Musadila Yehova Piuchidia Nsand

“Ey shakam mu yiwileja kal ni yiwitiyija anch yidi yakin.”—2 TIM. 3:14.

1. Yehova umen nchik mudimu wa ansand Atuman?

MUDIMU usadilau ansand udi wa usey nakash kudi Yehova mu chilik chakwel anch wapepila uprofet piur pau. Nfund a kusend wawanga anch: “Antwey akwizul sens ni muchim ukash piukuyitakela ku mukandu ujidila. Usangarum ukwez kudi ey mudi maum mabudika pikwacha pamanch.” (Kus. 110:3) Mwawiy, Yehova uyimen nich usey nakash ansand ipanina chakwel kumusadil.

2. Ansand a katat arishin nich yipwichik ik piur pa machuku mau ma kurutu?

² En ansand udiany mu chikumangen cha Ukristu, ov, wipaninany kal kudi Yehova? Amwing chiyikasikedining kutond kumusadil Nzamb wakin. Angend a mushing ajim, in kulejan, pamwing ni yid yimwing ya dijuku ni arund akat kuyikasikeshin ansand kulondul ntong ja ku mujimbu. Palondwilau an ntong ja muspiritu, yisu yivud antu akat kuyisupish. Pakwez kumusadil Nzamb wakin udi mulad uwamp nakash wa mwom ukutwisha kulondul. (Kus. 27:4) Pa chinech, shinshikin yipul yiney yisatu: Mulong wak ufanyidin kumusadil Nzamb? Mutapu ik ukutwisha kutwish mu kupan mwom wey kudi Nzamb chikalap nchik yikutwishau kulond ap kusal antu indjing? Mitapu ik yipandakena kuwap ya mudimu utumbila ukutwisha kwikal nich?

Kumusadil Yehova Chidi Chom Chiwamp

3. Yitang ya Yehova yikwet nchik usu padi etu?

³ Mulong wak tufanyidina kumusadil Nzamb mwom ni wakin? Kuburik 4:11 uletin diyingishil dia kusambish: “Yey ufanyidina, Mwant wetu, Nzamb wetu, Kutambul uyaj ni ulim ni ukash, Mulong yey watanga yom yawonsu, Yishiching mu rusot reyey, mwawiy mwayitangilau.” Yehova udi Sakatang upandakena kuwap wa yom yawonsu. Divu diwapin mudi ik! Mitond, yisalamb, annam, ni turung twa mem, mikandu, ni jimpol—Yehova ndiy wayisala yom yiney yawonsu. Kuseng 104:24 ulondil anch: “divu dizwil sens ni rupit [ra Nzamb].” Kujikitish mudi ik anch Yehova watwinkisha mujimbu ni manangu yitukwashina kusanger divu ni yom yiwamp yidiap! Kujikitish kwetu mulong wa yitang yipandakena kuwap kufanyidin kutubachik tumusadil?

4, 5. Yisal ik ya Nzamb yamupwitina Yoshua piswimp ni Yehova?

⁴ Diyingishil dikwau dia kumusadil Yehova didi mu mazu malonday mwant wa Isarel Yoshua. Piswimp ni rufu rend, Yoshua wayileja antu a Nzamb anch: “Wijany ku michim yen, ni ku mipim yenen awonsu anch kushilamu kwawonsu kuwamp kwashilayimu [Yehova] Nzamb wen mulong wenen, kwikil chom ap kusu chimwing chaburena kuwanyin. Yawonsu yasadika mulong wenen.” Mulong wak Yoshua walonda mwamu?—Yosh. 23:14.

⁵ Mutapu mwadingay mwan wapamina mu Idjibit, Yoshua wijika anch Yehova ukuwanyish kushilamu kwend ukuyichirish an a Isarel mwi ngand yau. (Dis. 12:7; 50:24, 25; Kub. 3:8) Kupwa Yoshua wamana mutapu Yehova wawanyishay kushilamu kwend kusutin kulet Yipupu Dikum pa Idjibit ni kumushindil Farao mwin chibud kuyilik an a Isarel aya. Yoshua udi pakach pa antu apandishau ku Karung Usuz, ni wamana mutapu mem ma karung mayijiyisha Farao ni amasalay end. Mu weny ulemp mwi Mpay “yijim ya yakamish” ya Sinai, Yoshua wamana mutapu wawanyishay Yehova maswir mawonsu ma in Isarel. Kwikil muntu wafa ni impu ap ni nzal. (Kuvur. 8:3-5, 14-16; Yosh. 24:5-7) Pasotau in Isarel kukwat muchid ukash wa in Kanan ni kusend Ngand ya Kushilamu, Yoshua wamana mutapu wayikwashay Nzamb wifukwidilay ndiy ni akwau.—Yosh. 10:14, 42.

