Dizu dia Yehova Didi Diom
Manans Majim ma Buku wa in Rome
PISWIMP mu muvu wa 56 C.C., padingay mu weny wend wa umishoner wa kasatu, kambuy Paul weza ku musumb wa Korint. Washikena ku kwijik kupwitijan kwa yitongijok yadingau nich in Kristu in Yuda ni in Michid adinga mu Rome. Wasota kuyichirish mu uumwing mu Kristu, Paul wakwata mupak wa kuyifundin mukand.
Mu mukand winou wayifundinay in Rome, Paul urumburil mutapu ushikedinau antu kukwikal atentamina ni mutapu ufanyidinau kushakam antu inay. Mukand winou utulejin ronganyin rijim ra Nzamb ni Dizu diend, ukasikeshidin pa ranaken ra Nzamb, ni utumbishin mwaz wa Kristu mu dipandish dietu.—Heb. 4:12.
MUTAPU IK—UKATA KUMUYINGISHIL?
(Rome 1:1–11:36)
Paul ufundin anch: “Antu awonsu asala yitil, kawanyidinip ku uyaj wa Nzamb; tukat kwiyingishil ku ranaken rend mudi kupan kwend, ni mu kwikodil kwa mu Yesu Kristu.” Paul walonda kand anch: “Muntu akat kumuyingishil ku ritiy, kangal ku yisalijok ya yijil.” (Rome 3:23, 24, 28) Kusutil ku ritiy “ku kwiyingish,” awonsu in Kristu azizidilau many ni yid ya “chisak chipandikena kujimb” cha “amikoku akwau” akutwish ‘iyingishil’—kudi azizidilau many mulong wa mwom wa mwiur mudi answan pamwing ni Kristu ni kudi amikoku akwau mudi arund a Nzamb, nich ruchingej ra kez kupand “mar makash.”—Rome 5:18; Kubur. 7:9, 14; Yoh. 10:16; Yak. 2:21-24; Mat. 25:46.
Paul wipwil anch: “Komb tukusal kwetu yitil, anch mulong kitudiap kwetu mwishin mwa yijil pakwez mwishin mwa ranaken?” Chad wakul anch: “Chakapul chaya mwa!” Paul urumburil anch: “En udiany atushalapol . . . , a chitil, ku rufu, ap a kuziyil, ku kutentam.” (Rome 6:15, 16) Ndiy ulondil anch: “Anch wajipany chaku cha mujimbu ku usu wa [s]piritu ukwikalany aom.”.—Rome 8:13.
Yakul ku Yipul Yipwilau Piur pa Bibil:
Rome 1:24-32—Kwijond kwisambidinau pinap kudi kwa in Yuda bil anch kwa in Michid? Ap anch kurumburil kwinoku kudi piur pa antu indjing, Paul wadinga wisambidin pakampwil piur pa in Isarel a pakur. Ap anch adinga ij mbil yitentamina ya Nzamb, amulika “Nzamb kushakam mu ronganyin rau.” Chawiy chifilau nich kamu.
Rome 3:24, 25—Ov, mutapu ik “kwikodil kwa mu Kristu Yesu” kujimangeshin “yitil yasalau pasak” kurutu akufuta? Uprofet wa kusambish piur pa Mesia, wafundau mu Disambishil 3:15, wawanyina mu muvu wa 33 C.C. pamujipinau Yesu pa mutond wa mar. (Gal. 3:13, 16) Pakwez, pa chisu chalonday Yehova ya uprofet winou, usey wa difut wadinga ku mes kwend mudi afuta kal, mulong kwadingap chom chikutwisha kumukangesh Nzamb kuwanyish jitong jend. Chawiy lel, kwengamin pa difut dia Yesu Kristu diadinga dichidi kurutu, Yehova ukutwish kuyilikishin an a Adam akeza kusadish ritiy rau mu kushilamu kwinoku yitil yau. Difut ditwishishin kand kuvumbuk kwa antu adingaku kurutu kwa Ukristu.—Midimu 24:15.
