Dipandish Dia Want Wa Nzamb Didi Piswimp!
“Want wey weza. Rukat [Rusot, MM] rey arusala pansh mudi mwiur.”—MAT. 6:10.
1. Misu madinga malejan ma usey ma Yesu?
CHISU Yesu Kristu chalejanay Malejan mend ma pa Mukandu, walejana kand ni malembil ma nsampwil malondila mu wiswimp manans majim ma malejan mend. Wayileja in kwilejend amulembila Nzamb anch: “Want wey weza. Rukat rey arusala pansh mudi mwiur.” (Mat. 6:9-13) Yesu “watambitamba mu misumb ni mu mal, wend ulejan ni kulet katumb kawamp ka want wa Nzamb.” (Luka 8:1) Kristu wayikasikesha in kwilejend anch: “Sambilany bil kusurib want . . . ni kutentam kwend.” (Mat. 6:33) Mudi mu wilejina mutu wa mulong winou, kimb mitapu ya kusadil malejan minam mu mujikit wey. Chilakej, tongin mutapu ukutwisha kuyakul yipul yiney: Uruu wa Want ukwet usey ik? Antu aswiridin ayipandisha ku ik? Ni Want wa Nzamb ukez kulet dipandish mutapu ik?
2. Uruu wa Want ukwet usey ik?
2 Yesu wasambela kulond anch: “Katumb kawamp ka want akez kukalejan ku mangand mawonsu, kakez kikal uman kudi michid yawonsu; chawiy lel disudiel chidikweza.” (Mat. 24:14) Rusangu ruwamp ra Want wa Nzamb rikwet usey ujim nakash. Mulong udi uruu wa usey ujim nakash mu mangand! Mu yikumangen 100 000 ya Atuman a Yehova pa mangand mawonsu, piswimp mamiliyon sambwad ma atushalapol a Nzamb asadil mudimu wa kulejan wakad cha kuwisikesh nich, ayilejin antu anch Want audishin kal. Kudishiu kwau kudi rusangu ruwamp mulong kurumburikin anch Nzamb watek kal winyikel wa mwiur chakwel uyikela yom yawonsu ya pa divu. Mwishin mwa Want winou, rusot ra Yehova rikusadik pa mangand mawonsu mudi muridia mwiur.
3, 4. Kukez kwikal ik pirikeza kusadik rusot ra Nzamb pansh?
3 Chom ik chikeza kuyishiken antu pirikeza kusadik rusot ra Nzamb panap pansh? Yehova ukez “kayikuswol mansoj mawonsu ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand.” (Kubur. 21:4) Antu kakezap kand kuyel ap kufa mulong wa chitil ni kuburen kuwanyin yaswanau. Antu adia mu chivurikish cha Nzamb akez kwikal kand ni mutapu wa kushakam chikupu, mulong Bibil ushidilamu anch: “Kukez kikal disanguk ni kudi ayingila ni kudi afila nich.” (Mid. 24:15) Kukez kwikalap kand njit, misong, ap nzal, ni divu akez kudikarumun dikal paradis. Ap annam adia ayidiany katat akez kwikal mu chisambu ni antu ni pamwing ni annam akwau.—Kus. 46:9; 72:16; Is. 11:6-9; 33:24; Luka 23:43.
4 Nich yiyukish yamushena mudi yiney yidiokila ku winyikel wa Want, chishimokishinap mulong uprofet wa Bibil ulondil mu ukwikala mwom pa chisu chinicha mu mazu manam mongojina: “Itudishila akez kaswan ngand, akez kusangar mu kuvul kwa chisambu.” Chad chikwikal nchik ku mutambu wa in aletina ruvundu? Bibil wasambela kal kulond anch: “Kwashal kal kachisu kakemp ni antu ayimp kakwikalikup kand.” Pakwez, “akata kumuchingel [Yehova] akez kaswan ngand.”—Kus. 37:9-11.
5. Chom ik chikeza kushiken ditenchik dia mangand dia katat?
5 Chakwel anch yom yiney yawonsu yisadik, ditenchik dia katat pamwing nich mawinyikel ma ruvundu, marelijon, ni yitenchik ya winsak yikez kwikal ayishesha kal. Chawiy kamu chikeza kusal winyikel wa mwiur. Muprofet Daniel wabwaka anch: “Pa chisu cha in kutakel inay [adiaku katat], Nzamb wa mwiur ukez kukasikesh want ukwau [mwiur] wakad kwez kwikal nich disudiel chikupu. Kakez kuukwatap want winou, pakwez ukez kushesh mant makwau mawonsu, chad wawiy ukez kushakam chikupu.” (Dan. 2:44) Want wa Nzamb—winyikel usu wa mwiur—ukez kayikel chisak cha antu pansh pa divu. Kukez kwikal “maur masu ni mangand masu . . . , kwinikwa kwawiy kukeza kwikal kutentam.”—2 Pita 3:13.
