Mutapu Wa Manangu Wa Kupwish Mulong

ANSAND asatu a mu Centre Afrique asota kuya ku chitentam cha distrik mwi ngand yau. Mutapu ik ukushikau kwinikwa? Kwadinga piswimp ku makilometre 90, ni mwi njil mutupukin rufunfut, ni kadingap nich mutapu wa kufut motak. Akwata chiyul cha kusondam jinking jisatu pakwez katwishap kutan jinking jikash.

Mukurump umwing wadinga mu chikumangen wajingunina mulong wau ni wayinkisha nking yend yimwing—yikur pakwez yendin kamu. Wayirumburila mutapu ndiy ni akwau mwasalangau pasak chakwel aya ku chitentam. Mukurump wayileja asadila nking yimwing awonsu asatu. Mutapu umwing uswapela, pakwez ukash. Ov, mutapu ik ukutwisha antu asatu kusadil nking yimwing mu weny?

Chakwel kwipuk kuswan wa muten, ansand inay alanka pa mbwidid akas mafund mau kwi nking. Umwing wakandamap waya kurutu, ni akwau aad amulondul ni endil nakash. Kupwa kwa metre 500, wadia pa nking wiman ni wazek nking ku mutond. Chakin kamu, ukusal anch ateka nking payimenau kudi akwau chakwel muntu windjing kangal eza “ayiya.” Wasambela kukandam pa nking katat ukudandamen ra pansh.

Anch in aad ashala kwinyim ashik padia nking, umwing wakandamap ni owu mukwau ukudandamen ra pansh mametre 500 tupamp tusatu kurutu chikala chisu chendend kukandam pa nking. Chawiy nich kutenchik kuwamp ni kukwat mupak, awonsu asatu atwisha pa kwend makilometre 90 ra pansh, enda makilometre 40 ra pansh. Chayita usu ukash. Akumangana pamwing ni akadivar ni anambaz nau in Kristu ku chitentam ni kusanger musambu wa muspiritu. (Kuvur. 31:12) Ov, ukez kusal yawonsu yiukutwisha kusal muvu unou, chakwel ukakumangana ku chitentam chen cha distrik mwi ngand yen?