6. Chom ik chikukukwasha ukudisha rusot ra kumusadil Nzamb?

⁶ Yoshua wadinga wij anch Yehova uwanyishining kushilamu Kwend. Chawiy, Yoshua walonda anch: “Am ni chikumbu cham tukumusadil [Yehova].” (Yosh. 24:15) Chikwikal nchik ku mutambu wey? Ang watongijokin pa kushilamu kwawanyishay kal Nzamb wakin ni kukezay kuwanyish, ov, ukusot kumusadil mudi mwamusadilay Yoshua?

7. Ov, mulong wak kubabatishiu mu mem kudi kwa usey?

⁷ Kushinshikin yom yatangay Yehova ni kutongijokin pa yakushilamu yend yisangareshina ni ya kuchingejin nakash kufanyidin kukubachik kichidiap ching kusu wipana kudi Yehova pakwez kand kukez kukushikij ku kulejan kwipan kwinoku kusutil ku kubabatishiu mu mem. Dibabatish didi ruzau ra usey rifanyidinau kusal antu asotila kumusadil Nzamb. Chinech achilejen patok kudiay Chilakej chetu, Yesu. Kurutu kamu asambisha mudimu wend mudi Mesia, waya kudiay Yohan Mubabatish akamubabatisha. Ov, mulong wak Yesu wasala mwamu? Ndiy weza kulond anch: “Am nadiokala mwiur, kinikusalip rusot ram amwinam, pakwez ching rusot rendendiy wantuma am.” (Yoh. 6:38) Chakwel kumekesh chijingidij cha kwipan kwend mulong wa kusal rusot ra Tatukwend, Yesu wababatishiwa.—Mat. 3:13-17.

8. Ov, mulong Timote watonda kumwifukwil Nzamb, ni chom ik uswiridina kusal?

⁸ Shinshikin kand chilakej cha Timote, nsand mwin Kristu winkishay Yehova mudimu ujim ni yisend yivud. Ov, mulong wak Timote wakwata mupak wa kumusadil Nzamb wakin? Bibil utulejin anch ‘wileja yom yamwitiyijishau.’ (2 Tim. 3:14) Anch wileja kal Dizu dia Nzamb ni akwitiyijisha anch malejan madiamu madi makin, udi mudi mwadingay Timote. Katat ufanyidin ukwata mupak. Ov, ukutwishap wayilej anvaj ey yiusotila kusal? Pamwing ni amakurump a mu chikumangen, akutwish akukwash utesha yitina Mifund mulong wa dibabatish.—Tang Midimu 8:12.

9. Mutapu ik ukutwishau antu akwau kutong anch watambul dibabatish?

⁹ Anch akubabatish, yiney yikez kwikal nsambishil yiwamp mu kumusadil Nzamb wakin. Kusutil ku dibabatish dined, wasambish kal weny ulemp wa kubambel ukukushikija ku difut dia mwom wa chikupu ni ku musangar wa katat wa kusal rusot ra Nzamb. (Heb. 12:2, 3) Ukuyisangaresh kand yid ya dijuku diey adinga kal mu kubambel ni arund ney adia mu chikumangen cha Ukristu. Chijim nakash, ukuusangaresh muchim wa Yehova. (Tang Jinswir 23:15.) Chakin, antu amwing kakutwishap atesh mulong wak watonda kumwifukwil Yehova, ni akutwish atadik mupak wey. Akutwish pamwingap akupompat. Pakwez ukutwish wayipandakan yikokujol yiney.

Ang Antu Akwau Alik ap Akupompat

10, 11. (a) Yipul ik yikutwishau antu kukwipul piur pa kutond kwey kumusadil Nzamb? (b) Chom ik ukutwisha kwilejin ku mutapu wadingay Yesu ni kwakul piur pa difukwil diakin?

¹⁰ Mupak wey wa kumusadil Yehova ukutwish wayishimokishish arund ney a kushikol, amutej ney, ni anamakwey. Akutwish akwipul mulong wak utond njil yiney ni kukwipul piur pa yitiyij yey. Ukwakul nchik? Chakin, uswiridin kushinshikin yitongijok ni yovil yey chakwel utwisha kuyirumburil mayingishin ma kutond kwey. Pa chisu wakwila ku yipul piur pa yitiyij yey, kwikil chilakej chiwamp ukutwisha kulondul chipandakenamu cha Yesu.

