Yipul Ya In Kutang

Kambuy Paul walonda anch “in Isarel awonsu akez kapand.” (Rome 11:26) Ov, wasota kulond anch dichuku dimwing in Yuda awonsu akez kwikal in Kristu?

Bwat, kimwawiyap mwasotay Paul kulond. Mudi muchind, an a Abraham amulika Yesu mudi Mesia. Ni mu mivu yalondulaku rufu ra Yesu, chamekana patok anch in Yuda kakezap kukarumuk ikal awonsu in Kristu. Pakwez, mazu ma Paul malonday anch “in Isarel awonsu akez kapand” madi makin. Mwi njil ik?

Yesu wayileja antakel a relijon a in Yuda a dichuku diend anch: “Want wa Nzamb akez kaudiosh kudi en, akez kaupan kudi muchid ukata kusong mabuj mau.” (Mat. 21:43) Mulong muchid wa Isarel wawonsu wa kambuj wamulika Yesu, Yehova wakarumukina ku muchid ukwau usu, wa muspiritu. Paul wawutazuka muchid winou anch “Isarel wa Nzamb.”—Gal. 6:16.

Maverse makwau madia mu Mifund ya Grek ya Ukristu malejen anch “Isarel wa Nzamb” udi wa in Kristu azizidilau many 144 000. (Rome 8:15-17; Kubur. 7:4) Mu chisak chinech mudi akamichid ni achilejen mwamu mu Kuburik 5:9, 10, ulejena anch in Kristu inay azizidilay many adi “a majuku mawonsu, ni jindim, . . . ni michid.” Yid ya Isarel wa muspiritu ayitonda bil chakwel ikala “ant ni in kupesh . . . ; awiy aswanyin kal pansh.” Ap anch Yehova wamulika Isarel mudi muchid watonday, muntu umwing umwing ukutwish wichakwish ni Nzamb. Mwamu chadinga ku mutambu wa atwimbuy ni kudi in Kristu avud a kusambish. Chakin kamu, in Yuda inay, mudi antu akwau awonsu, chafanyidina kuyiland nich mash ma Yesu Kristu.—1 Tim. 2:5, 6; Heb. 2:9; 1 Pita 1:17-19.

Uyakin ulejena anch in Yuda avud a ku mujimbu a mu mivu chitot ya kusambish ashadisha mutapu wau wa kwikal ant answan pamwing ni Yesu kwasheshap rutong ra Nzamb. Chom chinech chelap kusadik ap pakemp win, mulong Yehova walonda kusutil kudi muprofet wend anch: “Mwamu mukeza kikal kand mazu mam, kimakutwishap kukangany yom yinatenchika kal. Mazu mam makez kasal yom yawonsu mudi munalonda.”—Isay 55:11.

Chidi chakin rutong ra Nzamb ridi ra kuyikadish a 144 000 answan pamwing ni Mwan end mwiur. Bibil wovikeshin patok anch Nzamb ukez kuyizizin many a 144 000 awonsu. Kwikil ap umwing wau ukeza kuburen!—Kubur. 14:1-5.

Chawiy lel, pafunday Paul anch “in Isarel awonsu akez kapand,” kadingap ni kubwak anch kwez kukarumuk kwa in Yuda awonsu ikala in Kristu. Pakwez, wadinga usotil kulond anch rutong ra Nzamb ra kwikal nau in Isarel a muspiritu 144 000 chakwel ayikel pamwing ni Mwan End, Yesu Kristu, mwiur kukez kuwanyin. Pa chisu chatenchikay kal Nzamb, uvud wawonsu wa—“in Isarel”—ukez kwikal mu mwikadil wa kupand, ni kushiken mu kuyikel mudi ant ni in kupesh mu Want wa Mesia.—Efes. 2:8.

[Chipich chidia pa paj wa 28]

Azizidilau many a “a majuku mawonsu, ni jindim, . . . ni michid.”