Rome 6:3-5—Chirumburikin ik kubabatishiu mu Yesu Kristu ni kubabatishiu mu rufu rend? Chisu Yehova chayizizinay in kwilej a Kristu many ma spiritu, ayinunga pamwing ni Yesu ni ikala yid ya chikumangen chidia mujimbu wa Kristu, ni ndiy udi Mutu wach. (1 Kor. 12:12, 13, 27; Kol. 1:18) Diawiy dined dirumburikina dibabatish diau mu Kristu Yesu. In Kristu azizidilau many akat ‘kubabatishiu mu rufu ra [Kristu]’ charumburik anch ashich ni mwom wa kwipan ni wa kulik ruchingej rin rawonsu ra kushakam chikupu pa divu. Chawiy lel, rufu rau, ridi ra kwipan, mudi mwafay Yesu, ap anch rufu rau ridiap ra usey wa difut. Kubabatishiu kwinoku mu rufu ra Kristu kukat kuwanyin pafilingau ni ayivumbul chakwel aya mwiur.
Rome 7:8-11—Mutapu ik ‘yijidik yachikisha chitil usu’? Chijil chayikwasha antu ajingunina ditenchik diawonsu nawamp, ap anch chilik, cha chitil, chayishikija antu ku kwijik nawamp anch adi akayitil. Chawiy lel, imana ayinau anch adi akayitil mu jinjil jivud kushalijan, antu avud ijikana anch adi akayitil. Chitwishikin lel kulond anch Chijil chawiy chapana usu ku chitil.
Malejan Kudi Etu:
Rome 1:14, 15. Tukwet mayingishin mavud ma kulejen nich rusangu ruwamp nich mushiku. Dimwing dia mayingishin minam didi anch tukwet yikal ya antu alandau nich mash ma Yesu ni tukwet chisend cha kuyikwash muspiritu.
Rome 1:18-20. Antu akad Nzamb ni akad kutentam “kakwetip cha kwiyingish nich,” mulong ngikadil ya Nzamb wakad kumekan ku mes yimekedin patok mu yom yatangay.
Rome 2:28; 3:1, 2; 7:6, 7. Mazu ma Paul madia piur ap makutwish movikan mudi ma kuyiswingish in Yuda. Mazu minam chilakej kudi etu mad makupwish nich milong ya usey nich kubabal ni nkeu.
Rome 3:4. Pimakata mazu ma muntu kupwitijan nich yilondilay Nzamb mu Dizu diend, tukat kumulik “Nzamb ikal mwin yakin” kusutil ku kuchingejin uruu udia mu Bibil ni kusal kukwatijan nich rusot ra Nzamb. Kusutil ku kulejan nich mushiku mudimu wa Want ni wa kuyikadish in kwilej, tukutwish kuyikwash antu amana anch Nzamb udi mwin yakin.
Rome 4:9-12. Abraham amuchinda kwikal mwin kutentam mulong wa ritiy rend kudiosh pasak kurutu kandikal amutwala ku mukand pawanyishay mivu 99. (Dis. 12:4; 15:6; 16:3; 17:1, 9, 10) Mwi njil yiney ya usu, Nzamb wamuleja chamwikadisha utentamina kudi ndiy.
Rome 4:18. Ruchingej ridi chikunku cha usey ujim cha ritiy—ritiy retu rengamidin pa ruchingej.—Heb. 11:1.
Rome 5:18, 19. Kusutil ku kurumburil kwend nawamp anch Yesu umufaniken Adam, Paul warumburila nawamp mu wiswimp mutapu ukutwishay muntu umwing “kupan kupand kwend kuyikingiluku avud.” (Mat. 20:28) Kurumburil nawamp ni mu wiswimp yidi mitapu yiwamp ya kulejan nich yitufanyidina kwimburij.—1 Kor. 4:17.
Rome 7:23. Yid yiney ya mujimbu mudi makas metu, mend metu, rudim retu yikutwish ‘kutwandjik mu uswik wa chijil cha yitil,’ chawiy tufanyidin kudimukin mutapu wa kuyisadil.
Rome 8:26, 27. Piturishina nich mikadil yikash-yikash yitwakad kwijik chom ik tufanyidina kulembil, “ukat kutulembidil etu.” Kupwa Yehova, “ukat[a] kutesh kulembil,” ukat kwitiyij malembil mafanyidina madia mu Dizu diend mudi anch yetu ayinetu tumalembidila.—Kus. 65:2.
Rome 8:38, 39. Yishiken ya mar, yitang ya muspiritu yiyimp, ni mawinyikel ma antu kiyikutwishap kumukangesh Yehova kutukat; ni kiyikutwishap kutukangesh kumukat.
Rome 9:22-28; 11:1, 5, 17-26. Uprofet uvud piur pa kuchirishiu kwa Isarel wawanyina ku chikumangen cha in Kristu azizidilau many, yid ya antu “atazukay amwing a pakach petu adi in Yuda, akwau adi in michid yikwau.”
