Yangany Kurutu Muspiritu Mu Kulondul Chilakej Cha Paul

“Narish kal kurish kuwamp, napwish kal kubambil, nalamina ritiy.”—2 TIM. 4:7.

1, 2. Paul wa ku Taris wakarumuka mutapu ik mu mwom wend, ni mudimu ik wa usey wasalay?

WADINGA ikundj mwin manangu ni ukapukina. Pakwez, ‘washakama mu kukwatijan nich maku ma mujimbu.’ (Efes 2:3) Wiyijikisha amwinend mudi “mwin kusalan ni mwin kwakamishan ni kurumbok.” (1 Tim. 1:13) Ikundj winou wadinga Saul wa ku Taris.

² Mu kusut kwa machuku, Saul wakarumuka nakash mu mwom wend. Walika mwom wend wa kusambish, wasala nakash kangal mulong wa ‘musangar wend amwinend, pakwez mulong wa musangar wa avud.’ (1 Kor. 10:33) Wikala muntu muwamp ni wayikata antu ameshay mar. (Tang 1Tesalonika 2:7, 8.) Wafunda anch: “Am anteka mwin mudimu,” wawejinaku kand anch: “Kudi am, mukemp kusut pakach pa in Kristu awonsu, aringinka ranaken riner ra kulejan kudi in mangand mapit makad kuchind ma Kristu.”—Efes 3:7, 8.

3. Kwilej mikand ya Paul ni jinsangu ja mudimu wend kukutwish kutukwash mwi njil ik?

³ Saul, wadinga wijikena kand anch Paul waya kurutu nakash muspiritu. (Mid. 13:9) Njil yimwing yakin ya kuya kwetu kurutu swa mu uyakin yidi kusutil ku kwilej mikand ya Paul, jinsangu ja mudimu wend ni kwimburij chilakej cha ritiy rend. (Tang 1 Korint 11:1; Hebereu 13:7.) El tutalany mutapu kukutwisha kusal mwamu kutubachik twikala nich chaku cha kwilej, tuyikata chakin antu, ni twikala nich chitongijok chiwamp padi ayinetu.

Chaku cha Kwilej cha Paul

4, 5. Mutapu ik wataninayimu Paul mu kwilej kwa amwinend?

⁴ Chadingay Mufaris wilejina ‘ku mend ma Gamaliel, end amufumb ku yaku ya yijil ya angakend,’ Paul wadinga ukwetaku ronganyin kanang ra Mifund. (Mid. 22:1-3; Filip. 3:4-6) Kupwa kwa kumubabatish, waya “swa mwi ngand ya Arabi”—pamwingap waya mwin Mpay ya Siri ap chitwishikin anch waya mu jindond ja zoong pa Ditung dia Arabi mulong wa kutongijokin. (Gal. 1:17) Chimeken anch Paul wasota atongijokina pa mifund yamekesha anch Yesu wadinga Mesia. Chikwau, Paul wasota irijeka mulong wa mudimu wadinga umuchingedina. (Tang Midimu 9:15, 16, 20, 22.) Paul witekina chisu cha kutongijokin pa yom ya muspiritu.

⁵ Ronganyin ra Mifund ni njingunin yatambulay Paul kusutil ku kwilej kwend yamutwishisha kulejan nawamp uyakin. Chilakej, padingay mu sinagog wa mu Antiok wa ku Pisidia, Paul wajimbula tupamp tutan Mifund ya Hebereu mulong wa kulejan anch Yesu wadinga Mesia. Paul wajimbula kand tupamp tuvud mifund yitumbila. Malejan mend ma Bibil mayitiyijisha “antu amichid yikwau avud ading akarumuka kal kwikal in Yuda, amulondula Paul nend Barnabas” chakwel ileja yivud. (Mid. 13:14-44) Pa cheza chisak cha Ayuda in Rome kwi ndond kwadinga kushichay kwinyim kwa mivu, Paul wayirumburil rusangu rend “ndiy wasambisha ku Yijil ya Moses ni ku mazu mafundau aruu a Nzamb.”—Mid. 28:17, 22, 23.

6. Yik yamukwasha Paul imana dang muspiritu parishay nich yoziu.

⁶ Parishay nich yoziu, Paul wadandamena kushinshikin Mifund ni watambula dikasikesh ku rusangu ripepidilau. (Heb. 4:12) Padingay mu rukan mu Rome kurutu kwa kumujip, Paul wamukana Timote amuletina “mikand, ni yikit yikweta yom yifundilaup.” (2 Tim. 4:13) Yom yiney yadinga chakin yikunku ya Mifund ya Hebereu yasadinangay Paul mu kwilej kwend kukurikina. Kutambul ronganyin ra Mifund kusutil ku kwikal nich chaku cha kwilej Bibil kwadinga kwa usey kudi Paul chakwel imana dang.