Tuswiridin Nakash Dipandish Katat
6. Bibil urumburil nchik uyimp wa mangand manam?
6 Pamubwambwilau Nzamb kudi Satan, Adam, ni Eve, ni kusot kwikwatin chiyul cha yiwapina ni yiyipina, muchid wa antu wasambisha kuman mar. Mivu 1 600 ni kusut, kurutu kwa Mabeb, “kuyip kwa antu kwavulijan kal pansh ni kujimb kand. Yitongijok yawonsu ya michim ya antu yadandamena kamu ching mu kuyip.” (Dis. 6:5) Kupwa kwa mivu 1 300, Salomon wamana mwikadil uyimp chawiy chashikenay ku kufund anch: “Namana anch, ayuk kwau afa kal, kupandakan awiy achishicha aom. Wayuk kwend muntu wakad kal kuvadik ni kuman kuyip kudia pa mangand. Kuyuk kwinoku kupandakenamu kwa muntu mwom ap kwa muntu wafa kal.” (Mul. 4:2, 3) Kusut kwa mivu yikwau 3 000 kushik ni katat, uyimp udandamedin kuya kurutu.
7. Ov, mulong wak kudia kuswir kujim kwa dipandish dia Nzamb?
7 Choviken anch uyimp udandamedin mu mivu yivud, kudi maswir majim mulong wa kukolik ku Want wa Nzamb katat. Mikadil ya mu mivu 100 yasutila yidi yipandikenamu kuyip, ni yidandamedin kamu kuya kurutu. Chilakej, Worldwatch Institute ulondil anch: “Tupamp tusatu antu avud afil nakash mwi njit [mu chitot cha 20] kupandakanamu mu mivu chitot ya kusambish AD djat mu muvu wa 1899.” Kudiokal kamu mu muvu wa 1914 tutikit 100 twa antu tukat kufang kwi njit! Encyclopedia umwing ulondil anch tutikit 60 twa antu afa mwi Njit ja Mangand ja 2. Kudi michid yikwau ap anch yikwet mat ma nikleyer, antu akwet usu wa kuyijip antu avud kapamp kamwing. Ap anch siyans ni umwingang yiyil kurutu, muvu ni muvu nzal yidandamedin kujip piswimp tutikit tutan twa an.—Tal shapitre wa 9 mu buku Chom Ik Chakin Kamu Chifundishinay Bibil?
8. Tunan twa mivu twa winyikel wa muntu twamekeshin ik?
8 Antu akangeny kupwish uyimp. Yitenchik yiney ya mangand ya chipolitik, ya winsak, ni ya chirelijon yikangeny kuyiletin antu chisambu chiswiridinau, mapit, ni ukash wa mujimbu. Mulong akangeny kupwish milong yijim yikwetau antu katat, yitenchik yiney yiyiwejidin kand mar makwau. Chakin kamu, tunan twa mivu twa winyikel wa muntu tumekeshin uyakin wa mazu manam: “Kwikil muntu umwing ukutwisha kurijek yom yikumanay kurutu. Kwikil muntu ukutwisha kutakel mwom wend amwinend.” (Yer. 10:23) Mwawiy, ‘muntu umuyikedil mukwau muntu mulong wa kumumesh mar.’ (Mul. 8:9) Chikwau, yom “yawonsu yatangau yikat kukimuk ni kwakam mu kusansan pamwing.”—Rome 8:22.
9. Mwikadil ik uchingejinau in Kristu kuman mu “machuku [minam] ma kwisudiel”?
9 Piur pa chisu chetu, Bibil wasambela kulond anch: “mu machuku ma kwisudiel anch masej piswimp, kukez kez yom yikash.” Kupwa kwa kurumburil mwikadil wa machuku ma kwisudiel wa winyikel wa antu, uprofet ulondil anch: “antu ayimp ni in makasu akukudil mu kuyip ni mu kujiyip nakash” (Tang 2 Timote 3:1-5, 13.) Yawiy yichingejinau in Kristu, mulong “ngand ya kabuj yidi mu chikas cha Satan.” (1 Yoh. 5:19) Chawiy, rusangu ruwamp ridi anch, Nzamb ukuyipandish antu amukatina. Akuyipandish ku mangand minam, mayila swa-swa ku uyimp.
