb”

PAMWINKISHINAY Yehova Nzamb kutumb kupandakena nakash, Bibil ulondil anch: “Utumbila, Utumbila, Utumbila, udi [Yehova, NW].” (Is. 6:3; Kubur. 4:8) Dizu dia Hebereu ni dia Grek dikarumwinau anch “kutumb” dikwet chitongijok cha kwishitul ap kwinang mu relijon, kwikal waurilau ku kwijond. Kutumb kwa Nzamb kwisambidin piur pa kuwanyin kwend kujim nakash.

Ov, Nzamb, Yehova utumbila, kayichingejidinap antu amwifukwidila anch ikal atumbila, charumburik anch ikal ishitwila ku mujimbu, mu ngikadil ni muspiritu? Mu mazu makwau, Bibil ulejen anch Yehova usotil antu end ikal atumbila. Mu 1 Pita 1:16 tutangin anch: “Ikalany antu atumbila, mulong am nidi utumbila.” Ov, chakin kamu antu akad kuwanyin akutwish imburij kutumb kwa Yehova? Inge, pakwez chidiap mu kuwanyin kwawonsu kwa kutumb kwa Yehova. Nzamb ukutwish watuman anch tutumbil ku mes kwend anch twamwifukwil mu mwikadil wa muspiritu wishitwila ni kwikal ni urund wa piswimp nend.

Ov, mutapu ik lel tukutwisha kushal ishitwila mu mangand minam mijondila? Yisal ik tufanyidina kulik? Kuswimp ik tuswiridina mu kulond ni mu mwikadil? El tushinshikinany yitukutwisha kwilej pa mulong winou kusutil ku yayitay Nzamb in Yuda pachirikau mwi ngand yau kudiokal mu Babilon mu muvu wa 537 K.C.C.

‘Kukez Kikal Njil Yitumbila’

Yehova wasambela kulond anch antu end adinga mu uswik mu Babilon akez kuyichirish mwi ngand yau. Mu uprofet wa kuchirishiu kwau mwadinga dizu dined: “Kukez kikal njil. Yikutazukau anch: ‘Mukombil utumbila.’” (Isay 35:8a) Mazu minam malejen anch Yehova kayibodidilap kusu in Yuda njil ya kuchirikin kwol kwau pakwez wayinkisha kand kashinsh anch akuyichidij mwi njil.

Mulong wa atushalapol end a katat adia pa divu, Yehova uyibodidil “Mukombil utumbila” muchinidinau kudiokila ku Babilon Mujim, want wa mangand wa relijon wa makasu. Mu muvu wa 1919 wayikola in Kristu azizidinau many kudiokal mu uswik wa relijon wa makasu, ni atokisha pakemp-pakemp difukwil diau adioshamu malejan mawonsu ma makasu. Mudi in kwifukwil a Yehova ilel, tusangaredin mwikadil wa muspiritu wishitwila, mutukutwisha kumwifukwil Yehova ni kwikal nich urund wa chisambu pamwing nend ni ambay netu antu.

Yid ya “kachisak kakemp” in Kristu azizidilau many ni “chisak chipandikena kujimb” chiyila mu kwiwejinaku cha “amikoku akwau” atonda kal kwendil mwi njil yitumbila ni ayitazukin antu akwau eza ibomba nau. (Luka 12:32; Kubur. 7:9; Yoh. 10:16) “Mukombil utumbila” ayibodidilau antu awonsu asotila kupan “mijimbu [yau] kwikal yakupesh yom, yitumbila, ni [yitiyikina, NW] kudi Nzamb.”—Rome 12:1.

“Kwikil Mukayitil Ukeza Kasutilamu”

Mu muvu wa 537 K.C.C., in Yuda achirika afanyidina kuwanyish chom chijim chayitau. Piur pa antu awanyisha yitinau chakwel endila mu “Mukombil utumbila,” Isay 35:8b ulondil anch: “Kwikil mukayitil ukeza kasutilamu, ap muntu urumbangena kakutwishap kusutilamu.” Mulong rutong ra in Yuda achirika mu Yerusalem radinga ra kuchirish difukwil dishitwila, kwelap kwikal ndond ya antu akweta yitongijok yiyimp, akad kalimish ka yom yitumbila, ap adinga ijondila muspiritu. Antu achirika aswiridina kulam yijil ya piur ya Yehova. Antu asotila kwitapil ilel dilau dia Nzamb aswiridin niyawiy kuwanyish yijil yawiy yimwing. Afanyidin kwikal “atumbila mu wom wa Nzamb.” (2 Kor. 7:1) Yisal ik yijondila yitufanyidina kwiyep?

Kambuy Paul wafunda anch: “Katat mudimu ya mbij yikat kumekan, yawiy ey: kusotan, kwijond, ris.” (Gal. 5:19) Kwimik dis kwisambidin yom yawonsu yikwatina ku ukundj ni wimband pamwing nich kusadil yid ya ukundj ap wimband pol pa uruw. Mu dizu kwimik dis mudi “masandj; usund; mwikadil wa utandj wakad usany; mashakamin ma kwijond.” Mazu mawonsu maad masandj ni kwimik dis madi chinyim nich kutumb kwa Yehova. Chawiy lel, antu asadila yom yiney kakutwishap ikal yid ya chikumangen cha Ukristu ap akat kuyopatamu. Mwawiy kand chidinga ku mutambu wa antu ijondila nakash, chawiy, “kusalijok yom yawonsu yijondila nich maku.”—Efes 4:19.