¹¹ Pamwipulau Yesu kudi Ayuda antakel a chirelijon piur pa disanguk dia afu, ndiy wapwitina manangu mau pa mufund walikau kutongijokin palondau. (Kub. 3:6; Mat. 22:23, 31-33) Pamwipulau kudi mwin kufund anch chijil ik chidia chijim, Yesu wamuleja maverse mafanyidina madia mu Bibil. Ikundj winou wamujikitisha Yesu mulong wa chakul. (Lev. 19:18; Kuvur. 6:5; Mar. 12:28-34) Mulong wa mutapu wasadilay Yesu Mifund ni kulond kwend “kwaurik kwalanka mukach mwa chisak,” ni in kumupompat katwishap kumusal nayimp. (Yoh. 7:32-46) Anch wakwil ku yipul piur pa ritiy rey, sadil bibil ni akul “nich kwitudish ni kalimish.” (1 Pita 3:15) Anch wijap chakul cha chipul, muleja anch wijap ni kimbijol chakul. Kwinyim, kimb mutu wa mulong mu Watch Tower Publications Index ap Watchtower Library pa CD-ROM anch udiaku mu rudim ren. Nich kwirijek kuwamp, ukez kwijik “mwa kwakwil nawamp kudi muntu ni mukwau.”—Kol. 4:6.

12. Mulong wak ufanyidina ulika rupompat rikuchirisha kwinyim?

¹² Akutwish akwipul yipul yivud piur pa mupak wey ni yitiyij yey. Oku, Satan Djabul mukankuny wa Nzamb, uyikedil mangand. (Tang 1 Yohan 5:19.) Chikwikalap cha manangu kuchingejin anch muntu win mwawonsu ukukujikitish ap kukwitiyij, ukutwish watan rupompat. Antu amwing akutwish ‘akusal,’ ni akutwish adandamen nich kukusal. (1 Pita 4:4) Pakwez vurik anch, kiudiap amwiney. Yesu Kristu niyend amupompata. Kambuy Pita niyend chilik chimwing, ni wafunda anch: “Akadivar, kangal wachitongany ni kukwamuk mulonga wa mar makash madia mukach mwen, makat kwez ni kunipak mudi chom chisu chamekana kudi en. Pakwez mudi chiumenanya mar mulong wa Kristu, sangarany.”—1 Pita 4:12, 13.

13. Ov, mulong wak in Kristu afanyidin kusangar chisu chiyizengodilau?

¹³ Kujijamen kuzengol ap rupompat mudi mwin Kristu kudi diyingishin dia kusangar. Mulong wak? Chidi mulong kwitiyik ku mangand kukez kumekesh anch ushich kukwatijan nich yijil ya Satan—kiushichap kukwatijan nich ya Nzamb. Yesu wababesha anch: “Wayindamany kwen, pakukushimekanyau kudi antu, mulong chawiy chayisalangau aprofet a makasu kudi atatukwau.” (Luka 6:26) Kuzengol kumekesh anch Satan ni mangand mend akwovidil ujim mulong umusadidil Yehova. (Tang Mateu 5:11, 12.) Ni chisangareshin “anch akusalany mulong wa dijin dia Kristu.”—1 Pita 4:14.

14. Yom ik yiwamp yikutwisha kwikalaku anch muntu washal ushinshamena kudi Yehova chikalap nchik kuzengol?

¹⁴ Anch washal ushinshamen kudi Yehova chikalap nchik rupompat, kuding yibudikin yiwamp yinying. Ukupan uman piur pa Nzamb ni Mwanend. Kujijaman kwey kushinshamena kukuyikasikesh akadivar ni anambaz ey in Kristu. Antu amwing atadila akad kumwijik Yehova akutwish kwikal abachikinau amukimba. (Tang Pilipoi 1:12-14.) Piumena mutapu ukukasikeshinay Yehova chakwel ujijaman mu yoziu, ukumukat nakash.

Akwazuridil “Chis Chijim”

15. “Chis chijim” ik chamwanzurilau kambuy Paul?

¹⁵ Piur pa mudimu wend wasalay mu Efes, kambuy Paul wafunda anch: “Angazuridil chis chijim, chakwel am nisala mudimu ukash.” (1 Kor. 16:8, 9) Chadinga chis chitwadila ku mudimu ukash wa kulejan rusangu ruwamp ni kuyikadish in kwilej mu musumb winou. Ku kwandamin ku chis chinech, Paul wayikwasha antu avud kwilej piur pa Yehova ni difukwil Diend.

16. Mutapu ik washikenau atushal azizidilau many ku kwandamin mu ‘chis chazurilau’ mu muvu wa 1919?

¹⁶ Mu muvu wa 1919, Yesu Kristu watumbishau ‘wayanzurila chis’ atushal azizidilau many. (Kubur. 3:8) Andamina mu chis chinech ni asambisha kulejan rusangu ruwamp, kulejan uyakin wa Bibil nich mushiku ukwash kupandakanamu mwadingau kwinyim. Kwadinga yibudikin ik ku mujikit wau? Rusangu ruwamp rashikin kal ilel unou djat ni kwisudiel kwa divu, ni piswimp antu mamiliyon sambwad achingejin kutambul mwom wa chikupu mu mangand masu.