Musul Umwing Kusu wa Dipandish wa Kuchingejin
10. Ov, mulong wak Yehova ndiy kusu musul wa kuchingejin mulong wa dipandish?
10 Paulejena rusangu ruwamp, lejan anch Yehova ndiy kusu musul wa kuchingejin mulong wa dipandish. Ndiy umwing ukweta dikand ni rusot ra kuyipandish atushalapol end ku mwikadil win wawonsu uyimp. (Mid. 4:24, 31; Kubur. 4:11) Tukutwish kwikal ni kashinsh anch Yehova ukez chisu chawonsu kuyipandish antu end ni kuwanyish jintong jend, mulong ndiy wachipa anch: “Mwawiy, mudi munatenchika kal kusal, mwamu muchikeza kikal.” Mazu mend “kimakutwishap kukangany yom yatenchikay kal.”—Tang Isay 14:24, 25; 55:10, 11.
11, 12. Nzamb uyishidilamu ik atushalapol end?
11 Yehova washilamu kal anch ukez kuyipandish atushalapol end pakezay kuyirumburish antu ayimp. Pamutumay muprofet Yeremiy akayileja akayitil akash, Nzamb wamwela anch: “Kangal wayov wom.” Mulong wak? “Mulong am nidi ni yeyey, nikukuchidij.” (Yer. 1:8) Chilik chimwing, padingay Yehova piswimp ni kushesh mal mayimp ma Sodom ni Gomora, wayituma angel aad akamubudisha Lot ni dijuku diend mu mwab winou. “Chad [Yehova] wanakisha mayal makweta kasu, mapidilau anch sufre, pa musumb wa Sodom ni wa Gomora.”—Dis. 19:15, 24, 25.
12 Ap mu mangand mawonsu, Yehova ukutwish kuyipandish antu asadila rusot rend. Pasheshay mangand mayimp ma pasak nich Mabeb, ndiy “wamupandisha Nowa mwin kurumburil yom yitentamina, pamwing nau antu akwau sambwad.” (2 Pita 2:5) Yehova ukez kand kuyipandish antu atentamina pakezay kushesh mangand mayimp. Dizu diend dilondin anch: “Chirikany kudi [Yehova], en antu witudishinanya . . . Ziyilany ayinen, usalany yom yitentamina . . . chakwel ap wez wakwasanikany ku kadimu kakulejanay.” (Sof. 2:3) Mudi chibudikin cha kusheshik cha mangand, “antu atentamina akez kaswan ngand, ni antu akashinsh akez kashakamamu, pakwez antu ayimp akez kayidiosh mwingand.”—Jinsw. 2:21, 22.
13. Mutapu ik ukezay Yehova kuyipandish atushalapol end afa kal?
13 Pakwez, atushalapol avud a Nzamb afa kal ni mayej, kuyizengol, ni yom yikwau. (Mat. 24:9) Mutapu ik lel mukezau kuyipandish? Mudi mwachisambinangau kwiur oku, “kukez kikal disanguk ni kudi ayingila ni kudi afila nich.” (Mid. 24:15) Chongojin mudi ik pa kwijik anch kwikil chom ap chimwing chikeza kumukangesh Nzamb kuyipandish atushalapol end.
Winyikel Utentamina
14. Ov, mulong wak twitiyijin anch Want wa Nzamb udi winyikel utentamina?
14 Mu mujikit wey, ukutwish kurumburil anch Want wa mwiur wa Yehova udi winyikel utentamina. Chidi mwamu mulong umekeshin ngikadil yipandakena kuwap ya Nzamb, mudi kutentam, ni rukat. (Kuch. 32:4; 1 Yoh. 4:8) Nzamb wamwinkisha kal Yesu Kristu Want, ndiy uwanyishina nawamp yitinau chakwel ayikela mangand. Yehova watenchika kand anch in Kristu azizidilau many 144 000 ayidiosha pa mangand ni ayitwala mu mwom wa mwiur ikal mudi answan pamwing ni Kristu mu kutakel milong ya mangand.—Kubur. 14:1-5.
15. Lejan kushalijan kudia pakach pa Want wa Nzamb ni winyikel wa antu.
15 Kushalijan kujim mudi ik kukeza kwikal pakach pa winyikel wa Yesu ni a 144 000 ni wa antu akad kuwanyin! Anyikel a ditenchik dined dia yom yisu yivud ading in chisum ni akat kuyitwal antu ayikedilau mu jinjit, kwawiy kukata kuyishikij ku kufa kwa tutikit twa antu. Chidiap cha kushimok anch Mifund yituyudil anch kangal twamuchingejin mwan a muntu, ‘wakad kutwish kukwash.’! (Kus. 146:3) Yom yikez kwikal yiwamp mudi ik mu winyikel wa Kristu! Yesu walonda anch: “Ezany kwen kudi am en awonsu ukata kusalany mudimu ni ukwetany yisend yilimina, am nikuninkishany kwiswedish. Itwikany mpand yam, ungiyiyany am; mulong yam nitudishila ni kwikepishil mu muchim; ni en ukez kutanany kwipimish mipim yen. Mulong mpand yam yiwanyidin, ni chisend cham chipipel.”—Mat. 11:28-30.