7. Jimbul yikutwisha kutaninamu mu kwilej kwey Bibil pakad kujing.

⁷ Kwilej Bibil kwakad kujing, pamwing nich kutongijokin, kukutukwash tuya kurutu muspiritu. (Heb. 5:12-14) Piur pa usey wa Dizu dia Nzamb, nfund a kuseng wawanga anch: “Mazu ma mukan mwey madi mawamp kudi am chipandiken tunan twa nfalang. Yijidik yey yanginka manangu chipandiken akankuny nam, mulong yidi mu muchim wam machuku mawonsu. Nalamin mend mam ku jinjil jawonsu jiyimp chakwel nisadil dizu diey.” (Kus. 119:72, 98, 101) Ov, ukwet chaku cha kwilej Bibil amwiney? Ov, wirijekin mulong wa mijikit ya kurutu mu mudimu wa Nzamb kusutil ku kutang Bibil pichuku pichuku ni kutongijokin pa yiutangininga?

Saul Wileja Kuyikat Antu

8. Saul wadinga ni kuyisadil mutapu ik antu adinga pol pa relijon wa in Yuda?

⁸ Kurutu ikala mwin Kristu, Saul wadinga nich mushiku mulong wa relijon wend, pakwez wayibangina pakemp antu adinga pol pa relijon wa in Yuda. (Mid. 26:4, 5) Witiyija anch in Yuda amujipa Stefan nich mayal. Pamanay mutapu wamujipau Stefan, Saul wikala nich mushiku ni wamana anch chifanyidin kuyipompat in Kristu. (Mid. 6:8-14; 7:54–8:1) Rusangu ripepidilau rilondil anch: “Saul . . . wend[a] wandam mu yikumbu ni kuyikak amakundj ni amband kuyitwal mu rukan.” (Mid. 8:3) Ndiy wadinga “ni kuyakamish ni ku mal mayen.”—Mid. 26:11.

9. Chom ik chamanay Saul chamusala anch ashinshikina mutapu wadinga ni kuyisadil antu?

⁹ Pamubudikinau kudi Nsalejetu Yesu, Saul wadinga mwi njil uyil ku Damaskus akayimesha mar in kwilej a Kristu. Kulay kupandakena kwa Mwan a Nzamb kwamwikadisha Saul mputames ni wasota antu indjing amutakela. Yehova wamusadila Ananias chakwel amuchirishina Saul usu wa kuman, mwikadil wa Saul pantaliken ni antu wakarumuka rawonsu. (Mid. 9:1-30) Pikalay mwin kwilej wa Kristu, wayisadila antu awonsu mudimu ukash mudi mwasalay Yesu. Charumburika kudi ndiy anch kulik chisum ni ikal mu “chisambu nau antu awonsu.”—Tang Rome 12:17-21.

10, 11. Mutapu ik wamekeshay Paul anch uyikatin antu chakin kamu?

¹⁰ Paul kasotap kusu ching ikala mu chisambu ni akwau. Wasota kand kuyimekeshin rukat rakin, ni mudimu wa Ukristu wamwinkisha mutapu wa kurimekesh. Mu weny wend wa kusambish wa umishoner, walejana rusangu ruwamp mu Aziy Mukemp. Chikalap nchik rupompat rikash, Paul ni arund nend asina ching pa kuyikwash antu ikepishina chakwel itiyija Ukristu. Achirikina kand ku Listre ni Ikonium, ap in kuyipompat adinga mu misumb yiney asota kumujip Paul.—Mid. 13:1-3; 14:1-7, 19-23.

¹¹ Kwi nyim, Paul ni chirund chend ayikimba antu asotila kwikal nich urund ni Nzamb mu Makedonia musumb wa ku Filipoi. Lidia wakarumuka wikal mwin Yuda watesha rusangu ruwamp ni wikala mwin Kristu. Anyikel ayibula mishakwat Paul ni Silas ni ayindjimbula mu rukan. Pakwez, Paul wamuleja kalam wa rukan, ni ndiy ni dijuku diend atambula dibabatish mudi in kumwifukwil Yehova.—Mid. 16:11-34.