17. Mutapu ik ukutwisha kwandamin ku ‘chis chijim chitwadila ku mudimu ukash’?

¹⁷ ‘Chis chijim chitwadila ku mudimu ukash’ achanzuril ni katat mulong wa atushalapol awonsu a Yehova. Antu andamidinamu atanin musangar ni mazang pasadilau mudimu ujim wa kulejan rusangu ruwamp. En atushalapol ansand a Yehova, mutapu ik umenanya nich usey chisend cha kuyikwash antu akwau “[itiyija] rusangu ruwamp”? (Mar. 1:14, 15) Ov, washinshikinap kal chakwel usala mudi chibol wa rawonsu ap mudi chibol nkwash? Rutung ra Yot ya Want, mudimu wa Bethel, ni wa umishoner yidi mitapu yikwau yikutwishau kusadil avud adia pakach pen. Mulong chisu cha mangand ma Satan chakep kal nakash, kusal mudimu wa Want kwikal kal mulong wa swa swa pichuku ni pichuku. Ov, ukwandamin ku “chis chijim” pikuchidia chisu ap?

“Pakany Bil, Utalany [Yehova] Mudi Mudiay Muwamp”

18, 19. (a) Chom chamukwasha David ikala nich impu yikash ya kumusadil Yehova? (b) Chom ik chimekeshina anch David kanengananap ap pakemp mulong wamusadila Nzamb?

¹⁸ Nfund a kuseng wapepilau wayikasikesha akwau anch “pakany bil, utalany [Yehova] mudi mudiay muwamp!” (Kus. 34:8) Padingay Mwant David wa pasak wa Isarel kafung nsand, Yehova wamupandisha ku annam ayidiany a mwinsuk. Nzamb wamukwasha parishay ni Goliat ni wamupandisha mu mar makwau mavud. (1 Sam. 17:32-51, NW; Kus. 18, NW, mazu ma kusambish nich) Mulong wa rukat rijim ridimukina ra Nzamb, David washikena ku kufund anch: “A [Yehova], Nzamb wam, midimu yivud ya ufun yiwasala kal Ey, ni yitongijok yiutongila kudi etu yipandiken kuvul.”—Kus. 40:5.

¹⁹ David washikena ku kumukat Yehova nakash ni wasota Amushimana ni muchim wend wawonsu ni manangu mend mawonsu. (Tang Kuseng 40:8-10.) Mu kusut kwa mivu, David kanengananap ap pakemp mulong wa kusadil mwom wend mu kumwifukwil Nzamb. Kushakam nich kwipan kudi Nzamb kwadinga kwa usey nakash kudi ndiy—musul wa musangar upandakenamu. Mu upal wend, David walonda anch: “Ey udi ruchingej ram, A [Yehova] Nsalejam, nipana kal mudi Ey kudiok ku wanikanch wam. Inge, anch nananap nchik ni kwikal nich nswich jitok to, A Nzamb kangal wanlik.” (Kus. 71:5, 18) David wamukungamena Yehova ni urund nend ni Ndiy wakasikana, ap anch usu wend wa ku mujimbu wakepa.

20. Ov, mulong wak kumusadil Nzamb wawiy mutapu uwamp wa kusadil mwom wey?

²⁰ Mwom wa Yoshua, David, ni wa Timote uwejidin ku uman ulejena anch kumusadil Yehova chidi chom chipandakena kuwap mu mwom wen. Ukwash wa kachisu wa yom ya ku mujimbu mu mangand manam ukutwishap kulet yiyukish ya chikupu yiukutwisha kutambul kusutil ku ‘kumusadil Yehova nich muchim wen wawonsu.’ (Yosh. 22:5) Anch kandikal wipan amwiney kudi Yehova mu malembil, iyipula anch, ‘Ov, chom ik chinkangeshina kwikal umwing wa Atuman a Yehova?’ Anch udi mwin kumwifukwil Yehova ni watambula kal dibabatish, ov, ukutwish kuwejinaku musangar mu mwom wey? Tanduril mujikit wey, ni yang kurutu muspiritu. Mutu wa mulong ukulondula ou ukukulej mutapu ukutwisha kukul muspiritu kusutil ku kulondul chilakej cha kambuy Paul.

Mutapu ik Ukwakula?

• Let mayingishin maad malejena mulong wak tufanyidin kumusadil Nzamb.

• Chom ik chamukwasha Timote kukwat chiyul cha kumusadil Nzamb?

• Mulong wak ufanyidina kushal ujijamena ku kuzengol?

• Mitapu ik ya mudimu yiukutwisha kwikal nich?

[Chipich chidia pa paj wa 18]

Kumusadil Yehova chawiy chom chiwamp mu mwom

[Chipich chidia pa paj wa 19]

Ov, ukutwish wakul ku yipul piur pa ritiy rey?