Rome 10:10, 13, 14. Pamwing nich kumukat Nzamb ni ambay netu antu, ritiy rikash mudiay Yehova ni mu yakushilamu yend yikutwish kutukasikesh tusala nakash mu mujikit wa Ukristu.
Rome 11:16-24, 33. “Kuwap ni muchim ukash wa Nzamb” kwiliken nawamp mudi ik! Inge, “Diyal, mudimu wend uwanyidin, mulong jinjil jend jawonsu jidi jakin.”—Kuv. 32:4.
KUSHAKAM KUKWATIJAN NICH KWIKAL UYINGISHINAU
(Rome 12:1–16:27)
Paul ulondil anch: “Chawiy, anamakwam in Kristu, mulong Nzamb watwovidil kal riy rijim, nakwilembilany kal, ipanany ayinen kudi Nzamb kwikal mudi yakupesh yikweta mwom, yidia yitumbila ya kumusangarish ndiy.” (Rome 12:1, MM) “Chawiy,” ap anch kulondulijan nich uyakin ulejena anch in Kristu ayitazukin anch atentamin mulong wa ritiy rau, yilondwilaku yifanyidin kwikal nich usu pa mutapu wau wa kuyiman ayinau, akwau, ni anyikel a guvernema.
Paul ufundin anch: “muntu wawonsu udia pakach pen, kichiwapidilip itongang amwinend yom ya piur, yakad kufanyin kutong.” “Rukat rikal rakad rubabek,” mwauy mwayulay. (Rome 12:3, 9) “Muntu wawonsu ikala mu kuziyil kudi akata kuyikel piur pend.” (Rome 13:1) Piur pa milong yitadila kom ka muntu, wayikasikesha in Kristu anch ‘kangal warumburishijanany.’—Rom. 14:13.
Yakul ku Yipul Yipwilau Piur pa Bibil:
Rome 12:20—Ov, mutapu ik tukata kusosimwin “makal ma kasu” pa mutu wa mukakuny netu? Mu yirung ya Bibil, mavu makweta dipit adinga ni kumatek mu ruteng ra kasu chad atekanga makal pansh ni piur. Kasu kakash piur kadinga ni kukwash chakwel kusangunin chikung kuchauril nich yishoshot. Chilik chimwing, tukat kusosimwin makal ma kasu pa mutu wa mukankuny kusutil ku kumusadil yom yiwamp chakwel anch kuchinchik kwend kusangunik ni ngikadil yiwamp yikwikalaku.
Rome 12:21—Mutapu ik tukata ‘kupandikan tuyimp nich kuwap’? Mwi njil yimwing mutukutwisha kusadil mwamu yidi kulamat ba-a ku mudimu wetu watwinkishay Nzamb wa kulejan rusangu ruwamp wa Want djat ni pakumenay Yehova amwinend anch twauwanyish kal.—Marko 13:10.
Rome 13:1—Mwi njil ik mudiau akata kuyikel piur pa jindond jau “ching [ku] usu wa Nzamb”? Anyikel a chiuntu adi pa jindond jau “ching [ku] usu wa Nzamb” charumburik anch Nzamb ndiy ulikina anch ikalaku, ni mu jinjil jimwing Nzamb wasambela kuman winyikel wau. Chom chinech chimekedin patok kusutil ku yilondilay Bibil piur pa in kuyikel avud.
Malejan Kudi Etu:
Rome 12:17, 19. Kwifundakesh kuyip ku kuyip chid chom chitufanyidina kulikin mu makas ma Yehova. Chikwikal kwitutul mudi ik ku mutapu wetu kwifundakeshin ayinetu “kuyip ku kuyip”!
Rome 14:14, 15. Kitufanyidinap twamwinkish mukadivar yakudia ap ya kuna yikumunenganesha ap kumupwakesh.
Rome 14:17. Kwitiyik kudi Nzamb kwengamidinap pa yidilay ap yininay muntu ap pa yilikinay kudia ni kuna. Pakwez, kwengamidin pa kutentam, chisambu, ni musangar.
Rome 15:7. Tufanyidin kuyak pakad katond antu awonsu akin asotina uyakin kusutil mu chikumangen ni kuyilej antu in awonsu tutanina uruu wa Want.
[Chipich chidia pa paj wa 31]
Ov, chitwishikin kusadil difut piur pa yitil yasalau kurutu kwa kukufut?