Dizu ‘kwijond’ disambidin yitil yivud kushalijan. Dizu dia Grek disambidina kwijond dirumburikin kulik kwishitul ap kwikis kwa mutapu win wawonsu—mu mashakamin, mu kulond, ni muspiritu. Mudi kand yisal ya kwijond pakwez yakad kwit dipup dia winzamb.a Ov, antu ijondila mwamu akutwish ikal mwin njil yitumbila?

Chilikej anch mwin Kristu wasambish kutal pornografi mu ujindj. Pakemp-pakemp, mudi mulankina maku mayimp, kukwat kwend mupak wa kushal wishitwila ku mes kwa Yehova kukusambish kukemp. Mashakamin mend makutwish kandikal mashika ku chilik cha kwikal kwijond kukash, pakwez kadandamenap kushinshikin kusu “yom yilimishilau, yom yitentamina, yom yitokila, yom yikatilau, anch kudi yom ya kashinsh ni kuwap, yom yiwanyidina ni yifanyidina kulimish.” (Filip. 4:8) Pornografi udi kwijond ni chakin kamu ukutwish wayipish urund wa muntu ni Nzamb. Kwijond kwa mutapu win wawonsu kangal akujimbula kusu pakach penen.—Efes 5:3.

Tushinshikinany chilakej chikwau. Tulonda anch mwin Kristu ukat kwichuk—kusengesh mujimbu wa ikundj ap wa mband mulong wa kwisangaresh maku ma ukundj ni wimband—chikalap mu pornografi ap bwat. Ap anch dizu “kwichuk” kididiap mu Bibil, ov, kukutwish kwikal chinshilend anch kudiap chisal cha kwijond mu manangu ni mu yitongijok? Kudandamen nich kwijond kwa mutapu winou kukutwish kwayipish urund wa muntu ni Yehova ni kumwikadish wijondila ku mes ma Nzamb. El tushinshikinany chiyul cha kambuy Paul chalonday anch “twitokishany ku tuyimp twawonsu twa mujimbu ni muchim” ni tuyijipany “yid [yetu] yidia ya mangand: kusotan, kwijond, ris, maku ma yiyimp.”—2 Kor. 7:1; Kol. 3:5.

Mangand manam mayikedilau kudi Satan mayitiyina kwau mashakamin mijondila, ni kumakasikeshin. Kutaliken choziu cha kwiyandjik mu chisal chijondila kukutwish kwikal kukasikena. Pakwez in Kristu akin kafanyidinap enda “kand mudi mukat kwendau in mangand mu usup wa manangu mau.” (Efes 4:17) Ching anch twiyep mashakamin mijondila, ma mu ujindj ap ma mu mutapu windjing, chawiy lel Yehova ukututwishish tudandamena kwendil mu “Mukombil utumbila.”

“Mukez Kendilap Antambu”

Chakwel kwitiyik kudi Nzamb utumbila, Yehova, kukutwish kwit anch antu amwing asala yikarumuk yivud mu mashakamin ni mu kulond. Isay 35:9 ulondil anch: “Mu mukombil winiwa mukez kendilap antambu, ap annam ayidiany kakez kamekanap,” winou wawiy, “Mukombil utumbila.” Mu kulond kwa chifanikesh, antu in chisum ni in marundu mu yisal ni mu kulond awiy afanikeshinau mudi annam a mwisuku. Kakezap kwikal ni ndond mu mangand masu matentamina ma Nzamb. (Isay 11:6; 65:25) Chawiy lel chidi cha usey kudi antu asotila itiyika kudi Nzamb, alika ngikadil ya winnam ni alondula mashakamin matumbila.

Mifund yituyudil anch “mazu mawonsu maridil ni ujim, ni kuswej, ni jinkuny, ni kuchirilan, ayidiosh kudi en, ni dizaz diawonsu.” (Efes 4:31) Mu Kolosay 3:8, tutangin anch, “yidjibulany yawonsu: ujim, kuswej, jinkuny, mboj, ni mazu ma usany makata kubudik mukan mwen.” Mazu “kuchirilan” ni “mboj” masadidilau mu maverse minam maad marumburikin chakin kamu masal, kuswingishan, ap minsamb ya masal.

Ilel, kulond kuyimp, ni kwa usany kupalangen nakash, djat ni mu majuku. Antu atijadina akata kwelijan mazu maridila, chisum, ap kwelijan yom yiyimp umwing ni mukwau ap kuyel anau. Mutapu winou wa marundu mu kulond kufanyidinap kwikal mu majuku ma in Kristu.—1 Kor. 5:11.

Chidi Chiyukish—Kwikal “Atumbila mu Wom wa Nzamb”

Kudi kwitapil dilau dijim kumusadil Nzamb utumbila, Yehova! (Yosh. 24:19) Paradis wa muspiritu mwatwandjikinay kal Yehova, upandaken kuwap. Kulam mashakamin metu matumbila ku mes ma Yehova mawiy mashakamin mapandakenamu kuwap mu mwom.

Paradis wa pa divu washilayimu Nzamb ukwikal piswimp ap kamu uyakin. (Is. 35:1, 2, 5-7) Antu awonsu amuchingedina ni adandamedina kwikal nich mashakamin ma winzamb akez kuyukishiu kwikalamu ni ndond. (Isay 65:17, 21) Chawiy lel, el tudandamenany kumwifukwil Nzamb mu mwikadil wa muspiritu wishitwila ni twikala nich urund wa piswimp nend.

[Mazu madia kwishin kwa paj]

[Chipich chidia pa paj wa 26]

Chom ik chayitau in Yuda chakwel endila mu “Mukombil utumbila”?

[Chipich chidia pa paj wa 27]

Pornografi ukat kuyipish urund wa Yehova

[Chipich chidia pa paj wa 28]

“Mazu mawonsu . . . jinkuny, ni kuchirilan, ayidiosh kudi en”