12. Chom ik chamubachika Saul mwin kusalan ikal kambuy mwin rukat wa Yesu Kristu?

¹² Ov, mulong wak Saul mwin kumeshan mar witiya yitiyij ya antu adingay ni kumesh mar? Chom ik chamubachika muntu winou mwin kusalan ikal muntu muwamp ni kambuy mwin rukat, wasota kufa mulong wa antu akwau chakwel atwisha kwilej uyakin wa Nzamb ni Kristu? Paul urumburil amwinend anch: “Nzamb, ndiy wantonda mwivumu mwa makwam ni wantazukina mu ranaken rend, cha kumumekeshil Mwanend mu muchim wam.” (Gal. 1:15, 16) Paul wamufundina Timote anch: “Angovila riy chakwel Yesu Kristu amekesh kushimpish muchim wend pakusambish mu am, chakwel am nikwikal chilik kudi antu awonsu akumwitiyija, akutambul kupand kwa chikupu.” (1 Tim. 1:16) Yehova wamulikishina Paul, ni kumwanaken ni kumwovil riy mutapu winou kwamubachika ayikata antu kusutil ku kuyilej rusangu ruwamp.

13. Chom ik chifanyidina kutubachik tuyikata antu akwau, ni mutapu ik tukutwisha kusal mwamu?

¹³ Yehova chilik chimwing ukat kulikishin yitil ni kurumbuk kwetu. (Kus. 103:8-14) Nfund a kuseng wipula anch: “Anch Ey wading ni kuvurik yisalijok yawonsu yiyimp, ing nany lel ukwiman kurutu kwey, A [Yehova, NW]?” (Kus. 130:3) Pakad riy ra Nzamb, kwikil ap umwing wa pakach petu ukutwisha kusanger mudimu utumbila, ap tukutwishap kuchingejin kwez kutambul mwom wa chikupu. Ranaken ra Nzamb rikala rijim nakash pantaliken ni etu awonsu. Chawiy lel, mudi Paul, tufanyidin kusot kuyitanduril akwetu rukat kusutil ku kuyilej ni kuyifundish uyakin ni kuyikasikesh ambay netu akaritiy.—Tang Midimu 14:21-23.

14. Mutapu ik tukutwisha kutanduril mudimu wetu?

¹⁴ Paul wasota aya kurutu mudi kashalapol wa rusangu ruwamp, ni chilakej cha Yesu chamushika ku muchim. Mu mitapu yimwing yamekeshinay Mwan a Nzamb rukat rakad kwisikej mulong wa antu mwadinga mudimu wend wa kulejan patok. Yesu walonda anch: “Chakin, yir yivudil, pakwez in kwangul akepil. Chawiy ulembilany Mwant wa yir chakwel ayituma in kwangul mu yir.” (Mat. 9:35-38) Paul wasala kukwatijan nich kwit kwitay chakwel kwikala in kusal mudimu avud kusutil ku kwikal kwend mwin mudimu ukweta mushiku. Ing ey? Ov, ukutwish kuwapish mudimu wey wa kulejan? Ap anch ukutwish kusal nakash mudimu wey wa kulejan wa Want, pamwingap wirijeka mu mwom wey chakwel usala mudimu wa uchibol? El tuyimekeshinany rukat antu akwau kusutil kuyikwash chakwel atambul “dizu dia kupand.”—Filip. 2:16.

Mutapu Wimanay Paul Amwinend

15. Mutapu ik wimanay Paul amwinend mu urund ni ambay nend in Kristu?

¹⁵ Mudi kashalapol wa Kristu, Paul watushila chilakej chijim mwi njil yikwau. Ap anch watambula yisend yivud mu chikumangen cha Ukristu, Paul wadinga wij nawamp anch kelap kutambul yiyukish yiney ni anch kayitambulap mulong wa ukaliweny wend amwinend. Wajingunina anch yiyukish yadingay nich yadinga ku ranaken ra Nzamb. Paul wadinga wij anch in Kristu akwau adinga atushalapol ayifuvu a rusangu ruwamp. Chikalap nchik chisend chadingay nich mukach mwa antu a Nzamb, wadinga wikepishina.—Tang 1 Korint 15:9-11.

16. Mutapu ik wamekeshay Paul kwitudish ni kwikepish pa mulong wa kuya ku mukand?

¹⁶ Tushinshikinany mutapu wapwishay Paul mulong walanka mu Siri wa ku Antiok. In Kristu adinga ku chikumangen chadinga kwinikwa aurika pa mulong wa kuya ku mukand. (Mid. 14:26–15:2) Paul amutonda mulong wa kuyilej ayidim Akamichid rusangu ruwamp, wela kwitongin amwinend anch uswil chakwel apwisha mulong winou wa antu akad kwikal in Yuda. (Tang Galatia 2:8, 9.) Pakwez, pamanay anch katwishinap kuupwish mulong winou amwinend, nich kwitudish ni kwikepish, waya nich chitongijok cha kuchiman chisak chitakedila chadinga mu Yerusalem akisambina pa mulong winou. Wayileja nawamp mulong wawonsu ni yid yach yautesha, yakwata mupak, ni yamutuma ikala muruu wau. (Mid. 15:22-31) Chawiy Paul ‘wayilimisha’ ambay nend atushalapol.—Rome 12:10b.