Machuku ma Kwisudiel Makupwa Kurutu Oku!
16. Mutapu ik makeza kupwa machuku ma kwisudiel?
16 Mangand manam madi mu machuku ma kwisudiel, ap anch “kwisudiel kwa mangand,” kudiosh mu muvu wa 1914. (Mat. 24:3) Kurutu oku, chatazukay Yesu anch “mar mapandakena” chikushiken. (Tang Mateu 24:21.) Mar minam makad kwisikesh makujiyish mangand ma Satan. Mar mapandakenamu makusambish nchik? Ni makupwa nchik?
17. Chom ik chilejenay Bibil mudi chikeza kushiken kwinsambishil ya mar mapandakenamu?
17 Mar mapandakena makusambish kapamp kamwing. Inge, “dichuku dia Mwant” dikez kwez pakad kuchingejin “Pachikulondau anch, chisambu ni zo-ong.” (Tang 1 Tesalonik 5:2, 3.) Mar mapandakena mabwakau makusambish piyikeza michid kutongin anch yidi piswimp ni kupwish yimwing ya milong yau yijim. Disheshik dia “Babilon mujim” want ujim wa difukwil dia makasu, dikushiken kapamp kamwing. Ant ni antu akwau akez kushimok pakezau kumurumburish Babilon mujim.—Kubur. 17:1-6, 18; 18:9, 10, 15, 16, 19.
18. Yehova ukusal nchik anch Satan wayirishish antu End?
18 Pa chisu chikash cha mar mapandakena, kukez kwik “Yijingidij yikez kikadil ku muten ni ngond ni atutumbu,” ni “chijingidij cha Mwan a muntu mwiur.” Ni tukez chad ‘kutal, ni kudjindul mitu yetu mwiur; mulong kukol kwetu kwez kal piswimp.’ (Luka 21:25-28; Mat. 24:29, 30) Satan, ap anch Gog, ukuyirishish antu a Nzamb. Pakwez piur pa kuyirishish atushalapol ashinshamena a Nzamb, Yehova ulondil anch: “Mwawonsu ukeza kukukwatany watau kal pa dis.” (Zak. 2:8) Pakwez, kusot kwa kuyishesh kudi Satan kukutwishikap. Mulong wak? Mulong Mwant Mwin Mangand Yehova ukusal kapamp kamwing chom chakwel kuyipandish atushalapol end.—Ezek. 38:9, 18.
19. Chom ik chitwinkina kashinsh anch amasalay a Nzamb akez kushesh ditenchik dia Satan?
19 Nzamb pakurishikishay michid, ‘akez kwijik anch ndiy Yehova.’ (Ezek. 36:23) Ndiy ukez kuyitum amasalay end—tutikit twa antu a muspiritu akutakelay Kristu Yesu—chakwel kushesh yishadilaku yawonsu ya ditenchik dia Satan pa mangand. (Kubur. 19:11-19) Anch twavurik anch wasadila mwangel umwing kusu mu uchuku umwing “wayijipa antu tunan chitot makum chinan ni atan” akankuny a Nzamb, tukwikal ni kashinsh anch amasalay a mwiur akez chiswapela kushesh yishadilaku yawonsu ya dirijek dia Satan pa mangand pakushikena mar majim pa Armagedon. (2 Ant 19:35, NW; Kubur. 16:14, 16) Satan ni ayilembil akez kuyikas mulong wa mivu kanan. Kupwa, akez kayishesh.—Kubur. 20:1-3.
20. Yom ik yikusalay Yehova kusutin ku Want?
20 Mangand akez kumakomb ni mukwikalap uyimp, ni antu atentamina akushakam chikupu pa mangand minam. Yehova ukez kwimekesh mudi Mupandish Mujim. (Kus. 145:20) Kusutil ku Want, ndiy ukez katumbish ukaleng wend, kutumbish dijin diend, ni kuwanyish rutong rend mulong wa divu. Ukutwish kwikal ni musangar mu mudimu wey wa kulejan piulejena rusangu ruwamp riner ni kuyikwash antu adia “mu mwikadil ufanyidina kutambul mwom wa chikupu” kujingunin anch dipandish dia Want wa Nzamb didi piswimp!—Mid. 13:48.
[Chipich chidia pa paj wa 12]
Dizu dia Nzamb diasambela kulondil piur pa mudimu ujim wa kulejan wa pa chisu chetu wakad wa kwisikesh nich
[Chipich chidia pa paj wa 15]
Mudi Yehova mwayipandishay Nowa ni dijuku diend, Ukutwish watupandish niyetu
[Chipich chidia pa paj wa 16]
Yehova “ukez kayikuswol mansoj . . . kukez kikalip kand rufu.”—Kub. 21:4