17, 18. (a) Chovil ik chakudishay Paul pantaliken nau antu adinga mu chikumangen? (b) Chasalau amakurump a ku Efes chisu chadiokalay Paul kwinikwa, chitufundishin ik?

¹⁷ Paul mwin kutudish kimanyinap palemp ni akadivar ni anambaz nend mu yikumangen. Pakwez, wadinga murund nau wa piswimp. Kwinsudiel kwa mukand wend wayifundilay in Rome, wayilangwisha antu 20 ni kusut pa majin mau. Avud au kayijimbwilap mu Mifund yikwau, ni akemp au kusu adinga ni yisend. Pakwez adinga atushalapol ashinshamena a Yehova, ni Paul wayikata nakash.—Rome 16:1-16.

¹⁸ Kwitudish kwa Paul, ni kukwat kwend urund ni antu kwatunga yikumangen. Kupwa watanijana ni amakurump a ku Efes kapamp kansudiel, “amubwikat Paul mwi nshing amususu, ushon wayikwata awonsu palonday anch, kiukez kumananyip kand mpal yam kakwau.” Awiy kelap kusal mwamu anch ndiy wading mwin kwitutul ni chibud.—Mid. 20:37, 38.

19. Ov, mutapu tukutwisha “kwitumbish” mu kuyisadil ambay netu in Kristu?

¹⁹ Antu in awonsu asotila kuya kurutu muspiritu afanyidin kwikal nich muchim wa kwikepish mudi wa Paul. Ndiy wayikasikesha ambay nend in Kristu anch “kangal wasalany yom ya kwaurok ap ya kwitumbish nich, pakwez ikepishany, umwing amutonga mukwau kujimb chipandikena amwinend.” (Filip. 2:3) Ov, mutapu ik tukutwisha kusadil chiyul chinech? Njil yimwing yidi kusutil ku kusal mu kwovijan ni amakurump adia mu chikumangen chetu, kulondul umutakel wau ni kwitiyij mipak ya dipup dia winzamb yikwatinau. (Tang Hebereu 13:17.) Njil yikwau yidi kusutil ku kuyilimish akadivar ni anambaz netu awonsu adia mu chikumangen. Mu yikumangen ya antu a Yehova chisu ni chisu muding antu a michid, a yishankur, a ulombu wa chikit, a tubil kushalijan. Chawiy lel, tufanyidin twileja mutapu wa kuyisadil pakad kasolikany ni kuyikat, mudi mwasalay Paul. (Mid. 17:26; Rome 12:10a) Atukasikeshin twakijana “muntu ni mukwau, mudi Kristu chanakay kand en ku uyaj wa Nzamb.”—Rome 15:7.

“Tubambilany Nich Kudandamen” Kubambil kwa Mwom

20, 21. Chom ik chikeza kutukwash tubambil nawamp kubambil kutwadila ku mwom?

²⁰ Mwom wa mwin Kristu ukutwish wilikan nich weny ulemp uyilau ra pansh. Paul wafunda anch: “Narish kal kurish kuwamp, napwish kal kubambil, nalamina ritiy; chawiy antekila kwinikwa chibangul cha kutentam, chikez kanginkau kudi Mwant, mwimikish utentamin, mu dichuku dinidia; ni kudi am kusu amwinam bwat, pakwez ni kudi awonsu akatila kwez kwend.”—2 Tim. 4:7, 8.

²¹ Kulondul chilakej cha Paul kukutwish kwatukwash tubambil nawamp kubambil kutwadila ku mwom wa chikupu. (Heb. 12:1) Chawiy lel, el tudandamenany kuya kurutu muspiritu ku kukudish chaku chiwamp cha kwilej ayinetu, ku kuyikat nakash antu, ni ku kwikal ikepishina.

Ov, Ukwakul Nchik?

• Mutapu ik wataninayimu Paul mu kwilej Mifund pakad kujing?

• Ov, mulong wak kuyikat nakash antu kudi kwa usey kudi in Kristu?

• Ngikadil ik ufanyidina kwikal nich chakwel uyisadila antu akwau pakad kasolikany?

• Mutapu ik ukutwisha chilakej cha Paul kukukwash usala mu kwovijan ni amakurump adia mu chikumangen chen?

[Chipich chidia pa paj wa 23]

Isakina dikasikesh dia Mifund, mudi mwasalay Paul

[Chipich chidia pa paj wa 24]

Mekesh rukat ku kuyilej antu akwau rusangu ruwamp

[Chipich chidia pa paj wa 25]

Ov, mulong wak akadivar amukata Paul?